1441 ވަނަ އަހަރުގެ ފިތުރު ޢީދު ނަމާދު ބޮޑު ޖަމާޢަތުގައި ނުކޮށް، ގެތަކުގައި ކުރުމަށް އިސްލާމިކް މިނިސްޓްރީން ނިންމައިފި އެވެ.
އެ މިނިސްޓްރީން ރާއްޖޭގެ ހުރިހާ ރަށެއްގެ ކައުންސިލުތަކަށް ފޮނުވާފައިވާ ސަރކިއުލާ އެއްގައި ބުނެފައިވަނީ މިވަގު ރާއްޖޭގެ ޙާލަތު އޮތްގޮތަށް ރިޢާޔަތްކޮށް 1441 ވަނަ އަހަރުގެ ފިތުރު ޢީދު ނަމާދު ބޮޑު ޖަމާޢަތުގައި ނުކޮށް، ގެތަކުގައި ޢީދު ނަމާދު ކުރުމަށް ނިންމާފައިވާކަމަށެވެ.
ފިތުރު ޢީދު ނަމާދު ބޮޑު ޖަމާޢަތުގައި ނުކުރެވުނު ކަމުގައި ވީނަމަވެސް، ގެތަކުގައި ޢީދު ނަމާދު ކޮށް، ގިނަ ގިނައިން ތަކުބީރުު ކިޔައި، ދުއާކޮށް ޝަރުއީ ހަމަތަކުގެ މަތިން ރައްކާތެރިކަމާއި އެކު ގޭގެ އަހުލުވެރިންނާއި އެކު ޢީދު އުފާ ފާޅުކުރުމަށް ހުރިހާ ރައްޔިތުންނަށް ނަސޭހަތްތެރިވާކަމަށް އިސްލާމިކް މިނިސްޓްރީގެ ސަރކިއުލާގައި ވެއެވެ.
ގޭގައި ޢީދު ނަމާދު ކުރާއިރު ޢަމަލުކުރާނެ ގޮތް އެ ސަރކިއުލާގައި ކިޔައިދީފައިވެއެވެ.
- ޢީދު ނަމާދަށް ނިޔަތްގަނެ ހަށަންބަަން ތަކުބީރު ކިޔައި ހަށަންބަނދެ، ދުޢާއުލް އިސްތިފްތާޙު ކިޔުން.
- ހަށަންބަަން ތަކުބީރު ފިޔަވައި ވިދިވިދިގެން 7 ތަކުބީރު ކިޔުން. ކޮންމެ ތަކުބީރެއްގައިވެސް ދެއަތް ދެކޮނޑާ ހަމައަށް އުުުުފުުލުން
- އެއަށްފަހު ފާތިޙާ ސޫރަތް ކިޔަވައި ސޫރަތުލް އަޢުލާ ނުވަތަ އެމީހަކަށް ފަސޭހަ ސޫރަތެއް ކިޔެވުން.
- އެއަށްފަހު އެހެން ނަމާދުތަކެކޭ އެއްފަދައިން ފުރަތަމަ ރަކުޢަތް ފުރިހަމަކުރުމަށްފަހު، ދެވަނަ ރަކުޢަތަށް ތެދުވުން.
- ދެވަނަ ރަކުޢަތަށް ތެދުވަމުން ކިޔާ ތަކުބީރުގެ އިތުރުން ވިދިވިދިގެން 5 ތަކްބީރު ކިޔުން. ކޮންމެ ތަކުބީރެއްގައިވެސް ދެއަތް ދެކޮނޑާ ހަމައަށް އުފުލުން.
- ދެވަނަ ރަކުޢަތުގައި ފާތިޙާ ސޫރަތް ކިޔަވައި ސޫރަތުލް ޣާޝިޔާ، ނުވަތަ އެމީހަކަށް ފަސޭހަ ސޫރަތެއް ކިޔެވުން.
- ދެވަނަ ރަކްޢަތް ފުރިހަމަކޮށް، އައްތަޙިއްޔާތު ކިޔުމަށްފަހު ސަލާމްދިނުން
ޢީދު ނަމާދުގެ ވަގުތު ވަންނާނީ ލޮންސިއެއްގެ މިންވަރަށް (ގާތް ގަޑަކަށް އިރު އަރާ ވަގުތުން ފެށިގެން 20 މިނެޓް) އިރު އެރުމުންނެވެ. ރާއްޖޭގައި އާންމުކޮށް ޢީދު ނަމާދު ކުރަނީ ހެނދުނު 7:30 ގައި ކަން ފާހަގަކޮށްލެވެއެވެ.
މިފަދަ ޙާލަތްތަކުގައި ގޭގައި ޢީދު ނަމާދުކުރާނީ މައިދާނުގައި ނުވަތަ މިސްކިތުގައި ވެސް ޢީދު ނަމާދު ކުރާ ފަދައިންނެވެ. ނަމަވެސް ޢީދު ނަމާދުގެ ޚުޠުބާއަކީ ޙާކިމާގެ ޢަމުރަށް ބޮޑު ޖަމާޢަތެއްގައި ކިޔުމަށް އޮންނަ ސުންނަތެއް ކަމުން ގޭގައި ޢީދު ނަމާދު ކުރާއިރު، ޚުޠުބާ ދިނުމެއް ނޯންނާނެއެވެ. ޢީދު ނަމާދުކުރާނީ ބަންގި ގޮވުމާއި ޤަމަތް ދިނުމަކާނުލައެވެ. ގޭގައި ޢީދުނަމާދު އެކަނި ވެސް ކުރެވޭނެއެވެ. ނަމަވެސް ގޭގެ އަހުލުވެރިންނާއެކު، ޖަމާޢަތުގައި ކުރުން އަޢުލާކަން ބޮޑުވެގެންވެއެވެ. އެހެންކަމުން، މި ސަރކިއުލާގައި ވާގޮތަށް ޢަމަލު ކުރެއްވުމަށް ރައްޔިތުންނަށް އަންގައިދިނުމަށް އިސްލާމިކް މިނިސްޓްރީން އެދިފައިވެއެވެ.
ލިޔުންތެރިޔާގެ ފުރަމަލަ
- އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.
މި ލިޔުންތެރިޔާގެ ބައެއް އެހެން ލިޔުންތައް
- 5 ޖެނުއަރީ 2022ޚަބަރުކޮވިޑް ކޭސްތައް ގިނަވެ އިނގެރޭސި ލީގު ކަޕް ސެމީ ފައިނަލް މެޗު ފަސްކޮށްފި
- 4 ޖެނުއަރީ 2022ޚަބަރުއާ އަހަރު ކުޅުނު ފުރަތަމަ މެޗުން ޔުނައިޓެޑް ބަލިވެއްޖެ
- 4 ޖެނުއަރީ 2022ޚަބަރުފްރެންޗް ކަޕްގެ ގެ ގަދަ 16 އަށް ޕީއެސްޖީ ދަތުރުކޮށްފި
- 2 ޖެނުއަރީ 2022ޚަބަރުރޮޑްރީގެ ގޯލުން ފަހު ވަގުތު ސިޓީން އާސެނަލް ބަލިކޮށްފި
