ޖޫން 10 ވަނަ ދުވަހު ސްރީލަންކާގައި ތިބި ދިވެހިން ރާއްޖެ ގެނައި ފުލައިޓުގަައި އިން އުމުރުން ދުވަސްވީ ބަލި މީހަކު، އެމީހާގެ ދަރިންނާއި، ރަށުގެ ޓާސްކްފޯހާއި، އެޗްޕީއޭ އަށް ވެސް ނޭނގި އޮޅިގެން ރަށަށް ފޮނުވާލައިފިއެވެ.

މި ނޫހަށް މަޢުލޫމާތު ލިބިފައިވާ ގޮތުގައި ތ. ތިމަރަފުއްޓަށް ނިސްބަތްވާ މި އަންހެން މީހާ އެެރަށަށް ގެންދާ ވާހަކަ އެރަށު ޓާސްކްފޯހަށް އެނގުނީ ވެސް އެމީހާ ގޮވައިގެން ދިޔަ އެމްއެންޑީއެފްގެ އުޅަނދުން މިރޭ 19:00 ގައި ގުޅާފައި އެންގުމުންނެވެ. އަދި ޓާސްކްފޯހުން މިކަމަށް ތައްޔާރުވުމަށް ވެސް ދިނީ ތިން ގަޑިއިރުގެ މުހުލަތެކެވެ. މިކަމާއި ގުޅިގެން އެރަށު ޓާސްކުފޯހުން އެޗްޕީއޭ އަށް ގުޅާލުމުން އެޗްޕީއޭ ގެ ފަރާތުން ބުނެފައިވާ ގޮތުގައި އެ މީހާ ރަށަށް ފޮނުވާލާފައި ވަނީ އެ އިދާރާ އަށް ވެސް ނޭނގި، މުޢާމަލާތް ކުރުމުގައި އެރި އޮޅުމެއްގެ ސަބަބުން ކަމަށެވެ.

ސްރީލަންކާ އިން ރާއްޖެ ގެނައި ގޮތަށް ކޮވިޑް-19 އަށް ޓެސްޓު ވެސް ނުކޮށް އެ މީހާ މިރޭ ތިމަރަފުއްޓަށް ފޮނުވާލާފައި ވާއިރު، މިނޫހަށް މަޢުލޫމާތު ލިބިފައިވާ ގޮތުގައި އެރަށުގައި ހުރި އެމީހާގެ ފިރިމީހާ އަކީ ވެސް ވަރަށް ބަލިކޮށް އުޅޭ އަދި ކޮވިޑް-19 ގެ އެންމެ ރިސްކް ބޮޑު މީހުންގެ ތެރޭގައި ހިމެނޭ އުމުރުން ދުވަސްވެފައިވާ ފަރާތެކެވެ. އެހެންކަމުން އެ ފިރިހެން މީހާ މިހާރުވަނީ އެހެން ގެއަކަށް ބަދަލުކޮށްފައެވެ. ލަންކާ އިން ގެނައި މި އަންހެން މީހާ އަކީ ދުވަސްވެފައިވާ ބަލި މީހެއް ކަމުން ގޭގައި ކަރަންޓީނު ކޮށްފައި ހުންނަ އިރު، އެމީހާގެ ކަންކަން ބަލަހައްޓަން ރަށުގައި ހުރި ފިރިހެން ދަރި ހަވާލުވެފައި ވާއިރު، އެ ފިރިހެން ދަރިގެ އަންހެނުންނަކީ މިހާރު ވިހަން ތައްޔާރުވެފައި ހުރި، ކޮވިޑް-19 ގެ އެންމެ ރިސްކް ބޮޑު މީހުންގެ ތެރޭގައި ހިމެނޭ މީހެއް ކަމަށް މަޢުލޫމަތު ލިބިފައިވެއެވެ.

އެ މީހާ ބަލަހައްޓަމުން އަންނަ ދަރިން މާލޭގައި ތިބިއިރު، މާލެއިން އެމީހާއާ ހަވާލުވުމަށް އެމީހާގެ ދަރިއެއް އެމްބަސީގެ ލިޔުމުގައި ސޮއިކޮށްފައިވާ ކަމުގެ މަޢުލޫމާތު ވެސް މިނޫހަށް ލިބިފައިވެއެވެ. މި ނޫހަށް މަޢުލޫމާތު ދެމުން އެ އަންހެން މީހާގެ ދަރިއެއް ބުނެފައިވާ ގޮތުގައި އޭނާގެ މަންމަ ރަށަށް ފޮނުވާލަފައި ވަނީ އޭނާ އަށް ވެސް ނޭނގިއެވެ. އެޗްޕީއޭގެ ފަރާތުން ބުނެފައިވާ ގޮތުގައި އެމީހާ އެގޮތަށް ފޮނުވާލެވިފައި ވަނީ ލިޔެކިޔުންތައް ފުރިހަމަ ނުކޮށް ހުރުމުގެ ސަބަބުން ކަމަށެވެ. ނަމަވެސް، އެރަށުން މި ނޫހަށް މަޢުލޫމާތު ދިން މީހަކު ބުނެފައިވާ ގޮތުގައި، އެމީހާގެ އަތުގައި ހުރިހާ ލިޔެކިޔުންތަކެއް ހަމައަށް ހުއްޓެވެ.

އެކަށީގެންވާ ވަގުތު ދިނުމެއް ނެތި، ކުއްލިއަކަށް އެމީހާ ރަށަށް ގެންނަ ވާހަކަ މިގޮތަށް އެންގުމުން އެ ރަށުގެ ކޮވިޑް ޓާސްކްފޯހަށް ވެސް ރަނގަޅަށް ތައްޔާރުވުމަށް ފުރުސަތު ލިބިފައި ނުވާކަން ފާހަގަކޮށްލެވެއެވެ. މިކަމާއި ގުޅިގެން ތިމަރަފުށީގައި ދިރިއުޅޭ ރައްޔިތުން ވަނީ ބޮޑު ބިރާސްކަމެއްގެ ތެރޭގައެވެ. ކަމާބެހޭ ފަރާތްތަކުން ޒިންމާދާރުކަން ކުޑަކޮށް މިފަދަ ކަމެއް ކުރުމުން ރައްޔިތުން ތިބީ ޝަކުވާތަކުން ފުރި ބަންޑުންވެފައެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: