މަޝްހޫރު ފިލްމު ޑައިރެކްޓަރު އަދި އެކްޓަރު ފަރްހާން އަޚްތަރު، ދިވެހިރާއްޖޭގައި ޗުއްޓީ ހޭދަކުރަމުން އެބަގެންދެއެވެ. އޭނާ ޗުއްޓީ ހޭދަކުރަމުން ގެންދަނީ ސޮނެވާ ޖާނީ ރިޒޯޓްގައި ކަމަށް މަޢުލޫމާތު ލިބިފައިވެއެވެ.

ފަރްހާން އަޚްތަރުގެ ޗުއްޓީ ދަތުރާބެހޭ މައުލޫމާތު އޭނާ މީސް މީޑިއާގައި ހިއްސާކޮށްފައި ނުވިޔަސް، ސޮނެވާ ޖާނީގައި ފަރްހާން އާއި އެކު ރާއްޖޭގެ އެކްޓްރެސް އެއްކަމަށްވާ އައިޝާ ނަގާފައިވާ ފޮޓޯއެއް ވަނީ މީސްމީޑިއާގައި އާއްމުވެފައެވެ. އައިޝާ އަކީ މިހާރު ރިޒޯޓް ވަޒީފާގައި ހަރަކާތްތަތެރިވާ ފަރާތެކެވެ.

ފަރްހާންގެ ޗުއްޓީ ނިންމައިލުމަށްފަހު މީގެ ތިން ދުވަސްކުރިން ވަނީ އިންޑިއާއަށް ގޮސްފައެވެ.

“ޑޯން 3″، “ބާގް މީކާ ބާގް.” “ރޮކް އޮން”، “ދިލް ޗާތާ ހޭ” ފަދަ މަޝްހޫރު ފިލްމުތަކުން ފެނިފައިވާ ފަރްހާން އަޚްތަރަކީ މަޝްހޫރު ސްކްރީން ރައިޓަރ ޖާވިދް އަޚްތަރާއި ހަނީ އިރާނީގެ ދަރިފުޅެކެވެ.

ފަރްހާން އަޚްތަރަކީ ފިލްމު ޑައިރެކްޓްކުރުމާއި އެކްޓް ކުރުމުގެ އިތުރުން، ބައްޕަ ފަދައިން މޮޅު ސްކްރީން ރައިޓަރެކެވެ. އޭގެ އިތުރުން އޭނާއަކީ ލަވަކިޔުންތެރިއެއް އަދި ޓީވީ ހޯސްޓެއް ވެސް މެއެވެ.

އެންމެ ފަހުން ފަރްހާން އަޚްތަރު ފެނިފައިވަނީ “ދަ ސްކައި އިޒް ޕިންކް” ފިލްމުގައި ޕްރިޔަންކާ ޗޯޕްޅާ އާއެކުގައެވެ. މި އަހަރު ފަރްޚާންގެ އައު ފިލްމު “ތޫފާން” ރިލީޒްކުރާނީ 02 އޮކްޓޫބަރުގައެވެ. އެ ފިލްމަކީ ރާކޭޝް އޯމް ޕްރަކާޝް މެހެރާ ޑައިރެކްޓްކުރާ ފިލްމެކެވެ. ފިލްމުގައި ފަރްހާން ފެނިގެންދާނީ ޤައުމީ ފެންވަރުގެ ބޮކްސިންތެޅުންތެރިއެއްގެ ގޮތުގައެވެ. އެ ފިލްމުގައި ޕަރޭޝް ރާވަލް، ރޫނަލް ޓާކޫރް އާއި އިޝާ ތަލްވާރް ފަދަ ތަރިން ހަރަކާތްތެރިވާނެއެވެ.

ފަރްހާން ވަނީ އަދުނާ ބަބާނީ އާ 2000 ވަނަ އަހަރު ކައިވެނިކޮށްފަ އެވެ. ނަމަވެސް އެ ކައިވެނި ވަނީ 2016 ގައި ރޫޅިފަ އެވެ. މި ދެ މީހުންނަށް ލިބިފައިވާ ފުރާވަރު ދެ އަންހެންކުދިން ތިބެ އެވެ.

މިއަހަރު ތެރޭގައި ޝިބާނީ ޑަންޑޭކަރް އާއި ފަރްހާން ކައިވެނި ކުރަން މިހާރު ވަނީ ނިންމާފަ އެވެ. މި ކައިވެނި އޮންނާނީ ފަރްހާން މިހާރު ކުޅެމުންދާ “ތޫފާން” ރިލީޒް ކުރުމަށްފަހު މިއަހަރުގެ ފަހުކޮޅުގައެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: