ފާތުމަތު ނަހުލާގެ ކާމިޔާބު ވެބް ސީރީޒް “ހުވާ” ގެ ފުރަތަމަ ސީޒަންގެ ބޮޑު ކާމިޔާބީއަށްފަހު، އެ ސީރީޒްގެ ދެވަނަ ސީޒަން މިރޭ (30 ޖެނުއަރީ 2020 ވަނަ ދުވަހުގެރޭ) ދައްކަން ފަށާނެއެވެ.

ސީޒަން އެކެއްގައި ހިމެނޭ މައިގަނޑު ތަރިންގެ އިތުރަށް، އިތުރު ތަރިންތަކެއް ވެސް ހިމަނައިގެން ގެނެސްދޭ “ހުވާ 02″ގެ ކޮންމެ އެޕިސޯޑެއްގައި މިފަހަރު 20 މިނެޓް ހުންނާނެއެވެ.

“ހުވާ 02” ދައްކަން ފެށުމަށް ތައްޔާރުވެފައިވާއިރު، ބައިސްކޯފުން ވަނީ އެ ސީރީޒްގެ ޓްރެއިލަރ އެއް ނެރެފައެވެ. ޝައުޤުވެރިގޮތަށް އޯފް ސްކްރީން ނެރޭޝަންއަކާ އެކު ގެނެސްދީފައިވާ އެ ޓްރެއިލަރ ނިންމާލަމުން ފައިސަލްގެ އަޑުން އިވިގެންދާ ”އަހަރެމެންގެ ދިރިއުޅުމުގެ ހަނގުރާމަތައް އަދި މި ފެށުނީ.“ އިން ”ހުވާ 02“ އަށް ޝައުޤުވެރިވާނެވަރު އަންގައިދެއެވެ.

”ހުވާ 02“ ގެ ފުރަތަމަ އެޕިސޯޑްތައް ޑައިރެކްޓްކޮށްފައިވަނީ މިދިޔަ އަހަރުގެ ފިލްމު އެވޯޑްގައި އެންމެ މޮޅު ޑައިރެކްޓަރ، އެކްޓަރ އަދި ސްކްރީން ރައިޓަރ އެވޯޑް ހޯދާފައިވާ ޔޫސުފް ޝަފީޢު (ޔޫއްޕެ) އެވެ. އެޕިސޯޑްތައް ޑައިރެކްކުރުމުގައި މި ސީރީޒްގެ ސްކްރީން ރައިޓަރ، ޕްރޮޑިއުސަރ އަދި ޑައިރެކްޓަރ ނަހޫގެ އެހީތެރިކަމާއި ފަންނީ ލަފާ ދީފައިވެއެވެ.

ވެބް ސީރީޒް “ހުވާ 02” ގެ މަންޒަރެއް – ފޮޓޯ: ހުވާ ޓީމް

”ހުވާ-02“ ގެނެސްދޭއިރު އާ ތަރިންތަކެއް ފެނިގެންދާނެއެވެ. އެގޮތުން އެންމެ ފާހަގަކޮށްލެވެނީ އައްޒަ (މިންހާ) ގެ ފިރިމީހާގެ ރޯލުން މިފަހަރު ފެނިގެންދާނީ ޢަބްދުﷲ މުއާޒް (މުއާ) އެވެ. މީގެ އިތުރުން އަޙްމަދު އަޒްމީލް (އަޒޭ) ވެސް މި ސީޒަންގެ އެޕިސޯޑުތަކުން ފެނިގެންދާނެއެވެ. މީގެ އިތުރުން ފާހަގަކޮށްލެވޭ އަނެއް މޫނަކީ ފިލްމީ ދާއިރާގައި ހުނަރުވެރި އެކްޓިންއެއް ދައްކަމުން އަންނަ އައިންތު (އައްޒަގެ މަންމަ) ވެސް ވަރުގަދަ ރޯލަކުން ފެނިގެންދާނެ ކަމެވެ. މީގެ އިތުރުން ޓިކް ޓޮކްގެ މަޝްހޫރު ތަރި ޝާއިފް ވެސް މުހިންމު ރޯލަކުން ފެނިގެންދާނެއެވެ.

ވެބް ސީރީޒް “ހުވާ 02” ގެ މަންޒަރެއް – ފޮޓޯ: ހުވާ ޓީމް

ރާއްޖޭގެ ފުރަތަމަ ވެބް ސީރީޒް “ހުވާ” އަށް ދިވެހިންގެ ތެރެއިން ބޮޑު ތަރުޙީބެއް ލިބިފައިވާއިރު، މި ސީރީޒްގެ ދެވަނަ ސީޒަންއަށްވެސް ގިނަ ބެލުންތެރިން ތިބީ ކެތްމަދުވެފައިކަން ޔަގީނެވެ. އިންތިޒާރު ކުރާކަށް އެހައި ގިނަ ވަގުތުތަކެއް ނެތެވެ. މިރޭ “ހުވާ” ދައްކަން ފަށާނެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: