ކޮވިޑް-19 އަކީ މި ފަހުން ދުނިޔެ ދުށް އެންމެ ނުރައްކާތެރި އެއް ބަލިމަޑުކަން ކަމާމެދު ދެބަސްވެވޭކަށް ނެތެވެ. ޤައުމުތަކުގެ މިސްކިތްތަކާ، ކެޕޭތަކާއި ޕާކްތަކާއި ސްކޫލުތަކާއި މިހެންގޮސް މީހުން އެއްވެ އުޅޭ ހުރިހައިތަނެއް ބަންދުކޮށް ނިމިއްޖެއެވެ. ބަލިން ރައްކާތެރިވުމަށް އޮތް އެންމެ ރަނގަޅު ގޮތަކީ އިޖްތިމާޢީ ގައިދުރުކަން ދެމެހެއްޓުން ކަމަށް ކަމާބެހޭ އެންމެހާ ފަރާތްތަކުން މެދުނުކެނޑި އެ އަންނަނީ ގޮވަމުންނެވެ.

ކޮވިޑް-19 އަކީ އާދައިގެ ބައްޔެއް ކަމަށް ދެކެން އެއްގޮތަކަށްވެސް ހެޔޮނުވާނެއެވެ. މިކަމަކީ ބައެއްގެ މަޝްހޫރުކަން އިތުރުކުރަން ބޭނުންކުރާ ހަތިޔާރަކަށް ހަދައިގެންނުވާނެއެވެ. މިކަމަކީ ސިޔާސީ މަންފާއެއް ހޯދަން ބޭނުންކުރާ ހަތިޔާރަކަށްވެސް ހަދަން ހެޔޮނުވާވަރުގެ ސީރިއަސް ކަމެކެވެ. އެކަން އެނގެނީ މި ބަލީގެ ވޭން އުފުލަން ޖެހިފައިވާ މީހުންގެ ވާހަކަތަކުންނެވެ. އެކަން އެނގެނީ މި ބައްޔަށް ފަރުވާދިނުމަށް، އަމިއްލަ ފުރާނަ އަތްމައްޗަށް ލައިގެން ނުކުމެތިބި ޞިއްޙީ ބޭފުޅުންގެ ވާހަކަތަކުންނެވެ. މި ޤައުމުގައި އެކަންޏެއް ނޫނެވެ. ދުނިޔޭގެ ހުރިހައި ބައްރެއް، ހުރިހައި ޤައުމެއްގައިވެސް ކަން ހުރިގޮތަކީ މިއީއެވެ.

ކަން މިހެން އޮތް އިރު، ކޮވިޑް-19 އަކީ އާދައިގެ ކަމެއްގެ ގޮތުގައި ދެކެން ހެޔޮނުވާނެއެވެ. އެކަން މި ވޭން ތަހައްމަލުކުރަމުން އަންނަ އުމުރުން 39 އަހަރުގެ ބްރެޒިލް އަންހެނެއް އައިސީޔޫގައި އޮވެ މިއޮތީ ކިޔައިދީފައެވެ. އެ ވީޑިއޯގެ ދިވެހި ސަބްޓައިޓްލް އާއެކު، މުނިއަވަސް އިން މިވަނީ ވީޑިއޯއެއް ތައްޔާރުކޮށްފައެވެ. ދިވެހިން ހޭލުންތެރިކުރުވުމަށެވެ. ދިވެހިންނާއި މުޅި ދުނިޔެ ކުރަމުންދާ އިންސާނީ، އަދި ޞިއްޚީ މި ޖިހާދުގައި ބައިވެރިވުމަށެވެ. އައިސީޔޫގައި އޮވެ އެ އަންހެން މީހާ އާދޭހާއެކު އިންޒާރުތަކެއް ދީފައިވެއެވެ. އޭނާގެ ހާލަތު ބުނެދީފައިވަނީ ނޭވާލުމަށް ހަނގުރާމަ ކުރަމުންނެވެ.

 

މި ހާލަތަށް ނުދިއުމަށް އޮތް އެންމެ ފަހި ގޮތަކީ ކަމާބެހޭ ފަރާތްތަކުން ދެމުން އަންނަ އިރުޝާދުތަކަށް ކިޔަމަންވެ ބޯ ލެނބުމެވެ. ޞިއްޙީ ދާއިރާއާއި ސަރުކާރުތަކުގެ ކަމާބެހޭ ބޭފުޅުން ތިއްބެވީ އިންސާނިއްޔަތު ސަލާމަށްކުރުމަށް ރުކުރުވާލާފައެވެ. އެ ބޭފުޅުން އާއްމުންގެ ކިބައިން އެނދެނީ ވަރަށް ކުޑަކުޑަ ކަމަކަށެވެ. މީހުން އެއްވެ އުޅޭ ތަންތަނަށް ނުދިޔުމަށެވެ. ގޭގައި ތިބުމަށެވެ. ގިނަ ގިނައިން ސައިބޯނި ލައިގެން ރަނގަޅަށް އަތްދޮވުމަށެވެ. ނުވަތަ ސެނިޓައިޒާއިން އަތް ސާފުކުރުމަށެވެ. ކިނބިހި އަޅާ ކެއްސާ އިރު، އުޅަނބޮށީގެ އެތެރޭ ބައިން ކަވަރ ކުރުމަށެވެ.

ކޮވިޑް-19 އަކީ އާދައިގެ ކަމެއްގެ ގޮތުގައި ދެކެން ހެޔޮނުވާނެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: