މޯލްޑިވްސް ފިލްމް އެސޯސިއޭޝަން (އެމްއެފްއޭ)ގެ އާއްމު ބައްދަލުވުމެއް ބާއްވައިފި އެވެ. މި ބައްދަލުވުން ބޭއްވީ މިމަހު 08 ވަނަ ދުވަހު އޮލިމްޕަހުގައެވެ.

ފިލްމު އެސޯސިއޭޝަންގެ މި ދައުރުގެ ބައްދަލުވުމެއް ފުރަތަމަ ފަހަރަށް ބާއްވާފައިވާ އިރު، އެ ބައްދަލުވުމުގައި ފިލްމީ ދާއިރާއަށް ކުރިމަތިވެފައިވާ ގިނަ މައްސަލަތަކަކާމެދު ބަހުސްކުރެވުނެވެ.

ބައްދަލުވުމުގައި ގިނަ ކަންތައްތަކަށް ވަރުގަދަ ބަހުސްތަކެއް ކުރެވުނެވެ. އެގޮތުން ފިލްމު އެސޯސިއޭޝަންގެ ބައްދަލުވުމެއް ނުބޭއްވި ދިގުލައި ދިޔަ ސަބަބާމެދު ބޯޑު މެންބަރުން މަޢުލޫމާތު ހިއްސާކުރިއެވެ. އެކަން އެގޮތަށް މެދުވެރިވީ ފިލްމު އެސޯސިއޭޝަންގެ އެކައުންޓެއް އެކްޓިވް ނުވެގެން ކަމަށާއި އިތުރު މައްސަލަ ތަކެއްގެ މެދުވެރި ވެގެން ކަމަށް އެސޯސިއޭޝަންގެ ޚަޒާންދާރު ފާހަގަކުރިއެވެ. ނަމަވެސް މިހާރު އެކައުންޓެއް އެކްޓިވް ވެފައިވާ ކަމަށާއި އެ އެކައުންޓުގައި މުޅި އެކު ހަ ލައްކަ ދެ ހާސް ފަސްދޮޅަސް ދެ ރުފިޔާ ފަންސާސް ލާރި ހިމެނޭ ކަމަށް ޚަޒާންދާރު ބުންޏެވެ.

އަދި މި ބައްދަލުވުމުގައި ގިނަ މައްސަލަ ތަކަކަށް ވާހަކަދެކެވުނެވެ. އެގޮތުން އެންމެ ބޮޑު ވެފައިވާ މައްސަލަ އަކީ ފިލްމީ ތަރިން ކުރާ މަސައްކަތުގެ އަގު ވަޒަން ނުކުރުންކަން ފާހަގަކުރެވުނެވެ. ފިލްމީ ފަންނާނުންގެ ޙައްޤުތައް ނިގުޅައިގަނެފައިވާކަމަށް ބުނެ ގިނަ ތަރިން ތަކެއް ނުރުހުން ފާޅުކުރިއެވެ. މި ކަމާމެދު އެމްފްއޭގެ އިސްބޭފުޅުން ވެސް އެއްބަސްވެފައި ވާއިރު އެ ޙައްޤު ތައް ދިފާއު ކޮށްދިނުމަށް ވޭތުވެދިޔަ އަހަރު ތަކުގައި ނުބޭއްވުނު އެވޯޑު ދިނުމުގެ ހަފްލާ ވަރަށް ފުރިހަމަ ގޮތެއްގައި ކުރިއަށް ގެންދިއުމަށް ބޯޑުގެ އިސް ބޭފުޅުން ބޭނުންވާ ކަމަށް ބުނެފައި ވެއެވެ. މި ކަމާ ގުޅިގެން މަޝްހޫރު ޑައިރެކްޓަރ އަމްޖޭ ބުނީ ފިލްމު އިންޑަސްޓްރީގެ ހައްގުތަކެއް ގެއްލިފައިވާ ކަމަށާއި ފިލްމުތަކުގެ ވިޔަފާރި ވެސް ގެއްލިފައިވާ ކަމަށެވެ. މީގެ އިތުރުން އާންމު ރައްޔިތުންގެ ފާޑު ކިޔުން ވެސް ލިބޭ ކަމަށް އޭނާ ވަނީ ބުނެފައެވެ.

އެމްއެފްއޭގެ ބޯޑު މެންބަރު ޖާދު، ނިޢުމާ، ޝިވާޒް އަދި ޝާނީޒް – ފޮޓޯ: މުނިއަވަސް – މުޚްތާރް

މި ކަމާ ވިދިގެން މަޝްހޫރު ފިލްމީ ތަރި އަދި ޕްރޮޑިއުސާ އަދި ފިލްމު އެސޯސިއޭޝަންގެ ވައިސް ޗެއަރ ނިޢުމާ މުޙައްމަދު ބުނެފައިވަނީ ގެއްލިފައިވާ ޙައްޤުތައް ހޯދުމަށް ވަރަށް ގިނަ މަސައްކަތްތަކެއް ކުރެވޭ ކަމަށެވެ. އެގޮތުން ސަރުކާރުގެ ގިނަ އޮފީސްތަކަށާއި އެކި މުއައްސަސާތަކާ އެކު މަޝްވަރާ ކުރެވުނު ކަމަށް ނިއުމާ ގެ ވާހަކައިގައި ފާހަގަކުރި އެވެ. އަދި މީގެ އިތުރަށް ފިލްމު އެސޯސިއޭޝަންގެ ބޯޑުން ވަނީ މިނިސްޓްރީ އޮފް އާޓްސް ކަލްޗާ އެން ހެރިޓޭޖް ޔުމްނާ މައުމޫނާއި ޓުއަރިޒަމް މިނިސްޓަރު ޢަލީ ވަހީދުގެ އިތުރުން މާލެ ސިޓީ ކައުންސިލާ ވެސް ބައްދަލުކޮށްފައިކަން ފާހަގަކުރިއެވެ.

ދިވެހި ފިލްމީ ތަރިންގެ ހައްގުތައް ހޯދުމަށްޓަކައި ފިލްމު އެސޯސިއޭޝަންގެ ބޯޑުން ވަނީ މި އަހަރުގެ އޭޕްރީލް މަހުގެ 16 ވަނަ ދުވަހު ވޭތުވެދިޔަ އަހަރު ތަކުގައި ނުބޭއްވުނު އެވޯޑު ދިނުމުގެ ހަފްލާ ބާއްވަން ނިންމާފައެވެ. މި އެވޯޑު ހަފްލާ ގައި 2014 ،2015 ،2016 ގެ ފިލްމުތަކަށް 07 ނުވަތަ 08 އެވޯޑު ދެވޭނެ އެވެ. އަދި 2017, 2108 ގެ ފިލްމުތަކަށް 30 ވަރަށް އެވޯޑް ދެވޭނެކަމަށް ބުނެފައިވެއެވެ.

ފިލްމު އެސޯސިއޭޝަންގެ މެންބަރުންގެ ފުޓްސަލް މުބާރާތެއް އަންނަ ރޯދަމަހުގައި ބޭވުމަށް ނިންމައިފައި ވާއިރު ފިލްމީ ތަރިންގެ ޝޯ އެއްގެ އިތުރުން ސުކޫލު ތަކާއި މީޑިއާތަކާއި ގުޅިގެން ތަމްސީލު މުބާރާތެއް ބޭއްވުމަށް ނިންމާފައިވާކަން ވެސް އެމްއެފްއޭ ފުރަތަމަ އާއްމު ބައްދަލުވުމުގައި ހާމަކޮށްފައިވެއެވެ.

ކޮވިޑް-19 ގެ ކޭސް އެއް ރާއްޖެއަށް ފެނިފައިވަނިކޮށް މި މަހު 08 ވަނަ ދުވަހު ބޭއްވި މި ބައްދަލުވުމުގައި ބައިވެރިވެފައިވަނީ ދާއިރާގެ މަދު މެންބަރުންކޮޅެއްކަން ފާހަގަކޮށްލެވެއެވެ.

އެޑިޓޯރިއަލް ނޯޓް:  މި އާއްމު ބައްދަލުވުމަކީ މުނިއަވަސް އިން ރަސްމީ ސިފައެއްގައި އަޅުގަނޑުމެންގެ ރިޕޯޓަރެއް ހުރެގެން ކަވަރކުރި މިފަދަ ފުރަތަމަ ފިލްމީ އިވެންޓްކަން ފާހަގަކޮށްލަމެވެ.

ލިޔުންތެރިޔާގެ ފުރަމަލަ

ޙަސަން މުޚްތާރް
މުޚްތާރަކީ ނޫސްވެރިކަމުގައި ތަޖްރިބާ ހޯދުމަށް ނުކުމެހުރި ތަމްރީނު ލިބިފައިވާ ނޫސްވެރިއެކެވެ.

ގުޅުންހުރި ލިޔުން: