ޖޯކު ޖަހާމީހުން ޖޯކު ޖެހިޔަސް، ހޭ މީހުން ހީނ ހެދިޔަސް ފަރުވާލެއް ނެތެވެ. އަހަރެންގެ މި ލިޔުން ފަށާނީ ފިލްމީ ދާާއިރާާއަށް، އަދި ވަކިން ޚާއްޞަކޮށް ދިވެހި ފިލްމީ މަސައްކަތަަކަށް އަހަރެންގެ ހުންނަ ޝައުޤުވެރިކަން ހާމަކުރުމަށް، 1990 ގެ އަހަރުތަކުގެ ތެރެއަށް ފީނާާލަމުންނެވެ.

އެއީ ހަވީރެއްގެ ވަގުތެވެ. އޭރު އަހަރެން މާލޭގައި ހުރި ގޭގެ ދައްތަ ބުނެގެން ހަވީރު ސަޔަށް ހެދިކާ ގަންނަން ނިކުމެގެން ހެދިކާ ވިއްކާާ ގެއާއި ދިމާއަށް ހިނގައިގަތީ މާފަންނު ޤަބުރުސްތާނުގެ ފުރަގަހުން އޮންނަ މަގުންނެވެ. އެހެން ހިނގަމުން ދަނިކޮށް ފެނުނީ އަހަރެން އެކަމެއް ކައިރިން ބަލައިލުމަށް ކެތްމަދުވެފައިވާ ކަމެއް ކުރަން ބަޔަކު އުޅެނިކޮށްނެވެ. ފިލްމެއްގެ ޝޫޓިންގ އެއް ޖައްސައިގެން ފިލްމުކުޅޭ ބަޔަކު، މާފަންނު ހަނީކޯމްބް ގޭގައި ހުންނަ ވޯރްކްޝޮޕް ކުރިމަތީގައި އުޅޭތަނެވެ. އެހިސާބަށް އަރާ ހަމަވުމާއެކު އެތަނުން ފެނުނީ ދިވެހި ފިލުމު ލޭކަރުނައިންނާއި އިތުބާާރުން ދިވެހި ފިލްމީ އޯޑިއަންސަށް އެއްމެ ފަރިތަ އެއް މޫނެވެ. އަލްފާޟިލް އަލްމަރްޙޫމް އަޙްމަދު ޝަރުމީލްއެވެ. އަހަރެން ގެއިން ނިކުތް ބޭނުންވެސް ހަނދާން ނެތުނު ކަހަލައެވެ. މަގުގެ އަނެއް ފަރާތުގައި ވޯކްޝޮޕް ކުރިމަތީގައި ނަގަމުންދިޔަ ޝޫޓިން ބަލަން ކަމާ ކަންފަށާ ހުއްޓުނީމެވެ. އެހެން ހުރިއިރު ފެނުނު ސީންއަކީ ޝަރުމީލް ކޮންމެވެސް ފިކުރެއްގައި ހުރެ ފުރޮޅެއް ބައިސްކަލެއްގައި އެޅުވުމަށް ޝިފްޓަރަކުން ބާރުކުރަމުންދަނިކޮށް ކުއްލިއަކަށް އަތުން ދޫވެގެން ޝިފްޓަރު ވެއްޓޭ މަންޒަރެވެ. ޑައިރެކްޓަރު އެކްޝަންއަށް ގޮވާލާ ކޮންމެ ފަހަރަކު ހަމަ އެއް ކަމެއް އެތައް ފަހަރަކު ޝަރުމީލު ތަކުރާރު ކުރަމުންދިޔަތަން ފެނުނެވެ. އެއްވެސް ފޫހިކަމެއް ވަރުބަލިކަމެއް ނެތިއެވެ. ހަމަ ގައިމުވެސް ދިވެހި ފިލްމު ވަރީގެ އެ ކުޑަކުޑަ ސީން، ޑައިރެކްޓަރު ބޭނުންވާާ ފެންވަރަށް ނެގުމަށް އެތައް ފަހަރަކު ޖެއްސިތަން ފެނިގެން ދިޔައެވެ.

މި ދެންނެވީ އޭރުގެ ވާހަކައެވެ. ދިވެހި ފަންނާނުންވެސް އެމީހުންގެ އުފެއްދުންތައް އުފެއްދުމަށް ވަރަށް ބުރަ މަސައްކަތްތަކެއް އަބަދުވެސް ކުރެއެވެ. އަޅުގަނޑުގެ އަސްލު މަޢުޟޫއަށް އެނބުރިލަމުން ދައްކަންއޮތީވެސް އަޅުގަނޑަށް ފެނި ތަޖުރިބާާ ކުރެވުނު ކަމެއްގެ ވާހަކައެކެވެ. އެއީވެސް އަޅުގަނޑު އެ ދުވަހަކާއި ހަމައަށް ދެކެމުން އައި ހުވަފެނެއް ޙަޤީޤަތަކަށްވި ދުވަހެކެވެ. ފިލްމެއް އެޑިޓް ކުރުމުގެ މަސައްކަތް ކުރަމުންދާގޮތް އަމިއްލަ ލޮލުން ދެކިލައި ތަޖްރިބާ ކޮށްލުމަށް ފަހި ފުރުޞަތެއް ލިބިގެންދިޔަ ދުވަހަކަަށް އެދުވަސް ވީތީއެވެ.
އެއީ ނިމިދިޔަ 2015 ވަނަ އަހަރުގެ އޮގަސްޓް މަހުގެ 13 ވަނަ ދުވަހުގެ ރެއެވެ. އަޅުގަނޑުގެ ލިޔުންތެރިކަމުގެ މި ފިރުކެމުންދާ ދުވަސްވަރުގައި ލިބުނު އެއްމެ ބޮޑު ހިތްހަމަޖެހުމާއިވެސް ގުޅުންހުރި ކަމަކެވެ. އަޅުގަނޑު ލިޔުނު ފިލްމު ސްކްރިޕްޓެއްގެ މައްޗަށް ރާއްޖޭގެ އެއްމެ ފުންނާބު އުސް ސްކްރީން ރައިޓަރ މަޙްދީ އަޙްމަދު ލިޔެފައިވާ ސްކްރީން ޕްލޭއަކަށް ތައްޔާރުކުރި ދިވެހި ފިލްމް ‘މިކޮއެ ބައްޕަ ބައޭ ބައޭ’ ރިލީޒްކުރެވުނު ޚާއްޞަ ރެއަކީވެސް އެރެ އެވެ. އެރޭ ‘މިކޮއެ ބައްޕަ ބައޭ ބައޭ’ ޕްރޮޑިއުސް ކޮށްފައިވާ ރާއްޖޭގައި މިވަގުތު ހަރަކާާތްތެރިވަމުން އަންނަ އެއްމެ ކާމިޔާާބު ޕްރޮޑަކްޝަން ހައުސްގެ ވެރިޔާ މުޙައްމަދު ޢަލީ މޮގަރ އާއި ފިލްމުގެ ކެމެރާ އަދި އެޑިޓިންގ މަސައްކަތްކުރި ޢަލީ ޝިފާޢު ޗިއްޕެއާއި ފުރަތަމަ ދިމާވި ރެއެވެ. ކޮންމެއަކަސް މޮގަރ އާއި އެއްމެ ފުރަތަމަ ދިމާވީ އޮލިމްޕަސް ތެރެއިން ވަރަށް ހަނި ފުރުޞަތެއްގައެވެ. ނަމަވެސް އޭގެ ދެތިން މަހެއް ފަހުން އަޅުގަނޑަށް ލިބިގެންދިޔަ ޚާއްޞަ އުފާާވެރި ފުރުޞަތަކީ ޑާރްކް ރެއިން އެންޓަރޓެއިންމެންޓް ސްޓޫޑިއޯ އިން މޮގަރ އަދި ޗިއްޕެ އާއި ބައްދަލު ބައްދަލުވުމެވެ. ވަކިން ޚާއްޞަކޮށް މި އަހަރު އޭޕްރީލް 5 ގައި ރިލީޒް ކުރުމަށް ކުޑަތަންވެފައިވާ ދިވެހި ކޮމެޑީ ފިލްމު ‘ވާށޭ މަށާ އެކީ’ ގެ އެޑިޓް ނުކޮށް ހުރި އެތައް ވީޑިއޯތަކެއް ފެނި، އެ ވީޑިއޯ ކްލިޕްތައް އެޑިޓިންގ ޓޭބަލްގައި އަތުރާލައި ވަރަށް ފަރުވާތެރިކަމާއެކު މޮގަރ ގެ އިރުޝާދާވެސް އެކު ޗިއްޕެ އެޑިޓް ކުރުމުގެ މަސައްކަތް ކުރިތަން ކައިރިން ފެނިގެން ދިއުންވީ ލިބުނު ވަރަށް ބޮޑު އުފަލަކަށެވެ.

އެދުވަހު މި ފުޞަތު ލިބިގެންދިޔައީ އިއްތިފާޤަކުންނެވެ. އެދުވަހު އަޅުގަނޑު ރަށަށް އަންނަން އޮތް ފްލައިޓް މިސްވެގެން އަލުން އަނބުރާ މާލެއަށް އައިސް މާލޭގައި ދެތިން ހަތަރުވަރަކަށް ގަޑިއިރު މަޑުކުރަން ޖެހުމުން ބައެއް ރައްޓެހިންނަށް ގުޅާލީމެވެ. ނަމަވެސް ކޮންމެ މީހަކުވެސް އުޅޭލެތް ވަދިކަމުން (ބިޒީކަމުން) ދިމާާކޮށްލެވޭނެ ގޮތެއް ނުވިއެވެ. އެވަގުތު އަހަރެންގެ ހަނދާނަށް އައީ އެދުވަހު ހެނދުނު ޑާރކް ރެއިން އެންޓަރޓެއިންމެންޓް ސްޓޫޑިއޯއަށް ގޮސް މޮގަރ އާއި އެކު ވާހަކަދައްކާލަން އިނދެވުނު ކުޑަ ވަގުތުކޮޅުގައިވެސް ގާތް ރައްޓެއްސަކާާއެކު މުޢާމަލާތު ކުރާ ބީދައިން މުޢާމަލާތު ކުރަމުންގޮސް އެދުވަހު ހަވީރަށް ‘ވާށޭ މަށާ އެކީ’ ގެ ޝޫޓިންގ އެއް ޝެޑިއުލް ކޮށްފައިވާ ކަމަށް މޮގަރ ބުނި ހަނދާނެއެވެ. އެ ހަނދާާންވެގެން ވަގުތުން މޮގަރއަށް ގުޅީމެވެ. ހަމަ ގުޅާލިއިރަށް މޮގަރ ފޯނުވެސް ނެގިއެވެ. އަހަރެން ވެގެން އުޅޭގޮތް ކިޔައިދީފައި ފިލްމު ޝޫޓިންގ ބަލައިލަން ދާން ބޭނުން ވާާހަކަ ބުނީމެވެ. އެވަގުތު މޮގަރ ބުނީ ޝެޑިއުލްއަށް އައި ބަދަލަކާާއި ގުޅިގެން އެވަގުތު މޮގަރ އިނީ ސްޓޫޑިއޯގައި ޗިއްޕެއާާއެކު ‘ވާށޭ މަށާ އެކީ’ ގެ އެޑިޓިންގ ގައި ކަމަށެވެ. އަދި ބޭނުމިއްޔާ ސްޓޫޑިއޯއަށް އައިސް މަޑުކޮށްލަން އަންނަންވީ ނޫންހޭ ބުންޏެވެ. އަހަރެން އާާނއެކޭ ބުނެފައި ފޯނު ކަނޑާލާފަ އަމިއްލަ ނަފުސާ މުޚާޠަބްކޮށް ހޭވައްލާ ތައްޔާާރޭ، މިއޮތީ އަޅާ ދަމާފައޭވެސް ބުނީމެވެ.

ކޮންމެއަކަށް ސްޓޫޑިއޯއަށް ވަނުމާއެކު ހީވީ ޚުދު އަހަރެންވެސް އެތަނެއްގައި އެތައް ދުވަހަކު އެކުގައި މަސައްކަތްކޮށްފައިވާ ދެ މީހަކާާއި ދިމާވިހެންނެވެ. ރާއްޖޭގައި ފިލްމު އުފެއްދުމުގެ މަސައްކަތުގައި އުޅޭ ބައެއް ފަރާތްތަކުން އެފެންނަފަދަ ބޮޑާކަމާއި ފޮނިކަމެއް، މަބޮޑޭ ކަމުގެ ކުޑަވެސް ކުލަވަރެއް މޮގަރ އާއި ޗިއްޕެގެ ފަރާތަކުން ނުފެނެއެވެ. ފިލްމާއި ވީޑިއޯ އުފެއްދުމާއި ވާހަކަ ލިޔުމާާއި ފިލްމް ސްކްރިޕްޓް ލިޔުމުގެ މަސައްކަތުގައި އަހަރެން ކޮށްފައިވާ ކަންތައްތަކާއި ކުރަމުން އަންނަ ކަންކަމުގެ ވާހަކަތައް ކިޔައިދިންއިރު އެ ދެމީހުންވެސް ތިބީ ނުހަނު ޝަޢުޤާއި އެކު އަޑުއަހަންކަން އަހަންނަށް އެނގުނެވެ. އަހަރެންގެ ވާހަކަތައް އަޑުއަހައި ނިމިގެން އެމީހުންގެ މަސައްކަތްތަކުގެ ވާހަކައާއި އެޑިޓް ކުރަމުންދިޔަ ފިލްމުގެ ވާހަކަތައް ކިޔައިދިނެވެ.

އަހަރެން އެ ސްޓޫޑިއޯއަށް ވަތްއިރު ޗިއްޕެ އެޑިޓްކުރަން އިނީ އައިޖީއެމް އެޗްގައި ނަގާާފައިވާ މަންޒަރެކެވެ. ފިލްމުގެ މައިގަނޑު ހަތަރު ކާސްޓުން ތިބީ ޑޮކްޓަރެއްގެ ކައިރީގައި ވާާހަކަތަކެއް ދައްކާށެވެ. އެމީހުން ދައްކަމުންދިޔަ ވާހަކަތައް އިވިފައި އަހަރެންގެ ހިނިގަނޑު ފަޅައިގެން ދިޔައީ އެއްމެ ފަހަރަކު ދެފަހަރަކު ނޫނެވެ. އެ މަންޒަރު ފެނިފައި އަހަރެންގެ ހިތަށް އެރީ އިނގިރޭސި ކޮމެޑީ ސީރީސް ފްރެންޑްސް އިން ފެންނަ ފަދަ ހިއުމަރ އެއްގެ މަތިންނެވެ. އެކްޓަރުން ސޭކް ހެދިގެން އަވަގުރާާނައެއް ނުގޮވައެވެ. އަޅާފައިތިބީ ޖޯކަރުން ލާކަހަލަ ހެދުމެއްވެސް ނޫނެވެ. އެހެނަސް 3 ގަޑިއިރުވަންދެން އަހަރެން އެ ސްޓޫޑިއޯގައި ހޭދަކުރި ވަގުތުގައި ފެނިގެންދިޔަ މި ފިލްމުގެ ދެތިން މަންޒަރުންވެސް މިއީ ފައްކާ ލޯބީގެ ކޮމެޑީއަކަށް ވާާނެ ފިލްމެއްކަން ފިލްމީ މަސައްކަތަށް ލޯބިކުރާާ މީހެއްގެ ހައިސިއްޔަތުންނާާއި ފިލްމު ބެލުންތެރިއެއްގެ ހައްސިއްޔަތުން އިޙްސާސް ކުރެވުނެވެ.

‘ވާށޭ މަށާ އެކީ’ ގެ އެޑިޓިންގ މަސައްކަތް ޢަލީ ޝިފާޢު ޗިއްޕެ ކުރަމުން ގެންދިޔައީ ވަރަށް ފަރުވާާތެރިކަމާާއި އެކުގައެވެ. ހަމަ އެއްމެ މަންޒަރެއް އޭގެ އެއްމެ ފުރިހަމަ ގޮތުގައި ގެނެސްދިނުމަށްޓަކައި ހަމަ ގައިމުވެސް ގަޑި ދެގަޑިއިރު ޗިއްޕެ ހޭދަކުރިތަން އަހަންނަށް ފެނިގެން ދިޔައެވެ. ޗިއްޕެ ކުރަމުންދިޔަ މަސައްކަތަކީ އެކްޓަރުން ސީންއެއްގައި އެތައް ބައިވަރު ފަހަރަކު އެއްމެ މަންޒަރެއް ތަކުރާރު ކުރުމަށްވުރެން ވަކިން ކުޑަ މަސައްކަތެއް ނޫނެވެ. އެކްޓަރުން ކޮށްފައިވާ ހުރިހައި އެކްޓެއް ބަލައި، އެއްމެ ކަމުދާ މަންޒަރުތައް ވާހަކައިގެ ތަރުތީބުން އަތުރާލުމަކީ އެކަން ކުރާ މީހަކަށް ނޫނީ އިޙްސާސްކޮށްލަން ދަތިވާނެ ކަމެކެވެ.

ޙަޤީޤަތުގައި ރާއްޖޭގެ ފިލްމި ސިނާޢަތުން އަހަރެން ދެކެން ބޭނުންވާފަދަ އޮއްޓަރުހުރި ކޮލިޓީ އުފެއްދުންތަކެއް ގެނެސްދޭ ހަމައެކަނި ބަޔަކީ ޑާރކް ރެއިން އެންޓަރޓެއިންމެންޓް ކަމަށް ބުނަން ކެރިދާނެއެވެ. ޗިއްޕެ ހިއްސާވެގެން ހެދި އެއްމެ ފުރަތަމަ ދިވެހި ފިލްމު ‘ހޭލާާ’ ބަލައިފައި އޮލިމްޕަހުން ނިކުމެ އަޅުގަނޑު ހިތަށްއެރީ ދިވެހި ފިލްމަކަށް ވާފަދަ މޮޅު ފިލްމެއް އަދި ކިރިޔާ މި ފެނުނީ ކަމަށެވެ. މި ފިލްމު އެކަންޏެއް ނޫނެވެ. ޑާރކް ރެއިންގެ ފުރާޅު ދޮށުން ނިކުންނަ ކޮންމެ މަސައްކަތެއްވެސް އަހަރެން ޤަބޫލުކުރާގޮތުން ވަރަށް ކޮލިޓީއެވެ. ހެޕީ ބާތު ޑޭ، އެއްމެ ފަހު ވިންދާ ޖެހެންދެން އަދި މިކޮއެ ބައްޕަ ބައޭ ބައޭ އަކީވެސް ތަފާތު މޮޅު ކަންތައްތަކެއް ހިމެނިފައިވާާ ތަފާާތު ފިލްމު ތަކެކެވެ.

މޮގަރ އަކީ ފިލްމީ މަސައްކަތަށް، ފިލްމީ ދާއިރާ ކިހާާވަރެއްގެ ޑެޑިކޭޓެޑް މީހެއްކަން އެނގޭނީ މޮގަރ އާއި ބައްދަލުވެ ވާގަހަދައްކާާލުމުންކަމަށް ވިޔަސް، މި ދާއިރާގެ ކުރިއެރުމަށް މޮގަރ ގެ ހުންނަ ޝައުޤުވެރިކަން ޑާރކް ރެއިން އެންޓަރޓެއިންމެންޓް ފިލްމުތަކުގެ ކޮލިޓީއަށް ވިސްނާލިޔަސް އެނގޭނެއެވެ.

ކޮޮންމެއަކަސް ތިން ގަޑިއެއްހައި އިރު އެފިލްމެއް އެޑިޓް ކުރުމުގެ މަސައްކަތް ބަލައިލެވުނު ދިވެހި ފިލްމު ‘ވާށޭ މަށާ އެކީ’ ބަލައިލުމަށް ހަމަ ގައިމުވެސް އަހަރެން މިހުރީ ކެތްމަދުވެފައެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: