| MUNIAVAS

އަޅުގަނޑުމެންގެ ދިރިއުޅުމުގެ ވައްޓަފާޅިއަށް ވަރަށް ކުޑަކުޑަ ބަދަލެއް ގެނެސްގެން ޞިއްޙީ އެތައް ފައިދާތަކެއް ހަށިގަނޑަށް ލިއްބައިދޭނެ ގޮތް ވުމަށް ނުއެދޭނެ ހަމަ އެއްވެސް ބޭފުޅަކު ނުހުންނާނެ ކަން ޔަޤީނެވެ. ހިތަށް ލިބެންޖެހޭ ކަސްރަތުތައް އެކަމުގެ ސަބަބުން ލިބެއެވެ. މަސްތައް ވަރުގަދަވެ، ފަހެލިކަން (ފްލެކްސިބިލިޓީ) އިތުރުކޮށްދެ އެވެ. ހުޅުހުޅުގެ މަސައްކަތްތައް ފުރިހަމަކޮށްދެއެވެ. ހާސްވުމާއި ކަންބޮޑުވުން ކުޑަކޮށްދެއެވެ. ކަށިތައް ވަރުގަދަަ ކޮށްދެ އެވެ. ހަށިގަނޑުގައި ހުންނަ ބޭކާރު ސަރުބީގެ މިންވަރު ކުޑަކޮށްދެ އެވެ. ބަލިތަކުން ދިފާޢުވުމަށް އެހީތެރިވެދެ އެވެ.

ބައިސްކަލް ދުއްވުމަކީ ހަށިގަނޑަށް އެތައް ގިނަގުނަ ފައިދާތަކެއް ލިއްބައިދޭ ކަސްރަތެކެވެ. ސީރިއަސް އެތައް ބަލިތަކަކުން އަހަރުމެން ރައްކާާެރިކޮށްދޭ ކަމެކެވެ. ސްޓްރޯކް، ހާރޓް އެޓޭކް، ކެންސަރުގެ ބައެއް ވައްތަރުތައް، ހާސްވުމާާއި ކަންބޮޑުވުން، ހަކުރުބަލި، މާބޮޑަށް ފަލަވުން އަދި ހުޅުހުޅުގައި ރިއްސުން ނުވަތަ އާތުރައިޓިސް އިން ރައްކާތެރިކޮށްދެ އެވެ.

https://youtu.be/ieSntJMxtPk

ބައިސްކަލް ދުއްވުމަކީ ސިއްޙަތަށް ފައިދާހުރިކަމެއްގެ އިތުރުން މަޖާވެސް ކަމެކެވެ. ބައިސްކަލު ދުއްވުމަކީ އަތުން އެއްވެސް ޚަރަދެއް ނުގޮސް ނުވަތަ ކަސްރަތުކުރުމަށް ޚާއްޞަވަގުތެއް ހޭދަނުކޮށް ހަމަ ކޮންމެ އުމުރުފުރާއަކަށްވެސް އެއްމެ އެކަށޭނަ އެއް ކަސްރަތެވެ. އަޅުގަނޑުމެންގެ ދުވަހުގެ ކަންކަމުގައި ބައިސްކަލް ދުއްވާފައި އުޅުމުގެ އާދަ އަށަގެންނެވުމަކީ ހިތްވަރެއް ހުރިއްޔާ އެހާ އުދަނގޫކަމެއްވެސް ނޫނެވެ. ފިހާރައަކަށް އެއްޗެއް ގަންނަން ދާާ ހަމަ ކޮންމެ ފަހަރަކު ސައިކަލް ނުވަތަ ކާރުގައި ނުގޮސް ބައިސްކަލެއްގައި ދިއުމަށް އާދަކުރެވިދާނެ އެވެ. ހަމަ އެހެންމެ އޮފީހަށް ދިއުމާއި ސްކޫލަށް ދިއުންފަދަ ކަންކަން ކުރުމަށްވެސް ބައިސްކަލްގެ ބޭނުން ކުރެވިދާނެ އެވެ.

ރަނގަޅަށް ފިޓްކޮށް ތިބުމަށް ބޭނުންވާ އެއްކަމަކީ ގިނަގިނައިން ހެލިފެލިވެ އުޅުމެވެ. ހެލިފެލިވެ އުޅުން މަދު، ކަންނެތް ދިރިއުޅުމަކުން އަރައިގަތުމަށްޓަކައި ބައިސްކަލް ދުއްވުމުގެ އާދައަށް އެނބުރި ރުޖޫއަވުމަކީ މުހިންމު ކަމެކެވެ. މިއީ ތިމާވެށްޓާއި ރައްޓެހި ކަމެކެވެ. އަތުން އިތުރު ޚަރަދެއް ނުގޮސް ދަތުރުފަތުރު ކޮށްލެވިދާނެ ވަޞީލަތެކެވެ. ފިހާރަތަކަށް ދުއްވަންޖެހޭ ހަމަ ކޮންމެ ފަހަރަކު ބައިސްކަލުގައި ފިހާރައަށް ދިއުން އާދަކޮށްފިނަމަ، ރެއާދުވާލު ކިތައް ފަހަރު އަޅުގަނޑުމެންނަށް ބައިސްކަލް ދުއްވޭޭނެތޯ އެވެ. ނަމަވެސް މިއަދު ގިނަ ދިވެހިންނަށް މިވަނީ ބައިސްކަލް ދުއްވުމަކީ ‘ކަޓް’ ކަަމަކަށް ވެފައެވެ. ޒަމާނީ މީހަކަށް ވާނީ ‘ސަޅި ސައިކެއް’ ދުއްވައިގެންކަމަށް ޤަބޫލުކުރެވެން ފަށާފައެވެ. އެހެންނަމަވެސް ތަހުޒީބު މުޖުތަމަޢު ތަކުގައި ކަންހުރީ މި ފިކުރާއި މުޅިން އިދިކީލަ ކޮށެވެ. ޔޫރަޕްގެ ޤައުމަތަކަށް ބެލިޔަސް ބައިސްކަލް ދުއްވާމީހުންގެ އަދަދު ހީވެސް ނުކުރެވޭހާ މިންވަރަށް އިތުރެވެ. ޗައިނާ އާއި ޖަޕާނަށް ބެލިޔަސް މިއީ މިކަން އޮތްގޮތެެވެ. މިހާރުވެސް މުޅި ދުނިޔޭގެ އާބާދީގެ އެއް ބިލިޔަން މީހުންނަކީ ބައިސްކަލް ދުއްވާމީހުންނެވެ. އެއީ ދަތުރުފަތުރު ކުރުމާއި، މުނިފޫހިފިލުވުމަށް ނުވަތަ ކުޅިވަރެއްގެ ގޮތުގައެވެ.

ޞިއްޙަތާއި ފިޓްނަސް އަށް ބައިސްކަލް ދުއްވުން

ޞިއްޙަތު ރަނގަޅު ކޮށް ބެހެއްޓުމަށްޓަކައި ބައިސްކަލް ދުއްވަން ޖެހެނީ މާގިނައެއްކޮށެއް ނޫނެވެ. ހަފުތާއަކު ދޭއް ނުވަތަ ހަތަރު ގަޑިއިރު ބައިސްކަލް ދުއްވިޔަސް ޞިއްޙަތަށް އެނގުންވާނެ އެވެ. ބައިސްކަލް ދުއްވުމަކީ:
ލުވި ކަމެއް – މަސްތަކަށް ބާރުކުރާ މިންވަރު ކުޑަ، އެހެން ކަސްރަތުތައް ކޮށްގެން ލިބޭ ގެއްލުމަށްވުރެން ކުޑަކޮށް ގެއްލުން ލިބޭ ކަމެއް.
މަސްތަކަށް ރަނގަޅު ކަސްރަތެއް – ބައިސްކަލުގެ ފިޔަވަޅު އަނބުރާއިރު ހަށިގަނޑުގެ ހުރިހައި މުހިންމު މަސްތަކެއްގެ ބޭނުން ކުރޭ.
ފަސޭހަ ކަމެއް – އެހެނިހެން ކުޅިވަރުތަކާއި ޚިލާާފަށް، ބައިސްކަލް ދުއްވުމަށް މާބޮޑު ފިޒިކަލް ހުނަރުތަކެއް ބޭނުމެއް ނުވޭ. ގިނަ މީހުންނަކީ ބައިސްކަލް ދުއްވަން ދަންނަ މީހުންނެވެ. އަދި މިއީކީ ދަސްވުމަށްފަހު ހަނދާންނެތޭ ކަމެއްވެސް ނޫނެވެ.
ވަރުގަދަކަމާާއި ބުންވަރަށް ރަނގަަޅުކަމެއް – ބައިސްކަލް ދުއްވުމުން ބުންވަރު އިތުރުކޮށްދެއެވެ. ވަރުގަދަ ކޮށްދެއެވެ. އަދި މިއީ ރަނގަޅު އެރޮބިކްގެ ކަސްރަތެއްވެސް މެއެވެ.
ފިޓްކޮށް ތިބުމަށް މަޖާ ގޮތެއް – އެހެނިހެން ކުޅިވަރުތަަކާއި ޚިލާފަށް، ބައިސްކަލް ދުއްވުމަކީ ހިތްގައިމު މާހައުލެއްގައި ކޮށްލެވޭނެ ކަމެކެވެ. އަދި މަޖަލަކަށް ރޭސްޖެހުންފަދަ ކަމެއް ރަށުގެ ބޮޑެތިމަގުތަކުގައި ބާއްވާލުމަކީވެސް މަޖާ ހަރަކާތެއްގެ ގޮތުގައި ކޮށްލެވިދާނެ ކަމެކެވެ.

ޢާއްމުކޮށް ބައިސްކަލް ދުއްވުމުން ލިއްބައިދޭ ފައިދާތައް

ބައިސްކަލް ދުއްވުމަކީ އެރޮބިކްގެ ކަސްރަތެކެވެ. މީގެ މާނައަކީ ހިތާއި، ލޭހޮޅިތަކާއި އަދި ފުއްޕާމެއަށް މިކަމުން ރަނގަޅަށް ކަސްރަތު ލިއްބައިދެ އެވެ. ފުންކޮށް ނޭޭވާލެވުމާއި، ދާހިއްލުމާއި ހަށިގަނޑުގެ ހޫނުކަން އިތުރުވުމާާއި ޖުމުލަ ގޮތެއްގައި މުޅި ހަށިގަނޑުގެ ފިޓްނަސް ލެވެލް އިތުރުކޮށްދެ އެވެ.
އާދަވެ ބައިސްކަލް ދުއްވާ މީހަކަށް އަންނަނިވި ފައިދާތައް ލިއްބައިދެ އެވެ.

ކާޑިއޯވަސްކިއުލާ ފިޓްނަސް އިތުރުކޮށްދިނުން
މަސްތައް ވަރުގަދަކޮށްދީ މަސްތަކުގެ ފަހެލިކަން (ފްލެކްސިބިލިޓީ) އިތުރުކޮށްދިނުން
ހުޅުހުޅުގެ މަސައްކަތް ފުރިހަމަކޮށްދިނުން
ހާސްވުމާއި ކަންބޮޑުވުން (ސްޓްރެސް) ލެވެލް ދަށްކޮށްދިނުން
ޕޯސްޗަރ (ހަށިގަނޑު ބަހައްޓާގޮތް ނުވަތަ ހަށިގަނޑުގެ ހިފެހެއްޓުން) އާާއި ގުޅުންތެރިކަން އިތުރުކޮށްދިނުން
ކަށިތައް ވަރުގަދަ ކޮށްދިނުން
ހަށިގަނޑުގައި ހުންނަ ބޭނުންނުވާ ސަރުބީގެ މިންވަރު ދަށްކޮށްދިނުން
ބަލިތަކުން ދިފާޢުކޮށްދިނުން

ޚާއްޞަ ޞިއްޙީ ބައެއް މައްސަލަތަކަށް ބައިސްކަލް ދުއްވުން

ބައިސްކަލް ދުއްވުމުން ހަށިގަނޑުގެ ފިޒިކަލް އަދި މެންޓަލް ޞިއްޙަތު ރަނގަޅުކޮށްދެ އެވެ. ނަތީޖާއެއްގެ ގޮތުން، ގިނަގުނަ ޞިއްޙީ މައްސަލަތަކާއި ކުރިމަތިލާން ޖެހުމުގެ ފުރުޞަތު ކުޑަކޮށްދެ އެވެ.

މާބޮޑަށް ފަލަވުމާއި ބަރުދަން ވަކިމިންވަރެއްގައި ހިފެހެއްޓުން

ބަރުދަން ވަކިމިންވަރެއްގައި ހިފަހައްޓައި ކޮންޓްރޯލް ކުރުމަށްޓަކައި ބައިސްކަލް ދުއްވުމަކީ ވަރަށް އެކަށޭނަ ގޮތެކެވެ. މިކަމުގެ ސަބަބުން ހަށިގަނޑުގެ މެޓަބޮލިކް ރޭޓް އިތުރުކޮށްދިނުމާއި، މަސްތައް އުފެއްދުމާއި ސަރުބީ ވިރުވައިދެ އެވެ. ބަރުދަން ލުވި ކުރަން ބޭނުންނަމަ، އާދަވެ ބައިސްކަލްދުއްވުމާއިއެކު ކެއުންވެސް ވަކި މިންވަރެއްގައި ހިފަހައްޓަން ޖެހެ އެވެ. ބައިސްކަލް ދުއްވުމަކީ ކަސްރަތުކުރުމަށް އަރާމު ގޮތެކެވެ. ބޭނުން ވަގުތެއްގައި ބޭނުން މިންވަރަކަށް ކޮށްލެވިދާނެ ކަމެކެވެ. އެއްމެ ފުރަތަމަ ތަންކޮޅެއް މަދުމަދުން ދުއްވަމުންގޮސް އިތުރުކުރެވިދާނެއެވެ.

ދިރާސާތައް ދައްކާގޮތުން ހަފުތާއެއްގެ ތެރޭގައި އެއްމެ މަދުވެގެން 8400 ކިލޯޖޫލްސް (ގާތްގަނޑަކަށް 2000 ކެލޮރީސް) އަހަރުމެންގެ ހަށިގަނޑުން އަންދަން ޖެހެއެވެ. އާދައިގެ މިންވަރެއްގައި ބައިސްކަލް ދުއްވާާނަމަ، އެއްގަޑިއިރުގެ ތެރޭގައި 1200 ކިލޯޖޫލްސް (ގާތްގަނޑަކަށް 300 ކެލޮރީސް) އަންދައިދެ އެވެ.
ދުވާލަކު ދެފަހަރު (ގާތްގަނޑަކަށް ބައިގަޑިއެއްހައި އިރު) ބައިސްކަލް ދުއްވާނަމަ، ސަރުބީ ވިރުވައިދޭ ނިސްބަތް އިތުރުވެގެން ދާނެ އެވެ. އިނގިރޭސިވިލާތުގައި ކޮށްފައިވާ ދިރާއެއް ދައްކާ ގޮތުން ދުވާލަކު ބައިގަޑިއެއްހާާ އިރު ބައިސްކަލް ދުއްވާނަމަ އަހަރެއްގެ މައްޗަށް ފަސްކިލޯގްރާމްގެ ސަރުބީ ވިރިގެންދާނެއެވެ.

ކާޑިއޯވަސްކިއުލާ (ހިތުގެ) ބަލިތަކާއި ބަސްއިސްކަލް ދުއްވުން

ހިތުގެ ބަލިތަަކާާއި އަދި ހިތާއި ގުޅިފައިވާ ބަލިތަކުގެތެރޭގައި ސްޓްރޯކް، ލޭ މައްޗަށް ދިއުން އަދި ކުއްލިއަކަށް ހިތްހުއްޓުން (ހާރޓް އެޓޭކް) ހިމެނެ އެވެ. އާދަވެ ބައިސްކަލް ދުއްވާނަމަ، ހިތުގެ ހިނގުމާއި ހިތުގެ ޞިއްޙަތު ރަނގަޅުކޮށްދިނުމާއި، ފުއްޕާމެއާއި ލޭ ދައުރުކުރުން ރަނގަޅުކޮށްދީ ކާޑިއޯވަސްކިއުލާ ބަލިތަކާއި ކުރިމަތިލާންޖެހޭ ނިސްބަތް ދަށްކޮށްދެ އެވެ.

ބައިސްކަލް ދުއްވުމުން ހިތުގެ މަސްތައް ވަރުގަދަކޮށްދެ އެވެ. ރެސްޓިންގ ޕަލްސް ދަށްކޮށްދިނުމާއި، ސަރުބީގެ ނިސްބަތް ދަށްކޮށްދެ އެވެ. ދިރާސާތަކުން ދައްކާގޮތުން މަސައްކަތްކުރާ ތަނަށް ބައިސްކަލްގައި ދުއްވާފައިދާ މީހުންނަށް ވައިގެ ތަޣައްޔަރުކަމާާއި ކުރިމަތިވާ މިންވަރު ކުޑަކޮށްދެއެވެ. ނަތީޖާާއެއްގެ ގޮތުން އެފަދަ މީހުންގެ ފުއްޕާމޭގެ ޞިއްޙަތު ރަނގަޅުކޮށްދެ އެވެ. ޑެންމާކުގައި އުމުރުން 20 އާއި 93 އަހަރާއި ދެމެދުގެ 30000 މީހުންގެ މެދުގައި 14 އަހަރުވަންދެން ކޮށްފައިވާ ދިރާސާއަކުން ދައްކަނީ އާއްމުކޮށް ބައިސްކަލް ދުއްވާމީހުންނަށް ހިތުގެ ބަލިތައް ޖެހުމާއި ދުުރުކަމަށެވެ.

ކެންސަރާއި ބައިސްކަލް ދުއްވުން

ކަސްރަތުކުރުމާއި ކެންސަރާާއި ހުންނަ ގުޅުން ދެނެގަތުމަށް އެތައް ބައިވަރު ދިރާސާތަކެއް އަންނަނީ ކުރެވެމުންނެވެ. ޚާއްޞަކޮށް ކޮލޮން (ގޮހޮރުގެ) ކެންސަރާއި އުރަމަތީގެ ކެންސަރަށް މި ދިރާސާތައް އަމާޒުކުރެއެވެ. ދިރާސާތައް ދައްކާގޮތުން ޢާއްމުކޮށް ބައިސްކަލް ދުއްވާނަމަ ގޮހޮރުގެ ކެންސަރު ޖެހުމުން ދުރުކޮށްދިނުމުގެ ފުރުޞަތު ބޮޑެވެ. ބައެއް ހެކިތައް ދައްކާ ގޮތުން އާދަވެ ބައިސްކަލް ދުއްވާނަމަ އުރަމަތީގެ ކެންސަރު ޖެހުމުގެ ނުރައްކަލާއި ކުރިމަތިކުރުވާ މިންވަރު ދަށްވެ އެވެ.

ހަކުރު ބައްޔާއި ކެންސަރު

ހަކުރުބަލީގެ 2 ވަނަ ވައްތަރު ކަމަށްވާ (ޓައިޕް-ޓޫ ޑައިބެޓީސް) ނުވަތަ އިންސިއުލިން އަށް ބަރޯސާ ނުވާ ވައްތަރުގެ ހަކުރުބަލި ޖެހޭ ނިސްބަތް އިތުރުވަމުން އަންނަކަމީ މިހާރު ޢާއްމު ކަންބޮޑުވުމަކަށް ވެފައިވާ ޞިއްޙީ މައްސަލަ އެކެވެ. މި ވައްތަރުގެ ހަކުރުބަލި ޖެހެނީ ހެލިފެލިވެ އުޅުން މަދުވުމުގެ ސަބަބުންނެވެ. ފިންލޭންޑްގައި ވަރަށް ފުޅާ ދާއިރާއެއްގައި ކޮށްފައިވާ ދިރާސާއެއް ދައްކާގޮތުން އާދަވެ ދުވާލެއްގެ މައްޗަށް 30 މިނެޓަށްވުރެން ގިނަވަގުތުގައި ބައިސްކަލް ދުއްވާާ މީހުންނަށް ހަކުރުބަލި ޖެހޭ ނިސްބަތް ކުޑައެވެ.

ކަށްޓަށް ލިބިފައިވާ ގެއްލުމާއި، ހުޅުހުޅުގައި ރިއްސުމުގެ ބަލި (އާތުރައިޓިސް) އާއި ބައިސްކަލް ދުއްވުން

ބައިސްކަލް ދުއްވުމުން މަސްތަކާއި ކަށިތައް ވަރުގަދަކޮށްދެއެވެ. ބެލެންސް ކުރުމާއި ކޯޑިނޭޝަން ރަނގަޅުކޮށްދެ އެވެ. ވެއްޓެން ދިމާވުމާއި ވެއްޓިގެން ކަށީގައި ރެނދުލުމުން ދުރުހެލިކޮށްދެ އެވެ. ހުޅުހުޅުގައި ރިއްސާބަލި (އޮސްޓިއޯ އާރތުރައިޓިސް) ޖެހިފައިވާާނަމަ ބައިސްކަލް ދުއްވުމަކީ އެކަމަށް އޮތް ވަރަށް އެކަށޭނަ ފަރުވާ އެކެވެ. ސަބަބަކީ މިއީ ހުޅުހުޅަށް މާބޮޑު ބާރެއް ނުކުރާ ޒާތުގެ ކަސްރަތަކަށް ވުމެވެ.

ސިކުނޑީގެ ބަލިތަކަށް ބައިސްކަލް ދުއްވުން

އާދަވެ ބައިސްކަލް ދުއްވާނަމަ ސިކުނޑީގެ ބަލިތައް ކަމަށްވާ ޑިޕްރެޝަން (ހިތާމަކުރުމުގެ ބަލި)، ސްޓްރެސް (ހިތަށާއި ސިކުނޑިއަށް ކަންބޮޑުވެގެން ކުރާ ބާރު) އާއި އެންޒައިޓީ (ފިކުރުބޮޑުވެ ހާސްވުން) ފަދަ ބަލިތައްޖެހުމުން ދުރުކޮށްދެ އެވެ. މީގެ ސަބަބަކީ ބައިސްކަލް ދުއްވުމުން ލިބޭ ކަސްރަތުގެ އަސަރާއި ލިބޭ ހިތްހަމަޖެހުމެވެ.

ހަނދާނުގައި ބަހައްޓަންވީ ބައެއް ކަންކަން

• ބައިސްކަލް ދުއްވުމުގެ ސަބަބުން ސީރިއަސް ބައެއް ބަލިތައް ކަމަށްވާ ސްޓްރޯކް، ހާރޓް އެޓޭކް، ކެންސަރުގެ ބައެއް ބާވަތްތައް، ޑިޕްރެޝަން (ހިތާމަކުރުމުގެ ބަލި)، ހަކުރު ބަލި، ފަލަބަލި (އޮބޭސިޓީ) އަދި އާރތުރައިޓިސް (ހުޅުހުޅުގައި ރިއްސުން) ފަދަ ބަލިތަކުން ދުރުހެލިކޮށްދެ އެވެ.
• ބައިސްކަލް ދުއްވުމަކީ ޞިއްޙަތަށް ފައިދާހުރި، މަޖާ އަދި ކޮށްލަން އެހައި އުނދަގޫ ނޫން ކަސްރަތެކެވެ.
• ދުވާލުގެ ހަރަކާތްތަކުގެ ތެރެއަށް ބައިސްކަލް ދުއްވުން ހިމަނާލުމަކީ ފަސޭހަ ކަމެކެވެ. އެގޮތުން ފިހަރާތަކަށް، ޕާރކަށް، ހާބަރަށް، ސްކޫލަށް ނުވަތަ މަސައްކަތު ދިއުމަށް ބައިސްކަލް ބޭނުންކޮށްލެވިދާނެއެވެ.

މަޢުލޫމާތު ހޯދީ:
www.betterhealth.vic.gov.au
http://sihhath.blogspot.com