ތުއްތުކުދިންނާއި ކުޑަކުދިންނަކީ މައިންބަފައިންނާއި ބޮޑެތިމީހުންގެ އަޅައިލުމާއި އެހީތެރިކަން ކޮންމެ ކަމެއްގައިވެސް ބޭނުންވާ ބައެކެވެ. ކެއުމާއި ބުއިމުގައެވެ. ފެންވެރުމާއި އަންނައުނުލައި އުޅުމުގައެވެ. މިހެން ގޮސް ހުރިހައި ޒަރޫރީ ބޭނުންތަކަކާއި މުހުތާދުތަކެއް ފުރިހަމަވަނީ މި ދެންނެވި ފަރާތްތަކުގެ އެހީތެރިކަމާއި އެކުގައެވެ.

ތުއްތުކުއްޖާއަށް ސަމުސަލުން ނުވަތަ އަތުން ވިޔަސް، ބަކުން ކާންދޭއިރު ވަނީ ކިހިނެއްތޯ ވިސްނާލަމާތޯއެވެ. ކުއްޖާގެ އަނގަޔަށް ބަކުން ސަމުސަލެއް ލެވުމުން އެކުދިން ފަސޭހަކަމާއި ފަރިތަކަމާއެކު ދިރުވައިލާތޯ އެވެ؟ އެއްވެސް ޝައްކެއްނެތް ގޮތުގައި ސަމުސަލުން ކާންދޭއިރު ކަން ވެގެންދަނީކީ މިހެންނެއް ނޫނެވެ. ސަމުސަލުން ބަކުން ކޮޅެއް ލެވުމުން ތުއްތުކުއްޖާގެ ދުލުން، ބަކުންކޮޅު ބޭރަށް ނެރެނީއެވެ. އަނގަޔަށް ލަވާ އެތިކޮޅު ހަމަ ލެވުމާއިއެކު ބޭރުކޮށްލައެވެ. ބަކުން ކޮޅުން ކުޑަ އެތިކޮޅެއް އަރުތެރެއަށް ނުދެއޭކޭ ނުދެންނެވޭނެއެވެ. އެހެންނަމަވެސް އަނގަޔަށް ލަވާ އެއްޗެހިން ބޮޑުބައެއް ބޭރުކޮށްލަނީއެވެ. ހަމަ ބޭރުކޮށްލުމާއި އެކު އަނެއްކާވެސް މަންމައަށް ޖެހެނީ އަނގައިން ނެރެލާ ކާއެތިކޮޅު ދެވަނަ ފަހަރަށްވެސް ލަވާށެވެ. މިކުރެވެނީ އެއްގޮތަކުން ބަލާއިރު ފޫނެތް ފަޔަކަށް ފެންފުރުން ކަހަލަ ކަމެކެވެ. އާދެ، ކިޔަވައިދިނުމުގައި ސަމުސަލުން ކާންދިނުމަކީވެސް މިފަދަ ކަމެކެވެ.

‘ސަމުސަލުން ކާންދިނުން’، މި މަޖާޒީ މިސާލުގެ މާނައާއިމެދު ވިސްނާލަމާތޯއެވެ. މިއީ އިނގިރޭސިބަހުގައި ޢާއްމުކޮށް ބޭނުންކޮށްއުޅޭ ބަސްކޮޅެއްގެ މާނައެވެ. މީގެ ސާދާ މާނައަށް ވިސްނާލާއިރު ދޭހަވަނީ އިހު ދެންނެވުނުހެން ސަމުސަލުން ތުއްތުކުއްޖާއަށް ބަކުން ކާންދިނުމެވެ. ތަޢުލީމީ ބަހުރުވައިން ނަމަ، ކިޔަވާކުދިން އެކުދިންގެ ވިސްނުމުގެ މާބޮޑު ބޭނުމެއް ކުރުމުގެ ފުރުޞަތުނުދީ ފިލާވަޅެއް ނުވަތަ ތަމްރީނެއް ހަދާނެގޮތް ކިޔައިދީ މަސައްކަތް ކުރުވުމެވެ. ދިވެހިބަހުގައި މި މަޖާޒީ މިސާލު ކިޔައިއުޅޭނީ- އަނގައިން އަނގަޔަށް އަޅައިދިނުމެވެ. ނުވަތަ ވިސްނައިދިނުމަކާއި ނުލައި އެއްޗެއް ކިޔައިދީ ދަސްކޮށްކޮށްދިނުމަށެވެ.

ސަމުސަލުން ކާންދޭ އުޞޫލަކީ ސުކޫލުތަކުގައި ބައެއް މުދައްރިސުން އާދައެއްގެ ގޮތުން ކޮށްއުޅޭ ކަމެކޭވެސް ދެންނެވިދާނެއެވެ. މިދެންނެވި މުދައްރިސުންނަކީ އެއްވެސް ޙާލެއްގައި ތަޖުރިބާ މަދު މުދައްރިސުންނެއް ނޫނެވެ. އުނގަންނައިދުނުމުގެ ހުނަރުތައް އެއްމެ ފުރިހަމަ ގޮތުގައި ބޭނުންނުކުރެވެނީ ކަމަށް ވުން އެކަށީގެންވެއެވެ. ނުވަތަ ލިބިފައިވާ ވަޞީލަތްތަކުގެ މަދުކަމުން މިގޮތަށް ފިލާވަޅުތައް ބައްޓަންކުރެވެނީ ކަމަށްވެސް ވެދާނެއެވެ.

ކޮންމެ ސަބަބަކާއި ހުރެނަމަވެސް، ސަމުސަލުން ކާންދިނުން ނުވަތަ އަނގައިން އަނގަޔަށް އަޅައިދީގެން އުނގަންނައި ދިނުމުގެ އުޞޫލަކީ ދަރިވަރުންނަށް އެދެވޭ ލާބައެއް ލިބޭނެކަމެއް ނޫނެވެ. އެދެވޭ ނަތީޖާއެކޭ މިދެންނެވީ ދާއިމީ ނަތީޖާއަކާއި ހަމައަށް ވާޞިލްވެވޭ ފެންވަރުގެ ސިކުނޑިތަކަކަށް ކުދިންގެ ސިކުނޑިތައް ނުހެދޭނެ ވާހަކައެވެ. މިކަމަކީ ޚުދު މުދައްރިސުންނަށްވެސް ވަރަށް ރަނގަޅަށް އެނގިވަޑައިގަންނަވާނެ ކަމެކެވެ. ކަން މިހެން އޮތްއިރު ދެން އުފެދެނީ ސުވާލެކެވެ. ސަމުސަލުން ކާންދިނުމުގެ އުޞޫލު ބައެއް މުދައްރިސުން ބޭނުންކުރައްވަނީ ކީއްވެގެންތޯއެވެ؟ މިގޮތަށް ކިޔަވައިދިނުމުން ދަރިވަރުން ބަދަލުވެގެންދާނީ ސުވާލުކުރުމުން ޖަވާބުދާރީވާ މެޝިންތަކަކަށެވެ. އައު މާއްދާއެއް ނުވަތަ އައު ފިލާވަޅެއް ހަދަން ޙަވާލުކުރެވޭ ހިނދު އެހެން ފަރާތެއްގެ އެހީއާއި ނުލައި ދަރިވަރަށް މަސައްކަތްކުރަން ނޭނގޭ ނުވަތަ އުނދަގޫ މަރުޙަލާއަކާއި ކުރިމަތިކުރުވައެވެ. ދަރިވަރު ވެގެންދާނީ ނާޤާބިލް ކުއްޖަކަށެވެ. އަމިއްލަ ނަފުސަށް އިތުބާރުނުކުރެވޭ އެހެން ފަރާތަކަށް ބަރޯސާކުރާ ކަހަލަ ދަރިވަރަކަށެވެ. ދަރިވަރުން ކުރިމަގުގައި މަތީ ތަޢުލީމު ހޯދުމަށް މަސައްކަތްކުރާނެކަން އެނގޭ ޙާލުގައި އެކުދިންނަކީ މިފަދަ ބަޔަކަށް ހެދުމުގެ ބޭނުމެއް ނޯންނާނެކަން މުދައްރިސުންނަށްވުރެން ބޮޑަށް އެނގިލައްވާނެ ދެވަނަ ފަރާތެއް ނުވާނެކަން ކަށަވަރެވެ.

މިކަމުގެ ޙައްލަކީ ކޮބައިތޯ ވިސްނާލާއިރު ކަންތައްތަކެއް ފާހަގަކޮށްލެވެއެވެ. އެގޮތުން އެއްމެ މުހިއްމުކަމެއް ކަމުގައި ފާހަގަކުރެވެނީ އިޚްލާޞްތެރިވުމެވެ. އާދެ، އިޚްލާޞްތެރިކަމާއި ޝައުޤުވެރިކަމާއިއެކު އުނގަންނައިދިނުމާއި ކުރިމަތިލުމެވެ. އަދި ފިލާވަޅު ކުރިއަށް ގެންދިއުމުގައި ދަރިވަރުންނަށް އަމާޒުކޮށް ފިލާވަޅު ހުށައެޅުމެވެ. އިނގިރޭސިބަހުން ދަންނަވަނީނަމަ ސްޓޫޑެންޓް ސެންޓާރޑް ޓީޗިންގެ ގޮތްތައް ބޭނުންކުރުމެވެ.

ބޭރުގެ ބައެއް ޤައުމުތަކުގައި މިކަމުގެ ހައްލެއްގެގޮތުން، ޓީއެލްއެލްއެމް (TLLM)ގެ ނަމުގައި ޕްރޮގްރާމެއް ހިންގަމުން ގެންދެއެވެ. ‘ޓީޗް ލެސް – ލާރން މޯރ’ ގެ ނަމުގައި ކުރިއަށް ގެންދާ މި ޕްރޮގްރާމަކީ ތަޖުރިބާކޮށް ކާމިޔާބު ހޯދަމުން އަންނަ ކަމެކެވެ. ޕްރޮގްރާމުގެ ނަމަށް ވިސްނާލާއިރުވެސް، ވީހާވެސް މަދުން ކިޔަވައިދީގެން ދަރިވަރުންނަށް ބޮޑަށް އުނގެނުމުގެ ފުރުޞަތު ލިބިގެން ދިއުމަކީ ކާމިޔާބުކަމެއްކަމުގައި ނުވެ ނުދާނެކަން ކަށަވަރެވެ. މި ޕްރޮގްރާމުގެ ބައެއް މަޤުޞަދުތަކަކީ:

• ދަރިވަރުން ދިރިއުޅުމަށްޓަކައި ބައްޓަންކުރުމެވެ. އެކުދިންނަކީ ސިކުނޑީގައި ތެތްކަން ހުރި ދުނިޔެއަށް ލޯހުޅުވިފައިވާ ކުދިންތަކަކަށް ހެދުމެވެ.

• ކިޔަވައިދޭ ނުވަތަ އުނގަންނައިދޭ މަޢުލޫމާތުގެ ޢަދަދަށް ނުވިސްނާ، ފެންވަރަށް ވިސްނުން ބަދަލުކުރުމެވެ. ކުލާސްތެރޭގައި ޙަރަކާތްތެރިވުމުގައި ފެންވަރުމަތިވުމެވެ. އަމިއްލަ ޝުޢޫރާއި ޚިޔާލުފާޅުކުރުމަށް އިތުރު ފުރުޞަތުތައް ހުޅުވައިލުމެވެ. ދިރިއުޅުމަށް ބޭނުންވާނެ ހުނަރުތައް ތަރައްޤީކުރުމެވެ.

ކުދިންނަކީ ރަނގަޅު ނަމޫނާ ސަޚްޞިއްޔަތުތަކަށް ހެދުމެވެ.

ޢަދަދުމަދުކުރުމުގެ މަޙްފޫމަކީ ހިތުދަސްކުރުވުމާއި، އިމްތިޙާނުތައް ތަކުރާރުކޮށް ހެއްދުމާއި، ސުވާލުތަކަށް ޖަވާބުތައް ދިނުމުގެ އުޞޫލު ދޫކޮށްލުމަށް ނުވަތަ މަދުކުރުމަށެވެ.

• މިފަދަ ޕްރޮގްރާމް ކާމިޔާބު ކުރެވޭނީ މުދައްރިސުންނާއި ސުކޫލުގެ ވެރިން އަދި މިނިސްޓްރީ އޮފް އޭޑިއުކޭޝަނުން މިހިންމު ދައުރެއް އަދާކޮށްގެންނެވެ.

ދަންނަވައިލެވުނު ފަދަ ލަނޑުދަނޑިތަކެއް ޙާޞިލްކުރުމަށްޓަކައި ކޮންމެވެސް ކަހަލަ ޕްރޮގްރާމެއް ދިވެހިރާއްޖޭގެ ތަޢުލީމުދޭ މުއައްސަސާތަކުގައިވެސް ހިންގަން މިއަދު މިވަނީ ލާޒިމްވެފައެވެ. އެހެނީ ދިވެހިރާއްޖޭގައި މަތީ ޘާނަވީ އިމްތިޙާނު ނިންމާ ދަރިވަރުންގެ ނަތީޖާ ދަށްވަމުންދާ ކަމީ ވިސްނާލަން ޖެހިއްޖެ ކަމެކެވެ.

މިގޮތުން ގިނަ ދަރިވަރުން ތަކެއް ފޭލިވެގެން ދިއުމުގެ މައްސަލައަކީ ޤައުމީފެންވަރުގައި ފާހަގަކޮށްލެވޭ ހިތާމަވެރި މައްސަލައެކެވެ. މިމައްސަލައިގެ އަސްލަށް ބަލާއިރު ސަމުސަލުން ކާންދިނުމާއި ގުޅުންހުރިކަމަށް ޤަބޫލުކުރެވެއެވެ.

ތުއްތު ދަރިންނަށް ސަމުސަލުން ކާންދިނުމަކީ އެކަން ކުރުމަށް އޮތް ރަނގަޅު ގޮތެއް ކަމުގައި ވިޔަސް ދަރިވަރުންނަށް އުނގަންނައިދިނުމުގައި މިއީ ބޭނުންކުރުން އެދެވޭ ކަމެއްނޫނެވެ. މިކަން ތަޢުލީމީ ދިރާސާތަކާއި ނަތީޖާތަކުން ދައްކަމުން އެހެރަ ގެންދަނީއެވެ.

މައިގަނޑު މަސްދަރު: www.tomorrow.sg

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: