ޑާކް ރެއިން އެންޓަޓެއިންމެންޓުގެ ބިރުވެރި ފިލްމު ”ބަޅިނދު“ މިއީ ތަފާތު ވާނެ ފިލްމެއްކަން، ފިލްމުގެ ނަމުން، ފިލްމުގެ ޑައިރެކްޓަރުގެ ނަމުން ވެސް އެނގިގެން ދެއެވެ. ފިލްމު “4426”ގެ މޮޅު މަސައްކަތްތަކުގެ ފަހަތުގައި ހުރީ މި ފިލްމުގެ ޑައިރެކްޓަރެވެ. ފިލްމު “ގޮށްރާޅު”ގެ ވަރުގަދަ މަސައްކަތުގެ ފަހަތުގައިވެސް ހުރީ މި ފިލްމުގެ ޑައިރެކްޓަރ އަޙްމަދު ޝިނާނު އެވެ.
ފިލްމު ”ބަޅިނދު“ އުފެއްދުމުގެ މަސައްކަތްކުރާ މަންޒަރުތަކެއް ދައްކައިދޭ ވީޑިއޯ އެއް މިއަދު ޑާކް ރެއިން އެންޓަޓެއިންމެންޓުން ވަނީ ރިލީޒްކޮށްފައެވެ. ވީޑިއޯ ރިލީޒްކުރަމުން އެ ޕްރޮޑަކްޝަނުން ބުނީ މިއީ ރާއްޖޭގެ ފިލްމީ ތާރީޚްގައި ބައިނަލްއަޤްވާމީ އޯކެސްޓްރާއަކުން ފިލްމެއްގެ ބެކްގްރައުންޑް ސްކޯ ހަދާ ފުރަތަމަ ފިލްމު ކަމަށެވެ. މިކަމީވެސް މި ފިލްމުން ފެނިގެންދާނެ ބޮޑު ތަފާތެކެވެ.
މި ފިލްމުގެ ބެކްގްރައުންޑް ސްކޯ ރެކޯޑްކޮށްފައިވަނީ ބަލްގޭރިއާގެ ސޯފިއާގައެވެ. ސްކޯ ކޮމްޕޯސްކުރީ ދިވެހި މިއުޒީޝަނެއް ކަމަށްވާ ފަތުހުﷲ ޝަކީލެވެ. އޭނާއަކީ މިވަގުތު ބަލްގޭރިއާގައި ފިލްމު ސްކޯރިންގ އިން މާސްޓާރޒް ފުރިހަމަކުރަމުން އަންނަ ދަރިވަރެކެވެ.
ފިލްމު ”ބަޅިނދު“ އުފެއްދުމުގެ މަސައްކަތްތައް ދައްކައިލާ ވީޑިއޯއިން ފެންނަނީ ތަފާތު، ބުރަ އަދި އެހާމެ ކަވި މަސައްކަތްތަކެއް ކުރެވެމުން އަންނަ ތަނެވެ. ފިލްމަށް ތަފާތު ސެޓެއް ތައްޔާރުކުރާ މަންޒަރުތަކެއް ފެންނައިރު، ބައެއް ކަހަލަ ޕްރޮޕްސް ތަކެއް ތައްޔާރުކުރާ ތަން ވެސް ފެނިގެން ދެއެވެ. އޯނަމެންޓް ޕްލާސްޓަރ ޝީޓަކަށް އިސްކުރުޖަހައި، ދުވަސްވެފައިވާ ކަން ދައްކާ ކަހަލަ ގޮތަށް ކުލަލާ މަންޒަރު ފެނިގެންދަނީ ބަލްގޭރިއާގެ އޯކެސްޓްރާ ގްރޫޕްގެ ބެކް ސްކޯ މިއުޒިކް ހުށައަޅައިދޭ މަންޒަރުތަކާއި އެކީގައެވެ.
އާދަޔާޚިލާފު ބެކްގްރައުންޑް ސްކޯގެ އަޑާއެކު، ވަރުގަދަ ފޮށްޓެއް ނުވަތަ ދޮރުފަތެއްގައި ދެ ފަޅިއަށް ހުރި އޯނަމެންޓް ޝީޓުގައި ވަރުގަދަ ތަޅެއް ލާފައިހުރި އިރު އޭގެ ތެރޭގައި ”ބަޅިނދު“ ގައި ފޮރުވިފައިވާ ގިނަ ކަންތައްތަކެއް ވާނެކަން ޔަޤީންކުރެވެއެވެ.
ފިލްމު ”ބަޅިނދު“ މިއީ ޒުވާން ލިޔުންތެރިޔާ ހޫދު އިބްރާހިމް ލިޔެފައިވާ ސްކްރީންޕްލޭ އަކަށް ހަދާ ފިލްމެކެވެ. ހޫދަކީ ޑާރްކް ރެއިން އެންޓަޓެއިންމެންޓުން އިއުލާންކޮށްފައިވާ “ކައިވެނީގެ އަމާޒު”ގެ ވެސް ސްކްރީން ރައިޓަރެވެ.
ފިލްމުގެ މަންޒަރުތައް ކެމެރާކޮށް ޑައިރެކްޓްކުރަނީ އަޙްމަދު ޝިނާނު އެވެ. ޕްރޮޑިއުސަރުންނަކީ ޢާއިޝަތު ފުޢާދު ތަޢުފީޤް އާއި މުޙައްމަދު ޢަލީ (މޮގާ) އެވެ.
”ބަޅިނދު“ މިއީ ޑާކްރެއިންގެ 14 ވަނަ ފިލްމެވެ.
ލިޔުންތެރިޔާގެ ފުރަމަލަ
މި ލިޔުންތެރިޔާގެ ބައެއް އެހެން ލިޔުންތައް
- 29 ޑިސެމްބަރ 2024ޚަބަރު“ރޯމްދުނިޔެ” އިން އީސިމް ނެގުން ދިވެހީންނަށް މާ ސަޅިވާނެ!
- 27 ޑިސެމްބަރ 2024ޚަބަރުޑާކް ރެއިން އިން މިފަހަރު “ފެށުމާއި ނިމުން”
- 24 ޑިސެމްބަރ 2024ޚަބަރުނިޝާ އާރްޖޭއަކަށް!
- 20 ޑިސެމްބަރ 2024ޚަބަރު“ސޮރީ” ގެ މަންޒަރެއް!
އިންތިޒާރު ކުރެވެނީ ސިނަމާއަށް ބަޅިނދު އަންނާނެ ދުވަކަށް