ޅެންވެރިކަމުގެ އަސާސީ ހުނަރު ދަސްކޮށްދިން ތިލަ އުތުރު މަލަސްގެ ކްލާސްތައް ނިންމާލައިފި

ޅެންވެރިކަމުގެ އަސާސީ ހުނަރު ހިލޭސާބަހަށް ދަސްކޮށްދިނުމަށް ން ޢީޝާ ޝަރީފު ކުރިޔަށް ގެންދެވި ކްލާސްތަކުގެ ނިމުން ރޭ ފާހަގަ ކޮށްފިއެވެ. މި އޮންލައިން ބެޗްގެ ކިޔަވައިދިނުން ކުރިޔަށްގެންދެވީ އޭނާ ފުވައްމުލަކަށް ކުރައްވާ ދަތުރުމަތީގައި ގއ. ދާންދޫގައި ހުންނަވައިގެންނެވެ.

ސްކޫލުތަކުގެ ދަރިވަރުންނާއި ޓީޗަރުނާއި ޕްރިންސިޕަލުން އަދި ބެލެނިވެރިންނަށް އަމާޒު ކުރައްވައިގެން ޢީސާ ޝަރީފް ކުރިޔަށް ގެންދެވި މި ކްލާސްތަކުގައި ހއ. ސްކޫލްތަކުގެ އިތުރުން ރާއްޖޭގެ އެކި ކަންކޮޅުތަކުން 48 ސްކޫލަކާއި އެމް.އެން.ޔޫއިން 230 އަށް ވުރެ ގިނަ ދަރިވަރުން ބައިވެރިވެފައިވެއެވެ. މި ކްލާސްތައް ކުރިޔަށް ގެންދަވާފައިވަނީ އޮކްޓޯބަރު 21ން 25 އަށް ޒޫމް މެދުވެރިކޮށް އޮންލައިންކޮށެވެ.

އީއޯޕީން ކުރިޔަށް ގެންދެވި މި ކްލާސްތަކުގެ ނިންމުމުގެ ރަސްމިއްޔާތު ޝަރަފްވެރި ކޮށްދެއްވީ މަޝްހޫރު ޝާއިރު އަދި ޤައުމީ އަރުޝީފުގެ ޑިރެކްޓަރ ޖެނެރަލް މުޙައްމަދު ޢާމިރު އަޙްމަދު (ފަރެސް) އެވެ. ބައިވެރިންނާ މުޙާޠަބު ކުރައްވާ ޢާމިރު ވިދާޅުވީ…. “ވިލިއަމް ޝެކްސްޕިއާރ ވިދާޅުވެފައިވާ ފަދައިން ނިމިގެންދާ ކޮންމެ އެއްޗަކީ، އަންނާންއޮތް އެއްޗެއްގެ ނަކަލު. އެހެންކަމުން މިރޭ ނިމިގެން މިދާ ކޯހަކީ އަންނަންއޮތް މާ އުފާވެރި އިލްމާއި އަދަބާ ޅެންވެރިކަމާ ފަށުވި ފަންނުގެ ދުވަސްތަކެއްގެ މުޤައްދިމާ ކަމުގައި އަޅުގަނޑު ދެކެން. މި މުޤައްދިމާއިން ފެށިގެން ކުރިޔަށްދާނެ މުޅިން އާ ޅެންވެރި ޖީލެއްގެ ހިތްފަސޭހަ ޚިދުމަތްތަކަށް އުއްމީދު ކުރަން….. މިރޭ ތިޔަ ބައިވެރިން އަވަހާރަފުޅު ލައްޕަވާނީ ޅެންވެރިކަމުގެ އަސާސީ ތަމްރީނު ލިބިވަޑައިގެން ތިއްބެވި ޙައިޞިއްޔަތާއެކު. އެ ޙައިޞިއްޔަތާއެކު މިރޭ ފޮނިފޮނި ހުވަފެންތައް ދެކެވަޑައިގަންނަވާ. އަދި މުޅިން އަލަށް އަލިވިލޭ ފަތިހަކަށް ހޭފުޅުލައްވައި ޅެންވެރިކަމުގެ އާ ޙަޔާތެއް ފައްޓަވާ.”

މި ހިތްވަރުގެ ބަސްފުޅުތަކަށްފަހު ވިދާޅުވީ، މި މަރުޙަލާއަށްފަހު ދެން ދާންއޮތީ، ފުރާ ފުރިހަމަވެ، ޤާބިލުކަން އިތުރު ކުރުމުގެ ހަރުފަތްތައަ ކަން ވެސް އޭނާ ފާހަގަ ކުރެއްވިއެވެ.

މިރަސްމިއްޔާތުގައި ކޯހުގެ އުސްތާޛު ޢީސާ ޝަރީފު ވިދާޅުވީ، ސްކޫލްތަކުގެ ދަރިވަރުންނަށް ޅެންވެރިކަމުގެ އަސާސީ ހުނަރު ދަސްކޮށްދޭ ކުލާސްތައް ހިންގުމަކީ، ރާއްޖޭގެ ކަންކޮޅުތަކަށް ޅެންވެރިކަން ފެތުރުމަށް އީއޯޕީން ކުރަމުންދާ މަސައްކަތުގެ އެންމެ މުހިންމު އެއްބޮޅު ކަމަށެވެ.

“ވޭތުވެދިޔަ މަހެއްހައި ދުވަހުގެތެރޭ ތަފާތު 68 ސްކޫލެއްގެ ދަރިވަރުންނާއި ބެލެނިވެރިންނާއި ޓީޗަރުން އަދި ޕްރިންސިޕަލުން ހިމަނައި އެކި ކަންކޮޅުތަކުން މިހައި ތަނަށް 675 ދަރިވަރަކު މަލަސްގެ މި ކޯޯސްތަކުން އެކަނިވެސް ތަމްރީނު ކުރެވިފައިވޭ. ….. މިރޭގެ މި ހަފުލާ އެންމެ ޚާއްޞަވެގެންދާ އެއް ސަބަބަކީ މި ސިލްސިލާގެ އެންމެ ދަރިވަރުން ގިނަ ޕްރޮގްރާމު ވަރަށް ކާމިޔާބުކަމާއިއެކު ނިންމާލެވިއްޖެ ކަމުގެ ޔަޤީންކަން ލިބިގެން މިދާދިއުން….. އަލްޙަމްދުލިﷲ ޝުކުރު… މީ ކޮންފަދަ ބޮޑު ކާމިޔާބީއެއްތޯ؟’ ރަސްމިއްޔާތުގެ ނިމުން ފާހަގަކުރުމަށް ބޭއްވި ސެޝަންގައި ޢީސާ ޝަރީފް ވިދާޅުވިއެވެ.

ޢީސަގެ ވާހަކައިގައި އެހީތެރިކަންދެއްވި އެންމެހައި ފަރާތްތަކަށް ޝުކުރު އަދާ ކުރެއްވިއެވެ. “ޚާއްޞަކޮށް އަޅުގަނޑު ވަރަށް ކުއްލި ގޮތަކަށް ދަންނަވައިލި ދަންނަވާލުމަކަށް ހއ. އަތޮޅު ތަޢުލީމީ މަރުކަޒުގެ ޕްރިންސިޕަލް އަޚު، އަލްފާޟިލް ޢަބްދުﷲ ނާހިދު އެ ކޮށްދެއްވި ބުރަމަސައްކަތުން މިބުރު މީ މިހައިތަނަށް އެންމެ ގިނަ ދަރިވަރުން އެއްފަހަރާ ކިޔެވި އެއް ކޯސްކަމުގައި ހައްދަވައިދެއްވައިފި. މީ ނުހަނު ބޮޑު ޝަރަފެއް. މިއަގުބޮޑު ފުރުޞަތު، އަޅުގަނޑަށް އާދެ! އީއޯޕީއަށް ހޯއްދަވައި ދެއްވުމީ އީއޯޕީ އަށް އޭނާ ކޮށްދެއްވި އަގުއަދާ ނުކުރެވޭނެ ބޮޑު ޚިދުމަތެއް.. އެކަމަށްޓަކައި ހިތުގެ އެންމެ ފުންމިނުން ނާހިދު ސާރއާއި އޭނާގެ ޓީމަށް ވަރަށް އިޚުލާޞްތެރި ޝުކުރެއް ދަންނަވަން.” ޢީސަ ފާހަގަ ކުރެއްވިއެވެ.

މިރަސްމިއްޔާތުގައި ބައެއް ދަރިވަރުންނާއި ޓީޗަރުން، އަދި ޕްރިންސިޕަލުން ވާހަކަފުޅު ދެއްކެވިއެވެ. އެބޭފުޅުން ވަނީ، ޢީސަގެ މި އަގުނުކުރެވޭ ޚިދުމަތް ވަރަށް އިޚްތިރާމާއެކު ބަލައިގަންނަ ކަމަށާއި އެކަމަށްޓަކައި ނިހާއީ ޝުކުރެއް ޢީސަ އަށް ދަންނަވައިފައެވެ.

“މި ޕްރޮގްރާމްގައި އެކިކަންކޮޅުތަކުން ބައވެރިވެވަޑައިގެންނެވި ޓީޗަރުން ޢީސަ ސާރގެ އެ ކިޔަވައިދެއްވުމުގައި ބޭނުންކުރެއްވި ކެތްތެރިކަމާއި އުކުޅުތަކުން ޢިބުރަތް ޙާޞިލްކުރައްވައި ދަރިވަރުންނަށް އުނގަންނައި ދެއްވުމުގައި އެ ބެހެއްޓެވިފަދަ ގާތްކަމެއް ބެހެއްޓެވުމަކީ ކޮންމެހެން ބޭނުންތެރި ކަމެއް.” ހއ. އަތޮޅު ތަޢުލީމީ މަރުކަޒުގެ ޕްރިންސިޕަލް އަލްފާޟިލް ޢަބްދުﷲ ނާހިދު ވިދާޅުވިއެވެ.

ސްކޫލުތަކުގެ ދަރިވަރުންނަށް އަމާޒުކޮށްގެން ޢީސަ ހިންގެވި ފުރަތަމަ ކްލާސްތައް ކުރިޔަށް ގެންދަވާފައިވަނީ ނިމިދިޔަ އޮގަސްޓުމަހުގެ 18 އިން 26 ށް “ތިލަދެކުނު މަލަސް” ގެ ނަމުގައި ހދ. އަތޮޅުގައެވެ. މި ބުރުގައި ހދ. އަތޮޅުގެ 10 ސްކޫލަކުން 125 ދަރިވަރުން ބައިވެރިވެ ޅެންވެރިކަމުގެ އަސާސީ ހުނަރުތައް ދަސްކޮށްފައިވެއެވެ. އޭގެފަހުން “އީއޯޕީ މަލަސް2” ގެ ނަމުގައި 14 ސްކޫލަކުން 278 ބައިވެރިންނާއިއެކު ކާމިޔާބު ބޮޑު ޕްރޮގްރާމެއް ހިންގާފައި ވެއެވެ.

މިރޭ ފުވައްމުލަކު ސްކޫލް މަލަސްގެ ނަމުގައި 145 ބައިވެރިންނާއެކު ހަމަ މި ޕްރޮގްރާމްގެ އާ ކްލާސްތަކެއް ފަށާނެކަމަށް ޢީސަ ވިދާޅުވިއެވެ. މި ކްލާސްތަކުގައި ފުވައްމުލަކުގެ ހުރިހައި ސްކޫލަކާއި ޅ. ހިންނަވަރު އަތޮޅު ތަޢުލީމީ މަރުކަޒުގެ ދަރިވަރުންނާއި ބެލެނިވެރިން އަދި ޓީޗަރުންނާއި ޕްރިންސިޕަލުން ބައިވެރި ވާނެކަމަށް އީއޯޕީ އިން ވިދާޅުވެއެވެ.

އީއޯޕީގެ ކުރިޔަށް އޮތް ހަފުތާގެ މަސައްކަތައް ބަލާއިރު މިމަހުގެ 30 ވަނަދުވަހު ފުވައްމުލަކު ސިޓީކައުންސިލާއި ގުޅިގެން ޢީސާ ޝަރީފު ސީދާ އެރަށަށް ވަޑައިގެން އާންމުންނަށް ބާއްވާ ޅެންވެރިކަމުގެ އަސާސީ ކޯހެއް އެރަށު “ކުރުނދުނާ މާލަމް”ގައި ފެށުހުމަށް ހަމަޖެހިފައިވެއެވެ. މި ޕްރޮގްރާމްގެ މެއިން ސްޕޮންސާރ އަކީ ” ރޯޒްލައިން” އެވެ. މިއީވެސް ހިލޭސާބަހަށް އާންމުންނަށް ކުރިޔަށް ގެންދާ 6 ދުވަހުގެ ކޯހެކެވެ.

“އެ ކޯހަކީ 90 ވަރަކަށް ބައިވެރިންނަށް ދެ ދަންފަޅިޔަކަށް ބަހާލައިގެން ކިޔަވައިދޭ ބޭސިކާއި އިންޓަރމީޑިއޭޓް އެއްކޮށް ކިޔަވައިދެވޭ ތަންކޮޅެއް ފެންވަރު ރަނގަޅު ކޯހެއް. ހަވީރު 4 ޖަހާއިރު އަދި ރޭގަނޑު 8:30ގައި ކްލާސްތައް ފެށުމަށް ހަމަޖެހިފައި ވަނީ ފުވައްމުލަކު ” ކުރުނދުނާ މާލަމް”ގައި……. މިހާރު އަޅުގަނޑު މިހުރީ ގއ. ދާންދޫގައި. އެއީ ފުވައްމުލަކަށް ދިއުމަށްޓަކައި. މާދަމާ ހަވީރު ފްލައިޓުން އައްޑޫއަށް ގޮއްސައި ހޯމަދުވަހު ފުވައްމުލަކަށް ދާން ހަމަޖެހިފައިވަނީ ލޯންޗްގައި” ކުރިއަށް އޮތް ކޯސްތަކުގެ މަޢުލޫމާތު ހިއްސާކުރައްވަމުން އީސަ ހާމަކުރެއްވިއެވެ.

މިފަދަ ބުރަމަސައްކަތެއް މިހައި އުނދަގޫ ދަނޑިވަޅެއްގައިވެސް އަމުދުން ހިލޭސާބަހަށް ކުރެއްވުމުގެ ބޭނުމަކީ ކޮބައިތޯ ކުރެވުނު ސުވާލަށް އީސާ ޝަރީފު ވިދާޅުވީ މިއީ ގެއްލެމުން ހީނަރުވަމުން ދާ ދިވެހި އަދަބިއްޔާތުގެ އެންމެ މުހިންމު ބަހާ ކަމުގައިވާ ޅެންވެރިކަމަށް އަންނަންއޮތް ޖީލު ހޭލައްވައި ޝަޢުޤުވެރި ކުރުވުމުގެ މަޤުޞަދުގައި އީއޯޕީއިން ވަރަށް ބުރަކޮށް ކުރުމަށް ނިންމާފައިވާ ބޮޑު އެހެނަސް ވަރަށް ބޭނުންތެރި ޤައުމީ މަސައްކަތެއްކަމަށެވެ. މި މަސައްކަތުގެ ތެރެއިން އޮންލައިންކޮށް ރާއްޖެއަށް ފުރަތަމަ ޅެންވެރިކަން ކިޔަވައިދޭން ފެއްޓެވީވެސް މީގެ އަހަރެއްހައި ދުވަސްކުރީން ހަމަ އީއޯޕީ އިންނެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.

ގުޅުންހުރި ލިޔުން: