އެރެޔަކީ ބަރެސްދޫގައި އެންމެފަހުން ބޮޑުމާލޫދަށް ކައްކާފައި އޮތް ރެޔެވެ. ބަރެސްދޫގެ ކުދިބޮޑު އެންމެން ވަނީ އެރެޔަށް ފުރިހަމައަށް ތައްޔާރުވެފައެވެ. އެރެއަށްޓަކައި ޚާއްސަ މާލޫދު ހަރުގެޔެއްވަނީ އަޅާފައެވެ. ދަނޑިފަނުންނެވެ. އާންމުކޮށް ހަރުގެ އަޅާ ގޮތާ ޚިލާފަށް މި ހަރުގެއަށް ވަނުމަށް ދޮރު ކަނޑައިފައިހުރިކަމުގައިވަނީ ހަރުގޭގެ އެއްކޮޅުގައެވެ.

ކެއުމުގެ ގަޑިޖެހުނު އިރު ރަށުގެ އެންމެންތައް ހަރުގެޔަށް ޖަމާވެ ކެއިމަށް އަރައިފިއެވެ. ކެއުމަށް އިންސާފުކުރަންފަށާ ހަރުގެތެރެ ހޭލަމޭލަވެގެން ދިޔަ ވަގުތު އެއްކޮޅުން ވަދެވޭގޮތަށް ހުރި ހަރުގޭގެ ދޮރުމައްޗަށް ރަތްހާލެއް އަރާ “ކައްކަކާކޯ” އޭ ގޮވާލައިފިއެވެ. އެވަގުތު ކޮންމެވެސް މީހަކު “ކަލޯ ވިސް ބަލާން ނުހުރެ ކަންނާ ކާން އުމާށޭ” (ކަލޯވެސް ބަލާން ނުހުރެ ކަންޏާ ކާން އަންނާށޭ) ގޮވާލައިފިއެވެ. ދެނަކާދެނެއް ނެތެވެ. ހާލެއްގެ ސިފައިގައި ހުއްޓަކަސް ދޮރުމަތީގައި މިހުރީ އަކީ ހާލެއްނޫނެވެ. މިނިކާ ފުރޭތައެކެވެ. އެ ސޮރުގެ އަތުގައި ފުރަތަމަ ޖެހުނު މީހާ ފުރަތަމަ ކާލައިފިއެވެ. އެއާއެކު މުޅިތަން ރުއިމާއިހަޅޭކުގެ އަޑުން ގުގުމާލައިފިއެވެ. ހާލެއްގެ ސިފައިގާހުރި ފުރޭތަ އެއްކޮޅުން ފެށިގެން އަތުޖެހުނު މީހެއް ޝިކާރަކުރަމުން އަނެއްކޮޅަށް ދެވުނު އިރު ހަރުގޭތެރޭގައި ދިރޭ ފުރާނައެއް ނެތެވެ. އެމީހަކަށް ވެވުނުގޮތަކުން އެގޮތަކުން މިގޮތަކުން ސަލާމަތްވެވޭތޯ އުޅެގެން ނުކުމެވުނީ މަދު ބަޔަކަށެވެ. ހަރުގެ ހުސްވުމުން އެސޮރު ދިމާކޮށްލީ ރަށުތެރެއަށް ފިލަން ދުވިމީހުން ފަހައެވެ. އެދިޔަމަގުމަތީ އެސޮރަށް ފެނުނީ ކޮށާވަޅިއަކުން ކާށިއުކުރައިގެން ކާންއިން މުސްކުޅިދައިތައެކެވެ. ކޮންމެ ކާށި ފޮތްޗެއް ހަފައިލަނީ ވަޅީގެ ކޮޅަށް ކާށިކޮޅު ހަރާލުމަށްފަހު، އަނގައިގެތެރެއަށް ވަޅިލައި ދަތުން ކާށިކޮޅު ވަކިކޮށްލައިގެންނެވެ. ފުރޭތައަށް މިމަންޒަރު ފެނުމުން ހީވީ އެދައިތަ ކަމުން ދިޔައީ ދަގަނޑު ކަމަށެވެ. އެހެންވެ އެސޮރުވެސް ބިރުގެންޖެވެ. ގަތްބިރުން “ދަގަނޑަ މިއަލަނި ކަން ދައިތޭ މަ ނުކައްޔެ” (ދަގަނޑު މިއަލަނި ކާ ދައިތަ މަނުކާތި) އޭ ގޮވަމުން ފުރޭތަވެސް ރަށުން ފައިބައިގެން ހިނގައްޖެއެވެ. ފުރޭތައިގެ ކިބައިން ސަލާމަތްވި މަދުމީސްކޮޅަކަށް އިތުރަށް ރަށުގައި މަޑުކުރާކަށް ނުކެރުނެވެ. އަނެއްކާވެސް އެފުރޭތަ އަރައިފާނެކަމަށް އޮތް ބިރެއްގެ ބޮޑުކަމުން މިމީސްކޮޅު ރަށުން ފައިބައިގެން ގޮސް ދިރިއުޅެން ފެށީ ކައިރީގައި އޮތް ކަޅައިދޫގައެވެ.

މިވާހަކައިގެ އެކި ރިވާޔަތްތަކުގައި ކުދިކުދި ތަފާތު ހުރެއެވެ. ނަމަވެސް މައިގަނޑު ގޮތެއްގައި ވާހަކަ އެއްގޮތެވެ. އަޅުގަނޑު ކުރިއްސުރެ އަހާގޮތަކީ މިއީއެވެ.

ފޮޓޯ: https://damonhellandbrand.artstation.com

ލިޔުންތެރިޔާގެ ފުރަމަލަ

ޠާހާ އަބޫބަކުރު
ތާރީޚީ ހޯދުުންތައް ހޯދައި ތާރީޚް ލިޔުމާއި ދިވެހި ބަހާއި ބަހުގެ އަދަބިއްޔާތުގެ ލިޔުންތަކަކީ ޠާހާ ގެ އެންމެ ފާހަގަ ކޮށްލެވޭ ދާއިރާ އެވެ.

ގުޅުންހުރި ލިޔުން: