ލިޔުންތެރިންނަކީ އެމީހުންގެ ގަލަމުގެ ތުނޑު ބޭނުން ކޮށްގެން އެހެން މީހުންގެ އިޙްސާސްތަކާއި ނުހަނު ފަސޭހަ ކަމާއި އެކު ކުޅެލާ ބަޔެކެވެ. އެހާ ވެސް ލިޔުންތެރިކަމަކީ ބާރުގަދަ ހަތިޔާރެކެވެ. ލިޔުންތެރިކަމުގެ ޢާއިލާގެ ތެރޭގައި ވަރަށް ގިނަ މެމްބަރުން ތިބެއެވެ. ނަމަވެސް އެހުރިހާ މެމްބަރުންގެ ތެރެއިން ވެސް ވާހަކަ ލިޔުމުގެ ހުނަރަކީ ކޮންމެ ކޮންމެ މީހަކަށް ލިބިފައިވާ ހުނަރެއް ނޫނެވެ. އެއީ ޤުދުރަތުން ބައެއް މީހުންނަށް ދެއްވައިފައިވާ “ބޯން ޓެލެންޓެކޭ” ވެސް ބުނެވިދާނެއެވެ.

އެގޮތުން އަޅުގަނޑުމެންގެ މި ލިޔުން މި ޚާއްޞަ ކޮށްލަނީ، ވާހަކަ ލިޔުމުގެ ދާއިރާއިން ކުރިއަރަމުން އަންނަ ޒުވާނަކަށެވެ. އެތައް ކިޔުންތެރިންގެ ހިތްތައް، އެ ލިޔުންތެރިޔާގެ ހުށިޔާރު ކަމުން ކަތިލަމުންދާ ހުނަރުވެރި ލިޔުންތެރިއަކަށެވެ. އާނއެކެވެ. އެއީ ވާހަކަ ލިޔުންތެރިޔާ އިބްރާހިމް ޒިހުނީއެވެ. ހުރިހާ ކިޔުންތެރިންގެ ނަމުން ނަމަ “ޒެލް” އެވެ.

ފ. ބިލެއްދުއަށް އުފަން، އުމުރުން 24 އަހަރުގެ ޒިހުނީ އަކީ، ވާހަކަ ކިޔުންތެރިންގެ މެދުގައި މިހާރު މަޤުބޫލު ނަމެކެވެ. “އެހަނދާންތަކުގައި” މި ނަމުގައި ހަވީރު އޮންލައިންގެ ވާހަކަ މުބާރާތަށް ލިޔުނު ވާހަކައަށް ފަހު، ޒިހުނީ މިވަނީ ވާހަކައިގެ ދުނިޔެއަށް ލޯ ހުޅުވިފައެވެ. ކުރީގެ ދިރިއުޅުން ދައްކުވައިދޭ ލޯބީގެ، އަސަރުގަދަ ހާދިސާއެއްގެ މައްޗަށް ބިނާކޮށް ލިޔެފައިވާ “އެހަނދާންތަކަކީ” ޒިހުނީގެ ހަނދާންތައް ވާހަކައިގެ ޢާލަމުގައި ފުހެވިގެން ނުދާނެ ފުރަތަމަ ބިންގަލެވެ.

އުމުރުން ގާތްގަނޑަކަށް 15 އަހަރުގައި ވާހަކަ ލިޔުމަށް ޒިހުނީ ޝައުޤުވެރިކަން އުފެދިގެން ދިޔައީ އޭނާގެ ތުއްތަ ވާހަކަ ލިޔެ އުޅޭތަން ފެނިގެން، އެކަމަށް އުފެދުނު ލޯތްބެއްގެ ސަބަބުންނެވެ.

ޒެލް ލިޔެފައިވާ ބައެެއް ވާހަކަތަކުގެ ކަވަރ

“ތުއްތަ އޭރު ވަރަށް ވާހަކަ ލިޔާނެ. ވަރަށް ގިނައިން ފެނޭ އެހެން ވާހަކަ ލިޔެ އުޅޭ ތަން ވެސް. ދެން ސުކޫލުން ވާހަކަ ލިޔަން ހަވާލު ކުރީމަވެސް، ތުއްތަ ވަރަށް ހެލްޕް ވާނެ. އެގޮތަށް ތުއްތަ ލިޔާތަން ފެނިފެނި ޝައުޤުވެރިކަން އުފެދުނީ އަސްލުގަ ވާހަކަ ލިޔަން.” ޒިހުނީ މުނިއަވަސްއަށް ކިޔައިދިނެވެ.

މިހާތަނަށް އައި އިރު، ޒިހުނީ ވަނީ އޭނާގެ ގިނަ އަދަދެއްގެ ކުރު ވާހަކަތަކެއް ކިޔުންތެރިންނަށް ދޫކޮށްލާފައެވެ. ކޮންމެ ވާހަކައަކުން ވެސް ތަފާތު، އެތައް މެސެޖެއް ކިޔުންތެރިންނަށް ދަނީ ޒިހުނީގެ ވާހަކަތަކުން ލިބެމުންނެވެ. ޒިހުނީގެ ގިނަ ވާހަކަތައް ހުންނަނީ ވެސް އިޖުތިމާޢީ ބޮޑެތި މައްސަލަތަކުގެ މައްޗަށް ބިނާ ވެފައިކަން ފާހަގަކުރެވެއެވެ. އެގޮތުން، މައިންބަފައިން އުފުލަމުންދާ ހިތާމައާއި، އެއްޖިންސުން ގުޅުން ހިންގުމުގެ ނުބައި ކަމާއި، ބަދުއަޚުލާޤީ އަމަލުތަކުން ނުކުންނަ ނޭދެވޭ ނަތީޖާތަކާއި، އަންހެނުންނާއި، ފިރިހެނުންނަށް ލިބޭ ތަފާތު އަނިޔާ ތަކުގެ ވާހަކަތައް ވެސް ޒިހުނީގެ ވާހަކަތަކުގައި ވަރަށް އަސަރުގަދަކޮށް، ލޮލުން ކަރުނަ ހިލޭ ވަރަށް ގެނެސްފައި ހުރެއެވެ. އެގޮތުން ފާހަގަކޮށްލެވޭ ވާހަކަތަކުގެ ތެރޭގައި، މީ ލޯބިހޭ؟، މައިވަންތަ ލޯބި، ސްޓްރީކް ފަދަ ވާހަކަތައް ފާހަގަކޮށްލަމެވެ.

Listening to Kiss on #lavafoshi
https://on.lavafoshi.mv/albums/1261
Kiss on Lavafoshi
Lavafoshi is Maldives’ first music streaming service that gives you access to more than half a century of music.
on.lavafoshi.mv

 

ޙަޤީޤީ ހާދިސާތަކަށް ލިޔެފައިވާ ވާހަކަތަކަކީ، ގިނަ ބަޔަކު ލޯބި ކުރާ ކަހަލަ ވާހަކަތަކެވެ. ޒިހުނީ ލިޔުނު ޙަޤީޤީ ވާހަކައެއް ކިޔައިފިން ހެއްޔެވެ؟ ނުކިޔާ ކަމަށް ވާނަމަ، “އެހަނދާންތައް ނުފިލާނޭ”، “ދުނިޔެ ދޫކުރީ މަންމަގެ ލޯތްބޭ” ކިޔާލާށެވެ. ޙަޤީޤީ ވާހަކަތައް ވެސް ޒިހުނީ ގެނެސްދީފައި ވަނީ ނުހަނު ފުރިހަމަ ކޮށެވެ. ހިތުގެ ހިމަ ނާރަށް ވެސް އަސަރުކުރާނެވެ. ގިނަ އަދަދެއްގެ ޙަޤީޤީ ހާދިސާތަކެއް ވެސް ޒިހުނީ މިހާ ހިސާބަށް އައި އިރު ވަނީ ގެނެސްދީފައިކަން އަޅުގަނޑުމެން ފާހަގަކޮށްލަމެވެ.

ވާހަކަ ލިޔުމުގެ ދާއިރާއިން ފާހަގަކޮށްލެވޭ ކާމިޔާބީ ތަކެއް ވެސް ޒިހުނީ ވަނީ ހޯދާފައެވެ. އެގޮތުން ސަން އޮންލައިން، ހަވީރު ފަދަ ސައިޓުތަކުން ހިންގި ވާހަކަ މުބާރާތުން ޒިހުނީ ވަނީ އެއް ވަނަ ހޯދާފައެވެ. “ހަހުރަޔާ” ” ކަލަކުވޭ ބިރުވެތިވޭ” ފަދަ ވާހަކަތައް މި ފުރުޞަތުގައި ފާހަގަކޮށްލާނަމެވެ.

އަދި ނިމުނީއެއް ނޫނެވެ! ސިލްސިލާ ވާހަކަތައް ލިޔުމުގައި ވެސް ޒިހުނީ އަކީ ލަޔާޤަތާއި ޤާބިލިއްޔަތުކަން ހުރި މޮޅު ލިޔުންތެރިއެކެވެ. “ބަޑި” އަދި “ވެވުނީ ލޯތްބޭ ޔާރު ހުވާ” މި ދެ ސިލްސިލާ ވާހަކަ އަކީ މިހާރު ވެސް ވާހަކަ.ކޮމް ސައިޓަށް ޒިހުނީ ޝާއިއު ކުރަމުން އަންނަ 2 ސިލްސިލާ ވާހަކައެވެ. ކިޔުންތެރިންގެ ވަރަށް ބޮޑު ތަރުޙީބެއް މި ދެވާހަކައަށް ވެސް އަންނަނީ ލިބެމުންނެވެ. އެގޮތުން މި ދެ ސިލްސިލާ ވާހަކަތަކުގެ ވިއުސް ލައްކައިން ގުނާލެވެއެވެ.

“ބަޑި ވާހަކައަކީ ޙަޤީޤަތަށް ބުނަންޏާ ވަރަށް ބޮޑު މަސައްކަތެއް. ވަރަށް ރަނގަޅު، ވަރުގަދަ މެސެޖެއް މިވާހަކައިން މުޖުތަމަޢުއަށް ލިބިގެން ދާނެ. މިވާހަކައަކީ ޙަޤީޤީ އެތައް ކަމެެއް ހިމަނައިގެން ގެނެސްދޭ ވާހަކައެއް. އެތައް ބޮޑެތި ޗެލެންޖެސްތަކާ އެކީ މިވާހަކަ މި ކުރިއަށް ދަނީ ވެސް. ކިޔުންތެރިންގެ ހިތްވަރުމީ އަސްލު. ބަޑި ވާހަކަ އަކީ 2 ސީޒަންއަކަށް ބަހާލެވިފައިވާ ވާހަކައެއް. ދެ ސީޒަން ވެސް އެއްކޮށް ލިޔެ ނިމިފަ އޮތީ. ސީޒިން 1 ވަރަށް އަވަހަށް އަޕްކޮށް ނިމޭނެ.” ސިލްސިލާ ވާހަކަ “ބަޑި”އާ ބެހޭ ގޮތުން ޒިހުނީ ކިޔައިދިނެވެ.

ޒިހުނީގެ ސިލްސިލާ ވާހަކަ “ވެވުނީ ލޯތްބޭ ޔާރު ހުވާ” އަކީ ވެސް ވަރަށް ކާމިޔާބު ވާހަކައެކެވެ. އެތައް ގިނަ ކިޔުންތެރިންނެއް ދެން އަންނަ އެޕިސޯޑަަކަށް ނޭވާ ހިފަހައްޓާލައިގެން މިވާހަކަ ކިޔަމުންދާކަން ޒިހުނީގެ ވާހަކަ ވައިބާރ ގުރޫޕް، އަދި ވާހަކައަށް ލިބިފައިވާ ކޮމެންޓުތަކަށް ބަލައިލުމުން އެނގެއެވެ. ޢާއިލާގެ ތެރޭގައި ހިނގާ އެތައް ކަންތައްތަކާއި، ލޯބީގެ ތަފާތު ހާދިސާތަކެއްގެ މައްޗަށް ބިނާކޮށް ލިޔެފައިވާ މިވާހަކައިގައި ހިތް ތެޅޭ އެތައް ހާދިސާތަކެއް ހުރުމާއި އެކު، ކިޔުންތެރިންގެ ލޯބި މިވާހަކައަށް ވަނީ ވަރަށް ބޮޑަށް ލިބިފައެވެ.

އެހެން ގިނަ ލިޔުންތެރިންނާއި ޚިލާފަށް ޒިހުނީއަކީ ކިޔުންތެރިންނާއި ވެސް ވަރަށް ގުޅޭ ލިޔުންތެރިއެއްކަން އަޅުގަނޑުމެންނަށް ފާހަގަކުރެވެއެވެ. އެގޮތުން ކިޔުންތެރިންނަށް ކޮންމެ ވަގުތަކު ވެސް، ސީދާ ލިޔުންތެރިޔާއާ ވާހަކަދެއްކޭ ގޮތަށް ވައިބާރ ގުރޭޕެއް ވެސް ޒިހުނީ ގެންދަނީ ހިންގަމުންނެވެ. އަދި މީގެ އިތުރުން ޒިހުނީ ގެންދަނީ އޭނާގެ ވާހަކަތައް ވައިބާރ ކޮމިޔުޓީ އެެއް ކަމުގައިވާ “ވާހަކަ ބައި ޒެލް” މެދުވެރިކޮށް އެތައް ކިޔުންތެރިންނަށް ފޯރުކޮށްދެމުންނެވެ. ޒިހުނީގެ ފޭސްބުކް ޕޭޖު “ޒެލް” އިން ވެސް ޒިހުނީގެ ވާހަކަތައް ކިޔުންތެރިންނާއި ހަމައަށް ޒިހުނީ ގެންދަނީ ޙިއްޞާ ކުރަމުންނެވެ.

Join “Vaahaka Maalan- By Zel” ❤️
Keep in touch ❤️🔥
https://invite.viber.com/?g2=AQByyplJ8XB5Z0vD571MwoSEPZsauDBK6EQn6mOZ6qPG50FTageLSYymGXbfFMkk

ޒިހުނީގެ ވާހަކަތައް ލަވަ ފޮށިން އަޑު އަހާލެވޭކަން އެނގޭ ހެއްޔެވެ؟ ގާތްގަނޑަކަށް މިވަގުތު ވެސް ޒިހުނީގެ 5 ވާހަކައެއް ލަވަފޮށިން އަޑު އަހައިލެވޭނެއެވެ. “ކިސް” ، “99” އާއި “ޤުރުބާންވީމޭ” ފަދަ ވާހަކަތަކަކީ ގިނަ ބަޔަކު ލަވަ ފޮށި މެދުވެރިކޮށް އަޑު އަހާފައިވާ ވާހަކަތަކެކެވެ.

“ފެމިލީ ވަރަށް ސަޕޯރޓިވް. ވަރަށް ހިތްވަރު ލިބޭ. ދެން ވާހަކަ.ކޮމްއަށް ވެސް ވަރަށް ބޮޑަށް ޝުކުރިއްޔާ. އަސްލު އެ ސައިޓު މެދުވެރިވެގެން އަޅުގަނޑުގެ ވާހަކަތައް ގިނަ ބަޔަކަށް ވާސިލް ވެގެން މި ދިޔައީ. އެ ސައިޓުގެ ހިންގުންތެރިންގެ ވެސް ވަރަށް ބޮޑު އެއްބާރުލުމެއް ލިބޭ. ދެން ކިޔުންތެރިންނަކީ އަޅުގަނޑުގެ ވާހަކަތަކުގެ ހިތް ކަމަށް މިބަލަނީ. ކިޔުންތެރިންނަކީ ވަރަށް ލޯބި ބައެއް. ވަރަށް ބޮޑު ތަރުޙީބެއް ދޭނެ.” ޒިހުނީ މުނިއަވަސް އަށް ޙިއްޞާ ކުރިއެވެ.

ދިރާގުގެ ކަސްޓަމާރ ސާރވިސްގައި ސުޕަވައިޒާރ އެއްގެ ގޮތުގައި މަސައްކަތް ކުރަމުން އަންނަ ޒިހުނީ ވަނީ ރާއްޖޭގެ ގިނަ ސައިޓުތަކަށް ވާހަކަ އާއި ތަފާތު ލިޔުންތައް ލިޔެދީފައެވެ. މިހާރު މުނިއަވަސްގައި ލިޔުންތެރިއެއްގެ ގޮތުގައި ހަރަކާތްތެރި ވަމުން އަންނަ ޒިހުނީ އަކީ އިޖުތިމާޢީ މައުޟޫއު ތަކަށް ގަލަން ހިނގާ ކުޅަދާނަ ލިޔުންތެރިއެކެވެ.

“މުނިއަވަސްއަކީ އަޅުގަނޑު ވަރަށް ލޯބިވާ ސައިޓެއް. އަޅުގަނޑުގެ އާރޓިކަލްސްތައް މުނިއަވަސްއިން ފެންނާނެ.” ޒިހުނީ މުނިއަވަސްއާ މެދު ދެކޭ ގޮތް ޙިއްޞާ ކުރަމުން ބުންޏެވެ.

ޒިހުނީގެ ވާހަކަ ލިޔުމުގެ ހުނަރުވެރިކަމުގެ ވާހަކަ އަކީ ދައްކާ ނިމޭނެ ވާހަކައެެއް ނޫނެވެ. އެތައް ގޮތަކުން ބެލިޔަސް، ޒިހުނީގެ ވާހަކަތައް ރީތި ވެފައި ފުރިހަމައެވެ. ގިނަ ކިޔުންތެރިންގެ ހިތްތަކުން، ޒެލްގެ ވާހަކަތަކުގައި ގެނެސްދީފައި ހުންނަ ސިފަކުރުންތައް ކުރެހިގެން ދަނީ އެހެން ވެގެންނެވެ. ވާހަކައިގެ ދުނިޔޭގައި ޒިހުނީ (ޒެލް)ގެ ނަން ހަމަ ރަނގަޅަށް ވެސް މިދަނީ ރަން އަކުރުން ލިޔެވެމުންނެވެ. ޒިހުނީގެ ލިޔުމުގައި ބޭނުން ކުރާ ފަށުވި ބަސްތަކުން ، ކިޔުންތެރިންގެ ހިތްތައް މިދަނީ “ކަތިލެވެމުންކަން” ޔަޤީންނެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: