ކޮންމެ މީހަކީ އޭނާ އެއްމެ ފުރަތަމަ އުއްމީދުކުރާ ދާާއިރާއިން ކުރިއަށް ދެވޭނެ މީހެއް ނޫނެވެ. ނަމަވެސް ފަންނުވެރިކަމުގެ ޝައުޤަކީ ފަންނުވެރިޔާގެ ވުޖޫދު ހަނދާންނެތޭވަރުގެ ކަމެކޭ ބުނާ ބީދައިން، ކޮންމެ ފަންނެއްގައިވެސް އެމީހާގެ ހިތް އެއަށް ދޫކޮށްލެވިއްޖެ ނަމަ، ހަމަ ކޮންމެ ދާއިރާ އަކުންވެސް ކުރިއަށް ދެވިދާނެ އެވެ. އޭގެ އެއް މިސާލަކީ ރާއްޖޭގެ މަޝްހޫރު ފެޝަން ޑިޒައިނަރު ރަޒީނާ ތައުފީގު (ރަޒީ) އެވެ.

2001 ވަނަ އަހަރު ރަޒީ އޯލެވެލް ނިންމުމަށް ފަހު ނަރުހަކަށް ވާން ކުރި މަސައްކަތް ކާމިޔާބު ނުވެގެން އޭނާ އެންމެފަހުން ވަޒީފާ އަދާކުރަން ފެށީ އަމިއްލަ ކުންފުންޏެއް ކަމަށްވާ ހަޒާޝްގަ އެވެ. އޭރު އޭނާ އަށް 19 އަހަރެވެ. ނަމަވެސް މިއަދު ރަޒީ އަކީ ފިލްމީ ކޮންމެ ހަފުލާއެއްގައި އެނަން ފާާހަގަވެގެންދާ ނަމެކެކެވެ.

ފިލްމީ ދާއިރާގެ މަސައްކަތުގައި ބޭނުންކުރާ ކޮސްޓިއުމުގެ ވާހަކަ ދައްކާނަމަ އެންމެ ފުރަތަމަ ހިތަށް އަންނާނެ އެއް ނަމަކީ ރަޒީގެ ނަމެވެ.

މިރޭ އޮންނަ އަށްވަނަ ދިވެހި ފިލްމު އެވޯޑް ގައި އެންމެ މޮޅު ކޮސްޓިއުމް ޑިޒައިނަރ އަށް ނޮމިނޭޓް ވެފައިވާ ރަޒީ އަކީ މުނިއަވަސް ގެ ކަޅި މިފަހަރު ގޮސް ހުއްޓުނު ފަންނުވެރިޔާ އެެވެ. މިފަހަރުގެ ފިލްމު އެވޯޑް ހަފުލާގައި ރަޒީ ގެ ހެދުންތައް ވިދާ ބަބުޅާނެކަން ރަޒީގެ މި ކުރު ބަސްދީގަތުމުން އެނގޭނެ އެވެ.

ފިލްމު އެވޯޑަކަށް ރަޒީ އެންމެ ބުރަކޮށް މަސައްކަތް ކުރާ ފަހަރު ކަމަށް މިފަހަރު ވާއިރު، ދިވެހި ފިލްމު އެވޯޑް ހަފުލާގައި އެއްމެ ‘ޔުނީކް’ ވާނީ ޑިޒައިނަރ ރަޒީ ގެ ހެދުންތައް ބާއޭ މިއީ އުފެދޭނެ ސުވާލެކެވެ.

 

މުނިއަވަސް: މިފަހަރުގެ ފިލްމު އެވޯޑަށް މާކުރިންސުރެން ތައްޔާރުވެގެން ވަރަށް ޚާއްޞަ ޑިޒައިންތަކެއް ފަހަމުން އަންނަ ވާހަކަ އަޑުއެހިން. އެއީ ތެދެއްތަ؟

ރަޒީ: ރަނގަޅު ވާހަކައެއް.

މުނިއަވަސް: ކޮން ކޮން ބައެއްގެ ހެދުންތަކެއް ފަހަމުން ތި ގެންދަނީ؟

ރަޒީ: މިފަހަރުގެ ފިލްމު އެވޯޑަށް ނޮމިނޭޓް ވި  ކުދިންގެ ހެދުން ފަރުމާކޮށް ފަހަމުން މިދަނީ. އެއީ އަޒޫ،ސައީދު، މަލީހާ، ސަމާ، މަޖޫ، ރަޒީ އަދި ޖުމާހް ގެ ހެދުން.

މުނިއަވަސް: ފަހަމުންދާ ހެދުންތަކުގެ އެޕްރޮކްސިމޭޓެޑް ވެލިއު އަކީ ކޮބައިކަން ބުނެވިދާނެތަ؟

ރަޒީ: މަޖޫގެ ހެދުމަށް ވަރަށް ބުރަކޮށް މަސައްކަތް ކުރެވިއްޖެ. ފަސް ދުވަސް ވާންދެން އެ ހެދުމަށް އެކަނި މަސައްކަތް ކުރެވިއްޖެ. މަޖޫ ގެ ހެދުމުގެ އަގަށް 25 ހާސް ރުފިޔާ އަރާނެ.

އަޒޫގެ ހެދުމަކީ ރާއްޖޭގަ މިފަދަ ގޮތަކަށް މަސައްކަތް ކޮށްގެން ނެރޭ ފުރަތަމަ ހެދުމޭވެސް ބުނެވިދާނެ. މިއީ ރާއްޖެއިން ބޭރުން މެޝިނު ގެނެސްގެން ރާއްޖޭގައި ބީޑްވޯކް ހަދައިގެން ތައްޔާރުކުރާ ފުރަތަމަ ހެދުން. ހެދުމުގަ ހުންނާނެ 7200 ބީޑްސް. އެހައި ބައިވަރު ބީޑްސް ހުރުމުން ހެދުމުގެ ބަރުދަނުގައި ހުންނާނެ ހަ ކިލޯ.

ރަޒީގެ ހެދުން މި ފަހަނީ ބޭރުން ޑިޒައިނަރ ފޮތި ގެނެސްގެން. މިހައި އަގުބޮޑު ކޮށް ހެދުމެއް ރަޒީ އަކަށް އަދި ނުފަހަން.

ދެން މަލް ގެ ހެދުމަކީ ބޮޑުބައި ހޭންޑް މޭޑް ހެދުމެއް. ކަރާއި އަތް ވެސް އަތުން މަސައްކަތް ކޮށްފަ ހުންނާނީ. އެއީ ފްރިންޖް ހެދުމެއް.

މުނިއަވަސް: ރަޒީ ވެސް ވަނީ ފިލްމު އެވޯޑް ގަ ބެސްޓް ކޮސްޓިއުމް ޑިޒައިނަރ އަށް ނޮމިނޭޓް ވެފަދޯ. އެވޯޑް ކާމިޔާބު ކުރެވޭނެ ކަމަށް އުއްމީދު ކުރަންތަ؟ ކިހާވަރެއްގެ އުއްމީދެއް އެބަ އޮތް؟

ރަޒީ: ލިބިވެސްދާނެ ނުލިބިވެސް ދާނެ. އެވެސް އުއްމީދެއް ނުކުރަން. ފިލްމު ތަކަށް ހެދުން ފަހަނީކީ އެވޯޑަކަށް ނޫން. ރަޒީ އުއްމީދު ކުރަނީ ރައީސުލް ޖުމްހޫރިއްޔާ ދެއްވާ އެވޯޑަށް. އެއަށް އަންނަ އަހަރު ލާނަން.

ރަޒީ ބުނާނީ މީހުން ފާހަގަ ކުރިހެން ފިލްމު4426 ގަ އައްޒަ ކޮސްޓިއުމް ރޯލް ކިތަންމެ މަދުނަމަވެސް އައްޒަ ގެ ކޮސްޓިއުމް ސެލެކްޓް ކުރަން ވަރަށް އުނދަގޫވިއޭ. ނަހޫ ބުނާގޮތަށް 8 ވަރަކަށް ޓޮޕްކޮޅު ފަހާފަ ވާނެ އެ ފިލްމަށް.

މުނިއަވަސް: ފިލްމު އަދި ހަފުލާ ތަކަށް ކޮސްޓިއުމް ފަހާއިރު ވިސްނަނީ ކޮންކަހަލަ ކަންތައް ތަކަކަށް؟

ރަޒީ: އެމީހަކާ އެންމެ ގުޅޭ ގޮތަށް ބަލާފަ ހެދުން ފަރުމާކޮށް ފަހަނީ.

މުނިއަވަސް: ސްޓާރުން އެދޭ ގޮތަށް ހެދުންތައް ޑިޒައިންކުރުމަށް ރާއްޖެއިން މެޓީރިއަލް ހޯދަން ފަސޭހަތަ؟

ރަޒީ: ވަރަށް އުދަގޫ. ހުރިހައި މެޓޭރިއަލް އެއް ބޭރުން ގެންނަނީ.

މުނިއަވަސް: ފަހަން ދަސްކޮށްދިނުމަށް ރާއްޖޭގެ އެކި ކަންކޮޅުތަކުގައި ރަޒީ އަންނަނީ ވަރަށް ގިނަ މަސައްކަތްތައް ކުރަމުންދޯ. ރަޒީ ކައިރިން ދަރިވަރުވި ކުދިން މިހާރު ފެހުމުގައި ހަރަކާތްތެރިވަމުން އެބަދޭތަ؟

ރަޒީ: ވަރަށް އުފާވޭ ރަޒީ ފަހަން ދަސްކޮށްދިން ކުދިން ވަރަށް ކުރީގަ އެބަ އުޅޭ. ކުޅުދުއްފުށީގަ އުޅޭ އާދަން ކިޔާ ކުއްޖެއްގެ ނަން ފާހަގަކޮށްލަންވެސް ބޭނުންވޭ. މާލޭގަވެސް އެބަ އުޅޭ ފާހަގަކޮށްލެވޭ ކުދިން. ރަޒީ ހިންގާ ކޮންމެ ކޯހަކީވެސް ކާމިޔާބު ކޯހެއް. ކުދިން އުފަލުން ތަޢުރީފް ކުރޭ. މިހާރުވެސް ރަޒީ ކޯހަކަށް އަތޮޅު ތެރެއަށް ދާން ތައްޔާރުވެފަ މިއޮތީ. އެކަމަކު ކޯސް ލަސްކުރީ އެވޯޑަށް. އެވޯޑް ނިންމާފަ ފުވައްމުލަކަށް ދާ ގޮތަށް އޮތީ.

މުނިއަވަސް: އިތުރު ކަމަކަށް ރަޒީ ފާހަގަ ކޮށްލާނީ ކޮންކަމެއް؟

ރަޒީ: ރަޒީގެ ފެމިލީ އަށް ވަރަށް ބޮޑަށްޝުކުރު އަދާކުރަން ބޭނުންވޭ. އަސްލު އެމީހުންގެ އެހީތެރިކަން ނުލިބިއެއް ރަޒީ އަށް މިހިސާބަކަށް ނުދެވޭނެ. ޑިޒައިންކޮށް ފެހުމުގަ އުޅޭނެ ފަސް މީހުންގެ ޓީމެއް. އެކުދިންގެ ނަންވެސް ރަޒީ ފާހަގަ ކޮށްލަން. އަދި ވަރަށް ޚާއްޞަކޮށް އަޅުގަނޑުގެ ފިރިމީހާ އާއި ޢާއިލާ އެންމެންނަށް ވެސް ވަރަށް ބޮޑަށް ޝުކުރުވެރިވަން އަބަދުވެސް.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: