ރާއްޖޭގެ މެދު ދެކުނު އުދަރެހުން ވިދާލި އަލިގަދަ ތަރިއެއް ކަމަށްވާ، ތިމަރަފުއްޓަކީ އެންމެ އިހުޒަމާނުއްސުރެން ތަފާތު އެއްބައިވަންތަކަމެއް ދައްކަމުން އަންނަ ހީވާގި ރައްޔިތުންތަކެއް ދިރިއުޅެމުންދާ ރަށެކެވެ. ގައުމާއި، ރަށަށް ދިމާވާ ކޮންމެ ކޮޅިގަނޑެއްގައި ސާބިތުކަމާއެކު ކަށިން ހިތްވަރު ނެރެގެން މަސައްކަތްކުރާ އެކުވެރި ރައްޔިތުންތަކެއް ދިރިއުޅެމުންދާ ރަށެކެވެ.

އާދޭހެވެ! މިހެން މިދެންނެވީ ސަބަބެއް ނެތި އެއް ނޫނެވެ. ދިވެހިރާއްޖެ އަށް ކަރަންޓުގެ ޚިދުމަތް ތަޢާރަފު ވެގެން ދިޔައިރު، އެންމެ ފުރަތަމަ އިންޖީނުގެ އެއް ބިނާކޮށް ކަރަންޓުގެ ޚިދުމަތް ފޯރުކޮށްދިން ރަށްތަކުގެ ތެރޭގައި ތިމަރަފުށި ހިމެނެއެވެ. މި އިންޖީނުގެ ބިނާކޮށް ކަރަންޓުގެ ޚިދުމަތް ފޯރުކޮށްދިނީ ތިމަރަފުށީ ރައްޔިތުންގެ އަމިއްލަ ޖީބުން ޚަރަދުކޮށްގެން ރެޔާއި، ދުވާލު ދާ އޮހޮރުވައިގެން އެ ރައްޔިތުން ނިކުމެ ކުރި މިންނެތް ބުރަ މަސައްކަތުންނެވެ. ތިމަރަފުށީގައި އެންމެ ފުރަތަމަ ޖެޓީ އެއް ބިނާކުރީ ވެސް ރައްޔިތުންގެ އަމިއްލަ ޖީބުން ޚަރަދުކޮށް، ހަށިގަނޑުގެ އެކި ގުނަވަންތަކުން ލޭ އޮހޮރުވާލައިގެން އެ ރައްޔިތުން ނިކުމެ ކުރި ބުރަ މަސައްކަތުންނެވެ. ހަމަ އެފަދައިން ތިމަރަފުށީގައި އެންމެ ފުރަތަމަ ސިއްޙީ ޚިދުމަތް ދޭ މަރުކަޒެއް ބިނާކުރީ ވެސް އެ ރައްޔިތުންގެ އަމިއްލަ ޖީބުން ޚަރަދުކޮށްގެން ކުރި ބުރަ މަސައްކަތުންނެވެ. އެއީ އަޅުގަނޑު މިދަންނަވާ ތިމަރަފުށީ ރައްޔިތުންނެވެ. އެކުވެރިކަމާއި، އެއްބައިވަންތަކަމުގެ ލާމަސީލު ރައްޔިތުންނެވެ.

މިއަދު ވައިރަހެއްގެ ސިފައިގައި މުޅި ގައުމަށް ކުރިމަތިވެފައި މިވާ، މި ނުރައްކާތެރި ގަދަ ތޫފާނުގައި، އާބާދިގައި ގާތްގަނޑަކަށް 3000 މީހުން ދިރިއުޅެމުންދާ ތިމަރަފުށިން ފެނިގެންދަނީ، ކުރިންސުރެ އެރަށުގެ ރައްޔިތުންގެ ކިބައިން ފެންނަ އެއްބައިވަންތަކަމާއި، އަޚުވަންތަކަމެވެ. ކަމާއިބެހޭ މުއައްސަސާތަކުން އަންގާ އެންގުންތަކަށް އިޖާބަދީ ރަށު ރައްޔިތުން ތިބީ ގެތަކަށް ވަދެ ރައްކާތެރިކަން ހޯދައިގެންނެވެ. ޒަރޫރީ ބޭނުމެއްގައި ނޫނީ ރައްޔިތުން ގެއިން ބޭރަށް ނިކުމެ ހަދާ ތަނެއް ނުފެނެއެވެ. ރަށުގެ މަގުތަކަށް ވަނީ ހަމަހިމޭންކަން ވެރިވެފަ އެވެ. އެރަށުގެ ރައްޔިތުންގެ ކިބައިން ފެނިގެން ދަނީ ވަރަށް ފުރިހަމަ އަށް ފަރުދީ ޒިންމާ އަދާކުރަމުން ގެންދާ މަންޒަރެވެ. މި ބިރުވެރި އަދި އުދަނގޫ ދަނޑިވަޅުގައި، ރަށުގެ ކުދިބޮޑު އެންމެން ދައްކަމުން ގެންދަނީ، އާދަޔާ ޚިލާފު ހިތްވަރެކެވެ.

ކޮރޯނާ ވައިރަސް ނުވަތަ ކޮވިޑް-19 އޭ ކިޔުނު މި ނުރައްކާތެރި ތޫފާނުގެ އަސަރު ދިވެހިރާއްޖޭގެ ގޮނޑުދޮށްތަކާއި ހަމައަށް ނުފޯރަނީސް ތިމަރަފުށީ ކައުންސިލާއި، ކޮވިޑް ޓާސްކްފޯސް އަދި ކަމާއިބެހޭ އެހެން މުއައްސަސާތަކުން ގުޅިގެން އެކަމަށް ތައްޔާރުވާން ފެށިއެވެ. އެގޮތުން، ރަށުގައި ދިރިއުޅޭ “ހައި ރިސްކް” ފަރާތްތައް ފާހަގަކޮށް ކަންކަން ކުރިއަށް ގެންދާނެ ގޮތުގެ ރޭވުންތައް ރާވައި އޭގައިވާ ގޮތަށް އަމަލުކުރުމުގެ މަސައްކަތް ފެށިއެވެ. ގޭގެ އަށް ޒިޔާރަތްކޮށް ކޮވިޑް-19 އާއި ގުޅޭ މަޢުލޫމާތުތައް ފޯރުކޮށްދިނެވެ. ރަށުގެ ވިޔަފާރިވެރިންނާއި ގުޅިގެން ފިހާރަތަކާއި، ރެސްޓޯރެންޓް ތަކުން ޑެލިވަރީގެ ޚިދުމަތް ދޭގޮތަށް ހަމަޖައްސައި، ވިޔަފާރި ކުރުމުގައި ނަގުދު ފައިސާގެ ބަދަލުގައި ބޭންކް އެކައުންޓަށް ފައިސާ ޖަމާކުރެވޭނެ ގޮތަށް ވަނީ ހަމަޖައްސާފައެވެ. ރައްޔިތުން ގޭގައި ތިބެގެން ފަސޭހަކަމާއިއެކު ޒަރޫރީ ހުރިހާ ބޭނުންތަކެއް ފުދޭނެ ގޮތް ވަނީ ހަމަޖައްސާފައެވެ.

ރައްޔިތުންގެ ރައްކާތެރިކަން ކަށަވަރުކުރުމަށް އަޅާފައިވާ މުހިންމު އެހެން ފިޔަވަޅުތަކަށް ބަލާއިރު، ރަށުގެ ރަށްވެހީން ފިޔަވައި، ބޭރުން ރަށަށް ޒިޔާރަތްކުރާ އެއްވެސް ފަރާތަކަށް ރަށަށް އެރުން މަނާކުރުމާއި، ރަށުގެ ރަށްވެއްސެއް ނަމަ، ސްކްރީން ކުރެވި އެކަހެރިކޮށް ބަހައްޓަން ޖެހޭ ފަރާތްތައް އެކަހެރިކުރުމުގެ މަސައްކަތް ދަނީ ކުރެވެމުންނެވެ. މާލެ ދަތުރުކުރާ ރަށު ބޯޓުތައް ރަށަށް ބަނދަރުކުރުމަށް ފަހުގައި އޭގެ ފަޅުވެރިން 14 ދުވަހުގެ މުއްދަތަށް ރަށަށް ނާރާ ބޯޓުގައި މަޑުކުރަން ޖެހޭގޮތަށް ވަނީ ހަމަޖައްސާފައެވެ. ބިރުވެރިކަމާއި ނާމާންކަމުން ފުރިފައިވާ މި ދުވަސްވަރުގައި ތިމަރަފުށީ ކައުންސިލާއި، ކޮވިޑް ޓާސްކްފޯސް އަދި ކަމާއިބެހޭ އެހެން މުއައްސަސާތަކުން ގުޅިގެން ރައްޔިތުންގެ ރައްކާތެރިކަން ކަށަވަރުކުރުމަށް އަޅާފައިވާ ފިޔަވަޅުތަކަކީ ފާހަގަކޮށްލަންޖެހޭ ޝުކުރުވެރިވުން ޙައްޤު މަސައްކަތްތަކެއްކަން ފާހަގަކޮށްލެވެއެވެ.

ކޮވިޑް-19 އާއި ގުޅިގެން ތިމަރަފުށީގެ ޙާލަތާއި ގުޅޭގޮތުން މުނިއަވަސް އިން ކުރި ސުވާލަކަށް ޖަވާބުދެއްވަމުން، އެ ރަށުގައި އިސްވެ ހަރަކާތްތެރިވާ ފަރާތަކުން ވިދާޅުވީ މާތް ﷲ ގެ އިރާދަފުޅުން ތިމަރަފުށީގެ އާންމު ޙާލަތު ރަނގަޅުކަމަށާއި، ކޮވިޑް-19 އަށް ޝައްކުކުރެވޭ އެއްވެސް މީހަކު އަދި ނެތްކަމަށެވެ. އެފަރާތުން އިތުރަށް ވިދާޅުވި ގޮތުގައި މަގުތަކުގައި ޒަރޫރީ ބޭނުމެއް ނެތި މީހުން ނިކުމެ ނޫޅޭ ކަމަށާއި، އާންމު ރައްޔިތުންގެ ކިބައިން ލިބިގެން ދަނީ ވަރަށް ފުރިހަމަ އެއްބާރުލުމެއް ކަމަށެވެ. އަދި އެކަމަށްޓަކައި ހިތުގެ އެންމެ ފުންމިނުން ޝުކުރު އަދާކުރައްވާ ކަމަށް ވެސް ވިދާޅުވިއެވެ. ކޮވިޑް-19 އަކީ ފަރުވާ އެއް ހޯދިފައިނުވާ ބައްޔެއް ކަމުން، ކަމާއިބެހޭ ފަރާތްތަކުން ދެއްވާ އިރުޝާދުތަކާއި އެއްގޮތަށް ޢަމަލުކުރުމުގައި ދެމިތިބުމަށް އާންމު ރައްޔިތުންނަށް އެފަރާތުން އިލްތިމާސް ކުރެއްވިއެވެ.

މިއަދު މުޅި ތިމަރަފުށިން ފެނިގެން ދަނީ، ރަށުގެ ހުރިހާ ރައްޔިތުންގެ ކެތްތެރިކަމާއި، އެއްބައިވަންތަކަމެވެ. ފުރާނަ އަތްމައްޗަށް ލައިގެން މަސައްކަތް ކުރަމުންދާ، ދަރުމަވެރިންގެ ކެރުންތެރިކަމާއި، ފަނޑުވުމެއް ނެތް ހިތުގެ ސާބިތުކަމެވެ. މިހުރިހާ ބޭފުޅުންނަށް ހިތުގެ އެންމެ އަޑިން ޝުކުރުވެރި މިވަނީ، ފަޚުރުވެރި ހިތަކާއި އެކުގައެވެ.

މާތް ﷲ سُبْحَانَهُ وَتَعَالَى އަޅުގަނޑުމެން އެންމެންގެ ފާފަ ފުއްސަވާ، މުސްލިމް އުންމަތް މި ވަބާއިން މިންޖުކުރައްވާށި! އާމީން!

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: