އޭޕްރީލް 15 ވީ ބުދަ ދުވަހަށް މުޅި ދިވެހި ބިން އަލިވިލިގެން ދިޔައީ، މުޅި ދީބުން ކަރުނަ ހިލުވާލި ޚަބަރަކާއެކުގައިއެވެ. ވެރިރަށް ފުރަ މާލެއިން ކޮވިޑް-19 އަށް ދިވެއްސަކު ފައްސިވިކަމުގެ ބިރުވެރި ނާމާން ޚަބަރާއެކުގައެވެ. ހަމަ އެއާާއިއެކު، މުޅި ފުރަ މާލެ މިވަނީ ލޮކްޑައުން ކޮށްފައެވެ. އެ ހިތާމަވެރި ޚަބަރާއެކު ދުވަސް ނިމެން ދަނިކޮށް އިތުރަށް ހިތްތަކަށް ބިރުވެރިކަން ވައްދާލީ އެންމެ ދެ އަހަރުވެސް ނުވާ ތުއްތު ކުއްޖަކު ހަމަ މާލެއިން ފައްސިވިކަމުގެ ހިތްދަތި ޚަބަރާއެކުގައެވެ.

މުޅި ރާއްޖޭގެ ހުރިހާ ކަމެއް އެބިމަކަށް ބަރޯސާވެފައި އޮތް ފުރަމާލެ ބަންދުވުމާއެކު، މުޅި ރާއްޖެ މިވަނީ ގާތްގަނޑަކަށް ހުއްޓުމަކަށް އައިސްފައެވެ. މި ހިތްދަތި ކަމާއެކު އެތައް ބައެއްގެ އިހުމާލު މިކަމުގައި ވާކަމަށް ބައެއް ފަރާތްތަކުން މީސްމީޑިއާގައި ވަނީ ބުނަންފަށާފައެވެ.

އެހެންނަމަވެސް މި ވަގުތު އިހުމާލުގެ ވާހަކަ ދެއްކުމަށްވުރެ ގައުމުގެ އާދޭހާއި ކަރުނަ މުހިންމެއްނޫންތޯއެވެ؟ އެންބައިވަންތަކަމަށް އެދި ގައުމު ސަލާންޖަހަމުން ދާއިރު، އިހުމާލުގެ ވާހަކަ ދެއްކުމަށްވުރެ މި ހާލަތުން އަރައި ގަތުމަށް މަސައްކަތް ކުރުން މާމުހިންމެއް ނޫންތޯއެވެ؟

މިއަދަކީ ހިތާމަވެރި ދުވަހެކެވެ. އެންމެން އެކީ މިކަމުން އަރައިގަތުމަށް މަސައްކަތް ކުރަން އެބަޖެހެއެވެ. ސިޔާސީ ބައިބައިވުން ދޫކޮށް މިވަގުތު ކުލަ އަކީ ފެއްސާ، ރަތާއި ހުދުކަމުގައި ހަދަން އެބަ ޖެހެއެވެ. ފަރުދީ ޒިންމާ އަދާކުރައްވާ މާތް ﷲ އަށް ދުޢާކުރުމުގައި ގިނަ ވަގުތު ހޭދަކުރަން އެބަޖެހެއެވެ.

އަޅުގެ ވެރި ﷲ! އިނބަ އިލާހު ނޫނީ އެހީތެރިކަަމަކަށް، މަދަދަކަށް އެދޭނޭ އެހެން ފަރާތެއް އަޅަމެންނަށް ލިބިގެން ނުވެއެވެ. އިނބަ އިލާހު އެދިވޮޑިގަންނަވަނީ ދެންނެވުމަށެވެ. އަޅަމެން އިބަ އިލާހަށް ފުރިހަމަ އިތުބާރު ކުރާ ޙާލު އެދި މި ދަންނަވަނީ ކޮވިޑް-19 އިން އަޅަމެންނާއި، އަޅަމެންގެ އަހުލުން އަދި މުޅި އިންސާނިއްޔަތު ސަލާމަތް ކޮށްދެއްވުމަށެވެ. އަޅަމެންގެ ފާފަ ފުއްސަވައި، އަޅަމެންނާމެދު އޯގާވަންތަވެ ވޮޑިގަންނަވާންދޭއެވެ. އަޅަމެންގެ ދުޢާ އިޖާބަ ކުރައްވާންދޭއެވެ. އާމީން!

 

ލިޔުންތެރިޔާގެ ފުރަމަލަ

މުޙައްމަދު ރިފާޒް
ރިފާޒަކީ ސަން އޮންލައިން އާއި ޗެނަލް 13 ގައި މަސައްކަތްކޮށްފައިވާ ތަޖުރިބާހުރި ނޫސްވެރިއެކެވެ.

ގުޅުންހުރި ލިޔުން: