އައިއޯއެސް14 އަށް އެޕަލް ޑިވައިސް އަޕްޑޭޓްކޮށްފިން ހެއްޔެވެ؟ އިއްޔެގެ ވަގުތެއްގައި އައިއޯއެސް އަޕްޑޭޓް އާއްމުކޮށްފައިވާއިރު، އެންމެ ބޮޑު ބަދަލަކަށް ހިމެނެނީ އެޕްތައް މެނޭޖްކުރުމަށާއި ހޯމް ސްކްރީން ކަސްޓަމައިޒްކުރެވޭ ގޮތްތަކަށެވެ. މީގެ އިތުރުން އެޕްލިކޭޝަން ލައިބްރަރީއަށް ގެނެސްފައިވާ ބަދަލުވެސް ފާހަގަކޮށްލެވެއެވެ. މީގެ އިތުރުންވެސް ގިނަ އައު ފީޗާރސްތަކެއް ހިމަނާފައި ވެއެވެ.
ފޯނަށް އައިިއޯސް14 އެޅުމަށްފަހު، ފާހަގަ ކުރެވޭނެ ސަޅި 06 ފީޗާއަކަށް ބަލައިލާނަމެވެ.
1- މީހުންނަށް ޓެކްސްޓް ކޮންވަޒޭޝަން ޓެގްކުރެވޭ
އެޕަލްއިން އައިމެސެޖް ކޮންވަޒޭޝަން ގްރޫޕްކޮށް ކުރެވޭގޮތް ހެދުމަށް މިފަހަރުގެ އަޕްޑޭޓްގައި ވަރަށް ބޮޑު އަހައްމިއްޔަތުކަމެއް ދީފައިވެއެވެ.
މިގޮތުން ވައިބަރ ފަދަ އެޕްލިކޭޝަންތަކުގައި ޗެޓްކުރާއިރު އެހެން މީހުންގެ ސަމާލުކަން ހޯދުމަށް މީހަކަށް ޓެގް ކޮށްލެވޭނެ ފީޗާއެއް ހިމަނާފައިވެއެވެ. ހަމަ އެފަދަ ފީޗާއެއް މިހާރު އައިފޯނުގައިވެސް ވަނީ ހިމަނާފައެވެ.
މިކަން ކުރަނީވެސް ހަމަ ވައިބަރގައިވެސް ކޮންވަޒޭޝަން ޓެގްކުރާ ގޮތަށެވެ. މެސެޖަށް ރިޕްލައި ކުރުމަށްޓަކައި ރިޕްލައިކުރަން ބޭނުންވާ މެސެޖަށް އިރުކޮޅަކު ފިއްތައިލައިގެން ހުރުމުން ރިޕްލައިކުރެވޭގޮތް ވާނެއެވެ.
2- މެސެޖްތަކުގައި ހުންނަ ކޮންވަޒޭޝަންތައް މެސެޖްތަކުގެ އެންމެ މައްޗަށް ޕިންކުރެވޭ
މެސެޖްތަކުގެ އެންމެ މައްޗަށް ކޮންވަޒޭޝަނެއް ޕިންކުރެވޭގޮތް ވުމަކީ ހަމަ ގައިމުވެސް ފޯނުގައި ހުންނަ މެސެޖްތަކުން މުހިންމު މެސެޖްތައް ހޯދުމަށް ފަސޭހަވެގެން ދާނެ ކަމެކެވެ. އެގޮތުން އެންމެ މުހިންމު މެސެޖްތައް އެންމެ މައްޗަށް ޕިންކޮށްލެވޭނެއެވެ.
ބޭނުންވާ މެސެޖެއް، މެސެޖްތަކުގެ އެންމެ މައްޗަށް ޕިންކޮށްލުމަށްޓަކައި އެ ބޭނުންވާ މެސެޖްގައި އިނގިލި ޖައްސައި މައްޗަށް ސްވައިޕްކޮށްލާށެވެ.
3- އެޕަލްގެ އަމިއްލަ ޓްރާންސްލޭޝަން އެޕެއް މިހާރު ހިމެނޭ
ގޫގްލް ޓްރާންސްލޭޓް އެޕް ބޭނުންކުރުމުގެ ބަދަލުގައި، އައިއޯސް14 އާއި އެކު އައިސްފައިވާ ޓްރާންސްލޭޝަން އެޕް މިހާރު ބޭނުންކޮށްލެވޭނެއެވެ. އިނގިރޭސި، މަންޑަރިން ޗައިނީސް، ފްރެންޗް، ޖާރމަން، ސްޕެނިޝް، އިޓާލިއަން، ޖެޕެނީޒް، ކޮރެއަން، އަރަބިކް، ޕޯޗްގީޒް އަދި ރަޝަން ލޭންގުއޭޖަށް (ބަހަށް) ޓެކްސްޓް ތަރުޖަމާ ކޮށްލެވޭނެއެވެ.
ތަރުޖަމާ ކުރުމަށް ދެ ގޮތެއް ހިމެނެއެވެ. ތަރުޖަމާކުރަން ބޭނުންވާ ލަފުޒެއް ނުވަތަ ބަސް ފީންޏެއް (ފްރޭޒް) ޓައިޕްކޮށްލައިގެން ނުވަތަ މައިކްރޯންފޯން އައިކަންއަށް ފިއްތައިލާ ވޮއިސް-ޓު-ޓެކްސްޓް ފީޗާ ބޭނުންކޮށްލެވިދާނެއެވެ.
4- މާ ބޮޑަށްވެސް ތަރުތީބުކޮށްލެވިފައިވާ ހޯމް ސްކްރީނެއް އެޕް ލައިބްރަރީގައި ހިމެނޭ
އެންޑްރޮއިޓް ފޯނުތަކުގައި ހުންނަ ފަދަ އެޕް ޑްރޯވަރއެއް ހުރުމަށް އެދެން ހެއްޔެވެ؟ މިހާރު ‘އެޕް ލައިބްރަރީ’ގެ ނަމުގައި އެ ފީޗާ އައިއޯސް14 އިން ލިބޭނެއެވެ.
އެޕް ލައިބްރަރީ ހުންނާނީ ހޯމް ސްކްރީނުގެ ކަނާތްފަރާތުގައެވެ. ސްވައިޕްކޮށްލައި އެޕް ލައިބްރަރީ ސްކްރީނަށް ވަދެވޭނެއެވެ. އެޕްތަކުގެ ކެޓަގަރީތަކަށް ބަލައި އޮޓޯމެޓިކުން އެޕްތައް ތަރުތީބުކުރެވިފައި ހުންނާނެއެވެ. އެހެންކަމުން އެޕްލިކޭޝަނެއް ހޯދައިލުމަށް އިތުރު ފަސޭހަކަމެއް ލިބިގެންދާނެއެވެ. މަދުން ބޭނުންކުރާ އެޕްތައް ހިމެނޭ ސްކްރީނު ހައިޑްވެސް ކޮށްލެވޭނެއެވެ.
ހޯމް ސްކްރީނުން ފެންނަން ނުހުންނަ އެޕެއް ހޯދުމަށް އެޕް ލައިބްރަރީ ސްކްރީނަށް ވަންނާށެވެ. ކަނާތުން ވާތަށް ސްވައިޕްކޮށްލުމުން އެކަން ކުރެވޭނެއެވެ. އޮޓޯމެޓިކުން ތަރުތީބުކޮށްލެވިފައިވާ ފޯލްޑަރތައް ބަލައިލައިގެން ނުވަތަ ސާރޗް ބާރގައި ސާރޗްކޮށްލައިގެން ބޭނުންވާ އެޕެއް ހޯދޭނެއެވެ.
5- ވިޖެޓްތަކަށް ‘ނިއު ލުކެއް’ އަދި ‘ނިއު ހޯމް’ އެއް
އެންޑްރޮއިޑް ފޯނެކޭ އެއްފަދައިން އައިފޯނުގެ ހޯމް ސްކްރީނުން ވިޖެޓްތައް ފެންނަން މިހާރު ހުންނާނެއެވެ. ސީނެޓުން ތައްޔާރުކޮށްފައިވާ އެނިމޭޓް އިމޭޖުން މި ފީޗާ ވަރަށް ސާފުކޮށް ދައްކާލާފައިވެއެވެ.
6- ޕިކްޗަރ އިން ޕިކްޗަރ ފީޗާރ
އައިޕެޑްގައި ޕިކްޗަރ އިން ޕިކްޗަރ މޯޑުގައި ވީޑިއޯ ބަލައިލެވޭނެއެވެ. މިސާލަކަށް ހޯމް ސްކްރީނުގައި އިނދެ ވީޑިއޯ ބަލައިލެވޭނެއެވެ. މި ފީޗަރ މިހާރު މިވަނީ އައިއޯސް14 އާއި އެކު އައިފޯނަށްވެސް ދީފައެވެ.
މަސްދަރު: ސީނެޓް
ލިޔުންތެރިޔާގެ ފުރަމަލަ
