ރޭގަނޑު ވެހެމުންދިޔަ ބޯ ވިއްސާރައިން، ގޭތެރެއަށް ވެރިވެފައިވާ މަޑުމަޑު ފިނިކަމެއްގެ ސަބަބުން އަހަރެން ގާތަށްވެސް ނިދިއަތުވެއްޖެއެވެ. ކުރިމަތީ ހުރި ގޮނޑިދަމައި ގޮނޑިމައްޗަށް ފައިލާ ކުޑަކޮށް ދެމިލުމަށްފަހު އެއްވެސް ވަރަކަށް ވިސްނައިލުމެއް ނެތި، އޯކޭހޭ ބުނެ އަޔާނާގެ ކޮނޑުގައި ބޯއަޅައިލީމެވެ. އަޔާނާ އިނީ ގުޑިލާންވެސް ނޭނގިފައެވެ. ދަންވަރުގެ މި އެކަނިވެރިކަމުގައި ބިރުންކަމެއް، ހިތްހަމަ ނުޖެހިފަކަމެއް ނުވަތަ ހިތުން ރުހުމުން ކަމެއްވެސް ނޭނގެއެވެ. އަހަރެންނަށް މި ކުރެވުނު ކަމެއް ހިތައްއަރައި ފުންކޮށް ވިސްނައިލެވުނީ އިރުކޮޅަކުންނެވެ. ސިއްސައިގެން ގޮސް ތެދުވެވުނެވެ. އަޔާނާއަށް ބަލާލައި ސޮރީއޭ ބުނެލެވުނެވެ. އަޔާނާވެސް ރަކިގޮތަކަށް އޯކޭއޭ ބުނެލިއެވެ. ކުރެވުނު ކަންތަކުން ސަލާމަތްވާންވެގެން އަހަރެންނަށް ފެންތަށްޓެއް ގެނެސްދީފާނަންހޭ އެހުމުން އަޔާނާ އަހަރެންނަށް ފެންތަށްޓެއް ގެނެސްދިނެވެ. އަހަރެން ފެންތަށި ބޯލައި ހުސް ތަށި އަޔާނާގެ އަތަށް ދިނުމުން ތަށި ލާން ގޮއްސަ އައިސް މަންމަ ދޮރު ހުޅުވައިފިޔޭ ދެން މިދަނީ ނިދާށޭ ބުނެ އަޔާނާ ވަނީ ކޮޓަރިއަށެވެ. އަޔާނާ ނިދަން ދިއުމުން އަހަރެންވެސް ޓީވީ ނިއްވައިލުމަށްފަހު ކޮޓަރިއަށް ވަދެ ނިދޭތޯ މަސައްކަތްކުރީމެވެ. ނިދަން އޮވެ ވިސްނެމުން ދިޔައީ މާދަމާ ހޭލާއިރަށް ގޭތެރޭ ކަންތައް ހުންނާނެ ގޮތަކާމެދުއެވެ. އަހަރެން އަމިއްލައަށް އަހަރެންގެ އަމިއްލަ ނަފްސު ކުށްވެރިކުރީމެވެ. އަހަރެންނަށް ނިދުނީ ލޯބީގެ އިޝްގުގައި މިރޭ މި ކުރެވުނީ އެހާ ރަނގަޅު ކަމެއް ނޫންކަމަށް ވިސްނުމުން އަމިއްލަ ހިތަށް ވިސްނައިދެވޭތޯ މަސައްކަތްކޮށްކޮށް އޮއްވައެވެ.

ހެނދުނު ހޭލެވުމުން އަހަރެން އަވަސްވެގަތީ މަސައްކަތާއިގެންނެވެ. މިއަދަށް ކަނޑައެޅުނު މަސައްކަތްތައް ނިންމާލެވިއްޖެނަމަ މަސައްކަތް ނިންމުމަށް ކަނޑައެޅިފައިވީ ދުވަހުގެ ދެދުވަސް ކުރިން މުޅި ޕުރޮޖެކްޓް ނިންމައިލެވޭނެއެވެ. އޭރުން އަހަރެންނަށް މިރަށުގައި ޗުއްޓީގެ ގޮތުގައި ދެދުވަހު ހުރެވޭނެއެވެ. މިރަށުން މި ދިމާވި ކަންތައްތަކުން އަހަރެން މިރަށުން ދާނީ ދާހިތަކުން ނޫނެވެ. އެހެންވިޔަސް މަސައްކަތް ނިމުމުން އަހަރެން ޖެހޭނީ މި އުފާވެރި ދުވަސްތައް ދޫކޮށް އަހަރެންގެ ވަޒީފާއަށް އެނބުރި ދާށެވެ. ކުންފުނިން އަހަރެންގެ މަސައްކަތާއިމެދު ހިތްހަމަޖެހިއްޖެނަމަ ފަހަރުގައި މިރަށަށް އެނބުރި އަންނަން ޖެހިދާނެއެވެ.

މެންދުރަށް މަސައްކަތް ނިންމާލުމަށްފަހު ނާއިސްއާއި އަހަރެން އައީ ގެއަށެވެ. އަހަރެންގެ މިލްކަކަށް ވޭތޯ އަބަދާއި އަބަދު ދުޢާކުރަމުން މިދާ އަހަރެންގެ ހިތުގެ ރާނީގެ ސޫރަ ދެކިލާހިތުން އަހަރެން ކެތްމަދުވެފައި ހުރީމެވެ. އަޔާނާއާ ދެން އެންމެ އަވަހަށް ބައްދަލުވުމުން އަޔާނާދެކެ އަހަރެން ލޯބިވާ ވާހަކަ ހާމަކޮށް އަހަރެންގެ މިލްކަކަށް އަޔާނާ ހެދުމަށް ބޭނުންވާ ވާހަކަ ބުނަން އަހަރެން މިހުރީ ނިންމައިގެންނެވެ. އެގޮތުން އަދި ދެދުވަސް ވަންދެން މިރަށުގައި މަޑުކޮށްލުމަށް ކުންފުނީގެ ފަރާތުން އަހަރެންނަށް ވަނީ ހަމަޖައްސައިދީފައެވެ. ސަބަބަކީ ކުންފުނިން އަހަރެންނަށް ނިންމަން ދިން މުއްދަތުގެ ކުރިން މަސައްކަތް ފުރިހަމަކުރުމެވެ.

ރޭގައި ހިނގައިދިޔަ ހާދިސާގެ ވާހަކަ އަހަރެން އެއްވެސް ވަރަކަށް ނާއިސްއަށް ކިޔައެއް ނުދެމެވެ. އެވާހަކަތައް އިތުރު މީހަކަށް އެންގުން އެއީ އަހަރެންނަށް އެހާ ފަސޭހަ ކަމަކަށް ނުވިއެވެ. އަހަރެން ކިތަންމެ އުއްމީދުގައި ހުރިނަމަވެސް އަޔާނާގެ ސޫރަ ފެންނަގޮތެއް ނުވިއެވެ. އަޔާނާ ގެއަކު ނޫޅެއެވެ. އެހެނަސް އަޔާނާގެ މަންމަގެ މޫނުމަތިން، އެ އުފާވެރިކަމާއި ހިތްހެޔޮކަން ތަކުރާރުކޮށް ފާޅުވާން ހުރުމުން އަހަރެންނަށް، ރޭގައި ދިމާވި ހާދިސާގެ އެއްވެސް ނުރައްކަލެއް ނެތްކަން އިޙްސާސްކުރެވުނެވެ.

އަހަރެންނާއި ނާއިސް މެންދުރު ކެއުމަށްފަހު ނިކުތީ ބުރެއް ޖަހައިލާށެވެ. މަސައްކަތްތައް ނިންމައިލެވުމުން އެކަމުގެ ހިތްހަމަޖެހުމުގައި އަހަރެން ނާއިސްއަށް އެތައް ފަހަރަކު ޝުކުރު އަދާކުރީމެވެ. ޙަޤީޤަތުގައިވެސް ނާއިސްގެ އެހީތެރިކަން ނުލިބުނުނަމަ މަސައްކަތްތައް މިހާ ފުރިހަމައަށް ހަލުވިކަމާއިއެކު ނިންމައިނުލެވުނީހެވެ. ސައިކަލުގައި ގޮސް އަހަރެންނަށް އެންމެ ފުރަތަމަ އަޔާނާ ބައްދަލުވި އެ ހިތްފަސޭހަ ސަރަހައްދަށް އާދެވުމުން އަހަރެން ނާއިސް ކައިރީ މަޑުކޮށްލުމަށް އެދުމުން ނާއިސް ސައިކަލް ހުއްޓައިލިއެވެ. މިރަށަށް އައި އެންމެ ފުރަތަމަ ދުވަހު އަހަރެންނަށް މި ސަރަހައްދު ވަނީ ވަރަށް ޚާއްސަވެފައެވެ. ޚާއްސަވާންޖެހޭ ބައިވަރު ސަބަބުތަކެއްވެއެވެ. މިރަށަކީ ޤުދުރަތީ ރީތިކަމުގެ ލާމަސީލު މިސާލެކެވެ. ޚާއްސަވަނީ ހަމައެކަނި މިރަށެއް ނޫނެވެ. އެންމެ ނަޒަރަކުން އަހަރެންގެ ހިތް އަތުލި ހަމައެކަނި ޒުވާނާއާވެސް އަހަރެންނާ އެންމެ ފުރަތަމަ ބައްދަލުވެފައިވަނީ މި ސަރަހައްދުންނެވެ.

އަހަރެން ފުރަތަމަ މިރަށަށް އައި ދުވަހު އަހަރެންނަށް ކިތަންމެ ހިތްހަމަޖެހޭފަދަ މަންޒަރެއް ފެނުނު ކަމުގައި ވީނަމަވެސް މިވަގުތު މި ސަރަހައްދުން ފެންނަމުން މިދަނީ އަހަރެންނަށް ބަލަން އެހައި ހިތްގައިމު މަންޒަރެއް ނޫނެވެ. އެދުވަހާ ޚިލާފަށް އުޑުމައްޗަށްވެސް ވެރިވެފައިވަނީ ބަނަކަމެވެ. ދުނިޔެމަތި ވަނީ ހަދާފައި ހުރި ވިއްސާރަގަނޑެއްގެ ސަބަބުން އަނދިރިވެފައެވެ. އެދުވަހު އުދަރެހުގައި ދައުރުވަމުންދިޔަ ރަތްވިލާތައްވެސް މިއަދަކު ނުފެނެއެވެ. ނާއިސްއަށްވެސް އެމަންޒަރު ވަރަށް ކައިރިން ފެނުނެވެ. އެމީހެއްގެ ލޯތްބަށް އަހަރެންގެ ހިތް އަބަދުމެ އެދެމުން މިދާ އަހަރެންގެ ހިތުގެ މަލިކާގެ ގާތުގައި އިށީނދެލައިގެން އެއިނީ އެހެން ޒުވާނެކެވެ. މަންޒަރު ފެންނަގޮތުން އެއީ އަޔާނާގެ ޙަޔާތުގެ ބައިވެރިޔާއެވެ. މިއަދު އެ މަޤާމުގައި އިނުމަށް އަހަރެން ކިތަންމެ ހިތް އެދުނަސް އަހަރެން ނޫން އެހެން މީހަކު އެ މަޤާމު ފުރާތަން ފެނުން އެއީ އަހަރެންނަށްވެސް އަދި ނާއިސްއަށްވެސް ކެތްކުރެވޭނެ ކަމެއް ނޫނެވެ. ނާއިސްގެ އުއްމީދަކީ އަދި އެދުމަކީވެސް އަޔާނާ އަހަރެންގެ މިލްކަކަށް ވުމެވެ. ނަމަވެސް މިއަދު މި ފެންނަ މަންޒަރުން އަހަރެންގެ ހިތުގައި ދައުރުވަމުން މިދާ އޮއިވަރު ހުއްޓުމަކަށް އަތުވެއްޖެއެވެ. އަހަރެންގެ ހިތް ކުދިކުދިވީ ކަހަލައެވެ. އަޔާނާގެ ލޯބި ލިބޭނެކަމުގެ އުއްމީދު ކަނޑައިލެވުނެވެ. މިއަދަކީ އަހަރެން ދެކެން ބޭނުންވި ދުވަހެއް ނޫނެވެ.

ނާއިސް އަހަންނަށް ވަރަށް ވިސްނައިދެވޭތޯ މަސައްކަތްކުރިއެވެ. ދިރިއުޅުމުގައި އެކި ދުވަހު ދިމާވާނީ އެކި ކަންތަކާއެވެ. އޭގެތެރޭގައި ކެތްކުރެވޭ ކަންތައްތަކާއި ކެތްނުކުރެވޭ ކަންތައްތަކެވެ. ދިރިއުޅުމުގައި ދިމާވާ ކޮންމެ ކަމަކީވެސް އިމްތިޙާނެކެވެ. އަޑިގަނޑަކަށްފަހު އުސްގަނޑެއް އަންނާނެއެވެ. މިފަދަ އެތައް ވާހަކައެއް ނާއިސް އަހަރެންނަށް ކިޔައިދިނެވެ.

އަހަރެންނާއި ނާއިސްއަށް މި މަންޒަރު ފެނުނުކަމެއް އަޔާނާއަކަށް ނޭނގޭނެއެވެ. އަހަރެންވެސް ބޭނުންވީ ވީ އެންމެ އަވަހަކަށް މިތަނުން ދިއުމަށެވެ. އިތުރަށް އަހަރެންގެ ހިތް ރޮއްވަން އަހަރެން ބޭނުން ނުވީއެވެ. އަޔާނާ އަހަރެންގެ މިލްކަކަށް ހެދުމަށް އަހަރެން އެތަކެއް އުއްމީދެއް ކުރީމެވެ. އަހަރެން އަޔާނާ ލިބޭތޯ އެތައް ފަހަރަކު ދުޢާވެސް ކުރީމެވެ. އެކަމު އަހަރެންގެ ތަޤުދީރުގައި އެ ނަސީބު ނެތްކަން އެނގުމުން އެހެން މީހެއްގެ ޙައްޤަކަށް އަރައިގަތުމަށް އަހަރެންގެ މި އެކަނިވެރި ހިތް ބޭނުމެއް ނުވިއެވެ.

ލިބުނު ހިތްދަތިކަމެއްގެ ސަބަބުން އަހަރެން މިރަށުގައި އިތުރު ދުވަހެއް ހޭދަކުރުމުގެ މާބޮޑު މާނައެއް ނެތުމުން ޖެހިގެން އައި ދުވަހު މާލެ ދިއުމަށް އަހަރެން ނިންމީމެވެ. ޙަޤީޤަތުގައިވެސް އަހަރެން މިރަށުގައި ޗުއްޓީގެ ގޮތުގައި ދެދުވަސް ހޭދަކުރުމުގެ މާބޮޑު މާނައެއް މިހާރަކު ނެތެވެ. އަހަރެން އަވަހަށް މަސައްކަތްތައް ނިންމާލައި މިރަށުގައި މަޑުކުރުމަށް ނިންމީ އަޔާނާއާއިއެކު ލޯބީގެ ގުޅުމެއް އުފައްދައި އުފާވެރި ވަގުތުތަކެއް އަޔާނާއާއިއެކު ހޭދަކުރުމުގެ އުއްމީދުގައެވެ. ނަމަވެސް އަޔާނާ ވަނީ އަހަރެންގެ މި އުއްމީދުތައް ފުނޑުފުނޑުކޮއްލައިފައެވެ. އަޔާނާ ލޯބީގެ ގޮތުން މީހަކާ ގުޅިފައިވާ ވާހަކަ އަޔާނާވެސް އަހަންނަށް ކިޔައިދީފައެއް ނުވެއެވެ. އެކަމު އެއީ އަޔާނާގެވެސް ކުށެއް ނޫނެވެ. އަހަރެންވެސް އެފަދަ ވާހަކައެއް އަޔާނާގެ ގާތުގަ އަހައިފައެއް ނުވާނެއެވެ.

އަހަރެންގެ މަސައްކަތްތައް ނިންމައިލުމަށްފަހު މާލެ އައީ ކޮންމެވެސް ވަރަކަށް ހިތްހަމަޖެހުމާއި އެކުގައެވެ. ކުންފުނިން ހަވާލުކުރި މަސައްކަތްތައް ވަނީ މެނޭޖަރު ހިތްހަމަޖެހޭވަރަށްވުރެވެސް ފުރިހަމައަށް ނިންމައިލެވިފައިކަމަށް ބުނެ އެފަރާތުން އަހަރެންނަށް ވަނީ ތަޢުރީފްކޮއްފައެވެ. ނަމަވެސް އަހަރެންނަށް ލިބުނު ހިތްހަމަޖެހުމާއި އެއްވަރަށް އަހަރެންނަށް ވަނީ ހިތްދަތިކަމަކާވެސް ކުރިމަތިލާން ޖެހިފައެވެ. އަހަރެން އެމީހަކަށްޓަކައި އަހަރެންގެ މުޅި ޖާނާއި މާލު ޤުރުބާންކުރަން ނިންމައިގެން ހުރި އަޔާނާ އަހަރެންނަށް ގެއްލުނީއެވެ.

ކުޑަވަރެއްގެ ޗުއްޓީއެއް ނިންމައިލުމަށްފަހު އަހަރެން މަސައްކަތް ފެށީ އަހަރެން މަސައްކަތްކުރަމުން މިދާ ކުންފުނީގެ ފަރާތުން އަޔާނާމެންގެ ރަށުގައި އެޅުމަށް ހަމަޖެހިފައިވާ ގެސްޓުހައުސްތަކުގެ މަސައްކަތްތައް ކުރިއަށް ގެންދިއުމުގެ ކަރުދާހުގެ މަސައްކަތްތައް ނިންމުމަށެވެ. ކުންފުނިން ވަނީ އަހަރެން ކުރި މަސައްކަތުގެ އަގުވަޒަންކުރުމުގެ ގޮތުން މަސައްކަތްތައް ކުރިއަށް ގެންދިއުމަށް މި ޕުރޮޖެކްޓްގެ ޕުރޮޖެކްޓް މެނޭޖަރުކަން އަހަރެންނާއި ހަވާލުކޮއްފައެވެ. ވަރަށް މަސައްކަތުން ކުޑަ ދުވަސްކޮޅެއްތެރޭގައި ނަގަންޖެހޭ ހުއްދަތައް ނަގައި މަސައްކަތް ފެށޭވަރަށް ނިންމައިލެވުނެވެ. މަސައްކަތްތައް ކުރިއަށް ގެންދިއުމުގެ ގޮތުން ސައިޓް ސުޕަވައިޒަރަކަށް ކުންފުނީގެ ހުއްދައާއެކު އަހަރެން ހަމަޖެއްސީ ނާއިސްއެވެ. އެއީ އަހަރެންނަށް މި މަސައްކަތްތައް ކުރިއަށް ގެންދިއުމަށް ފަސޭހަތަކެއް ވާނެކަމުގެ ޔަޤީންކަން އޮތުމުންނެވެ.

ނުދަންނަ ނަންބަރަކުން މިސްކޯލެއް އައިސްފައި އޮތުމުން އެއީ ކާކުތޯ ބަލައިލިއިރު، އަހަރެންގެ ހިތް ޒަޚަމްކޮއްލި އަހަރެންގެ ހިތުގެ މަލިކާއެވެ. އެތައް ދުވަހަކަށްފަހު އަޔާނާއާ ވާހަކަ ދައްކައިލެވުމުން އަހަރެން ވަރަށް އުފާވިއެވެ. އަދި އަޔާނާ މާލެ އަންނަ ޚަބަރު ލިބުމުން އިތުރަށް އުފާވިއެވެ. އަޔާނާ އެހެން މީހަކާ ލޯބީގެ ގޮތުން ގުޅިފައިވާކަން އެނގުނަސް އަހަރެންނަށް އަޔާނާގެ މަތިން ވަނީ ހަނދާން ނައްތައިނުލެވިފައެވެ. ހަމައެކަނި ކުރެވުނުހައިވެސް ކަމަކީ ނާއިސް ފިޔަވައި އެހެން މީހަކަށް އަހަރެން އަޔާނާދެކެ ލޯބިވާކަން ނޭންގުމެވެ. އަހަރެންގެ ހިތުގައި އަބަދުވެސް އަޔާނާގެ ހަނދާންތައް ދައުރުވަމުން ދެއެވެ. އެ ރީތި ހިނިތުންވުމާއި އެ އުފާވެރި ވަގުތުތަކެވެ. އަހަރެން ކިތަންމެ ބޭނުންނުވިޔަސް، އަބަދުވެސް އަޔާނާގެ ލޯތްބަށް އިންތިޒާރުކުރެވެއެވެ.

އަޔާނާއާއި އަޔާނާގެ މަންމަ މާލެ އައުމުން އަހަރެން އެމީހުން ލަފާތަނަށް ދިޔައިމެެވެ. ދުވަސްކޮޅަކަށްފަހު އަނެއްކާވެސް އަޔާނާއާ ބައްދަލުވުމުން އަހަރެންގެ މި ޒަޚަމްވެފައިވާ ހިތަށް ފަރުވާއެއް ލިބުނު ކަހަލައެވެ. ކުރަން ބޭނުންނުވިޔަސް އަހަރެންގެ ހިތަށް ނޭނގިނަމަވެސް އަޔާނާގެ ލޯތްބަށް އަހަރެންނަށް އިންތިޒާރު ކުރެވެއެވެ. ކޮންމެވެސް ދުވަހަކުން އަޔާނާ އަހަރެންގެ މީހަކަށް ވާނެކަމުގެ އިހުސާސް އަހަރެންނަށް އަބަދުވެސް ކުރެވެއެވެ.

އަޔާނާގެ ކޮއްކޮމެން މާލޭގައި ކިޔަވަން ތިބޭ ގޭގައި ޖާގަ ނެތުމުން މާލެ އަންނަ ކޮންމެ ފަހަރަކު އެމީހުން ތިބެން ޖެހެނީ ކޮޓަރިއެއް ކުއްޔަށް ހިފައިގެންނެވެ. އެކަން އަހަރެންނަށް އެނގުމުން، އަހަރެންނާމެދު އެހާ ހެޔޮކޮށް ހިތި ބަޔަކަށް އަހަރެންވެސް އެހީތެރިކަމެއް ދިނުމުގެ ގޮތުން، އަހަރެންގެ އާއިލާގެ މީހުން ގާތު އަޔާނާމެން ބައިތިއްބުމަށް ނިންމީމެވެ. އެގޮތުން އަޔާނާމެންނަށް އަހަރެންގެ ކޮޓަރި ދިނުމަށްފަހު އަޔާނާމެން ފުރަންވަންދެން، އަހަރެން ބަދަލުވީީ ކުންފުނިން އަހަރެން ހުރުމަށް މާލޭގައި ހަމަޖައްސައިފައި ހުންނަ ކޮޓަރިއަށެވެ.

އަހަރެމެންގެ ގޭގައި އުޅެނީ މަންމައާއި ބައްޕަގެ އިތުރުން އަހަރެންގެ ދެ އަންހެން ކޮއްކޮއެވެ. އަހަރެންގެ އާއިލާއަކީ މެހުމާނުންނަށް ވަރަށް ކަމޭހިތާ ބައެކެވެ. އަބަދުވެސް ރާއްޖެތެރެއިން އަންނަ ރައްޓެހިންނަށް މިގެއިން ދެމުން ގެންދަނީ ވަރަށް ބޮޑު އެއްބާރުލުމެކެވެ. ނަތީޖާއެއްގެ ގޮތުން ބައްޕަމެންގެ ރަޙުމަތްތެރިން އަހަރެމެންނަށްވެސް ވަރަށް ހެވެވެ. އެކި ރަށްރަށުން އަބަދުވެސް ތަފާތު ހަދިޔާތައް މިގެއަށް އެ ރަޙުމަތްތެރިން ފޮނުވަމުން ދެއެވެ. އޭގެއިން ރަށަކަށް ޗުއްޓީއެއްގައި އަހަރުމެންނަށް ދެވިއްޖެނަމަ އެއްވެސް ދަތިކަމެއްނެތި އުފަލުގައި އަހަރެމެންނަށް އުޅެވެއެވެ.

އަހަރެންގެ އާއިލާއަށް އަޔާނާއާއި އަޔާނާގެ މަންމަ ތަޢާރަފްކޮއްދިނީމެވެ. އިތުރު މީހަކަށް ނޭނގޭނެހެން ކޮއްކޮމެން ގާތު ފަހަރެއްގަ، އަޔާނާއަކީ ކޮއްކޮމެންގެ ވާންއުޅޭ ފަހަރިކަމަށް ބުނީމެވެ. ކޮއްކޮމެން އެކަމާ ކިތަންމެ ހިތްހަމަޖެހިފައި ތިބިނަމަވެސް، ކޮއްކޮމެން އަހަރެންނާ ސުވާލެއް ކުރިމަތިކުރުވިއެވެ. ފަހަރެއްގައޭ ބޭބެ ބުނީ ކީއްވެތޯ ސުވާލުކުރިއެވެ. އަހަރެން ފަހުންނޭ ބުނެ ވާހަކަ ކުރުކޮށްލީމެވެ. އަޔާނާއާ ގާތް ގުޅުމެއް ބާއްވާށޭ ބުނެ މަންމަމެންނަށް އަދި ސިއްރެއްގެ ގޮތުގައި މިކަން ބާއްވަދިނުމަށް އެދުނީމެވެ.

އަޔާނާމެން ތިބުމުގެ ކަންތައްތައް ނިންމައިލުމަށްފަހު ކަމެއް ބޭނުންވެއްޖެނަމަ އަހަރެންނާ ގުޅާށޭ ބުނެ އަހަރެން ދިޔައީ އޮފީހަށެވެ. މިހާރު އަނެއްކާވެސް އަހަރެން ބޭނުންވަނީ ވީ އެންމެ އަވަހަކަށް އަޔާނާމެން ރަށުގައި މަސައްކަތްތައް ފެށުމަށެވެ. އަހަރެން އަލުން އަޔާނާމެން ރަށަށް ދާންޖެހޭ ވާހަކަ އަޔާނާ ގާތުގައި އަދި ނުބުނަމެވެ. އެހާ އަވަހަށް އަހަރެން އަޔާނާމެންގެ ރަށުން އަންނަން ޖެހުނީ ކީއްވެ ކަމެއްވެސް އަޔާނާއަކަށް ނޭނގޭނެއެވެ. ކުންފުނިން އަހަރެންނަށް ދެދުވަހުގެ ޗުއްޓީއެއް ދިނުމުންވެސް އަހަރެން މާލެ އަންނަން ޖެހުނީ އުއްމީދު ކުރަމުންދިޔަ އަހަރެން ހިތުގެ ރާނީގެ ލޯބި އަހަރެންނަށް ނުލިބޭނެކަން އެނގުނު ހިސާބުންނެވެ. އަހަރެންގެ ހިތް ކިތަންމެ އަޔާނާއަށް ބޭނުންވިކަމުގައި ވީނަމަވެސް އަހަރެން މަސައްކަތް ނިންމައި މާލެ އައި ދުވަހުން ފެށިގެން އަޔާނާއަކާ ވާހަކައެއް ނުދެއްކެއެވެ. އަޔާނާއަކީ އެހެން މީހެއްގެ ޙަޔާތުގެ ބައިވެރިޔާކަން އެނގުނު ހިސާބުން ހިތާދެކޮޅަށް ނަމަވެސް، އަހަރެން އަޔާނާއާ މާބޮޑު ގުޅުމެއް ބާއްވަން ބޭނުންނުވީއެވެ. ނަމަވެސް ނާއިސް މެދުވެރިކޮށް އަހަރެން ދިޔައީ އަޔާނާމެންގެ ޙާލު ބަލަމުންނެވެ.

އަޔާނާ މާލެ އައުމަށްފަހު އަހަރެން އިންތިޒާރުކުރަމުން ދިޔައީ އަހަރެންގެ ފަރާތުން އަޔާނާ ކަމަކަށް އެދި ގުޅާނެ ފަހަރަކަށެވެ. އަހަރެންގެ ހިތް އަބަދުވެސް އެދި އާދޭސްކުރަމުން ދިޔައީ އަޔާނާއަށް އެހީތެރިކަން ފޯރުކޮށްދިނުމަށެވެ. އަޔާނާއަށް ބޭނުން ޖެހިފައިވާ ކޮންމެ ކަމެއް ކޮށްދިނުން އެއީ މިއަދު އަހަރެންގެ އުފަލަކަށް ވެއްޖެއެވެ. އެއީ އަހަރެން އަޔާނާދެކެ މިވާ ޙަޤީޤީ ލޯތްބަށްޓަކައެވެ.

އަހަރެން މަސައްކަތްކުރަމުން ގެންދިޔައީ އަޔާނާމެން އެނބުރި ރަށަށްދާ ދަތުރު އަޔާނާމެންނާއި އެއްކޮށް އެރަށަށް ދިއުމަށެވެ. މަސައްކަތަށް ބޭނުންވާ ހުރިހައި ސާމާނެއް މިހާރު ހުރީ ރެޑީވެފައެވެ. އެރަށަށްދާ ބޯޓުން ފޮނުވައިލެވޭވަރަށް ތައްޔާރު ކުރެވިފައެވެ. ގެސްޓްހައުސްގެ ގޮތުގައި 20 ކޮޓަރި އެރަށުގައި އަޅާގޮތަށް ވަނީ ހަމަޖެހިފައެވެ. އޭގެ އިތުރުން ރެސްޓޯރެންޓެއްވެސް އެޅުމަށް ވަނީ ހަމަޖެހިފައެވެ. މަސައްކަތްތައް ކުރިއަށް ގެންދިއުމަށް މުވައްޒަފުން ނެގުމަށް އަހަރެން ވާނީ ނާއިސްއާ ހަވާލުކޮށްފައެވެ. ކުންފުނީގެ ހުއްދައާއެކު އަހަރެން މި ޕްރޮޖެކްޓް ކުރިއަށް ގެންދިއުމަށް ވިސްނައިފައިވަނީ މުޅީންވެސް ދިވެހި މުވައްޒަފުން ބޭނުންކޮށްގެންނެވެ. އޭގެތެރެއިންވެސް 80 ޕަސެންޓް މުވައްޒަފުންނަކީ އަޔާނާމެންގެ ރަށުގެ ޒުވާނުންނެވެ.

އޮފީހުގައި އަވަދިނެތި އުޅެނިކޮށް އަހަރެން އެ އަޑަކަށްޓަކައި އަބަދުމެ އިންތިޒާރުކުރަމުން މިދާ އަހަރެންގެ ހިތުގެ ރާނީގެ ފޯންކޯލެއް އައެވެ. އަހަރެން އަވަސްވެގަތީ ކުރިންވެސް ބުނިފަދައިން އަޔާނާ ބޭނުންވެފައިވަނީ ކޮން ކަމަކަށްތޯ ބަލައި އަވަހަށް އެކަން ކޮށްދިނުމަށެވެ. އަޔާނާގެ ފޯނުކޯލެއް އައުމުން އަހަރެން ވަރަށް އުފާވިއެވެ. އަޔާނާ އަހަރެންގެ ފަރާތުން އެދުނީ އަޔާނާއާއިއެކު އަޔާނާގެ ކޮއްކޮމެން އުޅޭ ގެއަށް ދިއުމަށް އައިސްދިނުމަށެވެ. އަހަރެން އަވަސްއަވަސް ކޮށްލާފައި މިދަނީއޭ ބުނެ ސައިކަލަށް އަރައި ގެއަށް ދިއުމަށް އަވަސްވެގަތީމެވެ. ސައިކަލުގެ މުށްގަނޑުގައި ހުރިވަރެއް ދައްކާލައިފައި ގެއަށް އައިއިރު އަޔާނާ، އޭނާގެ މަންމައާއިއެކު ދޮރުމަތީގައި ހުއްޓެވެ. އަހަރެން އައިސް މަޑުކޮށްލުމުން އަޔާނާ ދިޔައީ ސިހިގެންނެވެ. “ހާދަ އަވަހޭ. އަހަރުމެންނަށް ގުޅާފަ ހަމަ ތިރިއަށް ކިރިޔާ މި ފޭބުނީ.”

(ނުނިމޭ)

ލިޔުންތެރިޔާގެ ފުރަމަލަ

މުޙައްމަދު ޝާހީން

ގުޅުންހުރި ލިޔުން: