ސުޝާންތު ސިންގ ރާޖްޕުޓް އަމިއްލައަށް މަރުވުމާއިއެކު މުޅި ފިލްމީ ދުނިޔެއަށް ސިހުމެއް ލިބިގެން ދިޔައިރު އެންމެ ގަދައަށް ދެކެވެމުން ދިޔަ ވާހަކައަކީ ބޮލީވުޑްގައި އޮތް ނެޕޮޓިޒަމްގެ ވާހަކައެވެ. ނުފޫޒުގަދަ ބޮޑެތި ޕްރޮޑިއުސަރުންނާއި ޑައިރެކްޓަރުންގެ މައްޗަށް ބޮޑެތި ތުހުމަތުތަކެއް ކުރެވި، އެ ފަރާތްތަކާއި ސުޝާންތުގެ ގާތް މީހުންގެ ބަޔާން ނަގަމުން އެބަދެއެވެ.

ސުޝާންތުގެ މަރުގެ މައްސަލައިގައި ދަޢުވާ ކުރެވުނު ޑައިރެކްޓަރެއް ކަމަށްވާ ސަންޖޭ ލީލާ ބަންސާލީއާއި އިއްޔެގެ ވަގުތެއްގައި ވަނީ ސުވާލުކޮށް ބަޔާން ނަގާފައެވެ. ގާތްގަނޑަކަށް 3 ގަޑިއިރަށް ދެމިގެންދިޔަ އެ ބަޔާން ނެގުމުގައި، އޭނާއާއި ސުޝާންތު އެކުގައި އުފައްދަން އުޅުނުކަމަށް ބުނާ ފިލްމުތަކާއި ބެހޭގޮތުން ވިއްސަކަށް ސުވާލު ކުރެވުނެވެ. އެ ބަޔާނުގައި ސަންޖޭ ވަނީ އޭނާއާއި ސުޝާންތާއި ގުޅުވައިގެން ދައްކާ ވާހަކަތަކަށް ވަރަށް ތަފްސީލުކޮށް ޖަވާބު ދީފައެވެ.

މި ފިލްމު ސުޝާންތަށް ހުށަހެޅި، ވަގުތު ދެވެން ނެތުމުން ރަންވީރު ނެގީ

ސަންޖޭގެ ފިލްމުތަކަކުން އެއްވެސް ކަމަކާނުލާ ސުޝާންތު ވަކިކުރި ކަމަށް ފަތުރަމުންދާ ޚަބަރު ދޮގުކޮށް އޭނާ ބުނެފައިވަނީ 2013 ވަނަ އަހަރު އޭނަ ގެނެސްދިން “ގޯލިޔޯން ކީ ރާސްލީލާ ރާމް-ލީލާ”ގެ ލީޑް ރޯލު ސުޝާންތަށް ހުށަހެޅިކަމަށެވެ. އަދި އެ ފިލްމާއި ގުޅޭގޮތުން ދެމީހުންގެ ދެމެދުގައި ވާހަކަ ދެކެވުނު ކަމަށާއި އެ ފިލްމު ސުޝާންތާއެކު ގެނެސްނުދެވުނީ އެހެން ފިލްމުތަކެއްގައި މަސައްކަތްކުރަން ސުޝާންތު ނިންމާފައިވާތީ، ސުޝާންތުގެ ފަރާތުން އޭނާގެ ފިލްމަށް އޭނާ ބޭނުންވާވަރަށް ވަގުތު ދެވެން ނެތުމުންކަމަށް ސަންޖޭ ބުނެފައިވެއެވެ.

ކުރިން ޚަބަރުތައް ބުނިގޮތުގައި ސުޝާންތަށް ސަންޖޭ ބޭނުންވާ ވަގުތު ނުދެވުނީ އޭނާގެ އަތުގައި އެވަގުތު އިތުރު ދެ ފިލްމެއްވެސް އޮތުމުންނެވެ. އެއީ ޔާޝް ރާޖް ފިލްމްސްއާއެކު ކޮންޓްރެކްޓެއްގެ ދަށުން ކުޅެން ހަމަޖެހިފައިވާ ދެ ފިލްމެކެވެ. ސަންޖޭގެ ފިލްމު ސުޝާންތަށް ހުށަހެޅިއިރު ސުޝާންތު އުޅެނީ ޔާޝް ރާޖް ފިލްމްސްގެ “ޕާނީ” ގެ ތައްޔާރީތަކުގައި ވަރަށް ބުރަކޮށްކަމަށް ސަންޖޭއާއި ގާތް ފަރާތަކުން ބުނެފައިވެއެވެ. ޝޭކަރް ކަޕޫރް ޑައިރެކްޓްކުރަން ހަމަޖައްސާފައިވާ އެ ފިލްމުގެ އެއްވެސް ޚަބަރެއް ފަހަކުން ނުވިއެވެ.

ސުޝާންތުގެ މަރާއި ގުޅިގެން މިހާތަނަށް ޖުމުލަ 29 މީހަކާއި ސުވާލުކޮށްފައިވެއެވެ. އޭގެ ތެރޭގައި ސުޝާންތުގެ ލޯބިވެރިޔާ ކަމަށް ބުނާ ރިއާ ޗަކްރަބަތީއާއި ސުޝާންތުގެ އެންމެ ފަހު ފިލްމު ދިލް ބޭޗާރާ އުފެއްދި މުކޭޝް ޗަބްރާއާއި، ދިލް ބޭޗާރާގައި އޭނާގެ ކޯ-ސްޓާރ ސަންޖަނާ ސާންގީ، ޔާޝް ރާޖް ފިލްމްސްގެ ކާސްޓިންގ ޑައިރެކްޓަރ ޝަނޫ ޝަރްމާ އަދި ޕްރޮޑިއުސަރ ސަންދީޕް ސިންގ ހިމެނެއެވެ.

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: