ސްޕެނިޝް ލީގުގައި ރޭ ސެވިއްޔާ އާއި ބައްދަލުކުރި މެޗުގައި 0-0 ގެ ނަތީޖާއަކުން އެއްވަރުވުމުން ބާސެލޯނާ އިން ލީގު ހޯދުމަށް ކުރަމުން އަންނަ މަސައްކަތަށް ހުރަސްތަކެއް ކުރިމަތިވެއްޖެއެވެ.

ސެވިއްޔާގެ ދަނޑުގައި ރޭ ކުޅުނު މި މެޗުގައި ގިނައިރު ބޯޅަ ހިފަހައްޓައިގެން މޮޅަށް ކުޅެފައިވަނީ ބާސެލޯނާ އެވެ. ދެ ޓީމުގެ ފަރާތުން ވެސް ނުރައްކާތެރި ހަމަލާތަކެއް ފެނިގެންދިޔައިރު، ދެ ޓީމުގެ ކީޕަރުންގެ ފަރާތުން ފެނިގެންދިޔަ މޮޅު ކުޅުން ފާހަގަކޮށްލެވުނެވެ. ޚާއްޞަކޮށް ބާސެލޯނާގެ ކީޕަރު ޓާ ސްޓެގެން ވަނީ ސެވިއްޔާ އިން ފޮނުވާލި ނުރައްކާތެރި ގިނަ ހަމަލާތަކެއް ދިފާއުކޮށްފައެވެ.

މި މެޗުން އެއްވަރުވުމުން ވާދަވެރި ރެއާލް މެޑްރިޑުގެ މައްޗަށް ބާސެލޯނާ އިން ހޯދާފައިވާ ދެ ޕޮއިންޓުގެ ލީޑު ގެއްލުމަކީ އެކަށީގެންވާ ކަމެކެވެ. މާދަމާ ރޭ ރެއާލް ސޮސިއެޑާޑް އާއި ރެއާލް މެޑްރިޑް ބައްދަލުކުރާ މެޗުން ރެއާލް މެޑްރިޑް މޮޅުވެއްޖެ ނަމަ، ބާސެލޯނާ އާއި ޕޮއިންޓުގެ ގޮތުން ހަމަހަމަ ވާނެއެވެ. އަދި ހަމައެހެންމެ، ދެ ޓީމު ބައްދަލުކުރި ދެ މެޗުގެ ގޯލުގެ ތަފާތުން ތާވަލުގެ އެއްވަނަ އަށް ރެއާލް މެޑްރިޑް އަރާނެއެވެ.

ސްޕެނިޝް ލީގުގެ ތާވަލަށް ބަލައިލާއިރު، މިހާތަނަށް ކުޅުނު 30 މެޗުން 65 ޕޮއިންޓު ހޯދައިގެން ތާވަލުގެ އެއްވަނައިގައި ބާސެލޯނާ އޮތްއިރު، 29 މެޗުން 62 ޕޮއިންޓު ހޯދައިގެން ރެއާލް މެޑްރިޑް އޮތީ ތާވަލުގެ ދެވަނައިގައެވެ. އަދި، ކުޅުނު 30 މެޗުން 52 ޕޮއިންޓު ހޯދައިގެން ސެވިއްޔާ އޮތީ ތާވަލުގެ ތިންވަނައިގައި އެވެ.

ލިޔުންތެރިޔާގެ ފުރަމަލަ

އަޙްމަދު ޝާމިން
އަޙްމަދު ޝާމިން މައިގަނޑު ގޮތެއްގައި ލިޔާނީ ކުޅިވަރު ޚަބަރުތަކެވެ. ފިލްމީ އަދި މިއުޒިކީ ދާއިރާ ނޫން އެހެން ހުރިހައި ދާއިރާތަކަށް ވެސް ޝާމިން ލިޔާނެއެވެ.

ގުޅުންހުރި ލިޔުން: