އައި ފިލްމްސްގެ ދެވަނަ ފިލްމު “ނީނާާ”ގެ ޝޫޓިން މިއަދު މާލޭގައި ފަށައިފިއެވެ. ފިލްމުގެ ޑައިރެކްޓަރ އިލްޔާސް ވަހީދު (އިއްލެ) މުނިއަވަސް އަށް ބުނީ ފިލްމުގެ މަންޒަރުތަކުން މާލޭގައި ނަގަންޖެހޭ މަންޒަރުތައް މިއަދު ފަށާފައިވާކަމަށެވެ.
މާލޭގައި ފިލްމުގެ ޝޫޓިން ފެށިޔަސް ފިލްމުގެ ބޮޑުބައި ޝޫޓްކުރަން ނިންމާފައިވަނީ ލ. އަތޮޅުގެ ގުޅާލެވިފައިވާ ރަށްތަކުގައެވެ. އެގޮތުން ފިލްމުގެ ކުދިކުދި ރޯލުތަކުގައި އެ ރަށްތަކަށް ނިސްބަތްވާ މީހުންވެސް ހަރަކާތްތެރިވާނެއެވެ.
ފިލްމު ”ނީނާ”ގެ ކާސްޓަށް ބަލައިލާއިރު، ލީޑްގައި ހަރަކާތްތެރިވަނީ ނުޒުޙަތު ޝުޢައިބް އާއި އަލަށް ތަޢާރަފުކުރާ ޝަރަފް ޢަބްދުﷲ، އަދި ޖުމައްޔިލް ނިމާލް އެވެ. މީގެ އިތުރުން އާދަމް ރިޒްވީ (ރެކްސް)، ހަމްދޫން ފާރޫޤް، ޢަލީ ޔޫޝަޢު އާއި އަލަށް ތަޢާރަފްވާ ނަތާޝާ ޖަލީލް، ޢަލީ އިނާޒް، އަލަށް ތަޢާރަފްވާ އިބްރާހިމް ޝާއިފް (ޑެވިލް ޝާއިފް)، އަލަށް ތަޢާރަފްވާ ޙަސަން ސާމިހް މުޙައްމަދު، ހަސަން ޝިނާން އަދި މަރިޔަމް ޝަކީލާ އާދަމްގެ އިތުރުން އައިޝާ އަލީ ހިމެނެއެވެ.
ތަރިންގެ ލިސްޓަށް މިހާރު ކޮންމެވެސް ބަދަލެއް އައިސްފައިވާއިރު، އިއްލެ ބުނީ އެ ބަދަލު ގެންނަން ޖެހުނީ ތަރިން އެހެން ޝޫޓްތަކުގައި އުޅެންޖެހުމުންކަމަށެވެ.
ފިލްމުގެ މިއުޒިކް ހަދަނީ ހުސައިން ތައުފީގް އެވެ. މޭކަޕް ހަދައިދެނީ ”ބަވަތި“ގައި ފެނިގެންދިޔަ ފުރިހަމަ މޭކަޕްތައް ހެދި އާޓިސްޓް ރުޠުބާ އަޙްމަދު އެވެ.
މި ފިލްމުވެސް ކެމެރާ ކުރަނީ ”ބަވަތި“ ކެމެރާކުރި ހުނަރުވެރި ކެމެރާމަން ވިޝާން (ކަނޑި) އެވެ. އެޑިޓިން އާއި ޕޯސްޓް ޕްރޮޑަކްޝަން ހަދަނީ ”ބަވަތި“ ގައި ވެސް އެ މަސައްކަތްތައް ވަރަށް ފުރިހަމައަށް ކޮށްފައިވާ ’އޯކޭޒް އިންކް‘ އިނެވެ. ވިޝުއަލް ހަދަނީ އޯކޭޒް އިންކް ގެ ސާމީ އެވެ.
ފިލްމުގެ ލަވަތަކުގެ ލިރިކްސް ހެދީ އިލްޔާސް ވަހީދުގެ އިތުރުން މުޙައްމަދު ޢަބްދުލް ޣަނީ (ތޭރަވާ) އެވެ. މި ފިލްމުގައި ހިމެނޭ ލަވަތައް ކިޔައިދީފައިވަނީ އަންޔާ، އަޝްރަފް އަދި ޖައިޝާ އެވެ. ޖައިޝާ އަކީ ފިލްމު “ބަވަތި”ގެ ޓައިޓްލް ލަވަ ކިޔައިދިން ފަންނާނެވެ.
”ނީނާ“ ގައި ނުޒުހަތުގެ ތަފާތު އެކްޓިން އަކާއި ހުނަރެއް ފެނިގެންދާނެކަން ފިލްމަށް ކޮށްފައިވާ ޕްރެކްޓިސްތަކުން އެނގެއެވެ. އެގޮތުން މާޝަލް އާޓްސް މި ފިލްމުން ފެނިގެންދާނެއެވެ. ތަރިންނަށް މާޝަލް އާޓްސް ޓްރެއިނިން ދިނީ ‘ޝިން އަޓަމީ މޯލްޑިވްސް’ އިންނެވެ. ބޮޑީ ޓްރާންސްފޮމޭޝަން ޖައްސައިދިނީ ‘ބާރ ކޮންސެޕްޓް’ގެ ފަރާތުންނެވެ.
ފިލްމުގެ ވާހަކަ އާއި ސްކްރިޕްޓް ލިޔުނީ އިލްޔާސް ވަހީދު އެވެ. އެސިސްޓެންޓް ޑައިރެކްޓަރެއްގެ ގޮތުގައި ހަރަކާތްތެރިވަނީ ”ބަވަތި“ ގެ ލީޑުން ފެނިގެންދިޔަ އަހްމަދު އިފްނާޒް ފިރާގް އެވެ. މި ފިލްމުގެ ވެސް ޕްރޮޑިއުސަރުންނަކީ އާސިމް އަލީ އާއި އަޙްމަދު ވަހީދު އެވެ. މިއީ އިލްޔާސް ވަހީދު ޑައިރެކްޓްކުރާ ދެވަނަ ފީޗާ ފިލްމެވެ.
މުނިއަވަސް އިން އޮންލައިން މީޑިއާ ޕާޓްނަރުކަން ކުރާ ފިލްމު ”ނީނާ“ ރިލީޒްކުރަނީ 2020 ގައެވެ
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
- 18 ޑިސެމްބަރ 2024ޚަބަރުއައިފިލްމްސް އިން ލޯބިން ބުނެލަނީ ” ލޯބިން…؟ ” ކަމަށް!
- 18 ޑިސެމްބަރ 2024ޚަބަރުއައްޒަ ބަލިވެއިންކަމަށް ބުނެ ނަހޫއަށް “ސޮރީ” ބުނެފި
- 18 ޑިސެމްބަރ 2024ޚަބަރު“ސޮރީ” ފަށައިފި – ޑައިރެކްޓްކުރަނީ ނަހޫ އަދި ރަވީ!
