ހައުސިންގ ޑިވެލޮޕްމަންޓް ކޯޕަރޭޝަނުން ކުއްޔަށް ދޫކޮށްފައިވާ ތަންތަނުގެ ކުލި ލުއި ކުރުމަށް އެދޭ ފަރާތްތަކަށް އެ ލުއި ލިބިގަތުމަށް އެދި ފޯމު ހުށަހެޅުމުގެ ފުރުސަތު އިތުރުކޮށްދީފި އެވެ.
އެޗްޑީސީން ރޭ ނެރުނު ބަޔާނެއްގައި ބުނެފައިވަނީ އެ ކުންފުނީގެ ފަރާތުން ކުއްޔަށް ދޫކޮށްފައިވާ ތަންތަނުގެ ކުލި ދެއްކުމުގައި އެކުންފުނިން ދިނުމަށް ހަމަޖެހިފައިވާ ލުއި ހޯދުމަށް މިހާތަނަށް އެދިފައިނުވާ ފަރާތްތަކަށް އެެ އެހީތެރިކަން ހޯދުމުގެ ފުރުޞަތު ހުޅުވާލާ ކަމަށެވެ. އަދި، މިހާތަނަށް އެކަމަށް އެދި ފޯމު ހުށަހަޅާފައިނުވާ ފަރާތްތަކުން މިމަހުގެ 15 ވަނަ ދުވަހުގެ ކުރިން ފޯމު ހުށަހެޅުމަށް އެޗްޑީސީން އެދޭ ކަމަށް އެ ބަޔާނުގައި ބުނެފައިވެއެވެ.
އެޗްޑީސީން ވަނީ އެ ކުންފުނިން ކުއްޔަށް ދޫކޮށްފައިވާ ބިންތަކަށް ދައްކާ ފައިސާ ނުވަތަ ކުލީގެ 30 އިންސައްތަ ދެމަހު ދައްކަން ނުޖެހޭ ގޮތަށް ހަމަޖައްސައިދިނުމަށް ނިންމާފައި ވެއެވެ. އަދި ކުލީގެ 30 އިންސައްތަ ދެއްކުން ލުއިކޮށް އެފައިސާ އަދާކުރުން ފަސްކޮށްދެނީ ދެ މަސްދުވަހުގެ މުއްދަތަކަށް ކަމުގައިވެސް އެކުންފުނިން ބުނެފައިވެއެވެ.
ފައިސާ ދެއްކުމުގައި އެޗްޑީސީން ދޭ ލުއި ހޯދުމަށް ފޯމު ހުށަހަހަޅަންޖެހޭނީ ތިރީގައިވާ އީމެއިލް އެޑްރެސް އަށް ކަމުގައި އެ ކުންފުނިން ބުނެފައިވެއެވެ. [email protected]
އެކުންފުނީގެ ބަޔާނުގައި އިތުރަށް ބުނެފައި ވަނީ މިވަގުތު މާލެ ފުރަބަންދުކޮށްފައިވާތީ ދައްކަންޖެހޭ ފައިސާ އޮންލައިންކޮށް ދެއްކޭނެ އިންތިޒާމު ހަމަޖައްސާފައިވާ ކަމަށާއި، ގެދޮރު ބިނާކުރުމަށް އެކުންފުނިން ދޫކޮށްފައިވާ ލޯނުތައް އިސްލާމީ އުޞޫލަށް ބަދަލުކުރުމުގެ ފުރުޞަތު ވެސް ހުޅުވާލާފައިވާ ކަމަށެވެ.
ލިޔުންތެރިޔާގެ ފުރަމަލަ
- މުޚްތާރަކީ ނޫސްވެރިކަމުގައި ތަޖްރިބާ ހޯދުމަށް ނުކުމެހުރި ތަމްރީނު ލިބިފައިވާ ނޫސްވެރިއެކެވެ.
