| MUNIAVAS

މިދިޔަ ޑިސެމްބަރު މަހު ޗައިނާއިން އުފަންވެގެން މިހާރު މުޅި ދުނިޔެއަށް ފެތުރެވިފައިވާ ކޮރޯނާވައިރަހަކީ ޕެންޑެމިކް އެއް ނުވަތަ ދުނިޔެއަށް މެދުވެރިވި ބަލާއާފާތެއްގެ ގޮތުގައި ދުނިޔޭގެ ސިއްހަތު ޖަމިއްޔާ ޑަބްލިޔުއެޗްއޯއިން އެވަނީ ސިފަކޮށްފަ އެވެ. އެ ބަލި ފެތުރުން ދުވަހެއް ދުވަހަކަށް އިތުރުވަމުންދާއިރު، ރާއްޖޭގެ ތާރީޚުގައި ވެސް ފުރަތަމަ ފަހަރަށް މިވަނީ ސިއްހީ ކުއްލި ނުރައްކަލުގެ ހާލަތެއް އިއުލާން ކޮށްފައެވެ.

ހަމަ އެއާއި އެކު ދަތުރުފަތުރު ކުރުމާއި ރާއްޖެ އެތެރެވުމާއި ބޭރުވުން ކޮންޓްރޯލްކޮށް، ސްކޫލްތަކާއި އޮފީސްތައް ބަންދުކޮށް ރާއްޖޭގެ ތާރީޚުގައި ވެސް އެންމެ ހަރުކަށި ފިޔަވަޅުތައް އަޅަން ޖެހިފައި މިވަނީ މިފަހަރު އެވެ. އާންމު ދިރިއުޅުމާއި މަސައްކަތްތައް އެކަންޏެއް ނޫނެވެ. ދައުލަތުގެ އާމްދަނީ އާއި އިގްތިސާދަށް ވިސްނާލިޔަސް، އޮތީ ކަންބޮޑުވުމެވެ. އާންމުންގެ ރައްކާތެރިކަމަށާއި މި ހާލަތުން އަރައިގަތުމަށް މިހާ ވަރުގަދަ ފިޔަވަޅުތަކެއް އަޅަމުން ދާއިރު ވެސް، އޭގެ ސީރިއަސްކަން ގިނަ ބަޔަކު ގަބޫލުކުރަނީ ކިހާ މިންވަރަކަށްތޯ ސުވާލު އުފެދެ އެވެ.

އިގްތިސާދަށް ލޮޅުން އަޔަސް އަދިި އާމްދަނީއަށް ހުރަސް އެޅުނަސް އެކަން އެގޮތަށް ކުރަން ސަރުކާރަށް މަޖުބޫރެވެ. ކުރު ގޮތަކަށް ބުނާނަމަ، ރާއްޖެ ފަދަ ގައުމަކަށް ނިންމޭނެ އެންމެ އުނދަގޫ ނިންމުންތައް އެވަނީ ނިންމާފައެވެ. އެކަމަކު ސަރުކާރުން އަޅަން ބޭނުން ނުވާނެ ފަދަ ކިތަންމެ ފިޔަވަޅުތަކެއް އަޅަމުން ދާއިރު ވެސް، އާންމު ދިރިއުޅުމުން މާބޮޑު ބަދަލެއް އަދި ނުފެނެ އެވެ.

ބުރުޖެހުމާއި ބާރު ބާރަށް ސައިކަލު ދުއްވުން މަދެއް ނޫނެވެ. ސައި ހޮޓާތައް ބޭރުގައި ހުންނަ “ރަތް ދަވާދުގަނޑު” އަދިވެސް އެގޮތުގައެވެ. މަގުމައްޗަށް ކުޅު ޖެހުމާއި ކުނި އެޅުން މަދެއް ނުވިއެވެ. ރައްކާތެރިވުމުގެ ނަމުގައި ގެންގުޅޭ ސާޖިކަލް މާސްކް ވެސް އެއްލައިލަނީ މަގުމައްޗަށެވެ. މާލެެއަށް އެކަނި ބެލިޔަސް، މި މަންޒަރު އެބަ ފެނެ އެވެ.

ކޮރޯނާވައިރަސް ހުރި 13 މީހަކު ފެނިއްޖެ އެވެ. އެކަމަކު މިހާތަނަށް އެއްވެސް ދިވެއްސަކު އޭގެ ތެރޭގައި ނުހިމެނެ އެވެ. އަދި އަމުދުން، މާލެ ފަދަ ތޮއްޖެހިފައިވާ ތަނެއްގައި އުޅޭ މީހެއްގެ ގައިން އެ ވައިރަސް ނުފެނި އޮތުމަކީ އެއަށް ވުރެ ބޮޑު ނަސީބެވެ. އެ ހާލަތު އަތުވެއްޖެ ނަމަ، މުޅި މާލޭ ގާތްގަނޑަކަށް ހުއްޓުމަކަށް ގެންނަން ޖެހޭނެ އެވެ.

ސުވާލަކީ މި ހާލަތުގައި ކަމާބެހޭ ފަރާތްތަކުގެ ބަހަށް ބޯލެބުމެއްނެތި، ދިވެހިން ދިވެހިންގެ ގޮތުގައި ބޯ ހަރުކަންމަތީ އަބަދަށް ތިބޭނީތޯއެވެ؟ ނޫނީ ބޯހަރުކަން ދޫކޮށް ބޯލަބާނީތޯއެވެ؟

ދެބަސްވެވެން ނެތް ހަގީގަތަކީ މި ހާލަތު ދެމިގެން ހިނގައްޖެ ނަމަ، މާލީ ގޮތުންނާއި އެހެން ގޮތްގޮތުން މުޅި ގައުމުގެ ހާލަތު ވަރަށް ދަށަށް ދާނެ އެވެ. އިގްތިސާދީ ހީނަރުކަމާ ހެދި މުސާރަތައް ކުޑަވުމާ ހަމައިން މިކަން ނުނިމޭނެ އެވެ. އޭގެ އިތުރަށް އެތައް ވަޒީފާއެއް ގެއްލި، އާ ވަޒީފާއެއް ލިބުން ދަތިކަމަކަށް ވެސް ވާނެ އެވެ. މިހާރު ވެސް މަޑުމަޑުން އެ މަންޒަރު ދަނީ ފެންނަމުންނެވެ. އެހެންވެ، ކޮންމެ ގޮތެއް ހަދައިގެން ވިޔަސް، އެންމެން ގުޅިގެން ވީހާވެސް އަވަހަކަށް މި ހާލަތުން އަރައިގަތުން ނޫން ގޮތެއް ނެތެވެ.