އެކުވެރިކަމާ އެއްބައިވަންތަކަމުގައި ދިވެހިންވަނީ މުޅި ދުނިޔެއަށްވެސް ނަމޫނާ ބަޔަކަަށްވެފައެވެ. އެކަކު ކުރާ ހިތާމައެއްގައި އަނެކަކު ބައިވެރިވަނީ ލޮލުން ބޮލުންނެވެ. އެކުވެރިކަމާއި އެއްބައިވަންތަކަން ދިވެހިންގެ މެދުގައި އޮތްވަރަކީ މިއަދުގެ ޖީލަށް ހިތަށްވެސް ނުގެނެވޭނެ ފަދަ ކަމެކެވެ. ރޯދަ މަހުގައި އަވައްޓެރިންނަށް ހާރުކާން ގޮވުމާއި އަވަށްޓެރި އެންމެން ތިބީ ހާރު ކައިގެންތޯ ބެލުމަކީ އެންމެ ރެޔެއްވެސް ވައްޓައިނުލައި ކުރިކަމެކެވެ. ރޯދަ ވިއްލާ ގަޑިއަށް ތަށިބަރި ބެހުމާއި، މަސްކައްކާ ރިހާކުރު ތައްޔާރު ކުރުމަށް އަވަށްޓެރިން އެކުވެލާފައި އުޅޭއިރު އެފެންނަ އުފާވެރި މަންޒަރު ހަނދާން ވުމުން އަދިވެސް ހިނި އާދެއެވެ.

ޒަމާން ބަދަލުވެ، މިތުރުން ހަތުރުންނަށްވެ، ދުނިޔެ ބަވަނަ ވެފައިވާއިރު އެ އެކުވެރިކަން ދިވެހިންގެ ތެރޭގައި މިހާރު ފެންނާކަށް ނެތެވެ. އެހެންނަމަވެސް ގަބޫލު ކުރަންޖެހޭ ހަގީގަތަކީ، މިއަދުވެސް އެކަކު އަނެކަކު އެހީތެރިކަމަށް ބޭނުންވެއްޖެ ނަމަ އަދިވެސް ހަމަ އެކުވެރިކަން ފެނިގެން ދެއެވެ. 

މާލޭގެ އަބަދަށްފެހި މަގުގައި ދާދި ފަހުން ހިނގައި ދިޔަ އަލިފާނުގެ ހާދިސާގައި ހާލުގައި ޖެހުނު މީހުންނަށް އެހީވުމަށް އަރުވާ ޖަހާލާފައި ނުކުތް ދިވެހިން ފެނި ދެލޮލުން އުފާވެރި ކަމުގެ ކަރުނަ ހިލުނެވެ. 

2015 ވަނަަ އަހަރު އަނިޔާވެރި ގޮތަކަށް މަރާލާފައި އޮއްވާ ފެނުނު އުމުރުން 2  އަހަރުގެ އިބްތިހާލްއަށް އިންސާފު ހޯދައިދޭން މުޅި ރާއްޖެ ނުކުތެވެ. ކުޑަކުދިންނަށް އަނިޔާދޭ މީހުންނަށް ބޮޑެތި އަދަބުދީ އިބްތިހާލްއަށް އިންސާފު ހޯދައިދިނުމަށް ވަރުވަރުން ޕެޓިޝަންތައް ހެދި އެވެ. 

ދީނަށް ފަުރައްސާރަކޮށް މޯލްޑިވިއަން ޑިމޮކްރަސީ ނެޓްވޯކު ކިޔާ ޖަމްއިއްޔާއަކުން ރިޕޯޓެއްނެރެ ދިވެހިންގެ ލޭ ކައްކުވާލީވެސް ހަމަ ދާދި މިދާކަށް ދުވަހުއެވެ. އެޔާއެކު ޖަމްއިއްޔާގެ އިސްވެރިން ހައްޔަރުކޮށް ތަހުގީގު ހިނގަން ރާއްޖޭގެ ހުރިހާ ރަށެއްގައި މުޒާހަރާކޮށް ގޮވަންފެށިއެވެ. އެޔާއެކު ސަރުކާރުން އެ ޖަމްއިއްޔާވަނީ އުވާލާފައެވެ. 

އެންމެފަހުން މިދިޔަ ހަފްތާގައި އުމުރުން 2 އަހަރު ނުވާ މައުސޫމް ތުއްތު ކުއްޖެއް ރޭޕްކޮށް ދިވެހިންގެ ލޭކައްކުވާލީ އަމަށަކުވަރަކަށްނޫނެވެ. އެންމެފަހުން ރޭޕްގެ ތުހުމަތު އެޅުނު މީހުން ރަށްރަށަށް އެރުވުމަށް އިންކާރުކޮށް އެމީހުން ގެންނަން ޖެހުނީ މާލެއަށެވެ. 

މިފަދަ ކޮންމެ ހާދިސާއަކީ ދިވެހިން އަދިވެސް ހަނދާން ހުންނާނެ ހާދިސާ އެކެވެ. ދަންނަވަން މިއުޅޭ ވާހަކައަކީ އަލިފާނުގެ ހާދިސާގައި ހާލުގައި ޖެހުނުމީހުން މިއަދު އުޅޭ ހާލެއް އެނގެނީ ކިތައް ދިވެހިންނަށްތޯއެވެ؟ އިބްތިހާލްގެ ޝަރީއަތް ގޮސްފައިވަނީ ކިހާ ހިސާބަކަށް ކަން އެނގެނީ ތިޔައިގެ ތެރެއިން ކިތައް ބޭފުޅުންނަށްތޯއެވެ؟ ދީނަށް ފުރައްސާރަ ކޮށް ރިޕޯޓް ނެރުނު މީހުން މިނިވަންކަންމަތީ މަޖާނަގަން އެބަތިބިކަން އެނގިލައްވާތޯއެވެ؟ ރޭޕް ކޮށް ދިރިއުޅުން ގެއްލުވާލި ކުޑަކުޑަ ދަރިފުޅަށް އިންސާފު ލިބުނީތޯއެވެ؟ 

މިފަދަކޮންމެ މައްސަލައެއް ފެންމަތިވާ ދުވަހު ޖަޒްބާތު ކެކިއަރައިގެން އޮބިނޯންނަ އިރު، ދެތިން ދުވަސް ވާއިރު ޖަޒްބާތު ބޮނޑު ނަގުލަށް ދިޔައީމާ އަސްލު ކަޑަ ދޮގެއްތޯއެވެ؟ އިންސާފު ލިބޭނީ ކެރި ހުރެ އިންސާފު ލިބެންދެން މަސައްކަތް ކުރީމާ ނޫންތޯއެވެ. މައްސަލަ ހިލޭ ދުވަހު ޖަޒްބާތު އުތުރިއަރާވަރަށް އިންސާފު ލިބެންދެން އަޅުގަނޑުމެން ކެތްކުރަން އެބަ ޖެހެއެއް ނޫންތޯއެވެ؟

ލިޔުންތެރިޔާގެ ފުރަމަލަ

އާމިނަތު ސަޒްރާ
މުނިއަވަސްގެ ޑެޕިއުޓީ އެޑިޓަރ ސަޒްރާ އަކީ ކުރިން ރާއްޖެ ޓީވީގައި މަސައްކަތްކޮށްފައިވާ ތަޖުރިބާކާރު ނޫސްވެރިއެކެވެ. މުނިފޫހިފިލުމުގެ ދާއިރާގެ އިތުރުން އިޖުތިމާޢީ ދާއިރާގައިވެސް ސަޒްރާ ޚާއްޞައެވެ.

ގުޅުންހުރި ލިޔުން: