ދުނިޔޭގައި މިހާރު ތަޢާރަފު ކުރަމުންދާ 5 ޖީ ނެޓްވޯކަކީ މޫސުން ދިރާސާކުރުމުގެ މަސައްކަތަށް އޮތް ހުރަހެއް ކަމަށް ސައިންސްވެރިންނާއި، މޫސުމާއި ބެހޭ ތަޖުރިބާކާރުން ބުނެފިއެވެ.

ޒަމާން ބަދަލުވެ، ޓެކްނޮލޮޖީގެ ރޮނގުން ދުނިޔެ ކުރިއަރަމުން ދާއިރު، މޯބައިލް ފޯނުތަކަށް ބޭނުންވާ ނެޓްވޯކް ތަކުގެ ދުވެލި ވެސް މިވަނީ އަވަސްވެފައެވެ. 1 ޖީ ނެޓްވޯކުން ފެށި މި ދަތުރު މިހާރު މިވަނީ 5 ޖީ އާއި އަރާ ހަމަވެފައެވެ. ނަމަވެސް، އިންސާނުންގެ ލާބަ އާއި، މަންފާއަށްޓަކައި އީޖާދުކުރާ މިފަދަ މޮޅެތި އުފެއްދުންތަކުން ލިބޭ ފަސޭހަ އާއި އެއްވަރަށް ކުރިމަތިވާ އުނދަގޫތައް ވެސް ވަކި ކުޑައެއްނޫނެވެ.

އެމެރިކާގެ ސައިންސްވެރިންނާއި، މޫސުމާއި ބެހޭ ތަޖުރިބާކާރުން ހާމަކޮށްފައިވާ ގޮތުގައި 5 ޖީ ނެޓްވޯކުގެ ސިގްނަލްތަކުގެ ސަބަބުން މޫސުން ދިރާސާކުރާ ސެޓްލައިޓުތަކުން ފޮނުވާ މަޢުލޫމާތުތައް ސައްޚަ ނުވުމުގެ ބިރު ވަރަށް ބޮޑެވެ. އެހެންކަމުން މޫސުން ކުރިއަށް ލަފާކުރުމުގައި ބޮޑެތި ގޮންޖެހުންތައް ކުރިމަތިވާނެއެވެ. އަދި މިކަމުގެ ސަބަބުން އިންސާނުންގެ ދިރިއުޅުން ވަރަށް ބޮޑު ނުރައްކަލެއްގެ ތެރެއަށް ހުށަހެޅިގެން ދާނެކަމަށް ވެސް މޫސުމާއި ބެހޭ ތަޖުރިބާކާރުން ބުނެފައިވެއެވެ.

މޫސުން ދިރާސާކުރާ ސެޓްލައިޓުތައް މެދުވެރިކޮށް ތޫފާންތަކާއި، އެފަދަ ނުރައްކާތެރި އެހެން މޫސުމީ ކާރިސާތައް ކުރިއާލައި ދެނެގަނެވެއެވެ. އޭގެ ސަބަބުން އެފަދަ ކަންކަމުން ސަލާމަތްވުމަށްޓަކައި ދުރާލާ ރައްކާތެރިކަމުގެ ފިޔަވަޅުތައް އެޅުމަށް ފުރުސަތު ލިބިގެންދެއެވެ. ކަނޑުދަތުރުފަތުރު ކުރިޔަސް، އިމާރާތް ކުރުމުގެ މަސައްކަތެއް ކުރިޔަސް، ނޫންނަމަ އަތިރިމަތީގައި ކައިވެނީގެ ހަފުލާ އެއް ބާއްވާލަން ބޭނުންވިޔަސް އެންމެ ފުރަތަަމަ ވެސް ބަލަން މި ޖެހެނީ މޫސުން ކުރިއަށް ލަފާކުރާ ގޮތަށެވެ. ސަބަބަކީ މިފަދަ ކަންތައްތަކަކީ މޫސުން ގޯސްވެއްޖެނަމަ ކުރަން އުނދަގޫ ނުވަތަ ނުކުރޭވެނެ ކަންކަމަށް ވަތީއެވެ. މި ނޫނަސް އިންސާނުންގެ ދިރިއުޅުމާއި ގުޅިފައިވާ އެތައް ކަމެއް ރާވައި ހިންގަން ޖެހެނީ މޫސުމަށް ބަލައިގެންނޭ ބުނުމަކީ ދޮގަކަށް ނުވާނެއެވެ. އެހެންކަމުން މޫސުން ދިރާސާކުރާ ފަރާތްތަކުން ކުރަމުންދާ މިފަދަ މުހިންމު މަސައްކަތަށް ގޮންޖެހުންތައް ކުރިމަތިވުމަކީ ގައިމުވެސް އެކަމުގެ ނޭދެވޭ އަސަރު އިންސާނުންގެ ދިރިއުޅުމަށް ކުރާނެ ކަމެކެވެ.

ދުނިޔޭގެ 40 އަށް ވުރެން ގިނަ ގައުމުތަކުގައި 5 ޖީ ނެޓްވޯކު ތަޢާރަފުކޮށްފައި ވާއިރު، 2034 ވަނަ އަހަރާއި ހަމައަށް ދާއިރު މި ސިނާއަތުގެ އަގު 565 ބިލިއަން އެމެރިކާ ޑޮލަރަށް އަރާނެކަމަށް ތަޖުރިބާކާރުން ބުނެފައިވެއެވެ. ކަންމިހެން ހުރުމާއެކު، ދުނިޔޭގެ ޓެކްނޮލޮޖީ ކުންފުނިތަކުން މިކަމަށް ދުލެއް ނުދޭނެކަމަށް ޚަބަރުތައް ބުނެއެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: