އިންސާނެއްގެ ދިރިއުޅުމުގެ އެންމެ މުހިންމު ދުވަސްވަރަކަށް ވާނީ ހަމަގައިމުވެސް ޒުވާން ދުވަސްވަރެވެ. ޒުވާން ދުވަސްވަރު ނުކުރި ކަމެއް ނުވަތަ ނުހޯދި ކާމިޔާބީއެއް ފަހަކުން ނުލިބޭނެއެވެ. ވަޒީފާގެ މާހައުލުގައި ވިޔަސް ކިޔެވުމުގެ މާހައުލުގައި ވިޔަސް ޒުވާން ދުވަސްވަރު ރަނގަޅު ބިންގަލެއް އަޅަންވާނެއެވެ. މުސްކުޅިން ބުނާ އަޑުއަހަންހެއްޔެވެ.؟ ދަތްހުރި ދުވަހު ކާށިކާން ވާނެއެވެ. އާއެކެވެ. ޒުވާން ދުވަަސްވަރުގެ ބޭނުން އޭގެ އެންމެ ރަނގަޅުގޮތުގައި ހިފަން ވާނެއެވެ.
ނަމަވެސް މިހާރު ޒުވާން ދުވަސްވަރު މިވަނީ ވަރަށް ސްޓްރެސްފުލް ދުވަސްވަރަކަށްވެފައެވެ. ކިޔެވުމުގެ އިތުރުން ވަޒީފާގެ މާހައުލުގައިވެސް ވަރަށް ބުރަކޮށް މަސައްކަތް ކުރަން އެބަޖެހެއެވެ. މާލެ ކަހަލަ ތަރައްގީވެފައި އޮތް ތަނެއްގައި ދިރިއުޅެންޏާ ވަޒީފާއަށް ދިޔުން މުހިންމެވެ. ހުންނަތަނުގެ ކުލި، ކެއުމާއި ބުއިމުގެ އިތުރުން ޒަރޫރީ ބޭނުންތައް ފުއްދުމަށް މަސައްކަތް ކުރަން ޖެހެއެވެ.
މިހާރު ގިނަ ކުދިންނަކީ ކިޔަވަމުން ވަޒީފާއަށް ދާ ކުދިންނެވެ. ވަޒީފާގެ މާހައުލުގައި އުޅެމުން ކިޔެވުން މިއީ ފަސޭހަކަމެއް ނޫނެވެ. ނަމަވެސް ކަންކަން ރާވާލަން އެނގިއްޖެނަމަ އެއްވެސް ކަމަކީ އުނދަގޫކަމެއް ނޫނެވެ. މިހެންކަމުން އަޅުގަނޑުގެ ތަޖުރިބާ ހިއްސާކޮއްލާނަމެވެ.
- ކިޔެވުމަށް އިސްކަންދިނުން.
ވަޒީފާގެ މާހައުލުގައި އުޅެމުން ކިޔެވުމަކީ ފަސޭހަ ކަމެއް ނޫނެވެ. ގިނަ ތަންތަނަކީ ހަފްތާއެއްގެ 6 ދުވަހު 8 ގަޑިއިރު މަސައްކަތްކުރާ ތަންތަނެވެ. ވަޒީފާއަށް ފަހު ކޮލެޖް ނިންމާފައި ގެއަށްގޮސް ހަމަޖެހިލެވޭ އިރު މިހުންނަނީ ރޭގަނޑުވެފައެވެ. މިހެންވުމުން ގިނަފަހަރަށް ގެއަށް އަންނަގޮތައް ބޭނުންވާނީ އަރާމު ކޮއްލާށެވެ. ކިޔެވުމަށް ވަގުތު އޮންނާނީ ނުލިބިފައެވެ. ހަފްތާ ބަންދުގެ އިތުރުން ދުވާލަކު އެއް ގަޑިއިރު ނޫނީ ދެގަޑިއިރުވިޔަސް ފިލާވަޅުތަށް ހުލާސާ ކުރުމަކީ މުހިންމުކަމެކެވެ. އެހެންނޫނީ އެއްފަހަރާ ހުރިހާ އެއްޗެއް ދަސް ކުރަންޖެހުމުން އެތައް އުނދަގޫތަކާ ކުރިމަތިލާން ޖެހޭނެއެވެ.
ފަހުވަގުތައް ކަންކަން ބެހެއްޓުމަކީ އެންމެ އެދެވިގެންވާ ގޮތެއްނޫނެވެ. ޓެސްޓު އައިސް ބޯމަތިވުމުން ކިޔަވަން ތެޅިގަތީމަ ގިނަފަހަރައް އޮންނާނީ ރަނގަޅަށް ނުކިޔެވިފައެވެ. މިހެން ވުމުން ލިބޭ މަދު ވަގުތުގެ ބޭނުން އެދެވިގެންވާ ގޮތުގައި ހިފުމަކީ މުހިންމުކަމެކެވެ.
- ކިޔަވާ ދާއިރާއަކުން ވަޒީފާހޯދަން އިސްކަންދިނުން.
ވަޒީފާހޯދުމުގައިވެސް ބަލަންޖެހޭ ގިނަކަންކަން ހުންނާނެއެވެ. ހާއްސަކޮށް ކިޔަވަމުން ވަޒީފާ އަދާކުރާނަމަ ކިޔަވާ ދާއިރާއަކުން ވަޒީފާ ހޯދުމަށް އިސްކަންދޭން ވާނެއެވެ. ކިޔަވަމުން ތަޖުރިބާ ލިބޭނެތީއެވެ. ކިޔަވާ ނިމޭއިރު ތަމްރީނު ލިބިފައި ހުރުމުން ކުރިއަށް ދާނެ މަގުފަހިވުމަށް ފަސޭހަ ވާނެއެވެ. މީގެ އިތުރުން ކިޔަވާ ދުވަސްވަރު ކިޔެވުމަށްވެސް ފަސޭހަވާނެއެވެ. އެއްޗެއް ނޭނގިއްޖެ ހާލަތެއްގައި އެކުގައި އުޅޭ ތަޖުރިބާ ލިބިފައި ހުރި މީހުންގެ ފަރާތުން އެއްޗިހި އޮޅުންފިލުވަން ފަސޭހަވާނެއެވެ.
- އަމިއްލަކަންކަމަށް ވަގުތުހޯދުން.
ކިޔެވިޔަސް ނުވަތަ ވަޒީފާ އަދާކުރިޔަސް އަމިއްލަ ކަންކަންކުރަން ވަގުތު ހުސް ކުރުމަކީ ވަރަށް މުހިންމު ކަމެކެވެ. އަބަދު މީހާ ބިޒީކޮށް އުޅުމަކީ ސިއްހީގޮތުން ބެލިޔަސް ރަނގަޅުކަމެއް ނޫނެވެ. މީހާ މާބޮޑަށް ސްޓްރެސް ވުމުގެ ސަބަބުން ކުރާ މަސައްކަތްތަކައްވެސް އޭގެއަސަރުކުރާނެއެވެ. މިހެންވުމުން އާއިލާ ނުވަތަ ރައްޓެހިންނާ އެކު ބޭރައްގޮސް މަޖާކޮއް ބޯހަމަޖައްސާލުމަކީ މުހިންމުކަމެކެވެ.
ލިޔުންތެރިޔާގެ ފުރަމަލަ
- އިމްޝާ ނަޞީރަކީ ނޫސްވެރިކަމަށް ހުންނަ ޝާއުޤާއިއެކު، ނޫސްވެރިކަމަށް ކުރިމަތިލާފައިވާ ޒުވާން ލިޔުންތެރިއެކެވެ.
މި ލިޔުންތެރިޔާގެ ބައެއް އެހެން ލިޔުންތައް
- 17 މެއި 2020ދީންރަމަޟާން މަހުގެ ފަހު ދިހައިގެ ބަރަކާތް ލިބިގަންނަމާތޯ؟
- 3 އޭޕްރިލް 2020ރިޕޯޓްހައިރާންވާހާ ރީތި ކަނޑިތީމު!
- 26 ފެބްރުއަރީ 2020މަޢުލޫމާތުސްކިޓްޒޯފްރީނިޔާ އެނގޭތަ؟
- 6 ފެބްރުއަރީ 2020ރިޕޯޓްއަދުގެ ދުނިޔޭގައި “ބިޒީ” ޒުވާނުން
