ބުރަދުވަހެކެވެ. ލީޝާ އޮފީހުގެ މަސައްކަތް ނިންމާފަ ގެއަށް އާދެވުނު އިރު ގަޑިން ތިންގަޑި ބައި ވަނީއެވެ. ވެފަ ހުރި ވަރުބަލިކަމައިގެން އެނދުގަ އެއްޗެހިވެސް ބަދަލު ނުކޮށް ޖައްސާލިއެވެ. އިސާހިތަކު ނިދި ސަވާރުވެއްޖެއެވެ. ރޭގަނޑު ނުނިދާތާ ދެތިން ރޭވުމާއެކު ލީޝާގެ ހަށިގަނޑު ވަނީ ނިންޖަށް އިންތިހާއަށް ބޭނުންވެފައެވެ.

ކަށިތައް ގިނަ ޖަނގައްޔެއްގެ ތެރޭގަ ލީޝާ ދުވަނީއެވެ. މާދުރު ދުރުން މީހުންގެ ހަޅޭކުގެ އަޑު އިވެމުންދެއެވެ. ލީޝާގެ މަންޒިލަކީ އެ އަޑުތައް އިވެމުން އެދާ ތަނެކެވެ. އެހީގެ އަތެއް ދިއްކޮށްލާނެ މީހެކެވެ. ދުވަމުން މިދާ ކަށިބޯ ޖަންގަލިން ލީޝާ ސަލާމަތް ކޮށް މި އަނިޔާވެރިކަމާ ދުރަށް ގެނގޮސްދޭނެ އެހީތެރިއެކެވެ. ލޮލުގެ ކޮޅުން ފެންނަމުން ދިޔަ އައްޔާ ހަމައަށް ދެވޭތޯ ދުވެ ދުވެ ވަރުބަލި ވި އިރުވެސް އެއާ ގާތަށްވެސް ދެވޭހެން ހީނުވެއެވެ. ގައިގަ ނެތް ހަކަތަ ލައިގެން ދުވެދުވެ ލީޝާގެ ފުރާނަ ނިކުންނަށް ކައިރިވަނީއެވެ. ދެފައި މައްޗަށް ކޮޅަށް ނުހުރެވި އެންމެ ފަހުން ބަނޑުވަތަށް ވެއްޓުނެވެ. އަޑުގެ ކޮޅަށް ހަޅޭލަވައިގަތެވެ. ކުއްލިއަކަށް ލީޝާއަށް ފުންމައިގެން ތެދުވެވުނެވެ. ވަށައިގެން ހޯދާ ބަލާލެވުނެވެ. ހުވަފެނެކެވެ. ހަމަ ޖެހުމުގެ ނޭވާއެއް ފަޒާގެ ތެރެއަށް ދޫކޮއްލުމަށްފަހު މޫނުގައި ހިއްލާފައިވާ ދާތިކިތައް ފޮހެލިއެވެ.

ގަޑިން ހަގަޑި ބައިވަނީއެވެ. ލީޝާ ފެންވަރާ ތައްޔާރުވެލިއެވެ. މި ދުނިޔޭގަ އޭނަގެ ހުރި ހަމައެކަނި މީހާގެ ކައިރިއަށް ގޮސްލުމަށެވެ. ޑޮކްޓަރުން އުންމީދު ކަނޑާލާފަ ވީނަމަވެސް ލީޝާގެ އުންމީދަކީ އަދިވެސް އޭނަގެ މަންމަ ޒުލޭހާ ތެދުވެ ރަނގަޅު ސިއްހަތެއްގައި ވުމެވެ. ދުވާލުދާ ހަތަރުދަމު އޮފިހުގައި ބުރަކޮށް އުޅުމަށްފަހު ރޭގަނޑު ނުނިދާ ހޮސްޕިޓަލްގައި ލީޝާ އިންނަތާ މިހާރު މީ ފަސްވަނަރެވެ. ހުރިހާ ކަމަކަށް ހޮޅި ގުޅާފަ މަންމަ އޮންނަ ތަން ދެކުމަކީ ލީޝާއަށް ކިތަންމެ ވޭނެއްލިބޭކަމަކަށް ވިޔަސް މިއަދު އެނުން ގޮތެއް އެފަކީރަކަށް ނެތެވެ. އެއްބަނޑު އެއްބަފާ މީހަކު ނެއްތާނގަ ދުރުތާ ތިމާގެ މީހެއްވެސް އެމީހުނަށް އަޅާލާނެ ނެތެވެ. ލީޝާއަށް އޭ ލެވެލް އާ ހަމައަށް ކިޔެވުނީ ވެސް ޒުލޭހާގެ ހިތްވަރުގަދަކަމާ މުރާލިކަމުންނެވެ. ޒުލޭހާ ކޮށްދިން ކަންތައް ލީޝާ ހެޔޮހިތުން ގަބޫލުކުރެއެވެ. އޭނާއަށް ވެގެންނަންޏާ އޭނަގެ ކޮންމެ ނޭވާއަކީވެސް އޭނަގެ މަންމައަށްޓަކާ ގުރުބާން ކުރާނެއެއްޗެކެވެ.

ތޮއްޖެހިފަވާ އައި.ޖީ.އެމް.އެޗް ގެ ތެރެއަށް ލީޝާ ބާރު ހިނގުމެއްގައި ވަދެގެން ދިޔައެވެ. އައި.ސީ.ޔޫގެ ދޮރާ ހަމަވިކަމެއްނޭގެއެވެ. ޑޮކްޓަރ ފައިރޫޒް ފަހަތުން ގޮވާލި އަޑުއިވުނެވެ. އޭނަގެ އަޑުގަވާ ހާސްކަން ވަގުތުން ލީޝާއަށް ފާހަގަ ކުރެވުނެވެ.

“ޑރ.ފައިރޫޒް! ކިހިނެއްތޯވީ؟”

“ލީޝާ. ބޭޑް ނިއުސް ފޯ ޔޫ. ސޮރީ ޓު ސޭ. ލީޝާގެ މަންމަ މިދުނިޔެ ދޫކޮށްފި.”

ލީޝާ އަށް ހައިރާން ކަމެއްނުލިބެއެވެ. އެހެނީ އެކަމުގައި މާ ކުރިންސުރެވެސް އުންމީދު ގޮސްފަވާތީއެވެ. ނަމަވެސް ދުނިޔެ ދޫކޮށް އެދިޔައީ ލިޝާ ބަނޑުއަޅާ ވިހެއި މައިމީހާއެވެ. އެކަނި މާއެކަނި އެހާ ހާލުގަ ބަލާބޮޑުކޮށް ގަދަރުވެރިއަކަށް ހަދާދިން މަންމައެވެ. ލީޝާގެ ލޮލުން ކަރުނަތައް ފެންކޯރަކުން ފެންފައިބާ އުސޫލުން ފައިބަން ފެށިއެވެ. މަޑު މަޑުންގޮސް އައި.ސީ.ޔޫގެ ދޮރު ހުޅުވާލިއެވެ. މަންމަގެ ފުރާނަނެތް މަސްގަނޑު ފެނުމާއެކު ލީޝާގެ ބަޑި ފަޅައިގެން ދިޔައެވެ. މަންމަ ގައިގަ އޮޅުލާފަ ރޯންފެއްޓިއެވެ. އެންމެ ފަހުފަހަރަށް މަންމަ ގެ ގައިގެ ހިމާޔަތް ހޯދަމުންގެންދިޔައެވެ.

ކަށުކަމާ ކެމީގެ ކަންތައްކޮށް ވަޅުލާ ނިމުނު އިރު އަނެއްދުވަހު އިރުއަރައިފިއެވެ. ލީޝާގެ އޮފީސް ކުދިންތައް އައިސް ވަރަށް އެހީވެދެމުން ގެންދިޔައެވެ. އަދި ވަކިން ހާއްސަކޮށް އޮފީހުގައި ލީޝާއާ އެންމެ ގާތްކޮށް އުޅޭ ހަޝްމާއާއި އާފިޒްއެވެ. ހުރިހާ ކަމެއް ނިމިގެން ސަހަރާއިން ނިކުމެފަވެސް އެދެ އެކުވެރިން ލީޝާ އެކަނިވެރިކޮށް ނުލައެވެ. އެމީހުނަށް ލީޝާ އެކަނިވެރިވާނެ ވަރު އިހުސާސް ކުރެވެއެވެ. ލީޝާ ގެއަށް ގެންދިއުމަށްފަހު ކާއެއްޗެއް ދެވޭތޯ ހަޝްމާ ވަރަށް މަސައްކަތް ކުރިއެވެ. ނަމަވެސް އެކަން ކާމިޔާބު ނުވުމާއެކު ލީޝާއަށް ވިސްނަދޭން ފެއްޓިއެވެ.

“ލީޝާ! ދެން އެހާ ދެރަނުވޭ. ތިހެން ދެރަވެފަ ނުކައި އިނީމަ ހަމަ ގެއްލުން ލިބޭނީ ލީޝާއަށް. ލީޝާ މަންމައާ ދޭތެރޭ ވިސްނާފަ ތިހެން އިންކަމުގައިވާނަމަ މަންމައާ ދޭތެރޭ ތިވިސްނަނީ ރަނގަޅަކަށް ނޫން. މަންމައާ ދޭތެރޭ ރަނގަޅަށް ވިސްނާނަމަ މަންމަ ދެރަވާ ކަހަލަ ކަންތަކެއް ލީޝާ ނުކުރާނެ. އަޅެ ނޫންތަ؟”

ލީޝާގެ ކަރުނަތަކަށް ހުއްޓުމެއް ނެތްކަހަލައެވެ. ހަޝްމާގެ އުނގުގައި ބޯއަޅާލައިގެން އޮވެ ލީޝާ ހަމަ ރަނގަޅަށްވެސް ރޯންފެއްޓިއެވެ. އެއީ އަހަރެމެން އިންސާނުންގެ ގޮތެވެ. ދެރަވެފަވާ މީހަކަށް އެހެންމީހަކު ހިތްވަރުދޭން އެއްޗެއް ބުނެފިނަމަ އަދިވަކިން ބޮޑަށް ދެރަވެ ރޮވޭނީއެވެ. ލީޝާއަށް ވެސްވީ ހަމަ އެހެންނެވެ. ދެންއައި ދުވަސްތަކަކީ ލީޝާގެ ހަޔާތުގައި މިހާތަނަށް އައި އެންމެ ހިތްދަތި އެކަނިވެރި ދުވަސްތަކެވެ. ބަލާލި ކޮންމެ ދިމާއަކުން މަންމަގެ ހަނދާންތައް އާވަމުންދިޔައެވެ. މަންމަގެ ހުނުމުގެ އަޑު މުޅިގޭގެ ތެރޭގައި ލީޝާއަށް ވަނީ ގުގުމާލާފައެވެ. ހަޝްމާމެން ވަގުތު ލިބޭވަރަކުން އައިސް ލީޝާގެ ހިތްހަމަޖައްސައިދެން ކުރާ މަސައްކަތްވެސް ދިޔައީ ނާކާމިޔާބު ވަމުންނެވެ. އެންމެފަހުން ލީޝާ ނިންމީ އަހަރީ ޗުއްޓީ ނަގައިގެން ރަށަށް ދިޔުމަށެވެ. ނުދާތާ އެތައް އަހަރުތަކެއްވެފަވާ އަމިއްލަ އުފަން ރަށް ކަމުގައިވާ ކ.ގުރައިދުއަށް ދާން ލީޝާ ނިންމީ ކުޑަކޮށް މާހައުލު ބަދަލު ކޮއްލީމަވެސް ލީޝާގެ ހިތަށް ހަމަޖެހުމެއް ލިބިދާނެ ކަމަށް ވިސްނާފައެވެ. މިކަންވީ ހަޝްމާމެން އެއްގޮތަކަށްވެސް ރުހޭނެ ކަމަކަށް ނޫނެވެ. އެމީހުނަށް ލީޝާ އެކަނި އެފަދަ ހާލެއްގަ ހުއްޓާ ފޮނުވަން ގަބޫލު ނުވެވުނީއެވެ. ނަމަވެސް ލީޝާ ގޮތްދޫނުކުރުމުގެ ނަތީޖާއަކަށްވީ އެހެންމީހުން ގޮތްދޫކުރުމެވެ.

2012 ވަނަ އަހަރުގެ ޖެނުއަރީ މަހުގެ 27 ވަނަ ދުވަހު ކ.ގުރައިދުއަށް ފުރި ފެރީގައި ލީޝާ އިނެވެ. އާ މީހުންތަކެކެވެ. ދުވަހަކުވެސް ލޮލަށް ނުފެންނަ ބައެކެވެ. އާނއެކެވެ. ލީޝާމެން މާލެ ބަދަލުވި އިރު ލީޝާއަށް އެންމެ 6 މަހެވެ. އަމިއްލަ ގެ ފަޅުކޮއްލާފަ ޒުލޭހާ ލީޝާ ގޮވައިގެން މާލެ ދިޔައީ އަޅާލާނެ އެއްވެސް މީހެއްރަށުގަ ނެތީތީއެވެ. އަދި ރަށުގަ އެއްވެސް ވަޒީފާގެ ފުރުސަތެއްވެސް ނެތީތީއެވެ. ދިރިއުޅުމަށް ވަޒީފާއެއް ބޭނުންވާތީއެވެ. ކުޑަ ކުޑަ ލީޝާއަށް ރަނގަޅު މުސްތަގުބަލެއް ހޯދަދިނުމުގެ މަގުސަދުގައެވެ. އޭގެ 20އަހަރު ފަހުން ލީޝާ ރަށަށް އަންނަން ހިތައްއެރީ ކީއްވެ ކަމެއް އެކަކަށް ވެސް ނުވިސްނެއެވެ. 20 އަހަރު ތެރޭގަ ގެ ހުރިހާލެއްވެސް ނޭގެއެވެ. މަންމަ ކުރެން އެނގިފަ އޮތްގޮތުން ގެވަނީ މަންމަ ރަހުމަތްތެރިއެއް ކައިރީގަ ބަލާދިނުމަށް އެދިފައެވެ. އިތުރަށް އެނގޭހާވެސް އެއްޗަކީ ހަމައެކަނި ގެއަށް ކިޔާ ނަމެވެ.

ކ.ގުރައިދުއަށް ފެރީމަޑުކުރުމާއެކު ލީޝާވެސް އޭގެން ޖެޓީ މައްޗަށް ފޭބިއެވެ. ކުރުކޮށް ދެފަޅިން ފަޅައިފައިވާ ރަތްކުލައިގެ ހެދުމަކާ ކަޅު ޖިންސެއް ލައިގެން ކަޅު ބުރުގާއެއް އަޅައިގެން ހުރި އިރު ލީޝާގެ ރީތިކަން ކިތަންމެހާވެސް ބޮޑަށް ހާމަވެއެވެ. ކައިރިންދާ މީހަކަށް ލީޝާގެ ފަރި ހަށިގަނޑަށް ވަށްކަޅިން ނަމަވެސް ބަލާނުލާ ނުދެވޭނެކަން ހަމަ ގައިމެވެ. ދާނެވަކިދިމާލެއް ނޭގި އިރުކޮޅަކު ހުރުމަށްފަހު ލީޝާވެސް އެއްގަމަށް ހިނގައިގަތެވެ. ވަކި ހިސާބަކަށް ގޮސްފަ ކައިރި ހުރި ފިހާރައެއްގެ ދޮރުމަތީގަ ބަހައްޓާފަ ހުރި ޖޯއްޔެއްގައި އިށިންދެލައިގެން އިން މުސްކުޅި ފުރައިގެ ފިރިހެނެއް ކުރެން ލީޝާ ސުވާލު ކޮއްލިއެވެ.

“ބޭބޭ. އެނގޭތަ “ރަންބިން” ކިޔާ ގެ؟”

އެ މީހާ ލީޝާއާ ދިމާއަށް ކުޑަކޮށް ބަލާލުމަށް ފަހު ކުޑަ ހިނިތުންވުމަކާ އެކު ބުނެލިއެވެ.

“އާނ. މި މަގުންދާއިރު ފުރަތަމަ ވާތް ފަރާތުން ޖެހޭ ގޯޅި އަޅާއިރު ކަނާތް ފަރާތުން ދެވަނައަށް ޖެހޭނީ އެގެ.”

ކުރިމަތިން ފެންނަން އޮތް މަގަށް އިޝާރާތް ކޮއްލަމުން އެމީހާ ބުނެލިއެވެ. ލީޝާ ވެސް ކުޑަ ހިނިތުން ވުމަކާއެކު އެމީހާއަށް ޝުކުރު އަދާކުރުމަށްފަހު އެއްއަތުން ފޮށި ހިފައިގެން އަނެއްއަތުން އަތްދަބަސް ހިފައިގެން ހިނގައިގަތެވެ. ދެތިން ފިޔަވަޅު އެޅުނު ތަނާހެން އެއްކަލަ މީހާ ގޮވާލިއެވެ.

” ކޮއްކޯ! ތީ ކޮންކުއްޖެއް؟ ޒުލޭހާގެ ދަރިތަ؟”

“ލައްބަ” ލީޝާ އެބުރިލަމުން ބުނެލިއެވެ.

“އެހެންތަ؟ ކޮބާ ޒުލޭހާ؟”

“މަން…މަންމަ ނިޔާވެއްޖެ” ލީޝާގެ ލޮލަށް ކަރުނަ ޖަމާވިއެވެ.

“ކޮންއިރަކު؟ ވަރަށް ދެރަވެއްޖެ. ދަރިފުޅު އެކަނި ކީއްކުރަން ރަށަށް ދެން ތިއައީ؟” އެމީހާ ދެރަވެލާފަ ބުންޏެވެ.

“ވެއްޖެ ދުވަސް ކޮޅެއް. ކަމެއްނުވޭ. އަންނަ ހިތްވީމަ ހިތައް އެރީދެން އައިސްލާނަމޭ.”

“ކޮއްކޮގެ ކާފަޔާ ބޭބެ މީކުރިން ވަރަށް ގާތް ދެރަހުމަތްތެރިން. ކޮއްކޮގެ ބައްޕަ ނިޔާވެގެން މަންމަ މާލެ ދިޔުމުގެ ކުރިން ވަރަށް ތިގެއަށް ގޮސްވެސް އުޅުނިން.”

“އެހެންތަ. ވަރަށް އުފާވެއްޖެ ބޭބެއާ ދިމާވުމުން. ދެން މިވަގުތު ގޮސްލަނީ. އިނގޭ!”

ލީޝާ އެ މުސްކުޅި މީހާ ކިޔާދިން ގޮތައް ކުރިއަށް ދިޔައެވެ. އިސާހިތަކު ގެވެސް ފެނިއްޖެއެވެ. ލީޝާގެ އަނގަ ހުރީ ތަންމިނަށް ހުލުވިފައެވެ. ބުނާނެ އެއްޗެއްވެސް ނޭގުނެވެ. އެއީ ހަމަ އަމިއްލަ ގެ ބާވައޭ ލީޝާ ހިތާ ހިތުން ސުވާލު ކޮއްލިއެވެ. މިފެންނަމުންދަނީ ހުވަފެނެއްބާވައެވެ. ޔަގީން ނުކުރެވިގެން ދެތިން ފަހަރަކު ގޭގެ ނަންބޯޑުވެސް ކިޔާލިއެވެ. ހަމަ އެނަމެވެ. “ރަންބިން” ހަމަ ހަގީގަތުގަވެސް ރަންބިމެކެވެ. ހީވަނީ ހަމަ ގަނޑުވަރެއްގެ ބަގީޗާއެއް ހެނެވެ. އެކި ވައްތަރުގެ މާގަސްތައް ހައްދާފައިވާ ގޮތުން ހީވަނީ ހަމަ ޝާހީ ބޮޑުގަނޑުވަރެއްގެ ބަގީޗާއެއްހެނެވެ. ލީޝާއަށް އެހެން ހުރެވުނީ ކިހާއިރެއްވަންދެން ކަމެއްވެސް ނޭގެއެވެ. މަޑު މަޑުން ކުރިއަށް ދެވެން ފެށުނެވެ. ކުއްލިއަކަށް ލީޝާ ސިއްސައިގެން ދިޔައީ ފައިގަ އެއްޗެއް ޖެހުނީމައެވެ. ދެކޮޅު ހޯދާ ބަލާލުމަށްފަހު ކުރިއަށް ހިނގައިގަތެވެ. އެތެރެއަށް ވަދެގެންގޮސް ގޭ ދޮރުގައި ހިފި އިރު ހުރީ ތަޅުލާފައެވެ. ނަމަވެސް ލީޝާ ހާހެއްނުވެއެވެ. ހަމަޖެހިލާފަ ގޮސް ގަސްތަކު ތެރޭގަ ހަދާފައިވާ ކުޑަކުޑަ އުނދޯލިގެއަކަށް ވަނެވެ. އަދި އުނދޯލި މަތީ ފޮއްޓާއި ދަބަސް ބަހައްޓާފަ ގަސްތައް ކައިރިއަށް ޖެހިލިއެވެ. ހަމަ ގައިމުވެސް މީ އަޖައިބެއްފަދަ ކަމެކެވެ. އަދި ވަކިން މާލެ ކަހަލަ ތަނެއްގައި އުޅެފަ އައިމީހަކަށް މި ފެންނަމުން ދާމަހައުލަކީ އަޖައިބެކެވެ. އަނެއްކޮޅުން ގޭގޯތި ތެރޭގައި ހައްދާފައިވާ މާބަގީޗާއަކީ ކޮންމެ މީހަކުވެސް އަޖައިބު ކުރުވާ ވަރުގެ ތަނެކެވެ. ލީޝާ ހުރީ ހަމަރަނގަޅަށްވެސް މާމެލީގެ ވަހަށް ގެއްލި ހުސްވެފައެވެ.

ކުއްލިއަކަށް ފަހަތުން މީހަކު އައިސް ކޮނޑުގައި އަތްޖައްސާލިއެވެ. ލީޝާއަށްވި ގޮތެއްވެސް ނޭގުނެވެ. ކަންފަތްމަތީ އަތްއަޅާފަ ބާރަށް ހަޅޭއްލަވައިގަތެވެ. އެ އަތްލި މީހަކު ވާހަކަ ދައްކަން ފެށިއެވެ.
” ތީ ކޮންކުއްޖެއް؟ މިތާ ކީއްތިކުރަނީ؟”

“އަ….އަހަ….. އަހަރެން ލީ…. ލީޝާ”

“ލީޝާ! ތީ ޒުލޭހާގެ ދަރިތަ؟ ކޮއްކޮ އެކަނިތަ؟ މަންމަ ކޮބާ؟” އަދިވެސް އެނަ އަންނަން ހިތަކަށް ނާރާ ދޯ؟”

އެމީހާ އުފަލުން ހުރެ އޭނަގެ ސުވާލުފަތި އެއްކޮށް ލީޝާގެ ކުރިމައްޗަށް އަޅާލިއެވެ. ނަމަވެސް ޖަވާބު ދިނުމުގެ ބަދަލުގައި ލީޝާވެސް ކޮއްލީ ސުވާލެކެވެ.

“ތީ ކާކު؟”

“މީ ކޮއްކޮމެން ދިޔަފަހުން މިގެ ބަލަހައްޓާ މީހާ. ޒުލޭހާ ދަމުން ދިޔައީ އަހަރެން ކައިރީ މިގެ ބަލަހައްޓާދޭށޭ ބުނެފަ. އެކަން ކުރަމުން މިދަނީ އިރާދަ ކުރެއްވިއްޔާ. ދައްތަ އަށް ކިޔަނީ ޝަރީފާ. ކޮއްކޮ ހިނގާ އެތެރެއަށް. ކޮބާ ދަބަސްތައް.” އެމީހާ ލީޝާ އާ ދިމާއަށް އެނބުރި ވާހަކަ ދައްކަމުން ގެންދިޔައެވެ.

”އެކޮޅު އުނދޯލީގަ” އެމީހާ ފަހަތުން ހިނގައިގަންނަމުން މަޑުމަޑުން ލީޝާ ބުނެލިއެވެ.

ގޭތެރެއަށް ވަދެ ދަބަހާ އެއްޗެހި ބަހައްޓާ ހަމަޖެހެލުމަށް ފަހު އަނެއްކާވެސް ޝަރީފާ އޭނަގެ ސުވާލު ކޮއްލިއެވެ.

”ކޮއްކޯ! ޒުލޭހާ ކޮބާތަ؟ ކީއްވެ އޭނަ ނައީ؟”

ލީޝާގެ ލޯ ވަގުތުން ފެންކަޅިވިއެވެ. އެތެރެ އެތެރެއިން ގިސްލެވެން ފެށުނެވެ. އެންމެ ފަހުން ކެތްނުކުރެވިގެން ލޮލުން ލީޝާގެ ރީތި ކޯތާފަތް މައްޗަށް ކަރުނައިގެ ކޯރު ބަންޑުންވިއެވެ. ޝަރީފާއަށް ވީގޮތް ބުނެދޭންވެސް ނޭގެއެވެ.

(ނުނިމޭ)

ލިޔުންތެރިޔާގެ ފުރަމަލަ

ޚަދީޖަތު ސަނާ
ޚަދީޖަތު ސަނާ
މުނިއަވަސްގެ ޑެޕިއުޓީ އެޑިޓަރ ޚަދީޖަތު ސަނާ އަކީ ލޯބީގެ، އަސަރުގަދަ އަދި ހިތާމަވެރި ވާހަކަ ލިޔުމާއި ކިޔުމުގައި ފާހަގަކޮށްލެވޭ ލިޔުންތެރިއެކެވެ. އިޖްތިމާޢީ މައުޟޫތަކަށް ސައްނު ލިޔާ ކުރުވާހަކަތަކުން ބޭނުންވާ މެސެޖް ފޯރުކޮށްދެނީ ވަރަށް އަސަރާއި އެކުގައިކަން ފާހަގަކޮށްލެވެއެވެ.
މި ލިޔުންތެރިޔާގެ ބައެއް އެހެން ލިޔުންތައް

ގުޅުންހުރި ލިޔުން: