| MUNIAVAS

ދެކުނުގެ ރަށަކަށް ނިސްބަތްވާ އެ ދެމަފިރިން، ބޮޑުގެއާއި އުފާވެރި ދިރިއުޅުން ދޫކޮށް ޖަލެއް ފަދަ ދިރިއުޅުމަށް ބަދަލުވީ އަސާސީ ޚިދުމަތްތައް ލިބޭނެ، ފަހި އެހެން ގޮތެއް ނެތިގެންނެވެ. ކޮންމެ ހާލެއްގައި ވެސް ދަރިންނަށް ރަނގަޅު ތަރުބިއްޔައްތެއް ދެވިއްޖެ ނަމަ މާދަމާގެ މުސްތަގްބަލް އުޖާލާވާނެ ކަމުގެ ފޮނި އުންމީދުގަ އެވެ.

މާލެއަށް ހިޖުރަކުރުމާ އެކު ފައިސާ ހޯދޭނޭ މަގުތައް ވެސް ތަނަވަސްވެ އެވެ. ދަރިންނަށް ފުރިހަމަ ތައުލީމު ދިނުމުގެ މަސައްކަތް ވެސް ކުރެވެ އެވެ. އަމިއްލަ ރަށުގައި ނުދެކޭ ފަދަ ތަރައްގީ އާއި ތަހުޒީބު ވެސް ފެނެ އެވެ. އެހެނަސް، ކިތަންމެ ފޮނި އުންމީދެއްގައި ދިރިއުޅުން ބަދަލުކުރި ނަމަވެސް ބަދަލު ނުވާ ހާލަތެއް އޮވެއެވެ. އެއީ ދިރިއުޅޭ ތަނުގެ ހާލަތެވެ. ދުވާލުދާ ހަތަރުދަމު ދެމަފިރިން މަސައްކަތްކޮށްގެން ލިބޭ ލާރި ދަނީ ގޭ ކުށްޔަށެވެ. ހަނޑުލާއި ހަކުރުގެ އަގު މައްޗަށް ޖެހުނަސް ކުއްޔައްދޭ ފަރާތުން އެބައި ފޫބެއްދުމުގެ ގޮތުން ހަތިޔާރަކަށް ހަދަނީ ގޭ ކުއްޔެވެ.

މުއްސަދިންނާއި ފަގީރުންގެ ފަރަގު ކުޑަކުރުމުގެ ބޭނުމުގައި ކަމަށް ބުނެ، ރައްޔިތުންގެ މަޖިލީހުން ދާދި ފަހުން ފާސް ކުރުމުން މިހާރު ތަސްދީގުކޮށްފައިވާ އިންކަމްޓެކްސް ނެގުމުގެ ގާނޫނާއެކު، މިހާރު އަނެއްކާވެސް ފެން މަތިވެގެން މި ދިޔައީ އެބައި ފޫބެއްދުމަށް އަސާސީ ބޭނުންތަކަށް މާލޭގައި ކުއްޔަށް އުޅޭ ނިކަމެތި ރައްޔިތުމީހާގެ އަތުން އިތުރަށް ގޭގެ ކުލި ނަގާވާހަކައެވެ.

އަނެއްކާވެސް މޮޅު ނަމެއްގައި ވެރިން ފޮނުވާލި ވަޒަން އައިސް މިއެރީ ހަމަ އެއްކަލަ ގޮތެއް ނެތިފައި މާދަމާގެ މުސްތަގްބަލް އުޖާލާކުރުމުގެ ފޮނި އުންމީދުގައި، މާލެ އައިސް ހުރި އެއްކަލަ ނިކަމެތި ރައްޔިތުމީހާގެ ގަޔަކަށް ނޫންތޯއެވެ. އަތްނުފޯރާ ހިސާބުގައި އޮތް ވެރިރަށް މާލޭގެ ބޮޑުކުލި ޤާނޫނަކުން ކޮންޓްރޯލް ކޮށްދިނުމަށް އެދި ނިކަމަތި ރައްޔިތުމީހާ އާދޭސް ކުރަމުން ދުވެދުވެ ހުއްޓާ އަނެއްކާވެސް އިންކަމްޓެކްސާއެކު އެއްކަލަ ކުލި މިވީ ބޮޑެވެ.

“އިންކަމްޓެކްސް ނެގީމަވެސް ގެއްލުން މިވަނީ ހަމަ އަޅުގަނޑުމެން ނިކަމެތި ރައްޔިތުންނަށް، މިވެސް ދައްކަން މިޖެހުނީ ހަމަ އަޅުގަނޑުމެންގެ ޖީބުން. ކުލި ކޮންޓްރޯލް ނުކުރެވޭއިރު މިގޮތަށް އަމަލުކުރާ މީހުންނާއި މެދު ފިޔަވަޅު އަޅަންޖެހޭ.” މާލޭގައި ކުއްޔަށް އުޅޭ ދެކުނުގެ ރަށަކަށް ނިސްބަތްވާ ޒުވާނަކު ބުންޏެވެ.

ކާޑުގެ ބާވަތްތައް ވިއްކާނެ ވަކި އަގަކާއި ޓެކްސީ ފަދަ ޚިދުމަތްތައް ދޭނެ ވަކި އަގެއް ގަވައިދުން ކަނޑައެޅޭ އިރު އެންމެ ތުއްތު ކުއްޖާއިން ފެށިގެން ގޮސް އެންމެ އުމުރުން ދުވަސްވީ މީހާއާ ހަމައަށް، އެންމެންނާ ގުޅިފައިވާ ބޯހިޔާވަހިކަމަށް އެފަދަ ގަވައިދެއް ތަންފީޒު މިވަނީ ނުކުރެވި އެވެ.

އިންކަމް ޓެކްސްގެ އެ ގާނޫނުގައިވާ ގޮތުން މަހަކު 60،000 ރުފިޔާ އާއި 100،000 ރުފިޔާއާ ދެމެދުގެ އާމްދަނީ ލިބޭ މީހުން އެ އަދަދުގެ 5.5 ޕަސެންޓް ފައިސާ ދައުލަަތައް ދައްކަން ޖެހެ އެވެ. އަދި 100،000 ރުފިޔާއާއި 150،000 ރުފިޔާއާ މެދުގެ އާމްދަނީން އަށް ޕަސެންޓް ނަގާނެ އެވެ.

މި އާއެކު މާލޭގެ ގެ ވެރިން އެބައި ފޫބެއްދުމަށް ޝިކާރައަކަށް ނިކަމަތި ރައްޔިތުމީހާ ހެދުމާއެކު އެފަދަ ކަން ކަމަށް ކަމާބެހޭފަރާތް ތަކުން ފިޔަވަޅު އަޅަން ޖެހޭނެ ކަމަށް ގިނަ ރައްޔިތުން ގަބޫލުކުރެއެވެ.