ކެންޔާގެ މޮމްބާސާ އަވަށަށް ނިސްބަތްވާ ޕެނީނާ ބަހާތީ ކިތުސާއޯ ކިޔާ ހުވަފަތް މަންމަ އަކު އޭނާގެ 8 ދަރިންނަށް ކާންދޭނެ އެއްޗެއް ނެތިގެން ގާ ކައްކައިފިއެވެ.
ކޮވިޑް-19 ގެ ބިރުވެރިކަން މުޅި ދުނިޔެ ވަށާލުމުގެ ކުރިން އޭނާ ދިރިއުޅުމަށް އާމްދަނީ ހޯދުމުގެ ގޮތުން ކުރަމުން އައި މަސައްކަތަކީ ގޭގެ އަށް ގޮސް އަންނައުނު ދޮވެ ދިނުމެވެ. ނަމަވެސް، ކޮވިޑް-19 ގެ ސަބަބުން މިހާރު އިޖްތިމާޢީ ގައިދުރުކަން އިޚްތިޔާރުކޮށް ގެއިން ބޭރަށް ނިކުމެ އުޅުން މަނާކޮށްފައިވާތީ، އެ އަންހެން މީހާ އަށް އާމްދަނީ ލިބޭނެ ކޮޅު ބަންދުވެ އޭނާ އާއި، އޭނާގެ ދަރިންގެ ބަނޑުފުރާނަ މުއްތި ކުރެވޭނެގޮތެއް ވަނީ ނުވެފައެވެ.
ކަން މިހެން ހުރުމާއި އެކު، ކިތުސާއޯ ކޮންމެ ދުވަހުކަ ކާ އެއްޗެއް ތައްޔާރުކުރާ ކަމަށް އޭނާގެ ދަރިންނަށް ދައްކަންވެގެން ގާ ކައްކައެވެ. ކާ އެއްޗެތީގެ އިންތިޒާރުގައި ތިއްބާ އެ ދަރިންނަށް ނިދި ޖެހިއްޖެއުމަށް ދާންދެން އޭނާ އެގޮތަށް ގާ ކެއްކުން ކުރިއަށް ގެންދެއެވެ.
ކިތުސާއޯ އޭނާގެ ދަރިއެއް އުރާލައިގެން
މިގޮތަށް ދުވަސްތައް ވޭތުވަމުން ދަނިކޮށް ބަނޑުހައިހޫނުކަމާއި، ކެކުޅުންތަކުން ފުރިފައިވާ ކިތުސާއޯގެ އަނދިރި ހަޔާތަށް އަލިކަމެއް ގެނުވީ އޭނާގެ އަވަށްޓެރިއެއް ކަމަށްވާ ޕްރިސްކާ މޮމަންޔީ މީޑިއާގެ ސަމާލުކަމަށް މި ހިތްދަތި ދިރިއުޅުމުގެ ވާހަަކަ ތިލަކޮށްލި ހިސާބުންނެވެ.
ކެންޔާގެ ގައުމީ ޓީވީ އިން ކިތުސާއޯގެ އިންޓަވިއު ނަގައި، އޭނާގެ ވާހަކަތައް ބެލުންތެރިންގެ ސަމާލުކަމަށް ގެނައި ތަން މަދު ވަގުތުކޮޅެއްގެ ތެރޭގައި އޭނާގެ ފޯނަށާއި، އޭނާގެ ބޭންކް އެކައުންޓަށް ފައިސާ ޖަމާވާން ފެށިއެވެ. ކިތުސާއޯ އަކީ ލިޔަންކިޔަން ނުދަންނަ މީހެއް ކަމުން އޭނާ އަށް ބޭންކް އެކައުންޓެއް ހުޅުވަން އެހީތެރިވެދިނީ އޭނާގެ އަވަށްޓެރިޔާ މޮމަންޔީ އެވެ. ފެނާއި، ކަރަންޓުގެ ޚިދުމަތެއް ނެތް ދެ ކޮޓަރީގެ ގެއެއްގައި ދިރިއުޅެމުންދާ ކިތުސާއޯ ކެންޔާގެ ރައްޔިތުންގެ މި ދީލަތި އެހީތެރިކަން ސިފަކޮށްފައިވަނީ “މިރެކަލް” އެއްގެ ގޮތުގައެވެ.
ކިތުސާއޯ އަށް އެހީތެރިކަން ފޯރުކޮށްދިނުމަށްޓަކައި ކެންޔާގެ އެކި ހިސާބުތަކުން ފޯން ކޯލުތައް ލިބެމުންދާއިރު، އޭނާ ދިރިއުޅޭ ސަރަޙައްދަށް ކެންޔާގެ ރެޑްކްރޮސް ވެސް މިހާރު ވަނީ އެހީތެރިކަން ފޯރުކޮށްދޭން ފަށާފައެވެ.
ކެންޔާގެ އެކި ސަރަޙައްދުތަކުގައި މިފަދަ ދަތި ހާލުގައި އުޅޭ އެތައް ބައެއް އުޅެމުންދާއިރު، ކޮވިޑް-19 އާއި ދެކޮޅަށް ކުރާ މަސައްކަތްތަކަށް ވޯލްޑް ބޭންކުން ކެންޔާ އަށް ދީފައިވާ ފަންޑު، އެ ގައުމުގެ ހެލްތު މިނިސްޓްރީން ޚަރަދު ކުރަނީ އެ މިނިސްޓްރީގެ މުވައްޒަފުންނަށް ލުއި ކާނާ ގަތުމަށާއި، ފޯނަށް ލާރި އެޅުމަށް ކަމަށް ޚަބަރުތައް ބުނެއެެވެ.
ލިޔުންތެރިޔާގެ ފުރަމަލަ
- އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.
މި ލިޔުންތެރިޔާގެ ބައެއް އެހެން ލިޔުންތައް
- 5 ޖެނުއަރީ 2022ޚަބަރުކޮވިޑް ކޭސްތައް ގިނަވެ އިނގެރޭސި ލީގު ކަޕް ސެމީ ފައިނަލް މެޗު ފަސްކޮށްފި
- 4 ޖެނުއަރީ 2022ޚަބަރުއާ އަހަރު ކުޅުނު ފުރަތަމަ މެޗުން ޔުނައިޓެޑް ބަލިވެއްޖެ
- 4 ޖެނުއަރީ 2022ޚަބަރުފްރެންޗް ކަޕްގެ ގެ ގަދަ 16 އަށް ޕީއެސްޖީ ދަތުރުކޮށްފި
- 2 ޖެނުއަރީ 2022ޚަބަރުރޮޑްރީގެ ގޯލުން ފަހު ވަގުތު ސިޓީން އާސެނަލް ބަލިކޮށްފި
