​ބައެއް ޤައުމުތަކުގައި ހަލުވިކަމާއެކު ފެތުރެމުންދާ “ކޮވިޑް-19” ވައިރަސްއިން ރައްކާތެރިވުމުގެ ގޮތުން އަޅާފައިވާ ފިޔަވަޅުތައް އިތުރަށް ވަރުގަދަ ކޮށްފައިވާކަން ސަރުކާރުން ހާމަކުރައްވައިފިއެވެ. މިކަން ހާމަކުރައްވާފައިވަނީ ރައީސުލްޖުމްހޫރިއްޔާގެ އޮފީހުގައި މިރޭ ބޭއްވެވި ނޫސްވެރިންގެ ބައްދަލުވުމެއްގައި މިނިސްޓަރ އޮފް ހެލްތް ޢަބްދުﷲ އަމީނެވެ.

ކޮވިޑް-19 އިން ރައްކާތެރިވުމުގެ ގޮތުން މިހާތަނަށް އަޅާފައިވާ ފިޔަވަޅުތައް އިތުރަށް ވަރުގަދަކުރުމުގެ ގޮތުން ސަރުކާރުން މިހާރު މިވަނީ، ކްރޫޒްލައިނަރތައް މެދުވެރިކޮށް ރާއްޖެ އެތެރެވުމާއި، އީރާނާއި ދެކުނު ކޮރެއާގެ ދެ ސަރަޙައްދަކުން ފުރައިގެން އަންނަ އެއްވެސް ދަތުރުވެރިއަކު ރާއްޖެ އެތެރެވުން ވަގުތީ ގޮތުން މަނާކުރައްވާފައެވެ. އަމީން ވިދާޅުވީ، މި ވައިރަސްއިން ރައްކާތެރިވުމުގެ ގޮތުން ރާއްޖޭގައި އަޅާފައިވާ ފިޔަވަޅުތަކުގެ ސަބަބުން އަދި މިހާތަނަށް މި ވައިރަސްއަށް ޕޮޒިޓިވް ނުވަތަ މި ބަލި ޖެހިފައިވާ އެއްވެސް މީހަކު ފެނިފައިނުވާ ކަމަށެވެ.

ކަމާއިބެހޭ ފަރާތްތަކާއިއެކު މިއަދު ބޭއްވެވި ބައްދަލުކުރެއްވުމަކަށްފަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ، ދުނިޔޭގެ ބައެއް ޤައުމުތަކުގައި މި ވައިރަސްގެ އަސަރު މިހާރު ފެތުރެމުންދާ ހަލުވިމިނަށް ބައްލަވައި، ކްރޫޒްލައިނަރތައް މެދުވެރިކޮށް ރާއްޖެ އެތެރެވުން މަނާކުރަން ނިންމަވާފައިކަމަށް މިނިސްޓަރ ވިދާޅުވިއެވެ. އަދި، ހަލުވިކަމާއިއެކު މި ވައިރަސް ފެތުރެމުންދާ ދެ ޤައުމު ކަމަށްވާ އީރާނާއި ދެކުނު ކޮރެއާގެ ދެ ސަރަޙައްދަކުން ފުރައިގެން އަންނަ އެއްވެސް މީހަކަށް ރާއްޖެ އެތެރެވުން ވަގުތީ ގޮތުން މަނާކުރައްވަން ނިންމަވާފައި ކަމަށެވެ.

މި ވައިރަސްއަކީ ބޮޑު ރޯގާއަކަށް ވެދާނެކަމަށް ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ.) އިން ލަފާކޮށް، ޤައުމުތަކުން ސަމާލުވުމަށް އިލްތިމާސްކޮށްފައިވާތީ، މި ވައިރަސްއާއިގުޅޭ މަޢުލޫމާތު ކޮންމެ ދުވަހަކުވެސް ބައްލަވައި، އަޅަން ޖެހޭ ފިޔަވަޅުތައް އަޅުއްވަމުން ގެންދަވާނެ ކަމަށްވެސް މިނިސްޓަރ އަމީން ވިދާޅުވިއެވެ.

ދެކުނު ކޮރެއާގެ ބައެއް ސަރަޙައްދުތަކުގައި ކޮވިޑް-19 ހަލުވިކަމާއިއެކު ފެތުރެމުންދާތީ، ކޮންމެހެން ކުރަން ޖެހިއްޖެ ހާލަތެއްގައި މެނުވީ، ދިވެހިން އެ ޤައުމަށް ދަތުރު ނުކުރުމަށް މިނިސްޓްރީ އޮފް ފޮރިން އެފެއާޒްއިންވެސް ވަނީ އިލްތިމާސް ކުރައްވާފައެވެ. މީގެ އިތުރުން، އެ ޤައުމުގައި ދިރިއުޅޭ އަދި އެ ޤައުމަށް ޒިޔާރަތްކުރާ ދިވެހީން ޖަޕާނުގައި ހުންނަ ދިވެހިރާއްޖޭގެ އެމްބަސީ ނުވަތަ މިނިސްޓްރީގައި ރަޖިސްޓްރީވުމަށްވެސް އިލްތިމާސް ކުރައްވާފައެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު

ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

މި ލިޔުންތެރިޔާގެ ބައެއް އެހެން ލިޔުންތައް

• 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
• 18 ޑިސެމްބަރ 2024ޚަބަރުއައިފިލްމްސް އިން ލޯބިން ބުނެލަނީ ” ލޯބިން…؟ ” ކަމަށް!
• 18 ޑިސެމްބަރ 2024ޚަބަރުއައްޒަ ބަލިވެއިންކަމަށް ބުނެ ނަހޫއަށް “ސޮރީ” ބުނެފި
• 18 ޑިސެމްބަރ 2024ޚަބަރު“ސޮރީ” ފަށައިފި – ޑައިރެކްޓްކުރަނީ ނަހޫ އަދި ރަވީ!