އެއް ދުވަހަކު ވަރަށް ގާތް ރައްޓެއްސަކު ކޮފީއަކަށް ގޮސް މުޖުތަމަޢުގައި ހިނގާފައިވާ އިޖްތިމާޢީ ހާދިސާތަކެއްގެ ވާހަކަ ކިޔައިދެމުން ދިޔައެވެ. އެ ވާހަކަތަކުގެ ތެރެއިން ވާހަކައެއް ކިޔައިދޭން ފެށުމުން އުފެދުނު ޝައުޤުވެރިކަމެއްގެ ސަބަބުން އިތުރަށް އޮޅުން ފިލުވާލީމެވެ. ތިރީގައިމިވަނީ އެވާހަކަތަކުގެ ތެރެއިން އަޅުގަނޑާއި ހިއްސާކުރި އެއް ވާހަކައެވެ.

އެއީ 2000 ވަނަ އަހަރެވެ. އޭރު އަހަރެން ތަޢުލީމް ހާސިލު ކުރަމުން ދިޔައީ ގްރޭޑް 10 ގައެވެ. އަޅުގަނޑު މި ކިޔާދެނީ ކިޔަވަން އުޅުނު ދުވަސްވަރު އަޅުގަނޑު އުޅުނު ގޭގެ ކުލީ ކޮޓަރިއަކަށް އައި ދެބެންގެ ވާހަކައެވެ. އެއީ ދެބަނޑު، އެއް ބަފާ ދެބެންނެވެ. އެގެއަކީ އެޒަމާނުގައި ރާއްޖެތެރޭ ރަށެއްގައި އާދައިގެ ގެއެއް ހުންނަ ގޮތަށް ހަދާފައިވާ ގެއެކެވެ.

އެއް ދުވަހަކު އަހަރެން ގޭގައި އުޅެނިކޮށް ކުއްޔަށް ދޫކުރާ ހުސް ކޮޓަރިއެއް ހުރިތޯ ބަލަން މީހަކު އައެވެ. އެގޭގައި ކޮޓަރިއެއް ހުސްވެފައި ހުރުމުން އަޅުގަނޑު ގޭގެ ވެރިމީހާއަށް ގޮވާލީމެވެ. ގޭގެ ވެރިމީހާ އައިސް ކޮޓަރި ދެއްކުމަށްފަހު ކޮޓަރީގައި އުޅޭނީ ކޮޮންބައެއްތޯ އެމީހާ ކައިރީ އަހާލިއެވެ. “އަޅުގަނޑާއި އަޅުގަނޑުގެ ކޮއްކޮއާއި ދެމީހުން އެކަނި” ވަރަށް ކުރުކޮށް އެމީހާ ޖަވާބު ދިނެވެ. އެއަށްފަހު ކޮޓަރި ހިފުމާއި ގުޅޭ ހުރިހާ މުޢާމަލާތެއް ނިންމާލުމަށްފަހު ގެންގުޅޭ ލަގެޖްތައް ގެނައުމަށް އެ ފިރިހެން މީހާ ގެއިން ނުކުމެގެން ހިގައްޖެއެވެ.

އިރުކޮޅެއްނުވަނީސް ސަލާމް ގޮވާލާފައި ގެއަށްވަނީ އުމުރުން ދުވަސްވީ މުސްކުޅި އަންހެކެވެ. ގޭގެ ވެރިމީހާއާއި ކޮންމެވެސް ވަރެއްގެ ރައްޓެހިކަމެއް އޮންނަ އަންހެނެކެވެ. އޭނާ ގޭގެ ވެރިމީހާއަށް ގޮވާލާފައި “ދެންމެ ނުކުމެގެން އެދިޔަ މީހާއަށް ކޮޓަރި ދޫކުރީތަ؟” މިހެން އަހާލީއެވެ. ޖަވާބުގައި “އާނ” ގޭގެ ވެރިމީހާ ބުނެފިއެވެ. ގޭގެ ވެރިމީހާ އިތުރު އެއްޗެކޭ ބުނުމުގެ ކުރިން “އެދެމީހުން އުޅޭގޮތް ރަނގަޅަށް ބަލައްޗޭ” ބުނެފައި އެމީހާ ނުކުމެގެން ހިގައްޖެއެވެ. އަޅުގަނޑަށް ލިބުނީ ހައިރާން ކަމެކެވެ. އެބުނި އެއްޗެއްގެ މާނަ ފުންކަމުންނެވެ. އަހަރެން ގޭގެ ވެރިމީހާ ކައިރީގައި އެބުނީ ކީކޭހޭ އަހާލުމުން މީހުން އެކަހަލަ ވާހަކަ ދައްކާނޭ… އަޅާ ނުލާށޭ ބުނެފައި ކޮޓަރިއަށް ވަނެވެ.

ކޮޓަރިއަށް ކުއްޔަށް އައި ދެމީހުންގެ ތެރެއިން ފިރިހެން މީހާއަކީ ވަރަށް ދޮން އަދި ލޮލުގައި އައިބު ގޮތެއް ހުންނަ މީހެކެވެ. އަންހެން ކުއްޖާއަކީވެސް އޭނާގެ ބޭބެއާއި އެއްވަރަށް ވަރަށް ރީތި އަންހެން ކުއްޖެކެވެ. ގޭގެ ވެރިމީހާއަކީ އުމުރުން ގާތްގަނޑަކަށް 55 އަހަރުވެފައިވާ އަދި މީހަކާއި އިނދެ، ވަރިކޮށްފައިވާ ދަރިއަކު ނެތް އަންހެނެކެވެ.

ކޮޓަރި ހިފައިގެން އަޅުގަނޑުމެން ގެއަށް އައި ދެމީހުން އެކޮޓަރީގައި އުޅެމުންދެއެވެ. އެދެމީހުންގެ އުޅުން ހުންނަ ގޮތުން އާދަޔާއި ޚިލާފު ކަންތައްތަކެއް ފާހަގަ ކުރެވުނެވެ. އެއީ މޯބައިލް ފޯން އާންމު ޒަމާނެއް ނޫނެވެ. އެކަކު އަނެކަކާއި ގުޅާ ހަދަނީ ލޭންޑް ލައިން ފޯނުންނެވެ. ކޮޓަރީގައި އުޅޭ ދެބެންގެ ތެރެއިިން ފިރިހެން މީހާއަކީ ކޮންމެ ދުވަހަކު ހެދުނު 7 ޖަހާއިރު މާލެއާއި ކައިރީގައި އޮންނަ ރިސޯޓަކަށް ވަޒީފާއަށް ދާ މީހެކެވެ. އޭނާ އެނބުރި ގެއަށް އަންނާނީ ކޮންމެ ދުވަހެއްގެވެސް ހަވީރު 4 ނޫނީ 5 ޖަހާއިރުގައެވެ. އަދި ހުކުރު ދުވަހަކީ އޭނާގެ ޗުއްޓީ ދުވަހެކެވެ. އެދުވަހު އެއްކޮށް އޭނާ ހޭދަކުރަނީ ގޭގައެވެ. ނަމަވެސް ކޮންމެ ދުވަހަކުވެސް އެ ފިރިހެން މީހާ ގެއަށް ފޯނުކޮށްގެން އޭނާގެ އަންހެން ކޮށްކޮއާއި ވާހަކަދައްކަން އެއް ގަޑިއިރު ދެ ގަޑިއިރުވެސް ހޭދަކުރެއެވެ. މީއީ ފުރަތަމަ ފާހަގަ ކުރެވުުނު ކަންތަކެވެ. އެގޭގައި އަޅުގަނޑާއިއެކު އިތުރު ތިން ކޮޓަރީގައި ތިން ރަށުގެ މީހުން އުޅޭއިރުވެސް ހެދުން ބަދަލު ކުރުމާއި ނިދާ ގަޑީގައ ފިޔަވާ އިތުރު ގަޑިތަކުގައި ކޮޓަރީގެ ދޮރު ނުލައްޕަމެވެ. ސަބަބަކީ ގެ ތިރިވުމާއި ކޮޓަރިތައް ސީލިންގ ނުކޮށް ހުރުމުގެ ސަބަބުން ހޫނު ގަދަވުމާއެކުގައެވެ. ދޮރު ލެއްޕި ނަމަވެސް އެއްވެސް ކޮޓަރިއަކު ރޭގަނޑު ގަޑީގައި ނޫނީ ތަޅެއް ނުލާނެވެ. ހުރިހާ މީހުންވެސް އުޅުނީ އެހާ ގާތްކޮށެވެ. ނަމަވެސް އެ ފިރިހެން މީހާ ގެއަށް އައުމާއެކު އެދެމީހުން ކޮޓަރިއަށްވަދެ ތަޅުލައެވެ. އަދި ފިރިހެން މީހާ ގެއަށް އަންނައިރު ކޮޓަރި ހުޅުވާފަ ހުރެއްޖެނަމަ އެ އަންހެން ކުއްޖާއަށް ދިމާލަށް ހަޅޭލަވާ ތަޅުލައެވެ. މިއީ ދެވަނަ ކަންތަކެވެ. ތިންވަނަ ކަމަކީ ގޭގައި އުޅޭ ޓެކްސީ ޑްރައިވަރަށް އެދެމީހުން އާޓްފިޝަލް ބީޗު ސަރަހައްދުންނާއި މާލޭގެ އެކި ހިސާބުތަކުން ދެލޯބިވެރިންގެ އުސޫލުން ތަކުރާރުކޮށް ފެނުމެވެ. ހަތަރުވަނަ ކަމަކީ ގޭގައި އުޅޭ އެހެން މީހުންނަށްވެސް އެ ދެބެން މަގުމަތިން ތަންތަނަށް ދާއިރު އޮޑުކަމެއް ފާހަގަ ކުރެވުމެވެ. ސަބަބަކީ ދެބެން ތަންތަނަށް ދާއިރު ދެ ލޯބިވެރިން ދާ އުސޫލުން އަތްގުޅާލައިގެން ދިއުމާއި ގެއާއި ކައިރި ސަރަހަށްދަށް އައިސް ދެމީހުން ނުދަންނަ ދެމީހުން ފަދައިން މަގުގެ ދެފަރާތުން އައިސް ގެއަށް ވަންނަ ތަން އަވަށްޓެރިންނަށާއި ގޭގެ އެތައް ބަޔަކަށް ފެނުމެވެ.

ކަންތައްތައް މިހެން ހުރުމާއެކުވެސް އެއީ އާއިލީ ގޮތުން ވަރަށް ގާތް ދެބެން ކަމުން ގޭގެ އެއްވެސް މީހަކު މި ފާހަގަ ކުރެވޭ ކަންތައްތަކާއިމެދު އެކަކު އަނެކާއި ޚިޔާލު ބަދަލުކޮށް ނަަހަދައެވެ. ކޮންމެ މީހަކުވެސް ހިތުގައި އެކަން ބާއްވަނީއެވެ. ކަންތައްތައް ތިލަވެ، އެދެމީހުންގެ ވާހަކަ އެކަކު އަނެކަކާއި ހިއްސާކުރަން ފެށީ އެގޭގެ ކޮޓަރިއެއްގައި ކުއްޔަށް އުޅޭ ޓެކްސީ ޑްރައިވަރެއްގެ ސަބަބުންނެވެ. ޓެކްސީ ޑްރައިވަރު ކޮންމެ ރެއަކު އަންނަނީ ދަންވަރު ބާރަ ނޫނީ އެކެއް ޖަހާކަންހާއިރުއެވެ. މިދެބެންގެ ހަރަކާތް މަގުމަތިންނާއި ތަންތަނުން އެތައް ފަހަރަކު ތަކުރާރުކޮށް ފެނިފައިވުމާއެކު އެއް ރެއަކު އެދެމީހުން ނިދާ ކޮޓަރީގެ ކުޑަދޮރުގައި ޖަހާފައިވާ ލޫވަރ ގެ ތިރިން އިންނަ ހުސްތަންކޮޅުން އެ ކޮޓަރި ބަލާލިއެވެ. ކުޑަދޮރުގައި ދޮރުފޮތިގަނޑެއްވެސް ނީދެވެ. އަދި އެދެމީހުން ނިދާ ކޮޓަރިއަކީ މައި ގެއާއި ގުޅިފައި ހުރި ނަމަވެސް މައި ގޭތެރެއާއި ވަކިން ހުންނަ ކޮޓަރިއެކެވެ. މިޓެކްސީ ޑްރައިވަރުވެސް އުޅެނީ މި ކޮޓަރިއާއި ޖެހިގެން ބިއްދޮށަށް ހުރި ކޮޓަރީގައި ކަމުން އޭނާ އެރޭ ކޮޓަރި ތެރެ ބަލާލީއެވެ.

ޓެކްސީ ޑްރައިވަރަށް ކޮޓަރިތެރެ ފެނުމުން އޭނާއަށް ބޭއިޚްތިޔާރުގައި ހަޅޭލަވައި ނުގަނެވުނީ ކިރިޔާއެވެ. އާއިލީގޮތުން އެހާ ގާތް ކައިވެނި ހެޔޮނުވާ ދެމީހުންގެ ފަރާތުން ފެނުނީ ބުއްދިވެސް ޤަބޫލު ނުކުރާފަދަ ކަންތައްތަކެވެ. ޓެކްސީ ޑްރައިވަރަށް އެ ދެމީހުން ފެނުނީ ދެމަފިރިންގެ އުސޫލުން އެއްދާން ކުރަނިކޮށެވެ. ކޮންމެއަކަސް އަޅުގަނޑާއި އަދި ގޭގެ އެހެން މީހުންނާއިވެސް އެރޭ އެފެނުނު މަންޒަރުގެ ވާހަކަަތައް ޓެކްސީ ޑްރައިވަރު ހިއްސާކުރިއެވެ. އެހެން މީހުންވެސް އެ ދެބެންނާއި ބެހޭގޮތުން އެމީހަކަށް ފާހަގަވި ކަންތައްތައް އެކަކު އަނެކަކަށް ހިއްސާކޮށް އިސާހިތަކު އެ ދެބެންގެ ވާހަކަ ގޭތެރޭގައި ވަރަށް ހިޓް ވާހަކައަކަށް ވެއްޖެއެވެ.

އެރެއަށްފަހު ކޮންމެ ރެއަކުވެސް ޓެކްސީ ޑްރައިވަރު އެކޮޓަރި ތެރެއަށް ނަޒަރު ހިންގާލާފައި ނޫނީ ނިދޭ ކަމަކަށް ނުވެއެވެ. ފަަހަރުގައި ޓެކްސީ ޑްރައިވަރުގެ ވަޚްޝީ ކަމުންވެސް ވެދާނެއެވެ. ޓެކްސީ ޑްރައިވަރާއި އަޅުގަނޑުމެންނާއި ދެކެވުނު ވާހަކަތަކަށްފަހު ގޭގެ ވެރިމީހާއާއި މިވާހަކަ ހިއްސާ ކުރުމަށް ނިންމައިފީމެވެ. ގޭގެ ވެރިމީހާއަކީ ފަތިސް ނަމާދަށް ފަތިހު ތެދުވާ މީހެއްކަމުން އޭނާ އެންމެ ލަސްވެގެން ރޭގަނޑު 9 ޖާހާއިރު ކޮންމެ ރެއަކުވެސް ނިދައެވެ. އެހެންކަމުން ގޭގެ ވެރިމީހާއަށް ބޮޑު މަންޒަރު ދައްކާނީ ކިހިނެއްކަމެއް ނޭގުނެވެ. ގޭގެ ވެރިމީހާއާއި ދެކެވުނު ވާހަކަތަކަށްފަހު ބޮޑު މަންޒަރު ބަލަން ރޭގަނޑު ދަންވަންދެން ހޭލަ ހުރެފާނެ ކަމަށް ބުނެފިއެވެ. އެހެން ނަމަވެސް ގޭގެ ވެރިމީހާއަށް ކެތްކޮށްލެވުނީ އެރޭ 10:30 ހާއިރުވަންދެނެވެ. ގޭގެ ވެރިމީހާގެ އިތުރުން އަޅުގަނޑާއެކު ދެތިން މީހުން ހޭލާ އުޅޭކަން އެދެމީހުނަށް އެނގުމުން ފިރިހެން މީހާ އިރުއިރުކޮޅާ ކޮޓަރީގެ ދޮރު ހުޅުވާ ބޯ ދިގުކޮށްލާފައި ނިދާކަށް ނުވޭހޭ އަހާލައެވެ. އަދި ގޭގެ ވެރިމީހާ ދިޔަ ފަހުންވެސް އަޅުގަނޑުމެން އެގޭ ބަދިގެ ކައިރީގައި ހުރި ޖޯލިފަތީގައި ތިއްބާ ނިދާކަށް ނުވޭހޭ ދެތިން ފަހަރަކު އެހިއެވެ. އެހިސާބުން މިޝަން ކާމިޔާބު ނުވާނެކަން އެގުމުން ހުރިހާ މީހުން ދިޔައީ ނިދާށެވެ. ޖެހިގެން އައިރޭ އަޅުގަނޑާއި ގޭގެ އެހެން ކޮޓަރިއެއްގައި ހުޅޭ މީހަކު އެ ބޮޑު މަންޒަރު ބަލާލީމެވެ. ޓެކްސީ ޑްރައިވަރު ބުނީ ހަމަ ތެދެކެވެ. ޤަބޫލު ކުރަންވެސް ދަތިވިއެވެ.

އަދި އެހެން ވާހަކައެކެވެ. އަޅުގަނޑު އިންތިހާއަށް ދެރަވި ހާދިސާއެކެވެ. އެ ފިރިހެން މީހާގެ މުސްކުޅި މަންމައާއި އަދި އޭނާގެ އެއްބަނޑު އެއްބަފާ ބޭބެއަކާއި އެ ބޭބެގެ 12 ވަރަކަށް އަހަރުގެ ދަރިފުޅާއެކު ބޭސްވަރުވާއަށް މާލެ އައެވެ. އޭގެ ތެރެއިން ބޭސް ފަރުވާއަށް މާލެ އައީ އެ ފިރިހެން މީހާގެ މަންމައެވެ. އެއީ ފައިލޭރިއާ ޖެހިފައިވާ މުސްކުޅި ވަރުދެރަ އަންހެނެކެވެ. އެދެބެން ތިބޭ ކޮޓަރި އަކީ އެގޭގައިހުރި އެންމެ ބޮޑު ކޮަޓަރިވެސްމެއެވެ. ކޮޓަރީގެ ދެކޮޅުގައި ދެ ސިންގަލް އެނދު ހުންނައިރު ކޮޓަރީގެ މެދަށްވާގޮތަށް އަރިމަތީގައި އަލަމާރިއެއް ހުރެއެެވެ. ބޭސްފަރުވާއަށް އައި ފިރިހެން މީހާގެ މަންމައާއި އޭނާގެ ބޭބެގެ އަންހެން ކޮއްކޮވެސް ނިދަނީ އެކޮޓަރީގައެވެ. ނަމަވެސް އޭނާގެ ބޭބެ ނިދަނީ ފަޅުގައި އޮތް ދޯންޏެއްގައެވެ.

ޓެކްސީ ޑްރައިވަރު އަނެއްކާވެސް އެހެން ވާހަކައެއް ހިއްސާކުރިއެވެ. އެއީ ކޮޓަރީގައިހުރި ދެ އެނދުގެ ތެރެއިން އެއް އެނދުގައި އޭނާގެ މަންމަ އޮންނައިރު ކޮޓަރީގެ އަނެއް ފަރާތުގައިހުރި އެނދުގައި އޮންނަނީ އެއްކަލަ ދެބެންނެވެ. (އެ ދެއެނދުގެ ދެމެދުގެ ދުރުމިން 7 ފޫޓަށްވުރެ ދުރެެއް ނުވާނެވެ.) އަދި ތަރުފާލުގަނޑުގެ މަތީގައި ކުނާ އަޅައިގެން އެ ފިރިހެންމީހާގެ ބޭބެގެ ދަރިފުޅު އޮންނަ ވާހަކައެވެ. މީގެ އިތުރުން އެ ދެބެންގެ ތެރެއިން ފިރިހެން މީހާ އެނާގެ މަންމަ ކޮޓަރީގެ އަނެއް ފަރާތުގަހުރި އެނދުގައި އޮންނައިރުވެސް އެ ޢަމަލު ހިންގުމަށް މަސައްކަތްކުރާ ވާހަކައެވެ. ނަމަވެސް އަންހެން ކުއްޖާ ލަދުން އެކަން ނުކުރަންވެގެން ގަދަހަދާ ވާހަކައެވެ. މިވާހަކައިގެ ޙަޤީޤަތް ހޯދުމަށް އެދެބެން ގޭގައި ނެތް ވަގުތެއްގައި އެ ފިރިހެން މީހާގެ ބޭބެގެ ދަރިފުޅާއި ޓެކްސީ ޑްރައިވަރާއި އަޅުގަނޑާއި އިތުރު މީހަކު ވެގެން އެއްދުވަހެއްގައި ވާހަކަ ދެއްކީމެވެ. ޓެކްސީ ޑްރައިވަރު ބުނިގޮތަށް ވާހަކަ ދެއްކުމަށްފަހު އެއީ ތެދެއްތޯ އަހާލުމުން އެވާހަކަތައް އޭނާގެ ކައިރީގައި ނޭހުމަށާއި އަދި އެވާހަކަތައް ނުދެއްކުމަށް ތަކުރާރުކޮށް އެދުނެވެ. ޖަވާބުގައި އަޅުގަނޑުމެން އެވާހަކަތައް ހުއްޓާލާނީ އެއީ “ތެދެއް” ނޫނީ “ދޮގެކޭ” ބުނެ ކޮންމެވެސް ޖަވާބެއް ދިނުމުން ކަމަށް ބުނީމެވެ. އެންމެ ފަހުން އެ އަންހެން ކުއްޖާ ޓެކްސީ ޑްރައިވަރު އެބުނީ “ތެދެކޭ” އަހުރެމެން އެންމެން ކައިރީ އިއުތިރާފް ވިއެވެ.

ބޭސް ފަރުވާއަށް އައި މުސްކުޅި އަންހެން މީހާ ޑޮކްޓަރަށް ދެއްކުމަށް މުޅިންވެސް ދަނީ އަންހެން ކުއްޖާއެވެ. އެ މުސްކުޅި އަންހެނާގެ އުފަން ދަރިފުޅު ގޭގައި ހުރި ނަމަވެސްމެއެވެ. އެންމެ ފަހުން އެމައިމީހާއަށް ކެތް ނުކުރެވިގެން “ކަލޭ އަހަރެން ގޮވައިގެން ތިހިރަ ހޮސްޕިޓަލާއި ހިސާބަށް ނުދާން ތިއުޅެނީ އަހަރެން ފައި ފަލަ ވެފަ، ހުތުރު ވީމާހޭ؟” އޭނާގެ ދަރިފުޅާއި ދިމާލަށް ބުނެފިއެވެ. އެހެން ބުނުމާއެކު ފިރިހެންމީހާގެ ރުޅިގަނޑު ދިޔައީ ފަޅައިގެންނެވެ. ދުލަށް އައިހާ އެއްޗެއް އޭނާގެ މަންމައާއި ދިމާލަށް ގޮވާ ހެދިއެވެ. އަންހެން މީހާ ރުޔެއެވެ. އަދި އޭނާ މާލޭގައި ގިނަ ދުވަސްވާތީ ފިރިހެން މީހާ ކަންބޮޑުވެގެން އަވަހަށް ރަށަށް ދާށޭ ބުނެ ކޮންމެ ދުވަހަކު އެއްޗެހި ކިޔަން ފެށިއެވެ. އެހެންމެ ފަހުން އެ މުސްކުޅި މަންމަ، ބޭސް ފަރުވާ ފުރިހަމަނުކޮށް ފުރައިގެން ދިޔައީ އޭނާގެ އުފަން ދަރިފުޅުގެ ފަރާތުން އިވުނު ވިހަގަދަ ބަސްތަކާއެކު ހިތާމަކުރާ ހާލުގައެވެ.

އޯލެވެލް އިމްތިހާން ކައިރިވެފައި އޮއްވާ އަޅުގަނޑު ގެ ބަދަލުވާން ޖެހުނެވެ. އަޅުގަނޑު އެ ގެއިން ނުކުތް ދުވަހު އަޅުގަނޑު ދެކެ ރުޅިއައިސްގެން އެއްކަލަ ދެބެންނާއި ބެހޭގޮތުން ދެއްކި ވާހަކަތައް އަޅުގަނޑު ބުންޏޭ ކިޔައިގެން އެދެމީހުންގެކައިރީގައި ދެއްކިކަން އަހަންނަށް އެނގުނީ އެގެއިން ނުކުމެގެން އެހެން ގެއަކަށް ބަދަލުވިތާ ހަފުތާއެއް ފަހުންނެވެ. އަދި އެ ދެބެންވެސް އެ ދެބެންގެ ސިއްރު އެޖެންޑާގެ ކަންތައްތައް ގޭގެ ހުރިހާ މީހުންނަށް އެގޭކަން ކަށަވަރުވުމުން އެހެން ގެއަކަށް ބަދަލުވިއެވެ.

އޭގެ އެއް އަހަރު ފަހެވެ. މަގުމަތިން އެއްކަލަ އަންހެން ކުއްޖާއާއި ދިމާވެގެން އަޅުގަނޑު އިސްވެ ގޮވާލާ ހާލު އަހުވާލު އޮޅުންފިލުވާ ހަދާލީމެވެ. އޭނާ ވަރަށް ލަދުން ހުރެ މިިހާރު އެހެން ގެއަކަށް ބަދަލުވި ވާހަކައާއި ހާލު ރަނގަޅު ވާހަަކަ ކިޔާދިނެވެ. ދުވަސްތައް ފާއިތުވަމުން ގޮސް އޭގެ ދެ އަހަރެއްހާ ދުވަސް ފަހުން އެއްކަލަ ދެބެންގެ ކައިރިއަށް އަންނަ އެމީހުންގެ ތިމާގެ އަންހެން ކުއްޖަކާއި ދިމާވިއެވެ. އެއަންހެން ކުއްޖާއާއި އަޅުގަނޑާއި ދެމީހުން ދެއްކި ވާހަކަތަކުގެ ތެރެއިން އެއްކަލަ ދެބެންގެ ހާލު ކިހިނެއްހޭ އަހާލުމުން އޭނާ ވަރަށް ރުޅި އައިސްފައި ބުންޏެވެ. “އެ އަންހެނާ އެންމެ ފަހުން ބޮނޑިބޮައިފި. އޭނާގެ ބޭބެގެ ދަރިއަކަށް ބަނޑު ބޮޑުވެ، އޭނާގެ މަންމަ ކައިރިއަށް އައްޑޫއަށް (އަސްލު އަތޮޅެއް ނޫން) ހިގައްޖެ” މިއީ އެދެމީހުންނާ ބެހޭގޮތުން އަހަންނަށް އެންމެ ފަހުން ލިބުނު މަޢުލޫމާތެވެ. އަދި މިހާތަނަށްވެސް އެދެމީހުންކުރެ މީހަކު ލޮލުންވެސް ނުދެކެމެވެ.
…………………………..

ލިޔުންތެރިޔާގެ ފުރަމަލަ

އަޙްމަދު ނާފިޢު
ޢިބްރަތްތެެރި ވާހަކައާއި ބަހާއި އަދަބުގެ ޢިލްމީ ލިޔުންތައް ނާފިޢު ލިޔާނެއެވެ.

ގުޅުންހުރި ލިޔުން: