ސައްތައިން ސައްތަ އިސްލާމީ މުޖުތަމައަކަށް މި ގައުމު ވާއިރު އިސްލާމްދީނާ ދިމާ އިދިކޮޅު އަމަލުތައް ދުވަހެއް ދުވަހަކަށް މިދަނީ މިމުޖުތަމައުގައި އިތުރު ވަމުންނެވެ. މިމުޖުތަމައުގައި ދިވެހީން، ޚާއްޞަ ގޮތެއްގައި ކަނބަލުންގެ ހެދުން އެޅުމުގެ ވައްޓަފާޅިއަށް ބަލައިލަމާތޯއެވެ. އިސްލާމީ ރީތި ހިޖާބުން ހިޖާބުވެގެން އުޅޭ ފަރާތްތައް އުޅޭއިރު ނިވާކަން ކުޑަ ގޮތެއްގައި ހެދުން އަޅައި، ދެއްކުންތެރިކަމުގައި މޮޑެލް ކުރަމުންދާ ފަރާތްތައް ނުހަނު ގިނައިން މިފަހަކަށް އައިސް ފެންނަމުންދެއެވެ. ހަމަ އެއާއި އެކު ނަމެއްގައި ބުރުގާ އަޅައިގެން އުޅޭ ފަރާތްތައްވެސް މަދެއްނޫނެވެ.

މިހެން ބުނާތީ، ބުނާ މީހާ ގޯސްވެ އެމީހަކު ސަފުން ބާކީވެދާނެއެވެ. މިއީ އެހެން މީހުންގެ މިނިވަންކަމާ ބެހުން ކަމުގައި މިހާރު ގިނަ ބަޔަކު ދެކިދާނެއެވެ. މާފުކުރާށެވެ. ހިތާމައާ އެކު ދަންނަވަން ޖެހެނީ މިއީ ދިވެހިންގެ ވިސްނުން މިހާރު ހުރި ގޮތެވެ.

ކަމަކަށް ފަހު ކަމެއް ދިވެހިން ބަލައިގަންނަން ފަށައިފިއެވެ. ފަހަރަކު ކަމެއް އެއީ އާދައިގެ ކަމަކަށް ވާން ފަށައިފި އެވެ. ކިތައްކިތައް ކަންތައް ހެއްޔެވެ. އޮންލައިން ޕްލެޓްފޯމް ތަކުން ފަށާނަމެވެ.

އިންސްޓަގްރާމޭ ކިޔުނު އެއްޗެއް ދިވެހިންގެ ތެރެއަށް ތައާރަފުވިއެވެ. ޒަމާނުއްސުރެ އެހެންމީހުންގެ ގޮތް “ކޮޕީ ކުރުމުގެ” އާދަ ހުންނަ ދިވެހިން އިންސްޓަގްރާމުން އެދުރުވާން ފެށިއެވެ. ބޭރުގެ މޮޑެލުންނާ އެކުޓަރުންގެ ގޮތް ފާޑު ފަތުއަޑު ކިޔާފައި ރާޅެއް ހެން ދިވެހިންގެ ތެރެއަށް ބިންދާލިއެވެ. އެހާ ހިސާބުން ދިވެހިން އޮރިޔާންވާން ފެށިއެވެ. އެންމެ ފުރަތަމަ ދިވެހިން އެކަމާ ދެކޮޅު ހެދިއެވެ. މީޑިއާ ތަކުން އެކަމާ ދެކޮޅު ދެތިން ލިޔުމެއް އޭރު ދުށީމެވެ. ނަމަވެސް މަޑުމަޑުން އެކަން ބަދަލުވިއެވެ.

މިހާރު ދިވެހި ނޫސްތަކާ މަޖައްލާ ތަކުގެ ފަލަ ސުރުހީން އެމީހުން ޖާގަ ހޯދައިފިއެވެ. ނޫސްތަކުންނާ މަޖައްލާ ތަކުން އިންސްޓަގްރާމްގައި ޖިސްމު ނީލަން ކިޔަމުންދާ މީހުން އެއީ “މޮޑެލުން” ގޮތުގައި ޕްރޮމޯޓް ކުރަން ފަށައިފިއެވެ. ބޮޑެތި ކުންފުނިތަކުގެ ބްރޭންޑް އެންބެސަޑަރުންގެ ގޮތުގައި އެވެރިން ހަދައިފިއެވެ. ޓީވީ ޝޯތަކަށް އެވެރިން އަރުވާ އެވެރިންގެ ހަޔާތަކީ ދިވެހިންނަށް ނަމޫނާއެއް ކަމުގައި ޕްރޮމޯޓް ކުރަން ފަށައިފިއެވެ. މިއުޒިކާއި ލަވައިގެ ވާހަކަ އިހަށް ބާއްވާށެވެ. މުއިޒިކާއި ލަވައިގެ ނަމުގައި މައިންނާ ދަރިން އެއްތާ ތިބެގެން އަޑުއަހަން ހެޔޮނުވާ ވަރުގެ ބަސްތައް ފަތިފައްޗަށް އަމުނަމުން ދިއުމުން ވެސް ދިވެހިން ތިބީ އެކަން ބަލައިގަނެ އަތްޖަހާށެވެ.

ދެން އޮތީ މިހާރު މަޝްހޫރުވެގެން އުޅޭ “ޓިކް ޓޮކް” ގެ ވާހަކައެވެ. ޓިކްޓޮކް ވުޖޫދަށް އައުމާ އެކު މަންޒަރު ސިފަވެގެން ދިޔައީ ދިވެހިން ތިބީ ބަރަހަނާވެ އިސްލާމީ ރިވެތި އަޚްލާގު ބޮލުކޮޅުން ނަގާ އެއްލާލާނެ ޕްލެޓްފޯމަކަށް ނުހަނު ބޭނުންވެ ކެތްމަދުވެފައި ކަމެވެ.  ހަވާނަފުސުގެ އެދުންތަކަށް ދީލިގެން ގޮސް ހެއްލިގެން ދިޔަލެއް އަވަސްކަން ފެނި ހައިރާން ވަމެވެ.

މުންކަރާތްތަކަށް ދެކޮޅު ހަދާ އެކަން ނަހީކޮށް އިސްލާހުކުރަން މަސައްކަތްނުކުރާ ނަމަ ޤައުމެއް ހަލާކުވެގެން ހިނގައިދާނެއެވެ. ފިޔަވަޅަކަށް ފަހު ވިޔަވަޅެއް ޝައިތާނާގެ ފަސްފަހަތުން ހިންގަމުން ގެއްލި ހިނގައިދާނެއެވެ. މުޖުތަމަޢު އިސްލާހު ކުރުމުގައި އާންމު ފަރުދުންގެ އިތުރުން ނޫސް މަޖައްލާ ތަކުގެ ހިއްސާވެސް ނުހަނު ބޮޑެވެ. އިސްލާހު ކުރުމަށް އެންމެން އެކީގައި މަސައްކަތް ކުރަންޖެހެއެވެ.

ޙަޤީޤަތުގައި މުސްލިމުން މިއަދު ތިބީ ދެ ހަތުރުންގެ މެދުގައި ފިތިފައެވެ. އެއްބަޔަކީ ބޭރުން އަންނަ ހަތުރުންނެވެ. އަނެއް ބަޔަކީ އެތެރޭގެ ހަތުރުންނެވެ. ބޭރުގެ ހަތުރުންނަކީ އިސްލާމްދީނުގެ ވަސް ފުހެލަން މަސައްކަތްކުރާ ބޭރުގެ ބާރުތަކެވެ. އެތެރޭގެ ހަތުރުންނަކީ ޚުދު އެމީހުންގެ ވެރިންނެވެ. ނުވަތަ ސަރުކާރެވެ. އެތެރޭގެ ފިއްތުމާއި، ކޮރަޕްޝަނާއި، ޙައްޤުތަކުން މަޙްރޫމުކުރުން ވަނީ ޢާއްމު ކަންކަމަށް ވެފައެވެ. ނަތީޖާއެއްގެ ގޮތުން ދިވެހިންނަށް ބޭރުގެ ހަރުބީ ކާފަރުންގެ ގޮތް “ސަޅި” ވެއްޖެއެވެ.

ލިޔުންތެރިޔާގެ ފުރަމަލަ

މުޙައްމަދު ރިފާޒް
ރިފާޒަކީ ސަން އޮންލައިން އާއި ޗެނަލް 13 ގައި މަސައްކަތްކޮށްފައިވާ ތަޖުރިބާހުރި ނޫސްވެރިއެކެވެ.

ގުޅުންހުރި ލިޔުން: