| MUNIAVAS

ނޯޓް: މިއީ ޙަޤީޤީ ހާދިސާތަކެއްގެ މައްޗަށް ބިނާކޮށް ލިޔެފައިވާ ޚިޔާލީ ވާހަކައެކެވެ. މި ވާހަކައިގައި ހިމެނޭ ނަންނަމާއި ތަންތަނަކީ އަސްލެއް ނޫނެވެ.

އަހަރެންނަކީ މާލެއިން އުތުރު ރަށަކަށް ނިސްބަތްވާ ނޫކަށި ފުރައިގެ ޒުވާނެކެވެ. މާލޭގެ ނަން މަޝްހޫރު ޢާއިލާއެއްގެ ކުއްޖަކާ ކައިވެނިކޮށްގެން އުޅޭތާ މިހާރު 5 އަހަރު ފާއިތުވެއްޖެއެވެ. ނަމަވެސް ދެމަފިރިންގެ ދޭތެރޭ އެއްވެސް މައްސަލައެއް ޖެހިފައެއް ނުވެއެވެ. އަހަރެންނަކީ ރިސޯޓެއްގައި މަސައްކަތްކުރާ މީހަކަށްވުމުން ދިރިއުޅެން ޖެހިފައިވަނީ ރިސޯޓްގައެވެ. މާލެ އާދެވެނީ ހާލަކުން ފަހަރަކުއެވެ. އަންހެނުންނަކީ ފޭސްބުކަށް ވަދެއުޅޭ މީހަކަށް ނުވުމުން އަހަރެން އަންހެނުންނާއި ވާހަކަދައްކާ އުޅެނީ މުޅިންވެސް ފޯނުންނެވެ. ނަމަވެސް އަހަރެން މަސައްކަތްކުރާ މާޙައުލުގެ ގޮތުން ތަނުގެ ގިނަ މުވައްޒަފުން ހިތްހަމަޖައްސަމުން ދިޔައީ ފޭސްބުކްގެ ޒަރީއާއިންނެވެ. އަހަރެންވެސް ފޭސްބުކް ބޭނުންކުރަމެވެ. ރައްޓެހި ރަޙްމަތްތެރިންނާ ވާހަކަދައްކާލުމުގެ ބޭނުމުގައެވެ. އެކަނިވެރިކަން ފިލުވާލުމަށްޓަކައެވެ. ފޭސްބުކުން ވަރަށް ގިނަ އަންހެންކުދިންނާ ވާހަކަދައްކަމެވެ. އަހަރެންގެ އެކަނިވެރިކަން ފިލުވަނީވެސް ފޭސްބުކުންނެވެ.

މިގޮތުގައި މާގިނަ ދުވަސްތަކެއް ނުވެއެވެ. އަހަރެންގެ ރައްޓެހިންގެ ބަހަށް އަހަރެންނަށް ހެއްލެވިއްޖެއެވެ. ރައްޓެހިންގެ ނަޒަރުގައި ފޭސްބުކުން ވަގު އައިޑީއެއް ހުޅުވައި އަންހެންކުދިން ހިތްކަތިލާފަދަ ރީތި ފިރިހެނެއްގެ ފޮޓޯލައިގެން ގިނަ އަންހެންކުދިންގެ ހިތްދަމައިގަނެވިދާނެއެވެ. އެހެންކަމުން އަހަރެންވެސް ގަސްތުކުރީ މިފަދަ ގޮތަކަށް އުފާ ހޯދާށެވެ. މިގޮތުން ރައްޓެހިންނަށް ވަގަށް ވަގު އައިޑީއެއް ހަދައި ރީތިހެން ހީވާ އަންހެން ކުދިން އެޑްކޮށްލީމެވެ. މާގިނަ އިރުތަކެއްނުވެ އެކުދިން އަހަރެންނަށް އޯކޭއޭ ބުނެ ވާހަކަދައްކަން ފެށިއެވެ. އަދި އަހަރެންނަކީ މުއްސަނދި މީހެއްކަމަށާއި، ބިޓެއް ނުހުންނާނެކަމަށް ބުނެ އަހަރެންގެ ދަލުގައި ރީތި އަންހެންކުދިން ޖައްސަމުން ދިޔައީމެވެ. އަދި އެކުދިންގެ ނަންބަރު ހޯދައި މިކަމަށް ވަކި ނަންބަރެއް ހާއްޞަކުރީމެވެ. އަދި ކުރިއެކޭ އެއްގޮތަށް ލިބޭ ގިނަ “އޮފް ޑޭ”ތަކަށް މާލެ ގޮސް އެކުދިންނާއެކު މަޖާކޮށް ސަކަރާތް ޖަހަމުން ދިޔައީމެވެ. އަހަރެން މިކަން މިގޮތަށް ކުރަމުން ގެންދާތާ ގިނަ ދުވަސްތަކެއް ވެއްޖެއެވެ. އަންހެނުންނަށްވެސް ވަގަށެވެ. ނަމަވެސް މިކަމަށް ފާރަލާ ލޯތަކެއް ވާނެކަމެއް ކުރިއަކުން ނޭނގުނެވެ. އަހަރެން ފޭސްބުކުން ބަރަހަނާ ނުވި ނަމަވެސް ގިނަ އަންހެންކުދިން އަހަރެންނަށްޓަކައި ފޭސްބުކުން ބަރަހަނާވެލައެވެ. މިއީ އަހަރެންނަށް އާކަމެއް ނޫނެވެ. އަދި ފޭސްބުކުން އަބަދުވެސް ރީތި އަންހެންކުދިން އެޑްކޮށް ވާހަކަދައްކާލުމަކީ އަހަރެންނަށް ލިބޭ ވަރަށް ބޮޑު އުފަލަކަށްވިއެވެ. އަދި ނުދަންނަ އެތަކެއް އަންހެންކުދިންވެސް އަހަރެންނަށް ރިޕްލައި ކުރެއެވެ. އަހަރެންނަށް ކަމުދާ ފޮޓޯއެއް އިން ރީތި ކުއްޖެއްނަމަ އަވަހަށް އެޑްކޮށްލާ ވާހަކަދައްކާލަމެވެ.

ނަމަވެސް އެމީހުންނަށް އަހަރެންނަކީ ކާކުކަމެއް އަދި އަހަރެންގެ ނަމެއްވެސް ނޭނގޭނެއެވެ. މުޅިންވެސް އަހަރެން އެމީހުންނަށް ދެމުން ދިޔައީ ނުބައި އެޑްރެހެކެވެ. ނުބައި ނަމެކެވެ. ފޯނުން ވާހަކަދައްކަން ވެއްޖެނަމަ ދައްކަނީ މިކަމަށް ހާއްޞަކޮށްގެން ދިރާގުން ނަގައިގެން ގެންގުޅޭ ނަންބަރަކުންނެވެ. ވަރަށް ގިނަ އަންހެންކުދިން އެކި ގޮތްގޮތުން އަހަރެންނާ ސުވާލުކުރެއެވެ. މީހަކާ އިނދެގެންތޯއާއި ބިޓެއް ހުރޭތޯ އަހައެވެ. އަހަރެން ޖަވާބުދެނީ ބިޓެއް ނުހުންނަ ކަމަށެވެ. އަދި ބައެއް ކުދިން އިންނަންވެސް އަހައެވެ. ރައްޓެހިވާންވެސް އަހައެވެ. މިއީ އަހަރެންނަށް މިއަދު އާކަމެއް ނޫނެވެ. އަހަރެންގެ ހިތުން އަހަރެންގެ އަނބިމީހާ ފޭސްބުކަކަށް ނުވަންނާނެއެވެ. އޭނަ ފޭސްބުކު ދެކެ ރުޅި އާދެއެވެ. ނަމަވެސް އަންހެނުންނަށް މިކަން ފަޅާއަރާނެކަމެއް އަދި އެކުގައި އުޅޭ ބަޔަކު ނުބުނާކަމެއްވެސް އޭރަކު ޚުދު އަހަރެންނަކަށް ނޭނގެއެވެ.

މިގޮތުން އެއްދުވަހަކު އަހަރެންނަށް ދުވަހަކުވެސް ނުދެކޭފަދަ ރީތި އަންހެންކުއްޖަކު އަހަރެންނާއި ފޭސްބުކުން ބައްދަލުވިއެވެ. އޭނާ އަހަރެން އެޑްކުރުމުން އަހަރެންވެސް އޭނައަށް އޯކޭ ދިނުމުންނެވެ. ނަމަކަށް ކިޔަނީ އައިޝާއެވެ. ދޮންދޮން ރީތި ކުއްޖެކެވެ. އަހަރެން ބަލާކަށް ނުހުރެ ހައި ޖަހާލީމެވެ. އަދި އޭނާގެ މަޢުލޫމާތު ސާފުކޮށްލީމެވެ. އަހަރެން އެ ފޮޓޯއަށް ވަރަށް ހިތް ކިއެވެ. އަދި އެއީ އޭނާގެ ފޮޓޯއޭ ބުނުމުން އަހަރެން އެކަން ޤަބޫލުކޮށް ވާހަކަދައްކަމުން ދިޔައީމެވެ. އެހެން އަންހެންކުދިންނާ ޚިލާފަށް މިކުއްޖާގެ ވާހަކަތައް ތަފާތެވެ. ވަރަށް ގިނަ ގޮތްގޮތުން ވާހަކަދައްކަމުން ގެންދިޔައެވެ. އަދި އަހަރެންގެ ބިޓެއް ހުރޭތޯ ސުވާލުކުރިއެވެ. އަހަރެން ބުނީމެވެ. ނުހުރެއެވެ. ރައްޓެހި ވެދާނަންތޯ އެހުމުން އާނއެކޭ އަހަރެން ބުނީމެވެ. އަދި އިންނާނަމޭ ބުނެ އަހަރެން ހިތުން އޭނާ ހިތް ރުއްސާލީމެވެ. މިގޮތުގައި ފޭސްބުކު އައިޝާއާއި ވާހަކަދައްކަމުން ގެންދިޔައީމެވެ. އަދި ވަރަށް ގިނަ އަންހެންކުދިންނާ ފޭސްބުކުން ވާހަކަދައްކާ ކަމަށާއި، ނަމަވެސް ދުވަހަކުވެސް ތިޔަފަދަ ކުއްޖަކާ ދިމާނުވާކަމަށް އައިޝާ ގާތު ބުނަމުން ދިޔައީމެވެ.

އެއްރެއަކު އަހަރެން ފޭސްބުކަށް ވަންއިރު އައިޝާ އަހަރެންގެ ވޯލްގައި ވަރަށް ލޯބިވާ މެސެޖެއް ލިޔެލާފައި އިނެވެ. އަދި އިންނަން ބޭނުންވާކަމަށާއި މާލެ އައިސް ބައްދަލުކުރުމަށް އެދުނެވެ. އަހަރެން ވަގުތުން އަހަރެންގެ ވަގު ނަންބަރު އައިޝާއަށް ދިނީމެވެ. އެވަގުތު އައިޝާ ސަމާސާ ރާގަކަށް ވާހަކަ ބަދަލުކޮށްލިއެވެ. އަހަރެންނަށް ދޮގު ނުހަދާ ތެދަށް ބުނެބަލާށެވެ. ބިޓެއް ހުރޭ ހެއްޔެވެ؟ އަހަރެން ޖަވާބުގައި ލިޔެލީމެވެ. ނުހުރެއެވެ. އައިޝާ އަނެއްކާވެސް ލިޔެލިއެވެ. އެހެންވިއްޔާ އަނތްބަކު ހުރޭ ހެއްޔެވެ؟ އަދި ހީލިއެވެ. އެވަގުތު އަހަރެން ހީލާފައި ބުނެލީމެވެ. އަހަރެންގެ އަނތްބަކު ނުހުންނާނެއެވެ. މިހެން އަހަރެން ލިޔެލުމާއެކު އައިޝާ އޮފްވެއްޖެއެވެ. ވަގުތުން އައިޝާ އަހަރެންނަށް ދިން ނަންބަރަށް ގުޅީމެވެ. ވާހަކަދެއްކީ ބިދޭސީއެކެވެ. އަހަރެންގެ މޫޑް އޮފްވިއެވެ.

އިރުކޮޅެއްނުވެ އަހަރެންގެ ރައްޓެއްސަކު އަހަރެންގެ ފޯނަށް ގުޅިއެވެ. އަދި ބުންޏެވެ. ކަލޭ ތީ ހާދަ ގޮތެއް ނެތް މީހެކެވެ. ލޯބިވީ އައިޝާދެކެއެއް ނޫނެވެ. ކަލޭގެ އަންހެނުން މަލަކާ ދެކެއެވެ. އަދި ކަލޭގެ އަނތްބެއް ނުހުންނާނެކަން ކަލޭ ތިޔަ ލިޔެ ހާމަކުރީ ކަލޭގެ އަންހެނުންގެ ކުރިމަތީގައެވެ. އެއީ މިހާރު ކަލޭގެ އަނތްބެއް ނޫނެވެ. އަދި ކަލޭގެ ކުރީގެ އަނބިމީހާ މިހާރުވީ ހޮސްޕިޓަލުގައި އެނދުމަތިކޮށްފައެވެ. އޭނާގެ ޙާލު ވަރަށް ސީރިއަސްއެވެ. މިހެން ބުނުމާއެކު އަހަރެންނަށް ވީގޮތެއް ނޭނގުނެވެ. ވަގުތުން ފޯނު ކަނޑާލެވުނެވެ. އަދި މިވާހަކަ ރިސޯޓްގައި އުޅޭ ރައްޓެހި ކުއްޖަކަށް ކިޔައިދިނީމެވެ. އަދި ވަގުތުން މާލެ ދާން ބޭނުންވިއެވެ. އެކުއްޖާ ބުންޏެވެ. ދެންވެސް ތިގޮތަށް އުޅުން ހުއްޓާލާށެވެ. ވާނުވާ ނޭނގޭ މީހުންނާ ވާހަކަދެއްކުމުން ތިޔަ ކަހަލަ މަޅީގައި ޖެހި އެތައް ބައެއްގެ ދިރިއުޅުން ހަލާކުވެގެން ދަނީ މަދެއްކޮށެއް ނޫނެވެ. ދެންވެސް ކުރެވުނު ކުށަށް ތައުބާވެ، އަންހެނުންގެ ކައިރިން މަޢާފަށް އެދި ކޯޓަށް ދާށެވެ.

(ނިމުނީ)

މުޖުތަމަޢުގައި އިންޓަނެޓު މެދުވެރިކޮށް މިފަދަ އެތައް ޢަމަލެއް ހިންގަމުންދާއިރު މިފަދަ ކަމެއް ނުވާނެކަމަށް ޤަބޫލުކުރުމަކީ ކުށްހީއަކަށްވެސް ފަހަރުގައި ވެދާނެއެވެ. މިކަމަށް ފުންކޮށް ވިސްނާލުން މުހިންމެވެ.