ނޯޓް: މިވާހަކަ އަކީ “ކިޔުންތެރިންގެ ރިކުއެއްސްޓް” ބައިން ނަގާފައިވާ ހާދިސާއެކެވެ. މީ ކިޔުންތެރިއަކަށް ދިމާވި ހަޤީޤީ ހާދިސާއެއްގެ މައްޗަށް ލިޔެފައިވާ ވާހަކައެކެވެ. މިވާހަކައިގައި ބޭނުން ކޮށްފައިވާނީ އަސްލު ނަންތަކެއް ނޫނެވެ. ކިޔުންތެރިންގެ އަމިއްލަ ޙަޔާތުގެ މައްޗަށް ވާހަކައެއް ލިޔަން ބޭނުން ނަމަ 7967978 މި ނަމްބަރަށް މެސެޖު ކޮށްލަދެއްވުމަށް އެދެމެވެ. ނޫނީ “ވާހަކަ ބައި ޒެލް” ވައިބާރ ގުރޫޕް މެދުވެރިކޮށް ހާދިސާ ޙިއްޞާކޮށްދެއްވުމަށް އެދެމެވެ.
—————-

އަހަރެންނަށް ކޮޓަރިއަށް ވަދެ ވުމާއި އެކު ވަރަށް ބާރަށް ރޮއިގަނެވުނެވެ. އަހަރެންގެ ހިތަށް ވަރަށް އަސަރުކޮށްފިއެވެެ. އަހަރެން ވަރަށް ދެރަވެއްޖެއެވެ. ހިތް ހަލާކުވެ، ސުންނާފަތި ވާވަރު ވެއްޖެއެވެ. މުޅި ދިރިއުޅުން އަހަރެންނަށް ހިމޭން ވެގެން ދިޔަ ފަދައެވެ. އަހަރެން މުޅިން ބާކީ ވީއެވެ. އަހަރެން ފުރާނަ ފަދައިން ލޯބިވި އަހަރެންގެ ފިރިމީހާ އަހަންނާ ވަކިވެގެން ދިޔައީއެވެ. މުޅި އުމުރަށެވެ. އަހަރެންނަށް އަންގާ ވެސް ނުލައެވެ. އަހަރެން ހިތް ފަޅައިގެންދާ ވަރުވެއްޖެއެވެ. އަހަރެންގެ ފިރިމީހާއާ ނުލައި އަހަރެން އުޅޭނީ ކިހިނެއް ހެއްޔެވެ؟ އެއީ އަހަރެންގެ ދިރި ހުރުމެވެ. އަހަރެންގެ ނަސީބެވެ. އަހަރެންގެ ފުރާނައެވެ. ހިތުގެ ވިންދެވެ. ލެވޭ ކޮންމެ ނޭވާއެއް އަހަރެން ލަނީ އަހަރެންގެ ފިރިމީހާއަށް ޓަކައެވެ.

އަހަރެން މަޑުމަޑުން ފިޔަވަޅު ނަގަމުން ގޮސް ކޮޓަރީގެ އަލަމާރި ހުޅުވައިލީމެވެ. އަލަމާރީގައި އޮތް ފޮޓޯ އަލްބަމް ނަގައިގެން އަހަރެން އެނދުމަތީގައި އިށީންނެވެ. ފުރަތަމަވެސް އަހަރެންގެ ލޮލުގައި އަޅައިގަތީ އަހަރެންގެ ފިރިމީހާ، މާއިޒްގެ ފޮޓޯއެކެވެ. އަހަރެންގެ ހިތަށް ކުރީ ބަޔާން ކުރަން ދަތި ހިތްދަތި އަސަރުތަކެކެވެ. އަހަރެން އެ ފޮޓޯއަށް ބަލަހައްޓައިގެން އިނީމެވެ.

“ކީއްވެ؟ މާއިޒް. ކީއްވެ އަހަރެން ދޫކޮށް ތިދިޔައީ؟ އަހަރެން އެކަނި ދޫކޮށްފައި؟ އަހަރެން ހާދަ ހިތާމަ އެކޭ މި ކުރަނީ؟ އާދޭ އަހަރެން ގާތަށް! އަހަރެންނަށް މާއިޒްއާ ނުލާ ނޫޅެވޭނެ” ފޮޓޯއަށް ބަލަހައްޓައިގެން އިނދެ އަހަރެން ރޮމުން ބުނަމުން ގެންދިޔައީމެވެ. އިސާހިތަކު އަހަރެންގެ ސިކުނޑި މާއިޒްގެ ހަނދާންތަކުން ވަށައިލިއެވެ.

***

އެއީ މީގެ 2 އަހަރު ކުރިއެވެ. އަހަރެން އޮފީސް ދަތުރެއްގައި ރ. ދުވާފަރަށް ދިޔައީމެވެ. އެދަތުރު ވެގެން ދިިޔައީ އަހަރެންގެ މުޅި ދިރިއުޅުން ބަދަލު ކޮށްލި ދަތުރަކަށެވެ. އަހަރެންނާއި މާއިޒް ދިމާވީ ރ. ދުވާފަރުންނެވެ. މާއިޒަކީ އެރަށު ސުކޫލްގެ ޓީޗަރެކެވެ. މާއިޒް ފެނުނު ފުރަތަމަ ފަހަރު ވެސް އަހަރެންގެ ހިތުގެ ތެރޭގައި ފެށީ ލޯބީގެ ހަނގުރާމައެކެވެ. އެހަނގުރާމައިގައި އަހަރެންގެ ހިތް، މާއިޒަށް ޓަކައި ކަތިލެވިގެން ދާން ނެގީ ކުޑަ ހިނދުކޮޅެކެވެ. އަހަރެންގެ ހިތް ދިވާނާވެ، އަހަރެން އެ ލޯތްބަށްޓަކަައި މޮޔަވާ ވަރު ވިއެވެ. އަބަދުވެސް މާއިޒްގެ ހަނދާންތައް މިހިތުގައި ހިނގަން ފެށިއެވެ. މާއިޒް ފެންނަ ހިސާބުގައި އަބަދުވެސް ހުންނަން އަހަރެން ބޭނުންވިއެވެ.

ދުނިޔެ ދެކޭ ގޮތުގައި އަހަރެންނާއި މާއިޒަކީ މިހާރު ގާތް ދެރަޙުމަތްތެރިންނެވެ. އެހެންނަމަވެސް، އަހަރެންގެ ހިތުގެ ތެރޭގައި މާއިޒަށް ދެވިފައި ވަނީ ރަޙުމަތްތެރިއެއްގެ މަޤާމެއް ނޫނެވެ. އަހަރެން ދެކެނީ އެއީ އަަހަރެން މި ދުނިޔެމަތީގައި އެންމެ ލޯބިވާ އިންސާނާގެ ގޮތުގައެވެ. އާނއެކެވެ. އަހަރެންނަށް މާއިޒް ދެކެ ވެވުނީ ހަޤީޤީ ލޯތްބެވެ. އެލޯބީގައި އަހަރެން މޮޔަވާން ގާތްވެފައި ވަނިކޮށް، އަހަރެންނަށް ކަންތައް ދިމާވީ އަހަރެންގެ ހިތް އުފަލުން އުދުހިގެން ދާފަދަ ގޮތަކަށެވެ.

މާއިޒް އަހަރެންނަށް ލޯބި ހުށައެޅީއެވެ. އަހަރެންވީ އުފާ ބުނެދޭން ވެސް ނޭނގުނެވެ. ލިޔުމަކުން ބަޔާން ކުރަން ދަތިވާ ވަރަށް އަހަރެން އުފާ ވީމެވެ. ފޮނި ވީމެވެ. ލަސްކުރާކަށް އަހަރެން ބޭނުމެއް ނުވިއެވެ. އަހަރެން މާއިޒަށް އާނބަސް ބުނީ ހިތުން ރުހުމުންނެވެ. ވަރަށް ބޮޑަށް ބޭނުން ވެގެންނެވެ.

މާއިޒާއި އަހަރެން ލޯބީގެ ގޮތުން ގުޅިގެން އުޅުނީ ވަރަށް ލޯބިންނެވެ. މާއިޒަކީ ވަރަށް ހިތް ހެޔޮ، މަޑުމައިތިރި މިޒާޖެއްގެ މީހެކެވެ. ދީނަށް ފަރުވާ ބަހައްޓައި، ދީން ދެކެ ލޯބިވާ މީހެކެވެ. އަހަރެންނާ އެކަނި ދިމާކޮށް އުޅެން ވެސް މާއިޒް ނުރުހެއެވެ. މިހާރުގެ ގިނަ ރިލޭޝަން ތަކުގައި ލޯބިވެރިން އުޅޭ ގޮތާއި، އަހަރެންނާއި މާއިޒްގެ ރިލޭޝަންޝިޕް ވަރަށް ތަފާތެވެ. މާއިޒް އަހަރެންނާ ބައްދަލު ކުރިޔަސް އެންމެ ކައިރި ވެގެން ހުންނަނީ، އަހަރެންނާ 2 ވަރަކަށް ފޫޓު ދުރުގައެވެ.

އެގޮތުގައި އަހަރެމެން ރައްޓެހިވެގެން އުޅޭތާ 1 މަސް ވީއެވެ. އަދިވެސް މާއިޒް އަހަރެންގެ ގައިގައި ބީހިލާފައެއް ވެސް ނެތެވެ. ނަމަވެސް، އަހަރެން ހުރީ މާއިޒްގެ ބީހުންތަކަށް ދަހިވެތި ވެފައެވެ. މާއިޒްގެ ފަރާތުން ކުޑަ މިނުން “ބޮސް” އެއްގެ މިންވަރު ނަމަވެސް، އަހަރެންގެ ތުންފަތަށް ލިބުމަށް އެދި މިހިތް އާދޭސް ކުރެއެވެ. އެކަމު، އަހަރެންނަށް އިސްވެ މިވާހަކަތައް ބުނަން ނުކެރުނީއެވެ. މާއިޒް މިކަމަށް ޤަބޫލު ނުވާނެކަން އެނގެތީއެވެ. އެއަށް ވުރެށް މާއިޒްގެ ހިތުގެ ޢަޤީދާ ވަރުގަދަ ވާނެކަން އަހަރެންނަށް ޔަޤީނެވެ.

މާއިޒް އަހަރެންނާ ކައިވެނި ކުރަން ނިންމިއެވެ. ރައްޓެހިވެގެން މާ ގިނަ ދުވަހު އުޅެން ބޭނުން ނުވާތީއެވެ. އަހަރެން ހާދަ އުފާވީމެވެ. ހިތަށް ހާދަ ހަމަޖެހުމެއް ލިބުނެވެ. އަހަރެންގެ އޮފީސް ދަތުރު ނިމި އޮފީސްގެ މުވައްޒަފުން އެނބުރި މާލެ ދިޔައިރު، އަހަރެން ދުވާފަރުގައި މަޑުކުރީމެވެ. ވަޒީފާއިން ވަކިވުމަށް ފަހުގައެވެ. އެއީ މާއިޒް އަހަރެން ވަޒީފާއަށް ދާން އެއްބަސް ނުވާތީއެވެ.

އަހަރެންނާއި މާއިޒްގެ ކައިވެނި ކުރެވިއްޖެއެވެ. ދެ ހިތުގެ ގުޅުން އިސްލާމީ ރިވެތި އުސޫލުން ގުޅި ލާމެހިއްޖެއެވެ. އަހަރެންގެ ހިތް އުފަލުން ނަށަމުން ދިޔައެވެ. މާއިޒްގެ އަންބަކަށް ވުމުގެ ނަސީބު އަހަރެންނަށް ލިބުމުން އަހަރެން މާތް ﷲއަށް ޝުކުރުވެރި ވީމެވެ.

މުޅިން އައު ދުވަހެއްގެ ހަވީރުގެ ފިނިފިނި ވަގުތެވެ. މުޅި ރަށުތެރެއަށް ހަނާ އަޅަމުން ދިޔައީ ވަރަށް ފިނި މަޑު ވައި ރޯޅިތަކެވެ. ރަށުގެ ރައްޔިތުންގެ ހިތްތަކަށް އެ ވައިރޯޅިތަކުން އަރާމާއި އުފާ ލިބެމުން ދާއިރު، އަހަރެންނަށް ދިޔައީ މާއިޒްގެ ހަށިގަނޑުގެ ހޫނުން އަރާމާއި އުފާ ލިބެމުންނެވެ. ލޯބީގެ މަސްތީ ދާނުގައި އަހަރެން ދިޔައީ މާއިޒާއި އެކު މަސްތީ އުފާވެރިކަން ހާސިލު ކުރަމުންނެވެ. އެތައް ދުވަހަކު އަހަރެންގެ ހިތް އާދޭސް ކުރަމުން ދިޔަ އިޙުސާސްތައް އަހަރެންނަށް ދިޔައީ ލިބެމުންނެވެ. އަހަރެންނަށް މާއިޒްގެ ފަރާތުން އަހަރެން ބޭނުންވި ވަރަށް ވުރެ، އިތުރަށް އަރާމް ލިބުނެވެ. އުފާ ލިބުނެވެ. އެ ހަށިގަނޑުގެ ހޫނުން މިހިތް އަނދާ އަޅިއަށް ވަމުން ދިޔައީ ލޯބީގެ އަލިފާނުގައެވެ.

އަހަރެންނާއި މާއިޒްގެ ކައިވެންޏަށް 1އަހަރު ވީއިރު އަހަރެމެންގެ ދިރިއުޅުން މާލެ ބަދަލުވެެއްޖެއެވެ. މިހާރު މާއިޒަކީ އިިސްކަންދަރު ސުކޫލްގެ ޓީޗަރެކެވެ. އަހަރެންނާއި މާއިޒް އުޅެމުން ދިޔައީ ވަރަށް އުފާވެރި ދިރިއުޅުމެކެވެ. މާއިޒް އަހަރެންނަށް ވަރަށް ލޯބިދީ އަޅާޅައެވެ. އަހަރެންނަށް މާއިޒްގެ އެންމެ ލޯބި ސިފައަކީ ކޮންމެ ދުވަހަކު މާއިޒް ވަޒީފާއަށް ދިޔުމުގެެ ކުރިން އަހަރެންނަށް ދޭ ލޯބި ބޮސްތަކެވެ. ސީދާ އަހަރެންގެ ތުންފަތަށެވެ. އަހަރެންނަށް ބޮހެއް ނުދީ ހަމަ އެންމެ ދުވަހަކު ވެސް މާއިޒް ވަޒީފާއަށް ގޮސްފައެއް ނެތެވެ. މާއިޒް އަހަރެން ދެކެވާ ލޯބީގެ މިންވަރު ކިތަންމެ ހާވެސް ބޮޑަށް އަހަރެންނަށް ވަޒަންކުރެވެއެވެ. އަހަރެންް އަބަދުވެސް މާއިޒްގެ އަންބަކަށް ވީތީ އުފާކުރަމެވެ. މާއިޒަކީ އަހަރެންނަށް ލިބުނު ނިޢުމަތެއް ކަމަށް އަހަރެން ޤަބޫލުު ކުރަމެވެ. މާއިޒްގެ ސަބަބުން އަހަރެން ދީނީ ކަންކަމަށް ވެސް ލޯބި އިތުރުވިއެވެ. ދީނީ ވާޖިބުތައް އަަދާކުރުމުގައި ފަރުވާ ބެހެއްޓުނެވެ.

ދުވަސްތައް ބާރު ދުވެލީގައި ދައުރު ވަމުން ދިޔައެވެ. އަހަރެންނަށް ހޭލެވުނީ މާއިޒް ވަރަށް އަވަސް އަވަހަށް އޮފީހަށް ދާން ތައްޔާރު ވަނިކޮށެވެ. އޭރު ވަރަށް ބޯކޮށް ވާރޭ ވެހެމުން ދިޔައެވެ. ދޭތެރެ ދޭތެރެއިން ވަރަށް ބާރަށް ގުގުރާލާ އަޑުވެސް އިވެއެވެ. އަހަރެން ގަޑިއަށް ބަލާލީމެވެ. ހެނދުނުު 8ޖަހަނީއެވެ. ވިއްސާރަ ކަމުން އަހަރެންނަށްވެސް ނުހޭލެވުނީއެވެ.

“ކޮބާތަ ބޫޓު؟ ގަޑި ވެސް ޖެހެނީ.” މާއިޒް ވަރަށް އަވަސް އަވަހަށް ބުނެލިއެވެ.

“އެ އޮތީ. މޭޒު ދަށުގަ” އަހަރެން ދެލޮލުގައި އަތް އުނގުޅާލަމުން ބުނެލީމެވެ. އެއާއި އެކު ބޫޓަށް އަރައިގެން މާއިޒް ދުވެފައި ކަހަލަ ގޮތަކަށްް ގެއިން ނުކުމެގެން ސައިކަލަށް އަރާ ނައްޓާލިއެވެ. އަހަރެން ގޮވަގޮވަ އޮއްވައެވެ. މާއިޒްގެ ހަރަކާތްތަކުން މާއިޒް ވަޒީފާއަށް އެދަނީ ވަރަށް ލަސްވެގެން ކަން އަހަރެންނަށް ޔަޤީންވިއެވެ. ވަގުތުން އަަހަރެން މާއިޒަށް ގުޅީމެވެ. މާއިޒް އެއްވެސް އެއްޗެއް ނުބުނެ ނުކުމެގެން ދިޔުމުންނެވެ. އަހަރެންގެ ހިތަށް އެކަމުން ހަމަޖެހުމެއް ނުލިބުނީއެވެ.

މާއިޒް ފޯނު ނެގިއެވެ. އަހަރެން ދެރަވެފައި ހުރި ވާހަކަ ބުނީމެވެ. އަހަރެން ގޮޮވަގޮވަ އޮއްވާ ދިޔައީ ކީއްވެތޯ އަހަރެން ސުވާލު ކުރީމެވެ. މިވީހާ ދުވަހު އަހަރެންނަށް މާއިޒްގެ ފަރާތުން ކިސްއެއް ނުލިބުނީ ހަމައެކަނި މިއަދުގައެވެ. އެހެންކަމުން އަހަރެން ޝަކުވާ ކުރީމެވެ. އަހަރެންނަށް ބޮހެއް ދޭން އައުމަށްް އެދުނީމެވެ. އޮފީހުގެ ގަޑި ޖެހެނީ ކަމަށް ބުނެ މާއިޒަށް އާދެވޭ ގޮތެއްނުވިއެވެ. މާއިޒު ފޯނު ކަނޑައިލިއެވެ. ވެހޭ ބޯ ވާރޭގެ ތެރޭގައި، އަހަރެންގެ އަޑު މާއިޒަށް ނީއްވުނުކަމަށް ވެދާނެއެވެ.

އަހަރެން އިނީ ސިޓިންގރޫމްގެ ސޯފާގައި އިިށީންދެގެންނެވެ. އަހަރެންގެ ހިތުގެ ހަމަޖެހުން ވަނީ ގެއްލިފައެވެ. ކޮންމެ ދުވަހަކު ހެނދުނު ގަނޑީގައި އަހަރެންގެ ތުންފަތަށް ލިބޭ އުފާވެރި މީރު ރަހަ ނުލިބުމުން އަހަރެން އިނީ ދެރަވެފައެވެ. ކުއްލިއަކަށް އަހަރެންގެ ފޯނު ރިންގު ވާން ފެށިއެވެ. އަހަރެންް ފޯނު ނެގީމެވެ. އެކޮޅުން ވާހަކަ ދައްކަމުން ދިޔަ މީހާ ބުނި ޖުމުލައިން އަހަރެންގެ ހިތް ރޫޅި ފުޑުފުޑުވި ކަަހަލައެވެ. އަހަރެންގެ ދެލޮލުން ހޯސްލާފައި ކަރުނަތައް އަންނަން ފެށިއެވެ. ބޭއިޚުތިޔާރުގައި އަހަރެންނަށް ދުއްވައިގަނެވުނީ ހޮސްޕިޓިލާ ދިމާލަށެވެ.

“މާއިޒް. އަހަރެންގެ މާއިޒް. އަޅެ މާއިޒް. އަހަރެން ދޫކޮށް، އެކަނިކޮށްފައި ނުދޭ!” އަހަރެން އަޑުގެ ނެތްތަނަށް ރޮމުން މާއިޒްގެ ފުރާނަނެތް މަސްގަނޑުގައި އޮޅުލަމުން އަހަރެން ގެންދިޔައީމެވެ. އަހަރެންގެ އަރުތެރެ ބެދި ނޭވާ ކުރުވެ ގިސްލެވެން ފެށުނެވެ. މާއިޒް އަހަރެންނާ ވަކިވީއެވެ. އަހަރެންގެ ހިތް ދެތަން ކޮށްފައެވެ. އަހަރެންގެ ދިރިއުޅުމާއި އެކު މާއިޒް ތާއަބަދަށް އަހަރެންނަށް ބީއްވެއްޖެއެވެ.

މާއިޒް މަރުވީ ބާރު ސްޕީޑެއްގައި، ސައިކަލް ދުއްވާފައި ދަނިކޮށް އެކްސިޑެންޓް ވެގެންކަމަށް މަންޒަރު ދުށް މީހުން ބުންޏެވެ. އެވަގުތު މާއިޒް އިނީ މީހަކަށް ގުޅައިގެން ކަމަށްވެސް އެމީހުން ބުނަމުން ދިޔައެވެ. އާނއެކެވެ. މާއިޒް ގުޅައިގެން އިނީ އަހަންނަށެވެ. މާއިޒް ފޯނު ކަނޑައިލީ އެއްވެސް ނޫނެވެ.

މާއިޒް ވަޅުލުމާއި ހަމައަށް ނިކަމެއްޗެއް ފަދައިން އަހަރެން މާއިޒްގެ ގާތުގައި ރޯލަރޯލާ އިނީމެވެ. އަހަރެންނަށް އިޙްސާސް ވަމުން ދިޔައީ، އަހަރެންގެ ހިތުގެ ހުރިހާ ނާރެއް ހިމުން ވަމުންދާ ކަމުގެ ތަދު ހުރި ވޭނީ އިޙުސާސެވެ. އަހަރެން ކުޑަކުޑަ ކަމަކަށް ޝަކުވާ ކުރަން އެދުވަހު މާއިޒަށް ނުގުޅުނަމަ ކިހާ ރަނގަޅު ވީސް ހެއްޔެވެ؟ މާއިޒްގެ ސައްދޯއް ކަށްވަޅަށް ލެވުނީ އަހަރެންގެ ލޯ ކުރިމަތީގައެވެ. އެ މަންޒަރު ބަލަން އަހަރެންގެ މި ބަލިކަށި ވެފައިވާ ހިތަށް ކުޅަދާނައެއް ނުވިއެވެ. އަހަރެންގެ ގައިން ވަރު ދޫވެގެން ހުރި ތަނަށް އަހަރެން ދެމުނެވެ.

އަހަރެން ހޭއެރި އިރު، އަހަރެން އޮތީ ހޮސްފިޓަލްގައި އެޑްމިޓް ކޮށްފައެވެ. ކުރިމަތީގައި ހުރި ނަރުސް ކުއްޖާ އަހަރެންނަށް ބަލާލަމުން ހިނިތުންވެލިއެވެ.

“މަރުޙަބާ. ބަނޑު ބޮޑު.” ރިޕޯޓް ދިއްކޮށްލަމުން ނަރުސް ކުއްޖާ އަހަރެންގެ މޫނަށް ބަލައިލުމާއި އެކު، އަހަރެންގެ ލޮލުން ކަރުނައިގެ ރާޅެއް ކޯތާފަތްްމައްޗަށް ބީއްސާލިއެވެ. އަހަރެން ވާންވީ އުފާ ކަމެއް، ނޫނީ ކުރަންވީ ހިތާމަ ކަމެއް އަހަރެންނަކަށް ނޭނގުނެވެ.

***

އަހަރެންނަށް ހޭވެރިކަން ވީއިރު އަހަަރެންގެ ލޮލުން ފޭބިި ކަރުނަތަކުން މުޅި ފޮޓޯގަނޑު ވަނީ ތެމި ފޯވެފައެވެ. ލޮލުން ފައިބަމުން ދިޔަ ކަރުނަތައް ހުއްޓުމެއް ނެތި، ދަތްދޮޅިން ތިކިތިކި ޖަހަމުން ދިޔައެވެ. ދެން އަހަރެންނަކަށް މާއިޒްގެ ފަރާތުން ބޮސްއެއްގެ މިންވަރު ވެސް ނުލިބޭނެވެ. ފޮޓޯގަނޑުން ފެންނަށް ހުރި މާއިޒަށް އަހަރެން ބޮސްދިނުމަށް ފަހު، އެނދުމަތީގައި ނިދާފައި އޮތް އަހަރެންނާއި މާއިޒްގެ ލޯބީގެ ނިޝާން ކަމުގައިވާ، މާއިކަށް ބަލައިލިއެވެ. ފުން ހިތާމަޔާއި އުފާ އެކުލެވޭ ހިނިތުން ވުމަކާއި އެކުގައެވެ.

ނިމުނީ

ލިޔުންތެރިޔާގެ ފުރަމަލަ

އިބްރާހިމް ޒިހްނީ
ޒިހުނީ އަކީ ހުނަރުވެރި. ވާހަކަ ލިޔުންތެރިއެކެވެ. އިޖްތިމާޢީ މަޢުޟޫތަކަށްވެސް ގަލަންހިނގާ ކުޅަދާނަ ލިޔުންތެރިއެކެވެ.

ގުޅުންހުރި ލިޔުން: