ދިވެހި ފިލްމު އެވޯޑްސް އަށް ފިލްމު ހުށައެޅުމަށް ފުރުޞަތު ހުޅުވާލާފައި ވާއިރު ޕްރޮޑިއުސަރ އަދި ޑައިރެކްޓަރެއްގެ ގޮތުގައިވެސް މަސައްކަތް ކުރަމުން އަންނަ ފިލްމީ ތަރި ޢަލީ ސީޒަން ތިން ފިލްމެއް ބައިވެރިކުރާނެ ކަމަށް ބުނެފި އެވެ. މުނިއަވަސް އަށް ދިން ޚާއްޞަ ބަސްދީގަތުމެއްގައި ސީޒަން ބުނީ ފިލްމު އިންސާނާ، އަހްޝަމް އަދި ވަފާތެރި ކެހިވެރިޔާ ބައިވެރި ކުރާނެ ކަމަށެވެ.

އެވޯޑްގައި ވާދަކުރުމަށް ސީޒަން ހުށައަޅާ ފިލްމު ތަކުގެ ތެރެއިން އިންސާނާ އަދި އަހްޝަމް އަކީ ސީޒަނަލް މޫވީސް އިން އުފައްދާފައިވާ ދެ ފިލްމެވެ. ސީޒަން ބުނީ ވަފާތެރި ކެހިވެރިޔާ އަކީ މުޙައްމަދު ޢަބްދުﷲ (މުހައްމާ) ގެ ދެކެދެކެވެސް ޕްރޮޑަކްޝަންސް އިން އުފައްދާފައިވާ ފިލްމެއް ނަމަވެސް ފިލްމުގެ މަސައްކަތުގައި އުޅުނު މީހެއްގެ ހައިސިއްޔަތުން ދެކެދެކެވެސް ޕްރޮޑަކްޝަން ގެ ފަރާތުން މި ފިލްމު ހުށައަޅަނީ އޭނާ އެވެ.

ސީޒަން ހުށައަޅާ ތިން ފިލްމަށް ބަލާލާއިރު:

1- އިންސާނާ

އިންސާނަ އަށް ވަނީ 2015 ވަނަ އަހަރު ބޭއްވި ސާކް ފިލްމު ފެސްޓިވަލްގައި ބްރޯންޒް މެޑަލް ހޯދާފަ އެވެ. މި ފިލްމްގައި ސީޒަން އާއި ރިޝްމީގެ އިތުރުން ފާތިމަތު ފަރީލާ އަދި އަހްމަދު ސައީދު ވެސް މުހިއްމު ބައިތައް ކުޅެދީފައިވެ އެވެ. ފިލްމު ޑައިރެކްޓް ކޮށްފައިވަނީ އަލީ ސީޒަން އެވެ.

މި ފިލްމުގައި ދައްކުވައި ދެނީ މީހަކު މަރާލުމަށް ފަހު އެ އަނދިރި ކަމުގެ ތެރެއިން ސަލާމަތްވުމަށް ގާތިލު ކުރާ މަސައްކަތެވެ. ފިލްމުގައި ގާތިލުގެ ރޯލު ކުޅެފައި ވަނީ ސީޒަން އެވެ.

މި ފިލްމު ރިލީޒް ކޮށްފައިވަނީ 2014 ވަނަ އަހަރު ސެޕްޓެމްބަރު މަހުގައެވެ.

2- އަހްޝަމް

މިއީ އަލީ ސީޒަން ޑައިރެކްޓްކޮށް ޕްރޮޑިއުސްކޮށް އަދި ލީޑްރޯލް ކުޅެފައިވާ ފިލްމެކެވެ. މި ފިލްމު ރިލީޒް ކޮށްފައިވަނީ 06 ނޮވެމްބަރު 2015 ގައެވެ.

އެސް ޕްރޮޑަކްޝަންސްގެ ފުރަތަމަ ފިލްމް އަހްޝަމްގައި ޒިންމާދާރު ފުލުހެއްގެ މަސައްކަތުގެ އިތުރަށް ސިޔާސީ ބައެއް ހާދިސާތަކާއި، އިންތިހާބުގެ ދުވަސްވަރު ގައުމުގެ ހާލަތު އޮންނަ ގޮތް ވަނީ ދައްކުވައިދީފަ އެވެ.

މި ފިލްމުގެ މުހިއްމު ތަރިންގެ ތެރޭގައި އަލީ ސީޒަން، އާރިފާ އިބްރާހިމް، އައިޝަތު ރިޝްފާގެ އިތުރަށް ޒީނަތު އައްބާސް އަދި އަހްމަދު ސައީދު ހަރަކާތްތެރި ވެފައި ވެއެވެ.

3- ވަފާތެރި ކެހިވެރިޔާ

މިއީ މުހައްމަދު އަބްދުﷲ މުހައްމާގެ ދެކެދެކެވެސް ޕްރޮޑަކްޝަނުން އަހަރު ތަކަކަށްފަހު ހެދި ފިލްމެކެވެ. މި ފިލްމުގައި ހަރަކާތްތެރިވެފައިވަނީ

  • އަލީ ސީޒަން
  • މަލީހާ ވަހީދު (މަލް)
  • ޒީނަތު އައްބާސް
  • އިބްރާހީމް ނަސީރު (ފެންސިރު އިއްބެ)
  • އަހުމަދު ސައީދު
  • އަހުމަދު އަޒުމީލް


މި ފިލްމަކީ ތިނެސްކަން ލޯބީީގެ ވާހަކައެއްގެ މައްޗަށް ބިނާކޮށް ހަދާފައިވާ ފިލްމެކެވެ.

ޤައުމީ ފިލްމު އެވޯޑްސް ގެ ނަމުގައި ކުރިން ބާއްވަމުން ގެންދިޔަ އެވޯޑްގެ ނަން ބަދަލުކޮށް އަންނަ ޑިސެމްބަރު ގައި މި އިވެންޓް ބާއްވާނެ ކަމަށް ނޭޝަނަލް ސެންޓަރ ފޯރ ދި އާރޓްސް އިން ވަނީ ބުނެފައެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: