ސްރީ ލަންކާގައި މިހާރު ޝޫޓްކުރަމުން އަންނަ ‘ނިއުޒޯ ފިލްމްސް’ގެ ދެވަނަ ފިލްމު “ކަޅަކި“ގެ 50 އިންސައްތަ ޝޫޓިން ނިމިއްޖެކަމަށް ފިލްމުގެ ޕްރޮޑިއުސަރު ނިއުމާ މުހައްމަދު ބުނެފި އެވެ.

“ކަޅަކި“ގެ ޝޫޓިން ކުރިއަށްދާ މިންވަރާމެދު މުނިއަވަސް އަށް ދިން އޯޑިއޯ ބަސްދީގަތުމެއްގައި ނިޢުމާ ބުނީ 50 ޕަސެންޓް ޝޫޓިން ނިމިފައިވާކަމަށާއި ކުރިއަށްހުރީ ތަންކޮޅެއް ބުރަކޮށް، ރޭގަނޑު ނަގަންޖެހޭ މަންޒަރުތަކެއް ކަމަށްވާތީ މިހާރު އެ މަންޒަރުތައް ނެގުމަށް ތައްޔާރުވަމުން އަންނަ ކަމަށެވެ.

“”ކަޅަކި” ފިލްމުގެ މިހާރު ފިފްޓީ ޕަސެންޓް ޝޫޓްކޮށް މިހާރު ނިމިއްޖެ އިރާދަކުރެއްވިއްޔާމުން. ދެން މިހާރު ކުރިއަށް ހުރީ ތަންކޮޅެއް ހާޑްކޮށް މަސައްކަތްކުރަން ޖެހޭ ރޭގަނޑުގެ މަންޒަރުތަކެއް ވީމަ، ދެން މިހާރު އެ މަންޒަރުތަކަށް ރެޑީވަމުން މި ދަނީ.” ޔޫސުފް ޝަފީއު (ޔޫއްޕެ) ލިޔެ، ޑައިރެކްޓްކުރާ ނިޢުމާގެ ފިލްމު “ކަޅަކި”ގެ ޝޫޓިންގެ ތަފްޞީލްދެމުން ބުންޏެވެ.

“ހީވާގޮތުން މުޅި ފިލްމުގެ ޝޫޓިން ނިންމާލާފަ ފެބްރުއަރީ ސެކަންޑް (02 ފެބްރުއަރީ) ހިސާބުގަ މާލެ ދެވޭނެ ކަމަށް މި ބަލަނީ އިރާދަކުރެއްވިއްޔާމުން.” ފިލްމުގެ ހުރިހާ މަންޒަރުތަކެއް ސްރީ ލަންކާގައި ނަގަން ފިލްމު ކްރޫއާއެކު ލަންކާގައި ހުރެ ނިޢުމާ ބުންޏެވެ.

ކެމެރާގެ ކުރިމަތީގައި ގިނަ ދުވަސްތަކެއް ހޭދަކުރުމަށްފަހު އެކްޓިން އިން ރިޓަޔަރކޮށް އަމިއްލަ ޕްރޮޑަކްޝަން ލޭބަލް ’ނިއުޒޯ ފިލްމްސް‘ އިން ގެނެސްދޭ ފިލްމު “ކަޅަކި“ގެ ކާސްޓުގައި ހިމެނެނީ ޔޫސުފް ޝަފީޢު (ޔޫއްޕެ)، ޢަލީ ސީޒަން، މުޙައްމަދު މަނިކް، ރިޝްފާ، ލަހޫގެ އިތުރުން ޝިޔާ އެވެ.

މި ފިލްމު ކެމެރާކުރަނީ މިހާތަނަށް އެތައް ފިލްމެއް ކެމެރާކޮށްފައިވާ ދަބަ އެވެ. މި ފިލްމުގައި ހިމެނޭނީ ހަމައެކަނި ތީމް ލަވަ އެކަންޏެވެ.

މިމަހު 13 ވަނަ ދުވަހު ޝޫޓިން އަށް ލަންކާއަށް ދިއުމަށްފަހު، ޖެހިގެން އައި ދުވަހު ފިލްމުގެ ޝޫޓިން ފަށައި، ވަރަށް ބާރު ސްޕީޑްގައި ފިލްމުގެ ޝޫޓިން ކުރިއަށްދާކަމަށް މަޢުލޫމާތު ލިބެއެވެ.

ނިޢުމާ ފިލްމީ ހަޔާތުގައި ހޭދަކުރި 25 އަހަރު ފާހަގަކުރުމަށް ބޭއްވި ޚާއްޞަ ހަފުލާގައި “ކަޅަކި“ ލޯންޗްކޮށް ޓީޒާއެއް ދައްކާލާފައި ވާއިރު ހަމަ އެ ހަފުލާގައި ’ނިއުޒޯ ފިލްމްސް‘ އިން ގެނެސްދޭ ”ގޯނާ“ ވެސް ވަނީ ލޯންޗްކޮށްފައެވެ. ފިލްމް ”ގޯނާ“ގެ ޓީޒާއެއްވެސް އެ ހަފުލާގައި ދައްކައިލިއެވެ. މި ފިލްމު ޑައިރެކްޓް ކުރާނީ ހުނަރުވެރި ޑައިރެކްޓަރު ރަވީ ފާރޫޤްކަމަށް ވެސް އެ ހަފުލާގައި ހާމަކުރިއެވެ.

ނިއުމާ ބުނީ ފިލްމު އަޅުވާނެ ތާރީޚެއް އަދި ނިންމާފައި ނުވާކަމަށެވެ.

“ކަޅަކި“ގެ އޮންލައިން މީޑިއާ ޕާޓްނަރަކީ މުނިއަވަސް އެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: