​މިއީ 2020ވަނަ އަހަރުގެ ބައިނަލްއަގުވާމީ މާދަރީބަހުގެ ދުވަހުގެ މުނާސަބަތުގައި ފަންނާއި ސަގާފަތާއި ތަރިކައިގެ ވަޒީރު އަލްފާޟިލާ ޔުމްނާ މައުމޫނު ދެއްވި ޚިޠާބު

މިއަދަކީ ބައިނަލްއަޤުވާމީ މާދަރީބަހުގެ ދުވަސް. އެހެންކަމުން މި އުފާވެރި ދުވަހުގެ ހެޔޮ އެދުމާއި ތަހުނިޔާ ދިވެހި ރާއްޖޭގެ ޢިއްޒަތްތެރި ރައީސުލް ޖުމުހޫރިއްޔާ އިބްރާހިމް މުޙައްމަދު ޞާލިޙަށާއި ރާއްޖޭގެ އެންމެހައި ލޮބުވެތި ރައްޔިތުންނަށް ދަންނަވަން. ޚާއްޞަކޮށް ދިވެހިބަސް  ކިޔަވައިދެއްވާ ލޭފަވެތި މުދައްރިސުންނަށާއި ދިވެހިބަސް ކުރިއަރުވައި ތަރައްޤީކުރައްވަން މަސައްކަތްކުރައްވާ އެންމެ ބޭފުޅުންނަށް ތަހުނިޔާއާއި މުބާރިކުބާދީ ދަންނަވަން.

އާދެ! 2019ވަނަ އަހަރުގެ ޖަނަވަރީ މަހުގެ 4ވީ ހުކުރު ދުވަހު އަޅުގަނޑުމެންނަށް އިވުނު އެންމެ ހިތާމަވެރި ޚަބަރަކީ، އާޖެންޓީނާގެ ޕެޓަގޯނިޔާގެ ބަހެއް ކަމަށް ވާ ތެހުލްޗޭ ބަހުން އެންމެ ފަހުން ވާހަކަ ދައްކަމުން އައި މީހާ ޑޯރާ މަންޗަޅޯ މަރުވުމާއެކު ތެހުލްޗޭ ބަސްވެސް މަރުވި ކަމުގެ ހިތާމަވެރި ޚަބަރު.

ބަހުގެ މާހިރުން ވިދާޅުވާ ގޮތުގައި ދުނިޔޭގެ މީހުން ވާހަކަ ދައްކައި އުޅޭ 7000 ބަހުގެ ތެރެއިން ދެބައިކުޅައެއްބައި ބަސް އުވިގެން، ނެތިގެން ދިއުމުގެ ބިރު އެބައޮތް. ގާތްގަނޑަކަށް ކޮންމެ 2 ހަފުތާއަކުން ބަހެއް އުވި ނެތެމުން ދާ ކަމަށް ބަހުގެ މާހިރުން ވިދާޅުވޭ. މިހެން ވުމުން ކޮންމެ އަހަރަކު ގާތްގަނޑަކަށް 25އަކަށް ބަސް އުވޭނެ. މި ބާރުމިނުގައި ބަސްބަސް އުވޭ ނަމަ، މިހާރު ދުނިޔޭގައި ވާހަކަ ދައްކާ 7000 ބަހުގެތެރެއިން ދެބައިކުޅަ އެއްބައި ބަސް ނެތިގެން ދާނެ ކަމާ މެދު ޝައްކެއް ނެތް. ބަހުގެ ޢިލްމުވެރީން ވިދާޅުވެފައިވާ ގޮތުގައި ކުޑަކުދީންގެ ސިކުނޑިތަކަށް  ބަހެއް ރަނގަޅު ގޮތުގައި ވާސިލްކޮށް ނުދެވިއްޖެ ނަމަ އެ ބަހެއް ނެތިދާނެ.

ބައިނަލްއަގުވާމީ މާދަރީބަހުގެ ދުވަސް ފާހަގަކުރެވޭ މި މުނާސަބަތުގައި މިއީ އަޅުގަނޑުމެންގެ ކޮންމެ ދިވެއްސަކުމެ ފުންކޮށް ވިސްނާން ޖެހޭ ކަމެއް. ޔުނެސްކޯއިން މި ދުވަސް ފާހަގަ ކުރަނީ މާދަރީބަސްތަކާއި ބަހުރުވަތައް ރައްކާތެރިކުރުމުގެ މުހިންމު ކަމާ މެދު ހޭލުންތެރި ކުރުމަށާއި ބަހަވީ ސިންދަފާތު ރައްކާތެރިކަމާއެކު އެއްޖީލުން އަނެއް ޖީލަށް ވާސިލްކޮށްދޭން މައްސައްކަތް ކުރާން.

ޝައްކެއްވެސް ނެތް. އަޅުގަނޑުމެންނަކީ އަމިއްލަބަހަކާއި އަމިއްލަ ބަހުރުވަތަކާއި އަމިއްލަ އަކުރެއް އޮތް ކަމުގެ ފަޚުރުވެރިކަން އިހުސާސްކުރާ ބައެއް. މިއީ ދުނިޔޭގެ ވަރަށް ގިނަ ގައުމުތަކަށް ލިބިފައިނުވާ ނަސީބެއް.

އާދެ! މިއަދަކީ ބައިނަލްއަޤުވާމީ މާދަރީބަހުގެ ދުވަސް މުޅި ދުނިޔޭގެ އެކިކަންކޮޅުތަކުގައި ފާހަގަކުރާތާ 20 އަހަރު ފުރޭ ދުވަސް. ބައިނަލްއަޤުވާމީ މާދަރީ ބަހުގެ ދުވަސް ވަނީ، ފެންވަރުމޮޅު ތަޢުލީމެއް ދިނުމަށް ޓަކައި ކުރެވޭ ޢިލްމީ މަސައްކަތްތަކުގައި މާދަރީބަހުގެ މުހިންމުކަމަށް ޓަކައި ދިދަ އުފުލައިލުމުގެ ހިނދުކޮޅެއް ކަމުގައި.

މި އަހަރުގެ މާދަރީބަހުގެ ދުވަހަށް ޔުނެސްކޯއިން ކަނޑައަޅުއްވައިފައިވާ ޝިޢާރުގެ ދިވެހި ތަރުޖަމާއަކީ  “ސަރަހައްދީ އިމެއް ނެތި ބަސްބަސް”.

މިޝިޔާރުން ހާމަކޮށްދެނީ މުޖުތަމައުތަކުގެ ތެރޭގައްޔާއި މުޖުތަމަޢުތަކުގެ މެދުގައި ސުލްޙަމަސަލަސްކަން އިތުރަށް ދެމެހެއްޓުމުގެ މައިގަނޑު އަސާސްތައްކަމުގައި މީސްތަކުންގެ މާދަރީ ބަސްބަސް ހިމެނިގެން ވާކަން. ހަމަ އެހެންމެ ސުލްހަވެރިކަމަށް ޓަކައި ކުރެވޭ މަޝްވަރާއަށް މަގުފަހި ކުރުމަށާއި ވެހިތަރިކަ ރައްކައުތެރިކުރާން ރަށުބަހާއި އަވައްޓެރި ބަސްބަސް އެހީތެރި ވެދޭ ކަން ވެސް މެ.

މާދަރީބަހުގެ  ދުވަސް ފާހަގަކުރުމުގެ އެންމެ ބޮޑު ބޭނުމަކީ ފުޅާ ދާއިރާއެއްގައި ދިވެހި ދަރީންގެ ސިކުނޑިތައް ބައްޓަންކުރުމުގައި މާދަރީ ބަސް  އަދާކުރާ ތަފާތު ދައުރުތަކަށް ސަމާލުކަން ދިނުމަށާއި އުނގެނުމުގައްޔާއި ދިރިއުޅުމުގެ އެކިކަންކަމުގައި ބިރެއް ޖެހިލުމެއް ނެތި ބައިވެރިވެވޭނޭ ފުރުޞަތު މާދަރީބަހުގެ ތެރެއިން ފަހިކޮށްދީ ބަވަނަވެރި ރައްޔިތެއްގެ ޙިއްސާ ހޯދައިދިނުން.

ބަހަކީ ހަމައެކަނި އަޅުގަނޑުމެންގެ ޝުޢޫރުތަކާއި އިޙްސާސްތައް ހާމަ ކުރާ އެއްޗެއް ނޫން. ބަހަކީ އަޅުގަނޑުމެންގެ ހަނދާންތަކާ އަޅުގަނޑުމެންގެ މާޒީއާއި ގުޅުވައިދޭ ވެސް އެއްޗެއް. އެއީ އަމިއްލަ ވަންތަކަން ދައްކައިދޭ ވެސް އެއްޗެއް.

ބަހަކީ އަޅުގަނޑުމެންގެ ތަރީޚާއި ސަގާފަތާއި ތަރިކައާއި އާދަކާދައާ އަޅުގަނޑުމެންނާ ގުޅުވައިދޭ އެއްޗެއް. ހަމައެހެންމެ އެއީ ތަހުޒީބާއި ތަމަންދުނު ބިނާވާ ޙަޟާރީ ތަރިކައެއް.

މިއަދު ގިނަ ކުޑަކުދީންނާއި ޒުވާނުން ވިސްނަނީ އިނގިރޭސި ބަހުން. ވާހަކަދައްކަނީ އިނގިރޭސިބަހުން. މިއީ ކަންބޮޑުވާން ޖެހޭ މައްސަލައެއް. މިއީ ބަސް އުވިގެން ދާން މެދުވެރިވާ ސަބަބުތަކުގެ ތެރެއިން ސަބަބެއް. މިހެންވުމުން ދިވެހިބަސް ރައްކާތެރި ކުރެވޭނީ ބަހާ މެދު އަޅުގަނޑުމެން ދެކޭގޮތް ބަދަލު ކޮށްގެން. ބަހަށް އަޅުގަނޑުމެން އިޖާބަދޭގޮތް ބަދަލުކޮށްގެން.

މައިންބަފައިން ފަރުވާތެރިކަމާއެކު ދަރީންނަށް ދިވެހިބަސް ދަސްކޮށްދެއްވައިގެން. އެކަމަށް ޓަކައި ގޭތެރެއިން ފެށިގެން ގިނަގުނަ މަސައްކަތްތަކެއް ކޮށްދެއްވައިގެން. ޅަފަތުގެ ތަޢުލީމުގައި ދިވެހިބަސް އުނގަންނައި ދެއްވުގެ ދައުރުތައް ފުޅާކުރައްވައިގެން. މުޖުތަމަޢުގައި ބަހަށް ޚާއްސަ މަގާމު ކަށަވަރުކޮށްދީގެން.

ދިވެހި ބަހަކީ މުއްސަނދި ބަހުރުވަތަކެއް ލިބިފައިވާ ބަހެއް. ބަހުރުވަތަކަކީ އެ އަތޮޅެއްގެ ނުވަތަ އެ ރަށެއްގެ ޚާއްސަ ސަގާފަތާއި ދިރިއުޅުން ދައްކައިދޭ މުހިންމު މާނަވީ ތަރިކައެއް. މި ބަހުރުވަތައް ދިރުވަން އަޅުގަނޑުމެން މަސައްކަތްތަކެއް ކުރަން އެބަޖެހޭ. މިކަންކަމުގައި ދޭދޭ ފަރުދުންނާއި، ވަކިވަކި އާއިލާތަކާއި، ބަހަވީ މުޖުތައުގެ ލޭފަ ހަންހާރަވެތި އެހީތެރިކަން މިއަދު ވަނީ ނުހަނު ބޮޑަށް ބޭނުންވެފައި. މި އެހީތެރިކަން އެންމެ ފުރިހަމަ މާނައިގައި ދިވެހިބަހަށް ލިބެމުންދާނެ ކަމަށް އަޅުގަނޑު އުންދީކުރަން. އެކަމަށް އެދި ނުހަނު އިޚުލާސްތެރިކަމާއެކު އިލްތިމާސްކުރަން.

މި ފުރުސަތުގައި ރައީސް އިބްރާހީމް މުޙައްމަދު ސާލިހުގެ ސަރުކާރުން ބަހާއި ތާރީޚާއި ސަގާފީ ތަރިކައަށް ދެއްވާ އަހައްމިއްޔަތު ފާހަގަކޮށް އެ މަނިކުފާނަށް ޝުކުރު ދަންނަވަން. އަދި ބަސް ކުރި އަރުވަން މަސައްކަތް ކުރައްވާ ފަރާތްތަކަށް ޝުކުރު ދަންނަވަން.

އަޅުގަނޑުގެ އިޚުލާޞްތެރި ދުޢާއަކީ އަޅުގަނޑުމެންގެ މާދަރީބަހަށާއި އެބަހުގެ ބަހުރުވަތަކަށް ނިސްބަތްވާ ރަށުބަސްބަހާއި އަވައްޓެރި ބަސްބަހަށް ކުރިއެރުމާއި ފާގިތަކަށް ﷲ މިންވަރުކުރެއްވުން. ކީރިތި ﷲ އަޅުގަނޑުމެންގެ މި ދުޢާ އިޖާބާކުރައްވާށި! އާމީން.

ލިޔުންތެރިޔާގެ ފުރަމަލަ

ރަން ގަލަން
ރަން ގަލަން
މުހިންމު ބޭނުންތެރި ލިޔުންތައް އެކިއެކި ވަޞީލަތް ތަކުން ނަގައިގެން، ލިޔުމުގެ އަސްލު މުސައްނިފް ލިޔުއްވި ލިޔުމެއްކަން އެނގޭ ގޮތަށް 'ރަން ގަލަން' ޕޯސްޓް ކުރާނެ އެވެ.

ގުޅުންހުރި ލިޔުން: