ވައިގެމަގުން އެތެރޭގެ ދަތުރުތައްކުރާ އެއަރލައިނެއްގައި މިއަދު މާލެއަށް ކުރި ކުރު ދަތުރެކެވެ. ދަތުރުގެ ދިގުމިނަކީ 35 ވަރަކަށް މިނެޓެވެ.

ކުރުކުރު މި ދަތުރުގައި މަތިންދާބޯޓް ތެރެއިން މިއަދު ފެނުނު މަންޒަރުތައް ކުރިއާއި އަޅައި ބަލާއިރު ތަފާތެވެ. ކުރިއޭ މި ދެންނެވީ ކޮވިޑް19ގެ ބިރުވެރިކަން ފެތުރުމުގެ ކުރިއެވެ.

ފްލައިޓް ތެރެއިން މިއަދު ފެނުނު ބައެއް ކަންކަން ހިއްސާކޮށްލާނަމެވެ. ފްލައިޓަށް އެރުމާއެކު ފަސިންޖަރުންނާ އެންމެ ފުރަތަމަ ބައްދަލުކުރާ ފްލައިޓް އެޓެންޑެންޓް ނުވަތަ ކެބިންކްރޫ ހުރީ އަތަށް އަންގި ލައްވައިގެންނެވެ. މައްސަލައެއް ނެތްތާއެވެ. މިފަދަ ދުވަސްވަރެއްގައި ރައްކާތެރިކަމުގެ ފިޔަވަޅެއްގެ ގޮތުން މިއީ ފެނިގެންދިޔަ ހިތްހަމަޖެހޭ މަންޒަރެކެވެ. ނަމަވެސް މިކަމުން ކުރިމަތިވީ އިތުރު ބިރާސްކަމެކެވެ.

އެތެރޭގެ އުދުހުންތަކުގެ ކުރުކުރު ދަތުރުމަތީގައި ފްލައިޓް ތެރެއިން މާގިނަ ޚިދުމަތްތަކެއް ފޯރުކޮށްދޭކަށް ނުޖެހެއެވެ. ބޯޓަށްއަރައި ދަތުރަށް ފަށާތަނުން ކެބިންކްރޫ އައިސް ވެޓް ޓިޝޫއެއް ދިއްކޮށްލައެވެ.  ގާތްގަނޑަކަށް 27 ވަރަކަށް ފަސިންޖަރުންތިބި ފްލައިޓުން މި ދެންނެވި ވެޓް ޓިޝޫ ބޭނުންކުރީ ދެތިން ހަތަރު ފަސިންޖަރުންނެވެ. މިވެސް ކޮވިޑް19 އާމެދު ބިރާސްވެފައިވާ މިންވަރު ދައްކުވައިދޭ ކަމެއްބާވައެވެ؟ ނޫނީ ކޮވިޑް19 އާމެދު ހޭލުންތެރިވެފައިވާ މިންވަރު ހެއްޔެވެ؟

ދަތުރުމަތީގައި ފެންފޮދެއް ނުވަތަ ފިނި ބުއިމެއް ދިނުމަކީވެސް މިފަދަ ދަތުރެއްގައި އޮންނަ އާދައެކެވެ. މިއަދުގެ ދަތުރުމަތިން ފެނިގެން ދިޔައީ ދޭއް ނުވަތަ ތިން ފަސިންޖަރުން ފިޔަވައި ހަމަ އެއްވެސް ފަސިންޖަރެއް ފެންފޮދެއްހައި މިންވަރުވަރުވެސް ބޭނުންނުކުރި ތަނެވެ. ޚުދު އަޅުގަނޑުވެސް މި ލިސްޓްގައި ހިމެނެއެވެ. ބިރާސްކަން ހެއްޔެވެ؟ ނުވަތަ ހޭލުންތެރިކަން ހެއްޔެވެ؟ އަޅުގަނޑުގެ އަމިއްލަ ނަފުސާ ވެސް މި ސުވާލުކޮށްލީމެވެ.

އަޅުގަނޑުތޯއެވެ. ބިރާސްކަން އެބަ ހުއްޓެވެ. ދަތުރު މި ކުރީ ފަތުރުވެރިން ތަކަކާ އެކުގައެވެ. ބިރާސްކަމަށް ވުރެން ބޮޑަށް، ޞިއްޙަތާމެދު ވިސްނުން ބެހެއްޓުނީ ކަމަށްވެސް ވެދާނެއެވެ. މިފަދަ ކުރު ދަތުރެއްގައި އެ ވެޓް ޓިޝޫއާއި އެ ފިނި ބުއިން ބޭނުންނުކޮށް ފަރުޖައްސައިލެވެން އޮތްއިރު، އެ ބޭނުން ނުކުރުމަށް އަޅުގަނޑަށް ނިންމުނީއެވެ. އެހެން ފަސިންޖަރުންގެ ވިސްނުންފުޅު ހުރީވެސް ހަމަ މިހެން ކަމަށް ވެދާނެއެވެ.

ބިރާސްކަން ހުރީ އެއްވެސް ޙާލެއްގައި ދަތުރުކުރި އެއަރލައިން އާމެދު ޝައްކެއް އޮވެގެނެއްވެސް ނޫން އިނގޭތޯއެވެ. ޞިއްޙީ ރައްކާތެރިކަމާމެދު އިހުނަށްވުރެން ބޮޑަށް ވިސްނުން ބެހެއްޓުނީއެވެ. އަޅުގަނޑު ހިތުން މިއީ ހެޔޮ ފާލެކެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: