އެކްސެލް އެންޓަޓެއިންމެންޓްގެ ރިތޭޝް ސިދުވާނީއާއި ފަރްޚާން އަޚްތަރު ޕްރޮޑިއުސްކޮށް، ޒޯޔާ އަޚްތަރު ޑައިރެކްޓްކޮށް ގެނެސްދިން “ޒިންދަގީ ނާ މިލޭގީ ދޮބާރާ” ރިލީޒްކުރިތާ މިއަދަށް 9 އަހަރު ވީއެވެ.

ރިތިކް ރޯޝަން، އަބޭ ޑެއޯލް، ފަރްހާން އަޚްތަރް، ކެޓްރީނާ ކެއިފް އަދި ކަލްކީ ކޮއެޗްލިން މައިގަނޑު ރޯލުތައް ކުޅުނު މި ފިލްމަކީ 2011 ވަނަ އަހަރުގެ ބޮލީވުޑް ބޮކްސް އޮފީހުގައި 5 ވަނައަށް އެންމެ ބޮޑު އާމްދަނީއެއް ހޯދި ފިލްމެވެ. ސުޕަހިޓެއްގެ ދަރަޖަ ލިބިފައިވާ މި ފިލްމުގެ ލަވަތަކަކީ ފިލްމު ނުކުތް ދުވަސްކޮޅު ވަރަށް މަޝްހޫރުވި ލަވަތަކެކެވެ. ފިލްމުގެ ލަވަތަކަށް ޝަންކަރް-އެހްސާން-ލޯއީ މިއުޒިކް ތައްޔާރުކޮށްދީފައިވާއިރު ލަވަތަކުގެ ޅެން ހަދައިދީފައިވަނީ ޒޯޔާ އަޚްތަރްގެ ބައްޕަ ޖާވިދު އަޚްތަރެވެ.

މި ހިތްގައިމު ފިލްމަށް 9 އަހަރު ފުރުމާއި ގުޅިގެން ފިލްމުގެ ތަރިން ވަނީ މީސްމީޑިއާގައި އެމީހުންގެ ޝުޢޫރުތައް ފާޅުކޮށް ފިލްމުގެ ހަނދާންތައް އާކޮށްފައެވެ. މިފަހަރު މި ބަލައިލަނީ މި ފިލްމާއި ބެހޭގޮތުން މީހުންނަށް ނޭނގޭ ނުވަތަ މާ އާންމު ނޫން ބައެއް ވާހަކަތަކަށެވެ.

 

* ރިތިކް މި ފިލްމު ކުޅުނީ ސުޒާންގެ ސަބަބުން

ރިތިކް މި ފިލްމު ކުޅުނީ އޭނާގެ އޭރުގެ އަންހެނުން ސުޒާން ޚާން ބާރު އެޅުމުގެ ސަބަބުންނެވެ. ފިލްމު ފެށޭއިރު ސުޒާންއަށް ކްރެޑިޓް ދީފައިވަނީ އެހެންވެއެވެ.

 

* ޓޮމާޓޯ ފެސްޓިވަލް

“ދަ ޓޮމެޓީނާ ފެސްޓިވަލް” ޝޫޓްކޮށްފައިވަނީ އޮފް ސީޒަންގައި ކަމަށް ވުމުން ޓޮމާޓޯތައް ގެނައީ ޕޯޗުގަލްއިންނެވެ. އެބައި ޝޫޓްކުރުމަށް 16 ޓަނުގެ ޓޮމާޓޯ ގެނައެވެ.

 

* ފިލްމުގެ ނަން

“ޒިންދަގީ ނާ މިލޭގީ ދޮބާރާ”އަށް ފުރަތަމަ ކީ ނަމަކީ އެއީއެއް ނޫނެވެ. ފިލްމަށް ފުރަތަމަ ދިން ނަމަކީ “ރަނިންގ ވިތު ދަ ބުލްސް”އެވެ.

 

* ފުރަތަމަ ހޮވުން

ރިތިކް ރޯޝަންއާއި އަބޭ ޑެއޯލް ކުޅުނު އަރްޖުންއާއި ކަބީރްގެ ރޯލު ފުރަތަމަ ހުށަހެޅީ ރަންބީރް ކަޕޫރާއި އިމްރާން ޚާންއަށެވެ. އެކި ސަބަބުތަކާއި ހެދި އެ ދެ ތަރިން ފިލްމު ދޫކޮށްލުމުން ރިތިކާއި އަބޭއަށް ފިލްމު ހުށަހެޅީއެވެ.

 

* ފަރްހާންގެ ކެރެކްޓަރ

އިމްރާންއަކީ އުސް ތަންތަން ދެކެ ބިރުގަންނަ މީހެކެވެ. ފިލްމުގައި ވައިގެ ތެރޭގައި ނަގާފައިވާ މަންޒަރުތަކެއް ހިމެނެއެވެ. އެ ރޯލު ކުޅުނު ފަރްޚާން އަޚްތަރަކީ ސެޓްފިކެޓް އޮތް ސްކައި ޑްރައިވަރެކެވެ.

 

ތިން އެކުވެރިން ސްޕެއިނަށް ކުރާ ދަތުރެއްގެ ތެރޭގައި ހިނގާ އެކި ހާދިސާތައް ދައްކުވައިދިން މި ފިލްމަކީ ބަލައިލަން ވަރަށް ހިތްގައިމު ފިލްމެކެވެ.

ލިޔުންތެރިޔާގެ ފުރަމަލަ

ސާޖިދު ޢަބްދުﷲ
ސާޖިދު ޢަބްދުﷲ
މުނިއަވަސްގެ ޑެޕިއުޓީ އެޑިޓަރ ސާޖިދު އަކީ ވާހަކަ ލިޔުމުގެ އިތުރުން ޚަބަރު ލިޔުމުގައިވެސް ހުނަރުވެރި ލިޔުންތެރިއެކެވެ.

ގުޅުންހުރި ލިޔުން: