މިއީ ޕްރީސްކޫލް އަދި ގްރޭޑް 1، 2ގެ ޢަމަލީ ފަންނު މާއްދާގައި ކުރެވިދާނެ މަސައްކަތެކެވެ.

ތުއްތު ކުދިން ކުލަޖައްސާހިތްވާނެއެވެ. އޮށްގަލާއި ވެއްޔާއި ކުޅޭހިތްވާނެއެވެ. މި ދެކަންތައް އެއްކޮށްލައިގެން ޕްރީސްކޫލް ކުދިންނާއި ގްރޭޑް 1 އަދި 2 ގެ ކުދިންގެ ޢަމަލީ ފަންނު ގަޑިއަށް ވަރަށް އެކަށީގެންވާ ޙަރަކާތެއް ރާވާލައި ކުރިއަށް ގެންދެވިދާނެއެވެ.

މިގޮތުން، އޮށްގަލުގައި ކުލަ ޖައްސައިގެން މޮޒައިކެއް ހެއްދިދާނެއެވެ. މިކަމުގެ ސަބަބުން ބައްޓަމަށް ފަރިތަވުމާއި ތަފާތު ގޮތްގޮތަށް އެއްޗެތި އަތުރައި ޑިޒައިން ކުރުމުގެ ހުނަރު ލިއްބައިދިނުމާއި ކުލަތައް ދަސްވުން ހިމެނެއެވެ.

ބޭނުންވާނެ ތަކެތި

ކުދިކުދި އޮށްގާ ނުވަތަ ކުދި ހިލަކޮޅު

ބޯކަރުދާސް

ތެރަސް

ފެންކުލަ (ޓެމްޕެރާ ޕެއިންޓް)

ފެންކުލަޖައްސާ ބުރުސް

ފަންސުރު

ނޫސް ކަރުދާސް

ފެންކުލަ ގިރާ ތަށި

ފެން

މަސައްކަތް ކުރިއަށްގެންދާނެ ގޮތް

1- ކުދިންގޮވައިގެން ރަށުގެ ގޮނޑުދޮށުން، ދިޔަރެހާއި ކައިރިން ހިނގާލަން ގެންދާށެވެ. ކޮންމެ ކުއްޖަކުވެސް 1 ލިޓަރު ހުންނަވަރުގެ ބާލިދީއެއް ނުވަތަ އެފަދަ އެހެން ކަންވާރެއް ފުރޭވަރަށް ކުދިގައު (އޮށްގައު) ހޯދުމަށް އިރުޝާދު ދޭށެވެ. އަދި ވީހައިވެސް ތަފާތު ބައްޓަމުގެ ގައު ހޯދުމަށް ބުނާށެވެ.

2- ކުލާސް ކޮޓަރިއަށް އެނބުރިގޮސް މަސައްކަތްކުރާނެ ވެށި ރާވައިލާށެވެ. މިގޮތުން ޑެސްކުތައް މަތީގައި ނުވަތަ ކުލާހުގެ މުށިގަނޑު މަތީގައި ނޫސްކަރުދާސް ފަތުރާށެވެ. މިއީ ކުލާސްތެރެ ސާފުކުރަން ފަސޭހައަށް ކުރާ ކަމެކެވެ. މަސައްކަތް ފެށުމުގެ ކުރިން ހުރިހައިކުދިންވެސް އެޕްރަން އެޅުމަށް އިރުޝާދު ދޭށެވެ.

3- ފެންކުލަ ގިރާ ތަށީގައި ދެތިން ހަތަރު ކުލައެއް ތައްޔާރުކޮށްލުމަށް ބުނާށެވެ. 

4- ގިރާފައިހުރި ކުލައިގެ ތެރެއަށް އޮށްގާ އަޅައި ކުލަޖެއްސުމަށް ބުނާށެވެ. މިހެން ހެދުމުގެ ބަދަލުގައި ފިހިންވެސް ކުލަޖެއްސުވިދާނެ އެވެ.

5- ކުލަޖައްސާފައިވާ ގައުކޮޅުތައް ކުލަތައް ވަކިކޮށް ހިއްކުމަށް ބަހައްޓާށެވެ. ދޭތެރެއަކުން ގައުކޮޅުތައް ފުރޮޅައި ދަށަށްހުރި ފަޅި މައްޗަށް ޖަހަންވާނެއެވެ. 

6- ބޯކަރުދާސް ގަނޑުގައި ފަންސުރުން ޑިޒައިން ހަދާނެ އެއްޗެއް ކުރެހުމަށް ބުނާށެވެ. މިގޮތުން ތަންކޮޅެއް އާދައިގެ އެއްޗެހި ކުރެހުމަށް ބާރުއަޅާށެވެ. އޭރުން މޮޒައިކް ހަދަން ފަސޭހަވާނެއެވެ. މިސާލަކަށް: ރުކެއް، މަލެއް، ފަތެއް، ކާރެއް، ޔޮޓެއް، ތަރިއެއް ފަދަ އެއްޗެއް ކުރެހުމަށް ބުނެވިދާނެއެވެ. 

7- ބޯކަރުދާސްގަނޑުގައި ކުރެހި އެތީގެ އެކި ހިސާބުތަކުގައި ބޭނުންކުރާނެ ގައުކޮޅުތަކުގެ ކުލަތަކުގެ ނަންލިޔުމަށް ބުނާށެވެ. މިހެން ހެދުމުން ބޭނުންކުރަންޖެހޭ ކުލަތައް އެންމެ އެކަށީގެންވާ ބައިގައި ބޭނުންކުރުމަށް ފަސޭހަވާނެއެވެ.

8- ބޯކަރުދާސްގަނޑު ހަމަ ތަނެއްގައި ބޭއްވުމަށް ބުނާށެވެ. ކޮންމެ ގައުކޮޅެއް އެ ގައުކޮޅެއް ބާއްވަންޖެހޭ ތަނުގައި ތެރަސްލާފައި ތަތްކުރަމުން ގެންދިއުމަށް ބުނާށެވެ. މިސާލަކަށް: މަލެއްގައިނަމަ ކަރުގަނޑުގައި އޮރެންޖު ކުލައިގެ ގައުކޮޅުތައް، ފިޔަތަކުގައި ރަތްކުލައިގެ ގައުކޮޅުތައް ތަތްކުރުވުން.

9- ތެރަސް ހިކެންދެން ކުލާސް ކޮޓަރީގެ ބެލްކަނީގައި ބެހެއްޓުމަށް ބުނާށެވެ. މޮޒައިކު ހިކުމުން ކުލާސް ކޮޓަރީގެ ފާރުގައި ފްރޭމްކޮށްފައި ނުވަތަ ފްރޭމް ނުކޮށް ނަމަވެސް ހަރުކުރެވިދާނެއެވެ.

ލިޔުމުގެ އަސްލު ލިޔުނީ: އެރިކް ލޫޕް – އެޑިއުކޭޝަން ޑޮޓްކޮމް​

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: