ކޮވިޑް-19 އާ ގުޅިގެން ސީޒަން ނިންމާލާފައިވާ ފްރާންސް ފުޓްބޯޅަ ލީގު، “ލީގު 1” ގެ ކުލަބެއް ކަމަށްވާ މޮނާކޯ ގެ ފޯވާޑު ވިސާމް ބެން ޔެޑާ އަށް މެންޗެސްޓަރ ޔުނައިޓެޑުން ފާރަލަމުންދާ ކަމަށް ރިޕޯޓުތައް ބުނެފިއެވެ.

ލީގު 1 ގެ ފުޓްބޯޅަ ސީޒަން ނިންމާލިއިރު، ބެން ޔެޑާ ގެ ފަރާތުން މޮޅުކުޅުމެއް ވަނީ ފެނިގެން ގޮސްފައިވާކަން ފާހަގަކޮށްލެވެއެވެ. މި ސީޒަނުގައި އޭނާގެ ފަރާތުން 18 ގޯލު ފެނިފައިވާއިރު، ލީގުގެ ރަން ބޫޓަށް ވެސް އޭނާ ވަނީ ވާދަކޮށްފައެވެ. ވާދަވެރި ޕީއެސްޖީ ގެ ފޯވާޑު ކީލިއަން އެމްބާޕޭ އާއި އެއް އަދަދަކަށް ގޯލު ޖަހާފައި އޮތް ނަމަވެސް، ބެން ޔެޑާ އަށް ރަން ބޫޓު ނުލިބުނީ 18 ގޯލުގެ ތެރޭގައި ތިން ޕެނަލްޓީ ހިމެނިފައިވާތީ އާއި، ގޯލު ޖެހުމުގެ ރޭޝިއޯ ދަށް ވުމުގެ ސަބަބުންނެވެ.

މޮނާކޯ އަށް ދިމާވެފައިވާ މާލީ ދަތިކަމާއި ހެދިގެން އެ ޓީމުގެ ގިނަ ކުޅުންތެރިންތަކެއް އަންނަ ހޫނު މޫސުމުގެ ޓްރާންސްފަރ ބާޒާރުގައި ވިއްކާލާނެ ކަމަށް ރިޕޯޓުތައް ބުނެއެވެ. ބެން ޔެޑާ އަކީ އެޓީމުގައި މިވަގުތު ހުރި އެންމެ މޮޅު އެއް ކުޅުންތެރިޔާ ކަމަށްވެފައި، މިވަގުތު ރަނގަޅު ފޯމެއްގައި ހުރުމާއި އެކު، އޭނާ ވިއްކާލައިގެން ކުލަބުގެ މާލީ ދަތިތަކަށް ކޮންމެވެސް ވަރެއްގެ ލުޔެއް ލިބޭނެކަމަށް މޮނާކޯ އިން ވިސްނަމުންދާ ކަމަށްވެސް ރިޕޯޓުތައް ބުނެއެވެ. ބެން ޔެޑާ މޮނާކޯ އަށް ބަދަލުވީ ފާއިތުވެދިޔަ އަހަރު ސްޕެއިންގެ ސެވިއްޔާ އިން 30 މިލިއަން ޔޫރޯގެ އަގަކަށެވެ.

ބެން ޔެޑާ ގެ އިތުރުން ލިޔޯންގެ ފޯވާޑު މޫސާ ޑެމްބެލޭ އާއި، ލިއްލޭ ގެ ފޯވާޑު ވިކްޓަރ އޮސިމްހެން އަށް ވެސް މެންޗެސްޓަރ ޔުނައިޓެޑުން ފާރަލަމުން އަންނަ ކަމަށް ރިޕޯޓުތައް ބުނެއެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: