ގުރާ އާއިލާގެ ދޫންޏެއް ކަމުގައިވާ، “ޕެސްކުއެޓްސް ޕެރޮޓް” ނުވަތަ “ވުލްޗަރިންގ ޕެރޮޓް” އަކީ ބިރުވެރި ގޮތެއް ހުރި ނަމަވެސް އާދަޔާޚިލާފު ރީތީ ދޫންޏެކެވެ. “ޑްރެކިއުލާ ޕެރޮޓް” ގެ ނަމުން މަޝްހޫރުވެފައިވާ މި ގުރާ ހަމައެކަނި ދިރިއުޅެނީ ނިއު ގިނީގެ ތިރި ފަރުބަދަތަކުގައްޔާއި، އެ ފަރުބަދަތަކުގައި ހުންނަ ޖަންގަލިތަކުގައެވެ.

ޑްރެކިއުލާ ޕެރޮޓް

މި ރީތި ދޫނީގެ މޭމައްޗާއި، ބުރަކަށި އަދި ފިނދުފަތް އަޅި ކުލައަކަށް ހުންނައިރު، އިތުރު ފުރިހަމަކަމެއް ގެނެސްދެނީ ބަނޑުދޮށުގައްޔާއި، ދެ ފިޔައިގައި ހުންނަ އަލި ރަތްކުލައިގެ ސަބަބުންނެވެ. މި ބާވަތުގެ ގުރާ 18 އިންޗި އަށް ބޮޑުވާއިރު، އޭގެ ތުނބުން ފަށައިގެން ފިނދުފަތް ގަނޑާއި ހަމައަށް މީޓަރެއް ހުރެއެވެ.

ގުރާ އާއިލާ އަށް ނިސްބަތްވާ މި ރީތި ދޫންޏަށް “ޑްރެކިއުލާ ޕެރޮޓް” ގެ ނަން ދީފައިވަނީ ސަބަބެއް ނެތިއެއް ނޫނެވެ. އެއް ސަބަބަކީ މިބާވަތުގެ ގުރައަކީ އަޑުއަހަން އުނދަގޫ ބިރުވެރި އަޑެއް ލައްވާ ދޫންޏަކަށް ވާތީއެވެ. އަނެއް ސަބަބަކީ އެއްވެސް ފަތެއް ނެތި، ބިރުވެރި ސިފައަކަށް މި ގުރާގެ މޫނު ހުންނާތީ އެވެ.

ޑްރެކިއުލާ ޕެރޮޓް

“ޑްރެކިއުލާ ޕެރޮޓް” އަކީ ދުނިޔެއިން ނެތި ހުސްވެދާނެކަމުގެ ބިރު ހީވެފައިވާ ދޫންޏެކެވެ. މިބާވަތުގެ ދޫނީގެ އާބާދީ އުޅެނީ ގާތްގަނޑަކަށް 20,000 އާއި، 49,000 އާ ދެމެދުގައެވެ. “ޑްރެކިއުލާ ޕެރޮޓް” ގެ އާބާދީ ހަލުވިކަމާއެކު މަދުވަމުންދާ އެންމެ ބޮޑު އެއް ސަބަބަކީ އެތަކެތީގެ ފަތްތަކުގެ ބޭނުމުގައި އިންސާނުން އޭގެ ޝިކާރާ ކުރަމުންދިއުމެވެ.

މިދުނިޔޭގައި އަދިވެސް އިންސާނުންނަށް ނުހޯދޭ އެތައް ދިރުމެއްވާއިރު، މިފަދަ ދިރުންތައް ހިމާޔަތްކޮށް ބެލެހެއްޓުމަކީ އިންސާނުންގެ ކޮނޑުގައި އެޅިފައިވާ ވަރަށް ބޮޑު މަސްއޫލިއްޔަތެކެވެ. ނަމަވެސް، ހިތާމައަކީ އިންސާނުންގެ މާއްދީ ބޭނުންތަކަށް މިފަދަ ދިރުންތައް މަރައި، އެއްވެސް ވަރަކަށް ބަލާލުމެއްނެތި، އެތަކެތި ބޭނުންކުރުމުގެ ސަބަބުން ދިރޭތަކެތީގެ އެތައް ނަސްލެއް މުޅިން ނެތިވެ ގޮސްފައިވާކަމެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: