އަހަރެންނަކީ މުދައްރިސަކީމެވެ. ކުޑަ ދެކުދިންގެ މަންމަ އެކެވެ. ކޮންމެ ދުވަހަކު ފަތިސްނަމާދަށް ބަންގި ގޮވުމުގެ ކުރިން ހޭލައި ސައި ތައްޔާރުކޮށް ބަދިގެތެރެ ސާފު ކުރުމަކީ އަހަރެންގެ އާދައެކެވެ. ތައްޔާރުކުރި ލެސަންޕުލޭން ދެތިންފަހަރަކު ކިޔައި، ކިޔަވައިދިނުމަށް ބޭނުންވާ ޓީޗިން އެއިޑްތައް ހަމަތޯ ބަލާލަމެވެ. ފަހެއް ޖެހުމުން ދެ ކުދިން ހޭލައްވައި އެ ކުދިންނާއެކު ނަމާދު ކުރަމެވެ. ދެ ކުދިންނަކީވެސް މެންދުރުފަހު ސުކޫލަށްދާ ކުދިންނެވެ. އަހަރެން ސުކޫލުގައި އުޅޭ ވަގުތުތަކު އަހަރެންގެ މަންމަ އަހަރެންގެ ދެކުދިންގެ ކަންތައްތައް ކޮށްދޭނެވެ. އަހަރެންގެ ފިރިމީހާ އަކީ އޭނާ އަދާކުރާ ވަޒީފާގެ ގޮތުން އާންމުކޮށް ރަށުން ބޭރުގައި އުޅޭ މީހެކެވެ.

ސުކޫލަށް ވަދެވުމާއެކު އަހަރެން އަވަސްވެގަންނަނީ ކުދިން އަންނަންވާއިރަށް ކުލާސް ތަރުތީބުކޮށްލުމަށެވެ. ކުދިން ކުލާހަށް އައިސް ހަމަވުމުން ހާޒިރީ ބަލަމެވެ. ނާސްތާ ހަވާލު ކުރުމަށްފަހު އެ ކުދިންގެ ޝެއަރރިންގެ ޓައިމްއަށް ވައްބުރަކަށް އަތުރާލަމެވެ. މިއީ އަހަރެންގެ ދުވަހުގެ ފެށުމެވެ. އަހަރެންނާއެކު ކުލާހުގައި އެކުދިން ހޭދަކުރާ ވަގުތުތަކަކީ ވަރަށް މަޖާ އެހާމެ ބޭނުންތެރި ވަގުތުތަކަކަށް ހެދޭތޯ އަހަރެން ވަރަށް މަސައްކަތްކުރަމެވެ. އެދުވަހަށް ކަނޑައަޅާފައިވާ މިންވަރަށް ފިލާވަޅު އޮޅުންފިލުވައިދީ އެ ކިޔާދެވުނު އެއްޗެހި ދަސްވިތޯ ބެލުމަކީ ހަމަ ކޮންމެ ދުވަހެއްގެ ވެސް އާދައެވެ. ލިބޭ އެންމެ ބޮޑު ހިންހަމަ ޖެހުމަކީ ދަރިވަރުންނަށް ގިނަ އެއްޗެހި ދަސްވުމެވެ. ސުކޫލު ދަންފަޅި ނިމުމުން އަނެއް ދުވަހުގެ ފިލާވަޅަށް ތައްޔާރުކޮށް ފޮތްތައް މާރކްކުރަމެވެ. ކޮންމެ ބުރާސްފަތި ދުވަހަކު ޖެހިގެން އަންނަ ހަފްތާއަށް ލެސަންޕުލޭންތައް ހަދަމެވެ. ކިޔަވައިދޭ ތީމްއަކާ ގުޅިގެން ހަރަކާތެއް ކުރިއަށްގެންދިޔަ ނަމަވެސް އިތުރު ހަރަކާތެއް ކުރިއަށްގެންދިޔަ ނަމަވެސް މުޅި ސުކޫލު ތައްޔާރު ކުރުމަށްޓަކައި އިތުރަށް އެންމެ ލޯ ލާރިއެއް ނުލިބޭނެކަން އެނގޭ ހާލު އިތުރަށް އެތަކެއް ވަގުތުތަކެއް އެކަމަށްޓަކައި ގުރުބާންކުުރަމެވެ.

އަދި ހަމަ އެހެންމެ ކޮންމެ ޓާރމެއް ނިމެންވާއިރަށް ތައްޔާރު ކުރާ ދަރިވަރުންގެ ޕޯޓްފޯލިއޯ އާއި ދަރިވަރުންގެ ރިޕޯޓު ފޯރމް އަކީވެސް ވަކި ފަސޭހަ ކަމެއް ނޫނެވެ. މިއީ އަދި އަހަރެމެން ކުރާ މަސައްކަތުގެ ކުޑަމިންވަރެކެވެ. އަހަރެމެން ޓީޗަރުން ކުރާ ބުރަ މަސައްކަތް ފާހަގަކުރުމަށްޓަކައި ޓީޗާރސް ޑޭ ގެ ނަމުގައި 5 އޮކްޓޯބަރ ކޮންމެ އަހަރެއްގައި ފާހަގަ ކުރެއެވެ. އެދުވަހާއި އެރޭގައި ޓީޗަރުން ވަރުގެ ރަނގަޅު ބައެއް ނުވެއެވެ. ނަމަވެސް ކިތައްމެ ކުޑަ ކަމަކާވެސް ދަރިވަރުގެ ކުރިމަތީގައި ޓީޗަރުންނާއި ޒުވާބުކޮށް ޓީޗަރުންގެ އަގުދަށްކޮއްލާ ބެލެނިވެރިން މަދުންނަމަވެސް އުޅެއެވެ. ދަރިވަރުންގެ ނަތީޖާ ދަށްވުމުން ވެސް ޓީޗަރުންވަރުގެ ވިޔާނުދާ ބައެއް ނުތިބެއެވެ. އެއް އަތް ކިތަންމެ ވަރަކަށް ތެޅިޔަސް އަޑު ނުކިޔާނެ ބީދައިން ދަރިވަރުންގެ ނަތީޖާ ރަނގަޅު ކޮށްދިނުމަށްޓަކައި ޓީޗަރުން ކިތަންމެ މަސައްކަތެއް ކުރި ނަމަވެސް ދަރިވަރާއި ބެލެނިވެރިންގެ އެއްބާރުލުން ނުލިބޭނަމަ ނަތީޖާ ރަނގަޅު ކުރެވިދާނެހެއްޔެވެ؟

ތައުލީމު ހާސިލްކުރުމަށްޓަކައި ދަރިވަރުންކުރާ ދަތުރު ކާމިޔާބުކަމާއެކު ނިންމާލެވޭނީ ޓީޗަރުންނާއި ބެލެނިވެރިންނާއި ދަރިވަރުން އެއް މިސްރާބަކަށް އަމާޒު ހިފައިގެންނެވެ. އެ މިސްރާބު ވާންވާނީ ރަނގަޅު ނަތީޖާއެއް ނެރުމެވެ. ސުކޫލަށް ގޮސް އަބަދު ސަކަރާތް ޖެހުމަކީ އެއްވެސް ދަރިވަރެއް ކޮއްގެން ވާނޭ ކަމެއް ނޫނެވެ. އެހެންނޫންނަމަ ފަހުން އެކަމާ ހިތާމަ ކުރަން ޖެހިދާނެ އެވެ.

މިއީ ޓީޗަރެއްގެ އިހުސާސް ތަކެވެ. ކޮންމެ ކޮންމެ މީހަކަށް ޓީޗަރަކަށް ވުމަކީ ކުރެވޭނެ ކަމެއް ނޫނެވެ. މިއީ ވަރަށް އުނދަގޫ އެހާމެ ބުރަ ދާއިރާ އެކެވެ. ޓީޗާރސް ޑޭގައި އަގު ބޮޑެތި ހަދިޔާ ތަކާއި ކާޑުތަކާއި މާތަކެއް ޓީޗަރުންނަށް ބެހުމަށް ވުރެ ދުލުން ބޭރުކޮށްލާ ތައުރީފާއި ހިތްވަރުގެ ނުވަތަ ރަނގަޅު ކުރުމަށް އެދޭ ކަންތައް ރީތި ގޮތުގައި ބުނެލުމުން އުފަލުން ހިތް ފޮޅޭނެއެވެ. އިހުތިރާމާއި އެކު ވާހަކަ ދެއްކުމުން ވެސް މެއެވެ. މިއީ އަހަރެމެންގެ އިހުސާސްތަކެވެ. އަހަރެމެންގެ ހިތުގެ އުދާސްތަކެވެ.

ލިޔުންތެރިޔާގެ ފުރަމަލަ

އާއިޝަތު ޖަނާ ސަމީރު

ޖަނާ އަކީ ވާހަކަ ލިޔުމަށް ޝައުޤުހުންނަ ލިޔުންތެރިއެކެވެ. އެހެން ދާއިރާތަކުގައިވެސް ޖަނާ ހަރަކާތްތެރިވާނެއެވެ.

މި ލިޔުންތެރިޔާގެ ބައެއް އެހެން ލިޔުންތައް

• 12 މާރޗް 2021ޚަބަރު“އުމަރު” ސީރީޒް ރާއްޖެ ޓީވީން އަންނަ ރަމަޟާން މަހު!
• 31 ޖެނުއަރީ 2021ޚަބަރުސްކިލް ޓްރެއިނިން ސެންޓަރުން އަތޮޅުތަކަށް ހާއްސަ އޮންލައިން ކުލާސްތަކެއް!
• 25 ޖެނުއަރީ 2021ވާހަކަޙުޔޫން – އެޕިސޯޑް 03
• 21 ޖެނުއަރީ 2021ޚަބަރުތ. ކިނބިދޫ މައުލޫދު ހަރުގެ މަރާމާތުކުރަން ބަޔަކާ ހަވާލުކޮށްފި