’ޓިކްޓޮކް’ގެ ދިވެހި ރަސްގެފާނު، އިބްރާހިމް ޝާއިފް (ޑެވިލް ޝާއިފް) އާއި ކުރިއަރަމުން އަންނަ ބަޠަލާ ޢާއިޝަތު ލަހުފާ (ލަހޫ) ކައިވެނީގެ ގޮށުން ބަނދެވިފައިވާކަން ފުރަތަމަ ފަހަރަށް މީޑިއާއަށް ހާމަކޮށްފިއެވެ. ޒުވާން މި ޖޯޑު، ކައިވެނިކުރީ މި އަހަރު ޖޫން މަހު 01 ވަނަ ދުވަހުއެވެ.

ޝާއިފް އާއި ލަހޫގެ ކައިވެނީގެ ޚަބަރު މީޑިއާއަށް އާއްމުނުކޮށް ލަސްކޮށްލީ ކޮވިޑް-19ގެ ސަބަބުން އެމީހުން ޕްލޭންކުރި ގޮތަށް ކަންތައްތައް ނުދިއުމުން ކަމަށް މުނިއަވަސް އަށް ލަހޫ ބުންނެވެ.

“ރައްޓެހިވިތާ އަހަރު ނުވަނީސް މެރީކުރީ. އެންޑް ވީ ޑިސައިޑެޑް ޓު މެރީ މެއި 01 ގަ އެކަމަކު ޑިއު ކޮރޯނާ ވީ ކުޑްންޓް ޑޫ އެނީތިންގ ވީ ޕްލޭންޑް.” ލަހޫމެން ޕްލޭންކުރި ގޮތަށް އެއްވެސް ކަމެއް ނުދިޔަކަން ހާމަކުރަމުން ބުންޏެވެ.

ލަހޫ އާއި ޝާއިފުގެ ވެޑިން ފޮޓޯ ޝޫޓްގެ ތެރެއިން

ކޮވިޑް-19ގެ މި ހާލަތުގައި އޮންލައިންކޮށް ގިނަ ކައިވެނިތަކެއް ކުރަމުން އަންނަ އިރު، ލަހޫ އާއި ޝާއިފު ކައިވެނި ކުރީވެސް ވީޑިއޯ ކޮންފަރެންސް މެދުވެރިކޮށް އޮންލައިންކޮށެވެ.

“މެރީކޮށްފަ ސަޕްރައިޒެއް ދޭންވެގެން އުޅުނީ އެންމެނަށް. އެކަމަކު ޕްލޭންކުރި ގޮތަށް ކަންތައްތައް ނުދިޔައިމަ ޕަބްލިކް ނުކޮށް މި އުޅެނީ” މީގެ ހަފުތާއެއް ކުރިން މުނިއަވަސް އަށް ލަހޫ ބުންޏެވެ. ލަހޫ އެހެން ބުނީ ކައިވެނީގެ ފޮޓޯ ޝޫޓްގެ ފޮޓޯތަކާއެކު ލަހޫ އާއި ޝާއިފުގެ ފޭނުންނަށް މުނިއަވަސް މެދުވެރިކޮށް މި ޚަބަރާއެކު ފޮޓޯތައް ދައްކައިލުމަށް ކެތްމަދުވެފައި ހުރެއެވެ. އެހެންކަމުން މިއަދު މިއޮތީ އެވަގުތު އައިސް ޖެހިފައެވެ.

ލަހޫ އާއި ޝާއިފުގެ ވެޑިން ފޮޓޯ ޝޫޓްގެ ތެރެއިން

މިއަދަކީ ލަހޫ އާއި ޝާއިފުގެ ކައިވެންނަށް 03 މަސް ފުރޭ ދުވަހެވެ. އެމީހުން ކައިވެނިކުރީ ގޭގައި ތިބެ ވީޑިއޯ ކޮންފަރެންސް މެދުވެރިކޮށެވެ. ކައިވެނީގެ ރަސްމިއްޔާތުގައި ބައިވެރިވީ ވަލީވެރިޔާ، ގާޒީގެ އިތުރުން ލަހޫ އާއި ޝާއިފުއެވެ. ރަން ކިއީ 42 ރުފިޔާއަށެވެ.

މިހާރު ފިލްމުތަކުން ފެންނަން ފަށާފައިވާ ޝާއިފު އާއި ލަހުފާ އަކީ ބޮޑު ފޭން ބޭސްއެއް އޮންނަ ދެ ތަރިންނެވެ. ވަކިން ޚާއްޞަކޮށް ޓިކްޓޮކްގައެވެ.

ލަހޫ އެންމެ ފުރަތަމަ މަސައްކަތްކުރީ ފިލްމު “ކޮސް ގިނަ މިސްޓޭކް” ގައެވެ. ދެވަނައަށް މަސައްކަތްކުރީ ނިޢުމާ މުޙައްމަދުގެ ބިރުވެރި ފިލްމު “ކަޅަކި” ގައެވެ. އޭގެ ފަހުންވެސް ދެ ޕްރޮޖެކްޓެއް ލިބުނުނަމަވެސް އެ ފުރުސަތުތައް ދޫކޮށްލީ ވަގުތު ދެވެން ނެތިގެން ކަމަށް ލަހޫ ބުންޏެވެ.

އާއިޝަތު ލަހުފާ މުޙައްމަދު (ލަހޫ) ކުޅެނީ މަލިކާގެ ކެރެކްޓަރ – ފޮޓޯ: ކޮސް ގިނަ މިސްޓޭކް

މިހައިތަނަށް އައިއިރު، ޝާއިފު ވަނީ ވެބް ސީރީޒް “އެހެނަސް” އާއި “ހުވާ” އިން ފެންނަން ފަށާފައެވެ. މީގެ އިތުރުން ‘އައި ފިލްމްސް’ގެ ދެވަނަ ފީޗާ ފިލްމު “ނީނާ” ގައި މުހިންމު ރޯލަކުން ޝާއިފު ފެނިގެންދާނެއެވެ. މީގެ އިތުރު، އެހެން ފިލްމެއްގައި ޝާއިފް މިވަގުތު އަންނަނީ މަސައްކަތް ކުރަމުންނެވެ. ނަމަވެސް އެއީ ސަޕްރެއިޒެއްގެ ގޮތުގައި ޝާއިފު އާއި ލަހޫ ބާއްވަން ބޭނުންވާ ފިލްމެއްކަމުން އިތުރު މަޢުލޫމާތެއް ނުދެއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: