ރާއްޖޭގެ އެންމެ މަގުބޫލް އަދި ކުޅަދާނަ ޑައިރެކްޓަރުންގެ ތެރޭގައި ހިމެނޭ އަބްދުލް ފައްތާހް ކުއްލި ގޮތަކަށް ފިލްމީ ދާއިރާ ދޫކޮށްލި ކަމަށް ބުނުމުން މިއަދަކީ ފިލްމީ ދާއިރާ އަށް ކަޅު ދުވަހެއް ކަމަށް ދާއިރާގެ ފަންނާނުން ބުނަން ފަށައިފި އެވެ.
ފޭސްބުކްގައި މިމަހުގެ 19 ވަނަ ދުވަހުގެ ރޭ ފައްތާހު ކޮށްފައިވާ ޕޯސްޓެއްގައި ބުނެފައި ވަނީ ފިލްމީ ދާއިރާ އިން ދެން ނުފެންނާނެކަމަށެވެ. އެ ޕޯސްޓްގައި އޭނާ ވަނީ އެކުގައި މަސައްކަތް ކުރި ހުރިހާ އެންމެންނަށް ޝުކުރު ވެސް އަދާކޮށްފަ އެވެ.
ފައްތާހް ގެ މި ކުއްލި އިއުލާނުކުރުމާއި އެކު ފިލްމީ ދާއިރާގައި ހަރަކާތްތެރިވާ ބައެއް އެކްޓަރުންނާއި ޑައިރެކްޓަރުން އަދި ޕްރޮޑިއުސަރުންވެސް ވަނީ އެކަމާ ހިތާމަކުރާކަން ހާމަކޮށްފަ އެވެ. އެގޮތުން އެކްޓަރ/ޑައިރެކްޓަރ އަޙްމަދު ސައީދު ކޮށްފައިވާ ދިގު ޕޯސްޓެއްގައި ބުނެފައިވަނީ ފައްތާހް ގެ އެ ނިންމުމަށް އޭޭނާ އިހްތިރާމު ކުރާކަމަށެވެ.
ސަޢިދު ކޮށްފައިވާ ޕޯސްޓް ގެ ސްކްރީން ޝޮޓެއް
ސައީދު ގެމި ޕޯސްޓަށް ވަނީ މިހާރު ފިލްމީ ދާއިރާގައި ބާރަށް ފިޔަޖަހަމުން އަންނަ ފާތުމަތު އަޒީޝާ (އަޒޫ) ވެސް ހިތާމަފާޅުކޮށް ކޮމެންޓެއް ކޮށްފައެވެ. އަޒޫ ބުނީ ފައްތާހް ގެ އެ ނިންމުން ބަދަލުކުރާނެ ކަމަށް ހީކުރާ ކަމަށެވެ. އަދި ފައްތާހް އަކީ ސްޓާރުންދެކެ ލޯބިވާ ޑައިރެކްޓަރެއް ކަމަށާއި އެއްމެ ފުރަތަމަ ސްޓާރުންނަށް ރެސްޕެކްޓް ދިން މީހަކީ ފައްތާހް ކަމަށް ބުނެފައި ވެއެވެ. އަދި ގިނަ ކަންތައްތައް ފިލްމު އިންޑަސްޓްރީ އަށް ކޮށްދީފައި ހުރި އެއްމެންގެ އިހްތިރާމާއި ލޯބީ ލިބިގެންވާ ޑައިރެކްޓަރެއް ކަމަށްވެސް އަޒޫ ބުނެއެވެ.
ޑާރކްރެއިން އެންޓަޓެއިންމެންޓް ގެ ޕްރޮޑިއުސަރ މުޙައްމަދު ޢަލީ (މޮގަރ) ބުނީ މިއަދަކީ އޭނާ އަށާއި މުޅި ފިލްމު އިންޑަސްޓްރީ އަށް ހިތާމަވެރި ދުވަހެއް ކަމަށެވެ.
ނަމަވެސް ފައްތާހް ގެ އެންމެ ބޮޑު ވާދަވެރިއެއްކަމަށް ޤަބޫލުކުރެވޭ ފާތުމަތު ނަހުލާ ބުނަނީ ‘ސަމާލުކަން ނުލިބިގެން ޖެއްސި ސްޓަންޓެއް އެއީ. އަޅުގަނޑުގެ ރިހަ ޑައިލޮގުތަކަށްވުރެ ތީތީ މާ ރިހަ.’ މިހެންނެވެ. ނަހުލާ ގެ މި ޕޯސްޓް ވަނީ މިހާރު ޑިލީޓް ކޮށްލާފަ އެވެ. ނަހުލާގެ ފިލްމު ބޮސް ރިލީޒް ކުރުމަށްފަހު ފައްތާހް އާއި ނަހުލާ އާއި ދެމެދުގައި އަންނަނީ ބަހުގެ ހަމަލާތަކެއް ބަދަލުކުރުވެމުންނެވެ. މީގެ އިތުރުން ނަހުލާ ގެ ފިރިމީހާ ހަސަން ސިނާން ވެސް ވަނީ މިކަމާާ ގުޅުންހުރިކަމަށް ބެލެވޭ ޕޯސްޓެއް ކޮށްފަ އެވެ.
ނަހުލާ ކޮށްފައިވާ ޕޯސްޓާއި ބެހޭގޮތުން ބުނީ ‘ރިހަ’ އެ ލަފުޒު އަކީ ފައްތާހް ނޫސްވެރިއެއް ގާތުގައި ބޭނުންކުރި ބަހެއްކަމަށެވެ. ‘އަޅުގަނޑުގެ ރިހަ ޑައިލޮގު ތަކޯ އޮތީ ހުސް ފިލްމު ގަ.” ނަހުލާ އިތުރަށް ބުނީ ފިލްމީ ދާއިރާއިން ކުއްލިއަކަށް މީހަކު ވަކިވަންޏާ އެކަމާ ދާއިރާ ހިތާމަކުރާނެ ކަމަށެވެ.
“މަވެސް ހިތާމަ ކުރަން. އެކަމަކު އެއީ އެއްމެން ދެބައިވެ މަށާ ޖައްސާލީކީ ނޫން. ބައެއް ނޫސްތައް ބުނަނީ އެހެން.” ފިލްމީ ދާއިރާ ގައި ބައިބައިވުން އޮތުުމަށް ނަހުލާވެސް ބޭނުން ނުވާކަން އޭނާގެ ވާހަކައިން އެނގެއެވެ. އަދި ދާއިރާގެ މީހުން ކަމަކާއި ދެކޭގޮތް ބަޔާންކޮށްލުމަކީ އެމީހުން ނަހުލާ އާއި ޖައްސާލުން ކަމަށް ނުދެކޭކަންވެސް ނަހުލާ ފާހަގަ ކުރެއެވެ.
ނަހުލާ ގެ ފިރިމީހާ ހަސަން ސިނާން ކޮށްފައިވާ ޕޯސްޓް ގެ ސްކްރީން ޝޮޓެއް
ފައްތާހް އާއި އެކީގައި އެއްމެގިނަ މަސައްކަތްތަކެއް ކޮށްފައިވާ އެކްޓަރ މުޙައްމަދު މަނިކް (މަނިކް) މުނިއަވަސް އަށް ބުނީ މި ދާއިރާއިން ފައްތާހް ވަކިވެގެން ދިއުމަކީ ދާއިރާއަށް ލިބުނު ފޫނުބެދޭ ވަރުގެ ބޮޑު ގެއްލުމެއް ކަމަށެވެ. އަދި ފައްތާހް އަކީ މި ދާއިރާގައި އެއްމެ ރީިތި މަސައްކަތްތަކެއްކޮށްފައި ފަރާތެއް ކަމަށާއި މި ދާއިރާއަށް ވަރަށް ގިނަގުނަ ޚިދުމަތްތަކެއް ކޮށްދީފައިވާ ފަރާތެއްކަންވެސް ފާހަގަ ކުރިއެވެ. އެހެންކަމުން ހަމަ ހަޤީޤަތުގައިވެސް ފައްތާހް ވަކިވެގެން ދިއުމަކީ ދާއިރާއަށް ލިބުނު ފޫނުބެދޭ ވަރުގެ ބާގަނޑެއްކަން ތަކުރާރުކޮށް މަނިކް ފާހަގަ ކުރިއެވެ.
ފިލްމީ ދާއިރާއިން ފައްތާހް ދުރަށް ދިޔަކަމަށް ބުނެ ކުރި ޕޯސްޓަށް ފަހު އެކިއެކި ފަންނާނުންގެ ޝުޢޫރުތައް ފާޅުކޮށްފައިވާއިރު ބައެއް ޕޯސްޓްތަކުގައި ވާ އިބާރާތްތައް ހަމަ ސީދާ އަމާޒުކޮށްފައިހުރީ ނަހުލާއަށްކަން ފާހަގަ ކުރެވެއެވެ. އެގޮތުން މި ދާއިރާގައި ގިނަދުވަސްތަކެއް ހޭދަކޮށްފައިވާ ޒީނަތު ގެ ފޭސްބްކް ގައި ވަނީ ވަރަށް ދިގު މެސެޖެއް ލިޔެ ޕޯސްޓްކޮށްފަ އެވެ.
ޒީނަތު ކޮށްފައިވާ ޕޯސްޓް ގެ ސްކްރީން ޝޮޓެއް
ފިލްމީ ތަރި އަޒްމީލް (އަޒޭ) ވެސް ވަނީ މިކަމާ ގުޅުންހުރިކަމަށް ބެލެވޭ ޕޯސްޓެއް ކޮށްފަ އެވެ.
އަޒްމީލް ކޮށްފައިވާ ޕޯސްޓް ގެ ސްކްރީން ޝޮޓެއް
ކުއްލި ގޮތަކަށް ފިލްމީ ދާއިރާ ދޫކޮށްލަން ނިންމި ސަބަބާ ބެހޭ ގޮތުން ‘މިހާރު’ އޮންލައިން އިން ސުވާލު ކުރުމުން ފައްތާހް ބުނީ “ނޯ ކޮމެންޓް” ކަމަށެވެ. އަދި ދެން ފެންނާނީ ކޮން ދާއިރާއަކުންތޯ އެހުމުން ބުނީ “އެކަމާ އަދި ނުވިސްނަން” ކަމަަށެވެ.
ފިލްމީ ދާއިރާގައި މަސައްކަތް ކުރާތާ 21 އަހަރު ފަހުން، މި ދާއިރާ ފައްތާހް ދޫކޮށްލި އިރު، އޭނާގެ 12 ވަނަ ފީޗާ ފިލްމް “ހައްދު” ވަނީ މިދިޔަ ސެޕްޓެމްބަރު 6 ގައި ބެލުންތެރިންނާ ހަމައަށް ގެނެސް ދީފަ އެވެ.
ފައްތާހް ފަދަ މި ދާއިރާގައި ފުންނާބު އުސް ފަންނާނެއް ދާއިރާ ދޫކޮށްލުމުން ދާއިރާގެ ހިތުގެ އަޑުން ގޮވަމުންދަނީ ހަމަ އެއްމެ ވާހަކަ އެކެވެ.
‘ވަކިވީ އަސަރާ މަންޒަރު، ހިތަކުން ހަމަ ނުފިލާނޭ
ވޭނާއި ރިހުން އެކުވާ އުއްމީދު އާލާވާނޭ ‘
ލިޔުންތެރިޔާގެ ފުރަމަލަ
