އުތުރު ކޮރެއާގެ ހުދުމުޚުތާރު ވެރިކަމަކީ ދުނިޔޭގެ އެންމެން ދަންނަ ކަމެކެވެ. އެގައުމުގެ ކަންކަން ހޯދާ ބަލަން އުޅުމަކީ އަމިއްލަ ކަރަށް މަޅިގަނޑު މަހާލުންކަހަލަ ކަމެކެވެ. އެންމެ ކުޑަ މިނުން އެގައުމުގެ މީހުންގެ ބޯކޮށާނެ ގޮތްވެސް އެނގެނީ އެގައުމުގެ ލީޑަރު ކިމް ޖޮން އުން އަށެވެ. ދެން އެހެން ކަންކަމުގެ ވާހަކަ ދައްކާނެ ކަމެއް ނެތްތާއެވެ. މި ރިޕޯޓުގައި މި ހިމަނާލަނީ ކިމް ޖޮން އުންގެ އަނބިކަނބަލުން ރި ސޯލް ޖޫ އަށް މަނާ ކަންކަމުގެ ލިސްޓެވެ.

1. މާޒީ ހަނދާން ނައްތާލާ މުޅިން އައު މީހަކަށް ވުން:
ކިމް ޖޮން އުން އާއި ކައިވެނި ބައްލަވައިގަތުމަށްފަހު ރީ ސޯލް އަށް ޖެހިވަޑައިގަތީ އެކަމަނާގެ މާޒީގެ މަތިން މުޅިން ހަނދާން ނައްތާލާށެވެ. މިގޮތުން ކައިވެންޏަށްފަހު އެކަމަނާގެ ނަންވެސް ވަނީ ބަދަލުކޮށްފައެވެ. ރީ ސޯލް ޖޫ އަކީ ކައިވެންޏަށް ފަހު އެކަމަނާގެ ނަމެވެ. އުފަންވީ ތާރީޚުން ފެށިގެން ނަމާއި ކުރީގެ ދިރިއުޅުން އެކަމަނާއަށް ޖެހިވަޑައިގެންނެވީ ހަނދާނުން ފޮހެލައްވާށެވެ.

ކިމް ޖޮންގް އުން އަދި ރީ ސޮލް ޖޫ

2. އަމިއްލަ އާއިލާއާއި މައިންބަފައިންނާ ބައްދަލުކުރެއްވުމަކީ މުޅިން މަނާ ކަމެއް:

އެނގިފައިވާ ގޮތުގައި ކިމް ޖޮން އުން އާއި ކައިވެނި ބައްލަވައި ގަތުމަށްފަހު، އެކަމަނާގެ މައިބަފައިންނާއި އާއިލާއާއި ބައްދަލުވެފައިނުވާ އިރު، އެމީހުން ފެނިފައިވެސް ނުވެއެވެ. އެހެންނަމަވެސް އެކަމަނާއަކީވެސް އެގައުމުގެ ގަދަރުވެރި އާއިލާއަކަށް ނިސްބަތްވެވަޑައިގަންނަވާ ކަނބަލެކެވެ. އެކަމަނާގެ މަންމައަކީ އެގައުމުގެ ހޮސްޕިޓަލެއްގެ އަންހެނުންގެ ހާއްސަ ޑޮކްޓަރުންގެ އިސް ޑޮކްޓަރެކެވެ. އަދި ބައްޕަ އަކީ ޕްރޮފެސަރެކެވެ. އަދި އެކަމަނާއާއި ކިމް ޖޮން އުންއާއި ބައްދަލުވެފައިވަނީ އެކަމަނާގެ ބޮޑުބޭބެ މެދުވެރިކޮށްކަމަށް މައުލޫމާތު ލިބިއެވެ. އެކަމަނާގެ ބޮޑުބޭބެ އަކީ ކުރީގެ މިލިޓަރީ އެޑްވައިޒަރެކެވެ.

3. ފުނާއަޅާ، ހެދުން އެޅުއްވޭނީ ވަކި ގޮތަކަށް:

ރީ ސޯލް ޖޫ އަކީ އުތުރު ކޮރެއާގެ ފަސްޓް ލޭޑީކަމުގައި ވީނަމަވެސް، އެކަމަނާ ފުނާއަޅުއްވާނެ ގޮތާއި، ހެދުން އެޅުއްވުމުގެ ހަރުކަށި ގަވާއިދެއް ވަނީ ހެދިފައެވެ. ހެދުން އަޅާ ގޮތުން ފެށިގެން އެކަމަނާގެ ހުރިހާކަމެއްވެސް ހަމަޖެހިފައިވަނީ ވަކި ގަވާއިދަކުންނެވެ. އެއީ އާއްމުންގެ ލޯތަކުން އެކަމަނާ ސަލާމަތްކޮށް ކިމް ޖޮން އުންގެ އަބުރުފުޅަށް ހުތުރުވެދާނެ ފަދަ އެއްވެސް ކަމަކުން ސަލާމަތްވުމަށް ކަމަށްވެއެވެ.

ކިމް ޖޮންގް އުން އަދި ރީ ސޮލް ޖޫ

4. މާބަނޑުކަން ފޮރުވުމަކީ މަޖުބޫރު ކަމެއް:

ކައިވެނި ބައްލަވައިގެންނެވި ހިސާބުންފެށިގެންވެސް ސަލާމަތީ ކަންކަން ވަރުގަދަކޮށް ދިރިއުޅުއްވަމުން ގެންދަވާ ރީ ސޯލް ޖޫ އަށް އޭނާގެ މާބަނޑުކަން ފޮރުވުމަށް މަޖުބޫރެވެ. އެއީވެސް އާއްމުންގެ ލޯތަކުން އެކަމަނާ ސަލާމަތްކުރުމަށް ކަމަށްވެއެވެ. އެހެންނަމަވެސް ބުނެވޭ ގޮތުގައި އެއީ އެކަމަނާ އާއްމުންނާ ވަކި ކުރެއްވުމަށް ކިމް ޖޮން އުން ގެންގުޅުއްވާ “އެކްސްކިޔުޒް” އެކެވެ.

5. އުތުރު ކޮރެއާ އިން ބޭރަށް ދިޔުމަކީ މުޅިން މަނާ ކަމެއް:

ކައިވެނީގެ ކުރިން އެކި ގައުމުތަކަށް ދަތުރުކުރުމަކީ އެކަމަނާގެ ހޮބީއެކެވެ. އެކި ގައުމުތަކަށް ދަތުރު ކުރެއްވިއެވެ. ކިޔަވާ ވިދާޅުވީ ޗައިނާއިންނެވެ. އަދި ޗިއަރ ލީޑަރ އެއްގެ ގޮތުގައި ދެކުނު ކޮރެއާއަށް ދަތުރުކޮށް އުޅުއްވިއެވެ. އެހެންނަމަވެސް ކައިވެންޏަށްފަހު އުތުރު ކޮރެއާއިން ބޭރަށް ދިޔުމަކީ އެކަމަނާއަށް މުޅިން މަނާ ކަންކަމެވެ.

ލިޔުންތެރިޔާގެ ފުރަމަލަ

އާމިނަތު ސަޒްރާ
މުނިއަވަސްގެ ޑެޕިއުޓީ އެޑިޓަރ ސަޒްރާ އަކީ ކުރިން ރާއްޖެ ޓީވީގައި މަސައްކަތްކޮށްފައިވާ ތަޖުރިބާކާރު ނޫސްވެރިއެކެވެ. މުނިފޫހިފިލުމުގެ ދާއިރާގެ އިތުރުން އިޖުތިމާޢީ ދާއިރާގައިވެސް ސަޒްރާ ޚާއްޞައެވެ.

ގުޅުންހުރި ލިޔުން: