މެންދުރުގެ އެންމެ ހޫނުގަދަ ގަޑިއެވެ. އާދައިގެ މަތިން ސޯޝަލް މީޑިއާގެ އެކި ޕުލެޓްފޯމް ތަކުން ތަފާތު އެކި ޚަބަރުތައް ބަލަމުން ދިޔައިމެވެ. ކައިރީގައި ފޯނަށް ބަލަން ކޮއްކޮވެސް އިނެވެ. ތަފާތު އެކި ޕޯސްޓްތައް ބަލަމުން ދަނިކޮށް ފެނުނު ޕޯސްޓަކުން އިރުކޮޅަކު މަޑުޖެހެލެވުނެވެ. ކާރެއްގެ ތެރޭ ނިދާފައި ތިބި ދެ ފުލުހުންގެ ފޮޓޯ ލައިގެން “ދިވެހި ފުލުހުންގެ ހާލަތު” މިހެންޖަހާފައި އިން ޕޮސްޓެކެވެ. ކޮމެންޓުތައް ވެސް ބަލާލީމެވެ. އެކި ފަރާތްތަކުން އެކި ގޮތް ގޮތަށް ފުލުހުންނަށް މަލާމާތާ ފުރައްސާރަ ކޮށްފައިހުއްޓެވެ.

އޭރުވެސް ކައިރީގައި ކޮއްކޮއިނެވެ. އިރުކޮޅަކުން އަތުގައި ކޮށްޓާލާފައި ބުނެފިއެވެ. ” ދޮންބޭ! ޕޮލިސް ބޭބެއަށް ވެސް ވަރުބަލިވެގެން ނިދިދާނެދޯޯ؟” އެވެ. ކޮއްކޮގެ މި ސުވާލާއެކު ދޭނެ ޖަވާބެއްވެސް އެގަޑިއަކު ނޭނގުނެވެ. މި ސުވާލު މާނަ ކުރެވުނީ މުޅިން އެހެންގޮތަކަށެވެ.

ކޮއްކޮ އެބުނީ ތެދެކެވެ. ޕޮލިސް ބޭބެ އަށްވެސް ވަރުބަލިވެގެން ނިދިދާނެއެވެ. އެކަމަކު އެންމެ ނުވަ އަހަރުގެ އެ ކުޑަކުއްޖާއަށް ވިސްނުނު އެއްޗެއް، އެ ފޮޓޯލީ ފަރާތާއި އެއަށް ކޮމެންޓު ކޮށްފައި އެހުރި ފަރާތްތަކަށް ނުވިސްނުނީ ކީއްވެގެެންބާވައެވެ. ހަމަ ގައިމުވެސް ކޮމެންޓް ކޮށްފައި ތިބި ފަރާތްތައް ނުވަ އަހަރުގެ އެ ކޮއްކޮއަށް ވުރެ ބޮޑުވާނެކަން ޔަގީނެވެ.

ހަމަގައިމުވެސް އެންމެންވެސް ގަބޫލުކުރާނެ އެއްކަމެއް އެބަ އޮތެވެ. މާދަމާވެސް ތިމާ ނުވަތަ ތިމާގެ އާއިލާއަށްވެސް އެހީތެރިކަން ފޯރުކޮށްދޭން ތިބީ ހަމަ ފުލުހުންކަމެވެ. އަބަދުވެސް ފެންނާނީ ކުރެވޭ އެންމެ ގޯސް ކަންކަމެވެ. ރަނގަޅަށްކުރާ ކަންކަމެއް ނުފެންނާނެއެވެ. އެއީ އިންސާނީ ޠަބިއްޔަތެވެ! އިންސާނުންނަކީ ހުރިހާކަމެއް އެންމެ ފުރިހަމަ ކުރެވޭނެ ބައެއް ނޫނެކެވެ.

އެކަމަކު މިއަދު މީސް މީޑިއާގައި ދައުރުވަމުންދާ ފޮޓޯ ފެނިފައި ދެރަވިއެވެ. މާޔޫސް ވިއެވެ. ދިވެހިންނަކީ އަދިވެސް ހަމަ އެހާ ގަމާރު ބައެއްތޯ ހިތަށްއަރާފައެވެ. ރޭގަނޑުގެ އަރާމު ނިދި ނަގައިލުމަށްފަހު ރައްޔިތުންގެ ހަށިފާރަވެރިންގެ ގޮތުގައި މަސައްކަތްކުރި 2 ފުލުހުން ކާރުގައި ހުޅުމާލޭ ފޭސް 2 ގައި މަޑުކޮށްލައިގެން ނިދާފައި ތިބި މަންޒަކީ އަޖައިބުވާވަރުގެ ކަމެއް ނޫނެކެވެ. އެއީ އެމީހުންގެ ފެންވަރު ދަށްވުމެއްވެސް ނޫނެކެވެ. އަދި ނާގާބިލް ކަމެއްވެސް ނޫނެކެވެ. އެއަށްވުރެ މާ މަތީ މަގާމުތަކުގައި ތިއްބަވާ ބޭފުޅުންވެސް މާ ބޮޑު މުސާރަ ލިބޭ ބޭފުޅުންވެސް ބޮޑެތި މަޖިލިސްތަކުގައި ތިއްބާވެސް ނިދި ޖެހެއެވެ. ނިދި ދާނެއެވެ. ރޭގަނޑު ހޭލާ އުޅޭކަމުގައި ވަނީ ނަމަ ފަތިސް ގަޑީގައި އިންތިހާއަށް ނިދި އަންނާނެއެވެ. އެއީވެސް ތިޔަ ކަހަލަ އިންސާނެކެވެ.

އޭބޭފުޅުންނަށް ބަދުބަސްނުބުނާށެވެ. އަމާން ރޭގަޑެއްގެ ފުން އަރާމު ނިދީގައި ބިރުވެރިކަމެއް ނެތި، އަހަރުމެންނަށް ނިދުމުގެ ފުރުސަތު މިލިބެނީ ރެއާއި ދުވާލު ހޭލާތިބެ އެބޭފުޅުން އަހަރުމެންނަށް އެ އަމާން މާހައުލު ހޯދައިދޭތީކަން ޔަގީނެވެ. ހަމަ ތިބާއެކޭ އެއްގޮތަށް ފުލުސްމީހާގެ އާއިލާއެއްވެސް އޮންނާނެވެ. ކޮއްކޮ އެބުނީ ތެދެކެވެ. ޕޮލިސް ބޭބެއަށްވެސް ނިދިދާނެއެވެ.

ޝާއިޢުކުރީ: އަޙްމަދު ރަޝީދު  | ރިވިއު ކުރީ: އަޙްމަދު ރަޝީދު

ލިޔުންތެރިޔާގެ ފުރަމަލަ

މުޙައްމަދު ރިފާޒް
ރިފާޒަކީ ސަން އޮންލައިން އާއި ޗެނަލް 13 ގައި މަސައްކަތްކޮށްފައިވާ ތަޖުރިބާހުރި ނޫސްވެރިއެކެވެ.

ގުޅުންހުރި ލިޔުން: