ކޮވިޑް-19 އާއި ގުޅިގެން ރާއްޖޭގައި އަޅާފައިވާ ރައްކާތެރިކަމުގެ ފިޔަވަޅުތަކަށް ލުއިތަކެއް ދޭން ސަރުކާރުން ނިންމުމާ ގުޅިގެން، ތ. އަތޮޅު ހޮސްޕިޓަލުން ޚިދުމަތް ދޭ ގަޑިތަކަށް އައި ބަދަލުތައް އާންމުކޮށްފިއެވެ.

ތ. އަތޮޅު ހޮސްޕިޓަލުން ނެރެފައިވާ އިޢުލާނެއްގައި ބުނެފައިވަނީ 31 މެއި 2020 ވަނަ ދުވަހުން ފެށިގެން ޚިދުމަތް ދޭ ގަޑިތަކަށް ބަދަލުތަކެއް ގެނެސްފައިވާ ކަމަށެވެ. އެގޮތުން، ކުޑަކުދިންނަށް ވެކްސިން ދިނުމާއި، ކުޑަކުދިން ހެދި ބޮޑުވަމުން އަންނަ މިންވަރު ބެލުމާއި، އާއިލާ ރޭވުމާއި އަދި ޚާއްޞަ ބަލިތަކުގެ ކުލިނިކުތަކުގެ ޚިދުމަތް ދިނުމަށް ހަމަޖެހިފައިވަނީ ކޮންމެ ހަފުތާއެއްގެ ހޯމަ، އަންގާރަ އަދި ބުދަ ދުވަހެއްގެ ހެނދުނު 9:00 އިން މެންދުރު 13:00 އަށް ކަމަށް އެ އިޢުލާނުގައި ބުނެފައިވެއެވެ.

ލެބޯޓަރީގެ ޚިދުމަތާއި، އެކްސްރޭ ނެގުމުގެ ޚިދުމަތް ދިނުމަށް ހަމަޖެހިފައިވަނީ ކޮންމެ ހަފުތާއެއްގެ އާދީއްތަ ދުވަހުން ފެށިގެން ބުރާސްފަތި ދުވަހުގެ ނިޔަލަށް، ކޮންމެ ދުވަހެއްގެ ހެނދުނު 8:00 އިން 16:00 އަށެވެ. އަދި، ޖެނެރަލް އޯޕީޑީ ގެ ޚިދުމަތް ކޮންމެ ހަފުތާއެއްގެ އާދީއްތަ ދުވަހުން ފެށިގެން ބުރާސްފަތި ދުވަހުގެ ނިޔަލަށް 24 ގަޑިއިރު ދިނުމަށް ހަމަޖެހިފައިވާއިރު، ހުކުރު އަދި ހޮނިހިރު ދުވަހު މެޑިކަލް އޮފިސަރުން ތިއްބަވާނީ އޮންކޯލުގައި ކަމަށް ވެސް އެ ހޮސްޕިޓަލުން ނެރެފައިވާ އިޢުލާނުގައި ބުނެފައިވެއެވެ.

އެ އިޢުލާނުގައި އިތުރަށް ބުނެފައިވާ ގޮތުގައި ސްޕެޝަލް އޯޕީޑީގެ ޚިދުމަތް ދިނުމަށް ހަމަޖެހިފައިވަނީ ކޮންމެ ހަފުތާއެއްގެ ހޯމަ، އަންގާރަ އަދި ބުދަ ދުވަހެއްގެ ހެނދުނު 8:00 އިން ހަވީރު 16:00 އަށެވެ. ސްޕެޝަލް އޯޕީޑީގައި ބަލި މީހުން ބައްލަވާނީ އަންހެނުންގެ ޚާއްސަ ޑޮކްޓަރުންނާއި، ކުޑަކުދިންގެ ޚާއްޞަ ޑޮކްޓަރުންނާއި، އެތެރެހަށީގެ ޚާއްޞަ ޑޮކްޓަރުންނާއި، ދަތުގެ ޚާއްޞަ ޑޮކްޓަރުންގެ އިތުރުން, އޮޕަރޭޝަން ޑޮކްޓަރުންނެވެ. ކޮންމެ ދުވަހަކަށް ވެސް ދޫކުރުމަށް ހަމަޖެހިފައިވަނީ 15 އެޕޮއިންޓްމަންޓެވެ.

އެޕޮއިންޓްމަންޓް ދޫކުރުން އޮންނާނީ ކޮންމެ  ހުކުރު ދުވަހެއްގެ ހެނދުނު 9:00 އިން ފެށިގެން ކަމަށާއި، އެ ހޮސްޕިޓަލުގެ ފޯނު ނަންބަރު 6780057 އަށް ގުޅައިގެން އެޕޮއިންޓްމަންޓް ހެއްދޭނެ ކަމަށް އެ ހޮސްޕިޓަލުން ބުނެފައިވެއެވެ.

އެމަޖެންސީ ޙާލަތްތަކުގައި އިޢުލާނުގައި ދަންނަވާފައިވާ ގަޑިތައް ނޫން ގަޑިތަކުގައި ޚިދުމަތް ދެއްވާނެ ކަމަށާއި، ޑޮކްޓަރަށް ދެއްކުމަށް ދަތުރުކުރުމުގައި އެލްޖީއޭގެ ގަވާއިދުތަކާ އެއްގޮތަށް ޢަމަލު ކުރުމަށް އެ ހޮސްޕިޓަލުން އިލްތިމާސްކޮށްފައިވެއެވެ. އަދި، ކޮންމެ ބަލި މީހަކާ އެކު، ހޮސްޕިޓަލަށް ދެވޭނީ އެންމެ މީހަކަށް ކަމަށް އެ ހޮސްޕިޓަލުން ބުނެފައިވެއެވެ.

ތ. އަތޮޅުގެ ވެރިކަން ކުރާ ރަށް، ވޭމަންޑޫގައި ހުންނަ އަތޮޅު ހޮސްޕިޓަލަކީ ކޮންމެ ދުވަހަކު ވެސް، އެ އަތޮޅުގެ ގިނަ އަދަދެއްގެ ބަޔަކު ފަރުވާ ހޯދަމުން އަންނަ ހޮސްޕިޓަލެއް ކަން ފާހަގަކޮށްލެވެއެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: