ކޮވިޑް-19 ގެ ސަބަބުން އެއްބައެއްގެ ސިއްޙީ ޙާލަތު ދަށަށް ގޮސް މަރުވަމުން ދާއިރު، މާބޮޑު ކަމަކަށް ނުވެ އަނެއްބަޔަކު އަންނަނީ އެ ބަލިން ސަލާމަތް ވަމުންނެވެ. އެއްބައެއްގެ ކިބައިން އެ ބަލީގެ އާދައިގެ ނިޝާންތައް ފެންނައިރު، އަނެއްބަޔަކު ޙާލަތު ދަށަށް ގޮސް ވެންޓިލޭޓަރަށް ލާންޖެހެއެވެ.

ކޮވިޑް-19 އަކީ ކޮރޯނާ ވައިރަހުގެ އާ ވައްތަރެއްގެ ބައްޔެއް ކަމުން ސައިންސްވެރިން ރެޔާއިދުވާ ހޭދަކުރަމުން ދަނީ މި ބައްޔާއި ބެހޭ ހޯދުންތައް ހޯދުމުގައެވެ. ސައިންސްވެރިންނަށް ކުރިން ގަބޫލުކުރެވިފައި އޮތީ އެކި މީހުންގެ ހަށިގަނޑަށް މި ވައިރަހުގެ އަސަރު ކުރާ މިންވަރު ތަފާތުވުމުގަައި އުމުރަކީ ހަމައެކަނި ސަބަބު ކަމުގައެވެ. އެއީ މި ވައިރަހުގެ ސަބަބުން ޙާލަތު ދަށަށް ގޮސް ނިސްބަތުން އެންމެ ގިނައިން މަރުވެގެން ދަނީ އުމުރުން ދޮށީ މީހުން ކަމުގައި ވާތީއެވެ. ނަމަވެސް، ބައެއް ފަހަރު މި ބަލީގެ ސަބަބުން ވަރަށް ޒުވާން ކުދިންގެ ޙާލަތު ދަށަށް ގޮސް ވެންޓިލޭޓަރަށް ލާން ޖެހޭއިރު، އުމުރުން ދޮށީ މީހުންގެ ޙާލަތު އެހާ ދަށަށް ނުގޮސް ސަލާމަތް އެބަވެއެވެ.

ކޮވިޑް-19 މިފަދަ ސުވާލުތަކަށް ޖަވާބު ހޯދުމަށް ސައިންސްވެރިން އަންނަނީ އެކި ދިރާސާތައް ކުރަމުންނެވެ. އެގޮތުން ބައެއް މީހުންނަށް ކޮވިޑް-19 ގެ ނުރައްކާތެރިކަން ބޮޑުވާ އެހެން ސަބަބުތަކެއް ސައިންސްވެރިންގެ އެންމެ ފަހުގެ ހޯދުންތަކުން މިވަނީ ހާމަވެފައެވެ. އޭގެތެރޭގައި ހިމެނެނީ:

އުމުރު:

އެމެރިކާގެ “ސެންޓަރ ފޯރ ޑިސީސް ކޮންޓްރޯލް އެންޑް ޕްރިވެންޝަން” އިން ކުރި ދިރާސާއަކުން ދައްކާ ގޮތުގައި, ކޮވިޑް-19 ޖެހިގެން މަރުވާ މީހުންގެ ތެރެއިން ކޮންމެ 10 މީހަކުން 8 މީހަކީ އުމުރުން 65 އަހަރުން މަތީގެ މީހުންނެވެ. އެ ސެންޓަރުން އިތުރަށް ހާމަކޮށްފައިވާ ގޮތުގައި އުމުރުން ދޮށީ މީހުން ކޮވިޑް-19 ގެ ސަބަބުން ހޮސްޕިޓަލްގައި އެޑްމިޓްކޮށް ޚާއްސަ ފަރުވާ ދޭން ޖެހި، އިންފެކްޓް ވެގެން މަރުވުމުގެ ފުރުޞަތު ބޮޑުވެއެވެ.

ޑައިބެޓިސް (ޓަައިޕް 1 އަދި ޓައިޕް 2):

ސިއްޙީ ޚަބަރުތައް ގެނެސްދޭ މަޖައްލާއެއް ކަމަށްވާ “ޖާނަލް އޮފް އިންފެކްޝަންސް” ގައި ރިޕޯޓުކޮށްފައިވާ ގޮތުގައި، ސައިންސްވެރިން އެންމެ ފަހުން ހެދި 13 ދިރާސާއަކުން ދައްކާ ގޮތުން، ސިއްޙީ މައްސަލައެއް ނުހުންނަ މީހުންނާއި އަޅާބަލާއިރު، ޑައިބެޓިސް ހުންނަ މީހުން ކޮވިޑް-19 ޖެހިގެން ސިއްޙީ ޙާލަތު ދަށަށް ގޮސް މަރުވުމުގެ ފުރުޞަތު 3.7 ގުނަ އިތުރެވެ.

ހިތުގެ ބަލި އަދި ލޭ މައްޗަށް ދިއުން:

“އެމެރިކަން ހާރޓް އެސޯސިއޭޝަން” އިން ހާމަކޮށްފައިވާ ގޮތުގައި ހިތުގެ ބަލިތަކާއި، ލޭ މައްޗަށް ދިއުން ނުހުންނަ މީހުންނާ އަޅާ ބަލާއިރު، އެ ބަލިތައް ހުންނަ މީހުން ކޮވިޑް-19 ޖެހުމުގެ ސަބަބުން ޙާލަތު ދަށަށް ދިއުމުގެ ފުރުޞަތު ބޮޑެވެ. ވައިރަލް އިންފެކްޝަން ގެ ސަބަބުން ސިއްޙަތު ސަލާމަތުން ތިބި މީހުން ވެސް، ހިތުގެ މައްސަލަ ޖެހުމަކީ ވެދާނެ ކަމެއް ކަމަށް ވެސް އެ އެސޯސިއޭޝަނުން ހާމަކޮށްފައިވެއެވެ.

ދުންފަތުގެ އިސްތިޢުމާލު ކުރުން:

ދުންފަތުގެ އިސްތިޢުމާލު ކުރާމީހުންނަށް ކޮވިޑް-19 ޖެހިއްޖެނަމަ، ހަށިގަނޑު ގުނަވަންތައް ފެއިލްވެ، ނިއުމޯނިޔާ ޖެހުމުގެ ފުރުޞަތު ބޮޑު ކަމަށް ސިއްޙީ ޚަބަރުތައް ގެނެސްދޭ މަޖައްލާއެއް ކަމަށްވާ “ނިއު އިންގްލެންޑް ޖާނަލް އޮފް މެޑިސިން” ގައި ރިޕޯޓުކޮށްފައިވެއެވެ. ޗައިނާގައި 1000 ބަލި މީހުން ބޭނުންކޮށްގެން ކުރި ދިރާސާއަކުން ހާމަވި ގޮތުގައި، ދުންފަތުގެ އިސްތިޢުމާލު ކުރާމީހުންގެ 12.3 އިންސައްތަ މީހުންގެ ތެރެއިން ބައެއް މީހުން އައިސީޔޫގައި އެޑްމިޓްކޮށް ފަރުވާދޭން ޖެހިފައިވެއެވެ. އަދި، އޭގެތެރެއިން ބައެއް މީހުން ވެންޓިލޭޓަރަށް ލާންޖެހި އަނެއްބައި މީހުން މަރުވެފައިވެއެވެ.

އޮބެސިޓީ:

ކޮވިޑް-19 އާއި ބެހޭ ގޮތުން ތަންކޮޅެއް ކުރީކޮޅު ސައިންސްވެރިން ކުރި ދިރާސާއަކުން ހާމަވި ގޮތުގައި އޮބެސިޓީ ނުވަތަ އާދަޔާ ޚިލާފަށް ފަލަ މީހުން ކޮވިޑް-19 ޖެހުމުން ޙާލަތު ދަށަށް ދިއުމުގެ ފުރުޞަތު ބޮޑެވެ. އެމެރިކާގެ ނިއުޔޯކް ގައި ކޮވިޑް-19 ޖެހުނު އުމުރުން 60 އަހަރުން ދަށުގެ މީހުން ބޭނުންކޮށްގެން ކުރި ދިރާސާއަކުން ހާމަވި ގޮތުގައި، ހަށިގަނޑު ދުޅަހެޔޮކޮށް ހުންނަ މީހުންނާއި އަޅާބަލާއިރު، ހަށިގަނޑު އާދަޔާ ޚިލާފަށް ފަލަކޮށް ތިބޭ މީހުންގެ ޙާލަތު ދަށްވެ އިތުރު ފަރުވާ ދޭން ޖެހުމުގެ ފުރުޞަތު ދެގުނައަށް ބޮޑެވެ.

ލޭގެ ގުރޫޕް:

ޗައިނާގެ “ދަ ސަދަން ޔުނިވަރސިޓީ އޮފް ސައިންސް އެންޑް ޓެކްނޮލޮޖީ” އިން ވޫހާން ސިޓީގެ 3 ހޮސްޕިޓަލަކުން ކޮވިޑް-19 ޖެހިފައިވާ ތަފާތު ލޭގެ ގުރޫޕު ހުރި 2173 މީހުންނާއި، ކޮވިޑް-19 ނުޖެހޭ ތަފާތު ލޭގެ ގުރޫޕު ހުރި 23000 މީހުން ބޭނުންކޮށްގެން ދިރާސާއެއް ކޮށްފައިވެއެވެ. މި ދިރާސާއިން ހާމަވި ގޮތުގައި ލޭގެ އެހެން ގުރޫޕުތައް ހުންނަ މީހުންނާއި އަޅާ ބަލާއިރު، “އޭ ޕޮޒިޓިވް”, “އޭ ނެގެޓިވް”, “އޭބީ ޕޮޒިޓިވް” އަދި “އޭބީ ނެގެޓިވް” ލޭގެ ގުރޫޕު ހުންނަ މީހުންނަށް ކޮވިޑް-19 ޖެހުމުގެ ފުރުޞަތު ބޮޑެވެ. ލޭގެ އެހެން ގުރޫޕުތައް ހުންނަ މީހުންނާއި އަޅާ ބަލާއިރު، “އޯ ޕޮޒިޓިވް” އާއި، “އޯ ނެގެޓިވް” ލޭގެ ގުރޫޕު ހުންނަ މީހުންނަށް ކޮވިޑް-19 ޖެހުމުގެ ފުރުޞަތު ކުޑަކަމަށް ވެސް މި ދިރާސާއިން ހާމަވެއެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: