ސްޕެއިން އަދި ޔޫރަޕުގެ ގަދަ ބާރެއް ކަމަށްވާ ބާސެލޯނާ އަށް 2019/2020 ވަނަ ސީޒަނަކީ ގަދަ ކަނޑެއްގައި ދަތުރުކުރަން ޖެހިފައިވާ ސީޒަނެކެވެ.

ތިން ޕޮއިންޓުގެ ތަފާތަކުން ސްޕެނިޝް ލީގު ތާވަލުގެ އެއްވަނައިގައި މިވަގުތު އޮތްނަމަވެސް، އެތްލެޓިކް ބިލްބާއޯ އަތުން ހިތްދަތި ގޮތަކަށް ބަލިވެ، އެޓީމު ވަނީ ސްޕެނިޝް ކަޕުން ކަޓާފައެވެ. ރަނގަޅު ނަތީޖާތަކެއް ނުނުރެވި، ޓީމުގެ ކުޅުމުގެ ފެންވަރު ދަށްވުމުގެ ސަބަބުން ކޯޗުކަމުގެ މަގާމުގައި ހުރި އާނެސްޓޯ ވަލްވާޑޭ ވަނީ މިދިޔަ ޖެނުއަރީމަހުގެ ތެރޭގައި މަގާމުން ވަކިކޮށްފައެވެ. އަދި މިވަރުން ނިމުނީ އެއް ނޫނެވެ. ކުލަބު ތެރޭގައި އޮތް ސިޔާސީ ކޯޅުމާއި، ކަރަޕްޝަންގެ މައްސަލަތަކާއި ގުޅިގެން ކުލަބުގެ ކުރިއެރުމަށް ކުރެވޭ އެއްވެސް މަސައްކަތެއް ނެތްކަމަށް ބުނެ، މިދިޔަ އޭޕްރިލް މަހުގެ ކުރީކޮޅު ބާސެލޯނާ ބޯޑުގެ ހަ މެމްބަރަކު ވަނީ މަގާމުން އިސްތިއުފާ ދީފައެވެ. މިފަދަ ހުރިހާ ކަމެއްގެ އަސަރު ޓީމުގެ ކުޅުންތެރިންނަށް ފޯރުމުގެ ސަބަބުން، ބާސެލޯނާ އޮތީ ބޮޑު އަނދަވަޅަކަށް ވެއްޓިފައެވެ.

ބޮޑު ހޭދައެއް ކޮށްގެން ބާސެލޯނާގެ ފޯވާޑު ލައިން ވަރުގަދަކުރުމަށް ގެނައި ކުޅުންތެރިން ކަމުގައިވާ އޮސްމާން ޑެމްބެލޭ އާއި އޮންޓުއާން ގްރީޒްމަން ފަދަ ކުޅުންތެރިންނަށް އެދެވޭ ކުޅުމެއް މިހާތަނަށް ދެއްކިފައި ނުވެއެވެ. އެޓީމުގެ 9 ނަންބަރު ފޯވާޑު ލުއިސް ސުއަރޭޒް އަށް އަނިޔާގެ މައްސަލަތައް ކުރިމަތިވުމާއި، އޭނާގެ ކެރިއަރުގެ ފަހުކޮޅަށް އެޅިފައިވުމުން އޭނާގެ ކުޅުން ވެސް މިހާރު ވަނީ ވަރަށް ބޮޑުތަން ދަށްވެފައެވެ. ކަންމިހެން ހުރުމާއެކު، ބާސެލޯނާ އިން ޖޫން މަހުގަައި އޮންނަ ފިނިމޫސުމުގެ ޓްރާންސްފަރ ބާޒާރުގައި ފޯވާޑެއް ހޯދުމަށް ވަރަށް ބޮޑަށް މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ. އެގޮތުން ބާސެލޯނާ އިން ފާރަލަމުންދާ އެއް ފޯވާޑަކީ އިންޓަމިލާން އަށް ކުޅެމުން އަންނަ އާޖެންޓީނާގެ ޒުވާން ހުނަރުވެރި ފޯވާޑު ލައުޓާރޯ މާޓިނޭޒް އެވެ.

ކުޅިވަރު ޚަބަރުތައް ގެނެސްދޭ ނޫހެއް ކަމުގައިވާ “ސްޕޯޓް” އަށް ދިން އިންޓަވިއުއެއްގައި ލައުޓާރޯ މާޓިނޭޒް އާ ބެހޭގޮތުން މެސީ ބުނެފައިވަނީ މާޓިނޭޒް އަކީ ބާސެލޯނާގެ ފޯވާޑު ލައިން ވަރުގަދަކުރުމަށް ބޭނުންވާ ފެންވަރާއި، ހުނަރު ހުރި ކުޅުންތެރިއެއް ކަމަށެވެ.

“ތެދަށް ބުނަންޏާ މާޓިނޭޒް ބާސެލޯނާ އަށް ގެނައުމަށް އޭނާ އާއި މަޝްވަރާ ކުރި ކަމެއް ނޫންނަމަ ކުރަމުންދާ ކަމެއް އަހަރެންނަކަށް ނޭނގޭ. އަހަރެންނަށް އެކަމުގެ މަޢުލޫމާތެއް ނުލިބޭ. އަހަރެން ކުރިންވެސް ބުނިގޮތަށް ލައުޓާރޯ އަކީ ވަރަށް ހުނަރުވެރި މޮޅު ސްޓްރައިކަރެއް. އޭނާ އަކީ ގޯލާ ރައްޓެހި ކުޅުންތެރިއެއް. މޮޅަށް ކޮއްޓާ ވަރުގަދަ ކުޅުންތެރިއެއް. ބޯޅަ ހިފަހައްޓައިގެން ކުޅެންވެސް އޭނާ އަށް ރަނގަޅަށް އެނގޭ. އެކަމަކު މިކަން ނިމޭނެ ގޮތެއް ބަލަން ތިބެން ޖެހޭނީ.”

މެސީ ބުންޏެވެ.

2019/2020 ވަނަ ސީޒަނުގަަައި މިހާތަނަށް މާޓިނޭޒް 31 މެޗު ކުޅެފައިވާއިރު، އޭނާ 16 ގޯލު ޖަހައި، 4 އެސިސްޓް ހަދާފައިވާކަން ފާހަގަކޮށްލެވެއެވެ. އޭނާ ހޯދުމަށް ބާސެލޯނާގެ އިތުރުން ޔޫރަޕުގެ ބޮޑެތި އެހެން ކުލަބުތަކުން ވެސް އަންނަނީ މަސައްކަތް ކުރަމުންނެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: